22‏/03‏/2007

مش عايزين تعديل دستور...عاوزينك ترحل وتغور



يوم الاثنين 26/ 3 فيه استفتاء على تعديل 34 مادة في الدستور المصري دستور بلدنا اللي بيقول البلد تمشي إزاي وبيحدد حق وواجب كل واحد فينا، التعديلات دي الحزب الوطني عملها بمعرفته .. تعديلات تفصيل على مقاس جمال بيه ، عشان محدش يتكلم أو يعترض أو يطالب بحقه أو يرفع راسه، مش كدة وبس كلنا هنكون مهددين في الشارع وفي شغلنا وبيوتنا وأكل عيشنا.


تعديل المادة 179 بيدي الحق لأي أمين شرطة إنه يدخل بيتك ويفتشك ويراقبك ويراقب تيلفونك ويسجلك صوت وصورة ويحبسك وكل ده بمزاجه من غير إذن نيابة ولا دياولو وبعدين يوديك محكمة عسكرية لأنك إرهابي ؛ يعني مفيش حصانة لمحامي ولا صحفي ولا قاضي ؛ يعني مفيش عدل ولا صحافة ولا قانون، وكله بالدستور يا بيه !

أما بقى تعديل المادة 88 فده بيلغي الإشراف القضائي على الانتخابات ويسيبها للداخلية وبتوع " نعم نعم يا مبارك " يطلعوا النتيجة اللي هما عايزينها. التعديلات كمان هتمنع أي مستقل يترشح للرئاسة يعني انكتب علينا وعلى ولادنا رئيس من الحزب إياه لحد ما نموت، ورئيس الجمهورية بقى من حقه يحل مجلس الشعب من غيرحتى ما يستفتي الناس ؛ يعني احنا ننتخب مجلس شعب هو ييجي يحله من دماغة ويطلعلنا لسانه.

يعني من الآخر البلد هتبقى عزبة مبارك وولده ، واحنا عبيد وأنفار عندهم مالناش حقوق وكتّر خير ناظر العزبة إنه سايبنا قاعدين.

دي اخر فرصة ولا هنوافق نكون انفار وعبيد في العزبة؟

يوم الاحد 25/ 3 الساعة 6 مساء هنعتصم في ميدان التحرير

ونبات الليلة هناك

دي اخر مظاهرة قبل إلغاء الجمهورية
قابلونا هناك
شباب بيحلم ببكره

هناك 10 تعليقات:

يساري مصري يقول...

انشاء الله هنكون هناك و انا بعرف اصدقائي الان عشان نكون هناك كلنا
بس ياريت تؤكد لي المعلومات او تتصل بي عشان ميحصلش اللي حصل يوم مظاهرة الخميس
نزلت التحرير بدري و اتمسكت اشتباه و اتشديت و ضاعت منني فرصة المشاركه
عيزين تنظيم اكتر

3abkarino يقول...

أنا مع يسارى عاوزين تنظيم لو سمحتم
شوفوا مين اللى هيبقى مسئول عن التنظيم وبلغونا عاوزين نخليه إعتصام ناجح بما أنه آخر إعتصام قبل مامنعرفش نتجمع تانى

ibn nasser - ابن ناصر يقول...

انشاء الله يبقي عتصام ناجح بس ايه حكاية نباتدي هو احنا فين هنقف قدام جيش العدلي قدام التتار

3abkarino يقول...

خلاص الوقت قرب ولازم نكون جد
لازم نرتب مظبوط للإعتصام
اللحظة الاولى هيا اللى هتحدد الإعتصام هيينجح أو لأ؟
فيه إقتراح علشان نعرف بعض ونشجع بعض بجد مش باهزر
أيه رأيكم لو كل واحد فيكم جاب صفارة من بتاعة الكورة وقعد يصفر بيها ده معناه أنه مشارك معانا فى الإعتصام ونبتدى نجمع بعض ولو الامن أتحرش باى حد يبقى بيصفر علشان البت بتاعته
وكمان الصفافير هتبقى جامده لما نكون ال ألفين يارب نوصل كده ونصفر هتطلع عفاريت ميدان التحرير على الامن ويركبوهم وساعتها مش هيبقوا فاضيين لينا لا الظباط ولا العفاريت
أنا باتكلم بجد انا ماعرفش حد فيكم شكلا , أنا شاركت فى كل المظاهرات اللى كفاية عملتها وآخرها بتاعة مجلس الشعب وركبنا ساعتها أتوبيس وهتفنا فى الناس لحد ماروحنا نقابة الصحفيين
مش هاقدر اعرفكم غير بالصفارة
أنا هاصفر طول الليل فى ميدان التحرير
أشوفكم هناك

omar مشروع بطل يقول...

أتمنى مشاركة الاخوان
لأن العدد مهم و الاخوان يمتلكون العدد

لازم الناس كلها تتحرك
يارب الشعب كله يحس بقى

يساري مصري يقول...

جامده قوي فكرة الصفافير دي
عبقر عبقر
هنطلع ميتنهم انشاء الله
هههههههههههههه

هجيب صفافير ليا و للناس كمان

masri fil-mahgar يقول...

Rabbena ma'akum.

Egyptian Falcon الصقر المصري يقول...

إخواني الأحباء

أشكرك على هذه المدونة الرائعة، أخي لقد جاوز الظالمون المدى، يجب علينا أن نكون جميعاً في الشارع الآن وفي ميدان التحرير غداً وحتى الفجر. أنا من شدة انفعالي كتبت الزجل ده وأهديه لكم جميعاً:

أم المصايب


حزنك ماليني ياست الحبايب
ياللي ترابك ماليان عجايب
يامصر إصحي وفكي اللجام
ده انتي حبيبتي واعز القرايب
ياأمي يامصر ياغالية عليا
إصحي ودوسي برجلك مصايب
حطوا في إديكي السلاسل ياأمي
وانتي حرة برغم المصايب
حافضل ابكي عليكي بدموعي
واندب عليكي ياأمي ندايب
شلة من ولادك حقيقي جبابرة
واخدينك يامصر ياأمي سبايب
بيسبوا في شعبك ومصوا دمه
وخلوا نيلك ونخلك خرايب
ضربوا ولادك وهانوا الجميع
وعبوا كرمك وخيرك زكايب
بيعدلوا الدستور أخيراً ياأمي
عشان ماتكتر فيكي الزرايب
ويجف نيلك وتنشف مزارعك
ويحطوا في كل ركن من أرضك سدايب
عيني عليكي يامصر ياأمي
ياأغلى ماف حياتي برغم المصايب

أحمد عبد الفتاح يقول...

وانا معاكم
جيت من اسيوط مخصوص
مقدرتش استحمل هناك يوم واحد واسيب الناس هنا في الي هما فيه ده
وصفارتي جاهزه

arab girlscool يقول...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
شات انحراف
انحراف
منتديات منتديات عرب كول
غلا الروح
شات غلا الروح
شات صوتي
شات مغربي
قوانين الشات الصوتي
برامج كام وصوت

لكي لا ننسى دم أحمد علي مبروك