٠٣‏/٠٣‏/٢٠٠٧

كلب هيتحاكم وكلب اتحبس طب الإخوان علاقتهم إيه بدم المسيحيين؟

طبعا كما هو واضح من العنوان إن البوست دا يبدو إنه سمك لبن تمر هندي
إحتمال برضه... وإيه المشكلة؟

الفكرة بس إن فيه مجموعة أفكار في دماغي أو بالأصح مجموعة أخبار عايز أكتب عنها كلها ومش عايز أسيب حاجة منها من غير ما أتكلم فيها

نبدأ بأول خبر وأهمهم - من وجهة نظري

بعد ساعات من دلوقت وتحديدا في العاشرة من صباح اليوم (السبت 3 مارس 2007 يعني) ستجرى محاكمة الكلب الشاذ اللي اغتصب عماد الكبير بعصاية مقشة

الضابط المجرم ده إسمه إسلام نبيه



ودا واد عربجي دلوعة بابا وماما

وأبوه راجل مدير أمن سابق يبدو إنه ما عرفش يربي إبنه كويس فالولد طلع زي ما شفناه في الفيديو الشهير حيوان سادي مفكر نفسه فوق البشر ومفكر إن القانون هو البلطجة والوساخة

طبعا نتذكر جيدا إزاي الولد السافل ده كان بيشتم شتايم أبيحة للمواطن الغلبان عماد الكبير ودا يدل على التربية الوسخة اللي اترباها

المهم
الواد إسلام نبيه المجرم ده هيتحاكم بكرة قدام محكمة جنايات الجيزة بدار القضاء العالي الساعة عشرة الصبح

ولازم كلنا نكون موجودين عشان نقول للقضاء "العادل الشامخ" إننا كلنا عماد الكبير

مصر كلها عماد الكبير



وحق مصر وشرفها مش هنسكت عليه

والقضية قضيتنا والعرض اللي انتهك هو عرضي وعرضك وابو عماد الكبير اللي مات بحسرته هو أبويا وابوك

زي ما دماغ ماك قال... دا يوم مهم جدا في حياة كل واحد فينا

وزي ما شرقاوي قال إن حق عماد الكبير لازم يرجعله وإن حق عماد يشبه حق شرقاوي نفسه أو جزء من حقه


من يرد لعماد حقه المسلوب؟؟؟

بجد خلوا بكرة في المحكمة يكون يوم نحتشد فيه لرد شرف مصر الضايع

نتقابل هناك
================

الموضوع التاني

فاكرين كليب القفا؟

أيوة المواطن الشاب إيهاب مجدي اللي اتصور بالفيديو وهو بينضرب على قفاه في قسم إمبابة



الظابط اللي أمر بضربه واسمه كريم عبد الله فارس أخد براءة

ليه بقى؟

عشان الواد إيهاب مجدي (المحبوس في تهمة سرقة حاليا) رفض يشهد بالزور ويقول إنه شاف الظابط كريم بعينه ودا طبعا عشان كان مدي ضهره للظابط أثناء ما أمين الشرطة أحمد عبد الفتاح كان بيضربه على قفاه

إيهاب أكد إن الصوت هو فعلا صوت الظابط كريم ولكن المحكمة "ثبت لها أن كريم أفندي بريء"!!! أما الكلب أمين الشرطة - اسمه أحمد عبد الفتاح بالمناسبة - اللي ضرب إيهاب على قفاه فده أخد سنة سجن

المكسب الحقيقي في القضية دي يا جماعة طبعا ببساطة شديدة جدا هو أننا كمدونين - وهنا أحيي زميلنا وائل عباس وكل زملائنا المهتمين بفتح ملف التعذيب - نجحنا ومعنا عدد من الصحفيين الشرفاء كوائل عبد الفتاح في أن نرتفع بسقف كرامة المواطن حتى بات الضرب على القفا - وهو من كلاسيكيات الترحيب الطبيعية في أقسام الشرطة - بات مُجَرَّمًا ومرفوضا قانونيا وشعبيا وإنسانيا
ويتم حبس رجل شرطة بسببه... ومبقيناش محتاجين إن واحد يتم اغتصابه أو واحد يموت من التعذيب عشان الرأي العام يتحرك ... ولسة كلاب التعذيب هيشوفوا منا أيام سودا... إما خليناكوا تتلفتوا حواليكوا زي المجانين!!!ـ
===========

