03‏/03‏/2007

تغطية تفصيلية لجلسة محاكمة إسلام نبيه من داخل قاعة المحكمة

تابع على كفاية حرام آخر أخبار قضية اغتصاب عماد الكبير
المتهم فيها النقيب إسلام نبيه


اليوم كانت أولى جلسات محاكمة النقيب إسلام نبيه المتهم بهتك عرض المواطن عماد الكبير

وقد تقرر تأجيل المحاكمة إلى جلسة 2 أبريل 2007 واستمرار حبس المتهم

بدأت فعاليات جلسة محاكمة نقيب الشرطة إسلام نبيه نحو الثانية عشر ظهرا




وقد بدأت الجلسة بتلاوة الاتهامات الموجهة للضابط المتهم والتي ترتكز على التعذيب وانتهاك العرض وتصوير وبث صورا (فيديو الاغتصاب الشهير) منافية للآداب العامة وكذا القبض على مواطن واحتجازه دون سند قانوني



كان إسلام نبيه (دلوعة بابا) قد وصل إلى مقر محكمة جنايات جنوب الجيزة بدار القضاء العالي مرتديا ملابس مدنية (جاكت بيج غامق وقميص أبيض) ويغطي عينيه بنظارة شمس... وهذه المرة نجح زملاؤنا المصورون في التقاط العديد من الصور الفوتوجرافية له سواء في دخوله إلى قاعة المحكمة أو وهو قابع في قفص الاتهام بين المجرمين الآخرين هو وشريكه في الجريمة أمين الشرطة رضا فتحي




أعطى رئيس المحكمة الفرصة لدفاع المتهم إسلام نبيه لعرض طلباته وقد ركز دفاع المتهم على الطعن في مصداقية الدليل الرئيسي في القضية وهو فيديو اغتصاب عماد الذي أكد خبير الإذاعة والتلفزيون - المنتدب من قبل النيابة - صحته واستحالة تلفيقه بل وتطابق صوت المتهمين إسلام نبيه ورضا فتحي مع الأصوات الواردة بفيديو الاغتصاب. وقد شكك الدفاع في مصداقية الفيديو وادعى أنه فيديو ملفق وقد اتبع الدفاع حيلة ساذجة لمحاولة إثبات صحة ما يسوقه من دفوع بأن أكد أنه لديه نسخة أخرى من فيديو اغتصاب عماد عليها أصوات أخرى وتسجيل صوتي آخر غير الوارد بالتسجيل المرفق في ملفات القضية - والذي كان دماغ ماك أول من نشره على الإنترنت - محاولا بذلك خلق تشكيك منطقي لدى المحكمة بإمكانية وسهولة التلفيق... الطريف أن الدفاع في محاولاته للتشكيك في مصداقية الفيديو - الذي أكد الخبير الفني صحته - ساق مثالا ساذجا هو فيلم الأقوياء لرشدي أباظة الذي مات قبل إكماله وأتوا بدوبلير قلد صوته وأداءه وخرج الفيلم على هذا النحو والكل يظن أنه رشدي أباظة... شفتوا الحجج القانونية المقنعة؟ لأ وإيه كمان البيه المحامي بتاع إسلام ربط بين قضية إسلام نبيه وفيديو اغتصابه لعماد الكبير (واللي من تاني الخبير الفني أكد صحته) وبين قضية هويدا طه معدة البرامج الوثائقية في قناة الجزيرة ليحاول أن يثبت أن ثمة جهات أجنبية كخة بتمول تلفيق فيديوهات التعذيب عشان تشويه سمعة مصر... سلامات يا سمعة مصر


الدفاع طعن في مصداقية الخبير الفني المنتدب من قبل النيابة وهو خبير بالإذاعة والتلفزيون ولم تكن قضية إسلام هي سابقة العمل الأولى له في مجال التعرف على الأصوات وطلب السي في بتاعة الأستاذ الخبير وشهاداته (يمكن الراجل شايف شغلانة حلوة للأستاذ الخبير ومحتاجه يبعت له مسوغات تعيينه)... الدفاع ركز على جزئية معينة في موضوع الخبير ألا وهي المشاجرة التي حدثت بين إسلام نبيه والخبير المنتدب ليضفي مزيدا من التشكيك في مصداقية الخبير وشهادته في القضية



المهم طالب الدفاع بعد كدة بإطلاق سراح المتهم إسلام على أساس إنه مفيش خوف إنه يهرب ولا إنه هيأثر على سير المحاكمة أو يأثر على الشهود