الموضوع التالت

الإخوان يا جماعة رفضوا في التعديلات الدستورية الجاري النقاش حولها بالبرلمان نص المادة بتاعة "المواطنة"... وأكدوا أن "المواطنة" هي مصطلح مستورد من الغرب ويعني فصل الدين عن الدولة، والمناخ السياسي في مصر لا يمكنه قبول هذه الكلمة


وقد تمسك نواب الإخوان المسلمين في مجلس الشعب برفض مبدأ المواطنة، وطالبوا بعدم النص علي ذلك في الدستور


طبعا واضح لنا هنا الجهل بتاع البهوات الإخوان النواب بتوع البرطمان وخلطهم المتعمد بين المواطنة والعلمانية فتعريف المواطنة (من ويكيبيديا) هي وحدة الانتماء والولاء من قبل كل المكون السكاني في البلاد على أختلاف تنوعه العرقي والديني والمذهبي للوطن الذي يحتضنهم,وأن تذوب كل خلافاتهم واختلافاتهم عند حدود المشاركة والتعاون في بناءه وتنميته والحفاظ على العيش المشترك فيه.
وهو ما يعني ببساطة المساواة بين جميع المواطنين بغض النظر عن انتماءاتهم الدينية أو العقيدية أو العرقية وكون المواطن مطالبا أمام المجتمع بواجبات كاملة وله حقوق كاملة

أما الفصل بين الدين والدولة فهو أمر لا علاقة له على الإطلاق بالمواطنة... شفتوا نوابنا الحلوين المشرعين طلعوا جهلة إزاي؟

الفضيحة اللي تبين جهل الإخوان واستعباطهم إن الإسلاميين اللي بيدعوا الاعتدال زي الدكتور المعتدل المستنير محمد عمارة (بتاع التحريض على قتل الأقباط والمحسوب أيديولوجيا على الإخوان المسلمين بشكل أو بآخر) بيؤكد أن المواطنة مبدأ إسلامي أصلا وأن قبل الإسلام لم يكن هناك مواطنة في التاريخ أساسا!!!... طب نصدق مين يا إسلاميين يا بتوع قال الله وقال الرسول؟ نصدق دكتور جيكل (المعتدل المستنير) ولا نصدق مستر هايد الكتاتني؟


عمارة بيؤكد إن المواطنة أصلا اختراع إسلامي


بس الإخوان رأيهم إن المواطنة دي حاجة كخة مستوردة بتجيب تسمم وطني

المهم يا جماعة كدة الإخوان في أحد الاختبارات العملية (على الرغم من تفاهة نص المادة المذكورة وعدم جدواها في ظل نظام أهطل وتيارات شعبية مغيبة بكسر الياء وفتحها أيضا) فشلوا فشلا ذريعا وأظهروا وجههم القبيح تجاه المجتمع المدني والديمقراطية وفي الآخر لن يتبقى لكم يا شعب مصر سوى شيئين... جزمة المرشد (اللي هيضرب بيها المعارضين بحسب تصريحاته) وطظ المرشد (اللي هي طظ في مصر وأبو مصر واللي ف مصر بحسب تصريحاته برضه)... ولكي الله يا مصر
=============

الموضوع الأخير وهو فضيحة حقيقية معرفش إزاي محدش كدبها ولا أكدها ولا حد اتعامل معاها بوصفها كارثة فكرية حقيقية وفضيحة دينية وأخلاقية تصيب أكبر طائفة مسيحية في مصر في مقتل خصوصا وأن الموضوع يتعلق بتصريح خطير منسوب إلى أحد أهم أقطاب السلطة داخل الكنيسة الأرثوذكسية وهو الأنبيا بيشوي


الأنبا بيشوي زعيم الصقور في الكنيسة الأرثوذكسية

الموضوع ببساطة إن الدكتور جورج حبيب بباوي اللي البابا شنودة فصله من الكنيسة الأرثوذكسية وحرمه من عضويتها إلى الأبد بتهمة انتقاده لشخص البابا وعقائده كان بيدافع عن نفسه في تصريحات لصوت الأمة قال فيها إن الأنبا بيشوي زعيم صقور الطائفة الأرثوذكسية والذراع اليمين للبابا شنودة له "فتوى" قديمة يؤكد فيها أن
المسيحيين لا يجوز لهم التبرع بدمائهم لأن فيها دم المسيح والذي لا يصح أن يجري في عروق المسلمين حتى لا يدخلوا الجنة!!!! تخيلوا!!!! هذا الكلام نشر على عهدة الدكتور جورج بباوي وعلى حد علمي لم تنفه الكنيسة نفيا رسميا ومر الكلام وكأنه عادي جدا وكإن الكلام ده هو فعلا جوهر العقيدة بتاعة كنيسة البابا شنودة...ـ