طالب الدفاع كذلك بمشاهدة مستندات القضية وإرفاق التسجيل الآخر (المفبرك) اللي الدفاع عمله ومضاهاته بالتسجيل الموجود في ملفات النيابة وأيضا طلب السماع إلى الشهود وطالب بنسخة من مستندات القضية للاطلاع وطالب أيضا بالاستماع للشهود مع استبعاد الأستاذ ناصر أمين من الشهادة حيث أنه محامي المجني عليه عماد الكبير... الدفاع أيضا طالب بإرفاق دفتر أحوال قسم ناهيا في الأيام التي نسب الادعاء حدوث واقعة التعذيب فيها لمجاولة إثبات إن المتهمين ما كانوش موجودين أصلا في القسم أثناء وقت حدوث واقعة التعذيب والاغتصاب



أيضا الدفاع طلب شهادة مأمور قسم بولاق الدكرور (ووصفه أنه كبير العائلة) ... آه نسيت أقول لكوا إن في أثناء عرض دفاع إسلام لمطالبه على المحكمة قرر دلوعة ماما إسلام إنه يقعد في القفص (خلافا للعرف والتقليد المتبع في قاعات المحاكم بأن يقف المتهم داخل قفص الاتهام أثناء تناول قضيته) وقد شاهدت إسلام بعد أن جلس وقد أشار لأمين الشرطة رضا فتحي أن يجلس هو الآخر... باشا إبن باشا يا جماعة ومتخيل نفسه لسة سلطة يا اخواتي... المهم القاضي شافه قاعد فراح انتهره وقال له إنت قعدت ليه الجلسة لسة ما خلصتش... صدقوني برضه قضاءنا محترم... ما هو مش معنا إنهم سابوه يلبس مدني في القفص إنه يسوق فيها ويقعد كمان... دا كان ناقص يطلب حجرين معسل وقهوة مظبوط



بعد أن قدم الدفاع طلباته تم حجز قضية إسلام إلى آخر الجلسة حيث يصدر القاضي قراراته بشأن طلبات الدفاع
بعد خروجنا من القاعة كان هذا اللقاء مع الأستاذ ناصر أمين مدير المركز العربي لاستقلال القضاء والمحاماة ومحامي عماد الكبير وأيضا مقدم البلاغ إلى النائب العام بشأن فيديو اغتصاب عماد




أعتذر بسبب إعادة عرض فيديو الانتهاك الجنسي لعماد الكبير ولكنني رأيت أن إعادة عرضه مهمة جدا في هذا التوقيت حيث أنه الموضوع الرئيسي في هذه القضية

علق الأستاذ ناصر على طلبات الدفاع وطعنه في التسجيل وفي مصداقية الخبير بأن هيئة الدفاع لها كل الحق في الطعن في كافة الأدلة وهذا أحد ركائز المحاكمة العادلة للمتهم التي نبتغيها ونثق في القضاء العادل الذي له التقييم الأعلى لكل الدفوع المقدمة سواء من الدفاع أو من المدعي بالحق المدني ونحن نثق في حكم وتقييم القضاء العادل ونثق في عدالة المحكمة
وردا على مطالبة الدفاع باستبعاد الأستاذ ناصر أمين من قائمة شهود النيابة لكونه طرفا في القضية بصفته محامي عماد الكبير الضحية أكد الأستاذ ناصر أنه على الرغم من حق الدفاع بالمطالبة بما يراه من مطالب لمصلحة المتهم إلا أن الدفاع جانبه الصواب لاعتقاده بأنني من الشهود فأنا المبلغ عن القضية ولست شاهدا ومن ثم يحق لي أن أكون مبلغا عن الجريمة وفي ذات الوقت محاميا عن الضحية ولكن النيابة بالفعل أدرجت اسمي على قائمة الشهود


وردا على سؤال إحدى الفضائيات عن رأي الأستاذ ناصر في كليبات التعذيب التي انتشرت في الآونة الأخيرة أفاد الأستاذ ناصر بأنه يعتقد أنه سيكون هناك المزيد من هذه الكليبات في الفترة المقبلة بل وقد بدس الأمن بعض الفيديوهات المفبركة لنشرها بحيث تستخدم بعد ذلك في التشكيك في مصداقية الفيديوهات الصحيحة



وأكد الأستاذ ناصر أن فيديو اغتصاب عماد الكبير صحيح ولا شبهة للفبركة فيه وأن شهادة الخبراء صحيحة وأراؤهم دقيقة وإنه من حق الدفاع أن يطالب بانتداب ما يريد من خبراء آخرين - فهذا حقهم - وفي النهاية يبقى حكم وتقييم المحكمة هو الفيصل وصاحب الكلمة العليا