الكلام ده يا اخوانا مش بس يثير فتنة طائفية وبس... الكلام ده كلام مسيء جدا ومشحون بالتعصب العرقي والفاشيستية الدينية ويحض على ازدراء الأديان ومصايب سودا معرفش تكييفها القانوني إيه بس الكلام عيب أوي وانهيار أخلاقي حقيقي لو ثبتت صحته... مطلوب من الكنيسة ومن البابا شنودة نفسه ومن الأنبا بيشوي أن يردوا على هذا الكلام بشكل واضح وقاطع وعلى بباوي أيضا أن يظهر البينة على ما يدعيه... وكفايانا بقى غباء وهطل... إيه النيلة دي بس يا ربي؟؟

هناك ٧ تعليقات:

bluestone يقول...

اولا ومبدئيا نهنئ انفسنا على المحاكمتين
آدي كلبين في ستين داهية .. عقبال باقي العصابة

اللي مفهمتوش يا جرجس الموضوع بتاع الدم ده .. هو نكتة عبيطة اصلا .. بس السبب فيها حسب كلامك هو الدكتور بباوي مش الانبا بيشوي ...مش الكلام محسوب على بباوي؟؟؟
ده اللي فهمته ..

يبقى دخل الانبا بيشوي ايه ؟

عامة ده موقف معتاد للكنسية انها ماتردش غالبا إلا لما يبقى الموضوع كبير وينتشر والناس تسمع بيه
انما لما تكون فتوى مجهولة مرت مرور الكرام ومحدش حس بيها ولا عملت مشاكل خلاص محدش بيتكلم عليها

اعتقد ان ده توجه كنسي عام
---

اما بشوات الاخوان .. طبعا مش عايزين كلام
صباح الجهل .. ياريت حد يديهم دروس في السياسة الاول ..بالذات بتوع البرطمان

البرطمان كله تعبان لا اخوان ولاغيره
محدش بيفهم في اي حاجة
لما نواب برلمانيين مش عارفين الفرق بين المواطنة والعلمانية
ونواب تانيين فاهمين ان العلمانية كفر
(على فكرة الزرقاوي قال مرة في شريط من شرايطه ان الديموقراطية كفر وبدعة غربية ورجس من عمل الشيطان) اعتقد اننا قربنا ..
والمسؤولين عن حزب ليبرالي كان في يوم من الايام مهم اسمه حزب الغد اعلنوا رفضهم للعلمانية ...

أمال ليبراليين إزاي يا جدعان ..

يا ريت حد يشرحلهم هما كمان يعني ايه علمانية ويعني ايه علمانية كلية وعلمانية جزئية ..عشان احنا اتخنقنا

ذو النون المصري يقول...

الحمد لله
كده فعلا المدونين من نصر لنصر
الضرب علي القفا زمان كان في المقوله الشعبيه
الضرب علي القفا شفا
الان الضرب علي القفا جريمه نكراء يحاسب عليها القانون بالسجن حتي لو كان المجرم الذي ضرب المواطن علي قفاه ضابط شرطه كبير او صغير
مبروك للجميع و عقبال الباقي
...............
الاخوان انا صراحه احترت
اسمع كلامهم اصدقهم اشوف امورهم استعجب
كل اخواني بيطلع في التليفزيون علي المحور او غيرها بيقول كلام فعلا ممكن انت نفسك تصدقه ...كلام كبير بجد عن الحريه و الديمقراطيه و حقوق الشعب ...الخ...و مع اول بالونة اختبار
مش هقول اختبار
لا بالونة اختبار
بتفرقع في وشهم بسبب جهلهم باور بسيطه جدا
من كام يوم العريان كان في التليفزيون و تسمع منه يقول العجب عن امور عديده حتي ان المحاور ساله و هتعملوا ايه مثلا في السائح علي الشواطيء او مع الحجاب مثلا
العريان قال له
اولا احنا بنتكلم عن شعب مطحون و له امال و طموحات استحاله نسيب امال الناس و نمسك في حاجات سطحيه زي دي لاننا كده ........الخ
.........................
بالنسبه للكنيسه و موضوعها انا فعلا سمعت بالكلام ده لكن مكنتش متاكد منه
لكن فعلا ازاي يطالب المسيحيين بحقوق المواطنه و التبرع بالدم علي تفاهة امره محرم عليهم في هذا الوطن؟؟؟؟طبعا فيه تناقض في الامر و صعب انه يمر بسهوله
مش بعيد الاخوان بكره ياخدوا منه حجه لتمرير مواقفهم في غير صالح المسيحيين في مصر
و بكره هافكرك ان ما كانش ده يحصل
....................
بقولك ايه يا حاج جرجس
انت مش ناوي تسمعنا حاجه لشكوكو؟
خلاص احنا عاوزين شويه فرفشه
كفايه حرام

غير معرف يقول...

طبعا ده نصر للحريات ان الكلاب يتحاكموا بس فاضل كلاب كتير ما تحكمتش الكلاب اللى بتحكمنا الكلاب اللى بتهاجم الاسلام والمسلمين الكلاب اللى بتسرقنا وتدبحنا وتنهبنا

che_sniper يقول...

يا حاج جرجس انت رحت محاكمة الكلب اسلام نبيه ؟ لو رحت يا ريت تقول اللي حصل فيها لان في ناس كتير مقدرتش تروح زي اخوكم

غير معرف يقول...

يا عم الشيخ جرجس كنت حابب انك تقول فبل كدة علشان اجى معاك انت عارف انا محامى وكنت هعرف اتعامل فى حاجات كتير انت فى المحكمة كنت قولى يا عم
على العموم مبروك على الحكمين عقبال الباقى
اما بالنسبة لاخوان الوحد مبقش عرف نقدر نخد راى اخوانى اويمثل الاخوان من مين بالظبط كل الاراء بقيت عند الاخوان لدرجة ان الوحد مبقاش عراف الاخون مين فى الرى دة
يا ريت لو تقبل قريب
سعيد وطنى

غير معرف يقول...

اسأل عن تاريخ الكتاتني في نادي أعضاء هيئة التدريس بالمنيا و ازاي فضل رئيس النادي 15 سنة حتى و النادي تحت الحراسة.

مستبعدش و مستغربش أن نواب الأخوان يقولوا الكلام ده، بس برضه مش هحكم من غير ما أشوف ايه المادة اللي بيتكلموا عليها و أعرف تفاصيل أكثر عن قالوا ايه، المصري اليوم أثبتت أنها مصدر غير موثوق فيه للمعلومات و الخبر مكتوب بطريقة ركيكة.

يعني الكلام كان على لفظة المواطنة؟ ولا على نص كامل لتعديل مقترح؟ على مبدأ و لا على نص؟

ممكن يكون نواب الأخوان غلطانين في الحالتين، ممكن يكون النص المقترح كويس.

ثاني مشكلة طبعا أن ده مينفعش يتحسب برلمان أصلا.

الفكرة في البرلمان أن ناس ليها رؤى مختلفة هتقعد تتناقش و تتعارك و تقنع بعض و تقدم تنازلات لبعض الخ.

اللي خحاصل دلوقتي أن عندنا طرف لا عنده مبدأ و لا رأي ولا عايز يقنع و لا هيقدم تنازلات اللي هو الحزب الوطني، الطرف الثاني مبيمرش بأي اختبار حقيقي لقدراته السياسية و رؤيته و مش مطلوب منه يظهر أي ليونة، لأن دوره أنه يكون ضحية و معلق على الأحداث (دول الأخوان).

لو كان الناصريين هما اللي عندهم 80 مقعد كان هيبقى الأداء مشابه (لكن مش على المواطنة، كانوا هيتخانقوا في حاجة ثانية طبعا).

لكن لما يبقى الأخوان 80 و الناصري 80 و الحزب الوطني 80 و الغد 80 و 80 مستقل بجد وقتها يبقى فيه برلمان و أحزاب و أيد
يولوجيات سياسية حقيقية.

مراقب مصري يقول...

عزيزتي القهوة العالية

تابعي كمان تفاصيل محاكم إسلام نبيه في التدوينة الجديدة

بالنسبة لموضوع الأنبا بيشوي وفتواه الشاذة هذه... أعتقد أنه طالما أثير الموضوع على هذا النحو على صفحات الجرائد فإن الأمر تجاوز مجرد الرأي الشخصي العبيط إلى إثارتها بالفعل كقضية عامة والرأي كما تتفقي معي هو رأي مفزع ولابد على بباوي أن يأتي بالبينة فيما ادعى وعلى بيشوي أن ينفي أو يؤكد ما ادعي به عليه

دعينا لا ندفن رؤوسنا في الرمال أكثر من ذلك ولنواجه الفساد على كافة الأصعدة وتذكري يا عزيزتي أن السمكة تفسد من رأسها

والمبدأ إنه أنتم ملح الأرض ولكن إذا فسد الملح (اللي مفترض فيه أن يصلح ما هو فاسد) فلا يصلح بعجد لشيء إلا لأن يطرح خارجا ويداس من الناس... حماية الفساد تواطؤ معه... وهذا رأيي بالطبع

بالنسبة للإخوان... أنا مستغرب لهم فعلا ومش عارف أوصل لحكم نهائي... يصدق فيهم القول بتاع أسمع كلامك (الحلو أحيانا) أصدقك أشوف أمورك (وكلامك الزفت أحيانا أخرى) أستعجب
==========

ذو النون المصري

جبت لب الموضوع يا أستاذي وببساطة شديدة جدا... وف رأيي منظومة الفساد تشابكت أفرعها معا - مع اختلاف مشاربها - والهدف في النهاة هو تدمير "الوطن" سواء كانت أفرع الشبكة هي أعضاء تنظيم التعذيب في الداخلية أو أصحاب التيار السياسي المتأسلم أو المنظومة الكنسية... ما اسخم من ستي إلا سيدي
==============

الحدق يفهم

المفروض نعمل جهاز لمطاردة كافة أنواع الكلاب الضالة ونقسمه أقسام وربنا يدينا ويديك طولة العمر لحد ما نخلص بقى من كل أنواع الكلاب
==============

كلام الليل

تابع مدونتي لتعرف الجديد في موضوع محاكمة إسلام نبيه وبالتفاصيل والصور
==============


سعيد وطني

بص يا سيدي... أنا حاطط الإعلان عن محاكمة إسلام في مدونتي من حوالي تلات أسابيع في اللوحة بتاعة الإعلانات في السايد بار من فوق وإن كنت بالفعل لظروف العمل تأخرت في نشر النبيه الأخير بتاع المحاكمة... بس ملحوقة قابلنا يوم اتنين أبريل في جلسة المحاكمة القادمة

بالنسبة للإخوان... أنا برضه محتار... نفسي بس شباب الإخوان يبقوا موضوعيين شوية هما كمان ويبدأوا يحتاروا زينا ويسألوا قادتهم بوضوح هي إيه أجندتنا؟ وهل فيه أجندة خفية؟ وما هو سر التضارب في أقوالنا وأفعالنا ومواقفنا؟؟
=================


عم علاء

أنا متفق معاك في عدم الحكم بشكل قاطع على التصريحات بمجرد النظر وخصوصا بالشكل الذي وصفته أنت بالركاكة... بس بجد ما هو زي ما انت شايف الإخوان في كل فرصة بيثبتوا لنا خيبة تقيلة بتحبطنا فيهم وبترجعنا لورا خطوات كتير قبل ما نفكر إننا نحط إيدنا في إيدهم كشريك وطني حقيقي... على حد علمي الإخوان لحد دلوقتي ما نفوش الكلام المنسوب إليهم وما اعتذروش عن الخلط الفاضح بين ما يتصورون أنه العلمانية وتعريف المواطنة... دا إيه الجهل ده يا ربي... نفسي الناس دي تقدم نفسها بجد كبديل وطني محترم مش كبديل دوجماتيكي أحادي الرؤية رؤيته ضبابية ومشوهة ويضمرون غير ما يظهرون وأراؤهم بشكل عام في المسائل الوطنية حاجة تكسف... وطبعا أي نقد لحضراتهم يبقى اللي بينتقدهم يا إما مسلم كافر ومنحل وزنديق أو مسيحي صليبي صهيوني يخدم مؤتمر كولورادو وأجندة التنصير السيكوفيزيقية المتمركزة حول بؤرة تدمير الإسلام

ربنا يشفي
(مش باتريق بس ربنا يشفي بجد لأن اللي احنا فيه دا مرض فعلا بل هو متلازمة أمراض في بعض)

لكي لا ننسى دم أحمد علي مبروك