=========
أعلى إفيه يا جماعة في الليلة كلها كان تصريح أهطل لأحد أعضاء هيئة الدفاع عن إسلام بإنه الواد طبعا هياخد براءة على أساس إن كل الفيديوهات دي ملفقة بأمارة الفيديو بتاع كليب القفا اللي الظابط كريم فارس اتبرأ فيه على أساس إنه كليب متفبرك... طبعا الافتكاسة في الموضوع كانت في إن في نفس تلك القضية بتاعت القفا (اللي بيدعي بسلامته إنها ملفقة) أمين الشرطة اللي ضرب الواد إيهاب خد سنة حبس وده طبعا دليل إن الفيديو ملفق... شفتوا حلاوة المحامي ده و"نضافة" دماغه؟؟
=========
من الجدير بالذكر أن منظمة العفو الدولية كانت تحضر المحاكمة بصفتها مراقبا للمحاكمة وبحسب ما ذكره الأستاذ وائل عبد الفتاح في جريدة الأخبار اللبنانية فقد أرسلت منظمة العفو الدولية خطابا الى ادارة حقوق الانسان بوزارة الخارجية المصرية تبلغها باهتمامها الاقصى بمتابعة محاكمة الضابط اسلام نبيه المتهم بتعذيب سائق الحافلة المصرى عماد الكبيروقد ارسلت منظمة العفو وفدا الى القاهرة برئاسة مسئولة شمال افريقيا..لحضور المحاكمة التى تبدأ اليوم السبت فى ظل اهتمام اعلامي و جماهيرى..وعلمت”الاخبار” ان وفد العفو سيتقدم بطلب الى رئيس محكمة جنايات الجيزة التى سيمثل امامها الضابط بطلب للحضور بصفة مراقب .وهذه هى المرة الاولى التى تراقب فيها منظمة العفو محاكمة فى مصر وسبقها فقط اتحاد الحقوقيين الدولية حين طلبت فى منتصف التسعينات مراقبة محاكمة تنظيم طلائع الفتحالجناح المسلح للجهاد امام المحاكمة العسكرية (كان خبر مراقبة منظمة العفو الدولية قد نشره فجر اليوم الزميل محمد الشرقاوي نقلا عن الأستاذ وائل عبد الفتاح)ـ
===========
انعقدت الجلسة من جديد نحو الثالثة عصرا ليقرر القاضي تأجيل القضية إلى جلسة الثاني من أبريل 2007 للاستجابة لطلبات الدفاع من اطلاع على مستندات القضية وإرفاق دفتر أحوال قسم بولاق الدكرور عن أيام 19 - 21 يناير 2006 وكذا للاستماع إلى الشهود من الأول إلى الثالث وقرر القاضي استمرار حبس المتهم إسلام نبيه إلى موعد الجلسة القادمة


===========
الحاجة المهمة جدا يا جماعة إن اللي عملناه منذ بداية القضية لما بدأها دماغ ماك بنشر الفيديو في شهر نوفمبر إلى اليوم كان له دور مهم جدا في إكساب القضية كل هذا الزخم الإعلامي الذي نالته والذي جعلها محط أنظار العالم كله وموضوع قلق للمنظمات الدولية وعلى رأسها العفو الدولية وغيرها من المنظمات الحقوقية حول العالم كله
ومن جهة أخرى سيتم الإفراج عن عماد الكبير من سجنه يوم 20 مارس الجاري مما يعني أنه سيتمكن من حضور الجلسة القادمة في محاكمة جلاديه وهذا في غاية الأهمية
أكد لي الأستاذ ناصر أمين أن عماد حالته جيدة جدا وأنه آمن ولم يتعرض له أحد بالسوء وقد أكد أن هذا يرجع إلى الزخم الإعلامي والرأي العام المحلي والدولي الذي تمكن المدونون من تعبئته على النحو الأمثل بما كان يمثل أهم حماية لعماد في فترة حبسه التي ستنتهي بعد أسبوعين
==========

كان شيء رائع بالنسبة لي مقابلة الأستاذين ناصر أمين ووائل عبد الفتاح بشكل شخصي وقد عرفني بهما الصديق محمد الشرقاوي... أيضا كان معي منذ الصباح الصديق المدون أسد وانضم إلينا الرائع دماغ ماك الذي كان يشعر أن هذه القضية قضية عمره - وهي بالفعل قضية عمره وعمرنا - فكما قلت وأقول دائما
كلنا عماد الكبير
========

الصور من تصوير الفنان عمرو عبد الله مصور المصري اليوم
ومنقولة عن موقع الصور الخاص بالزميل حسام الحملاوي

لهما جزيل الشكر
=====


دي صورة من الخبر اللي نشرته العربية عن موضوع محاكمة إسلام وقد وضعوا البانر الذي قمت أنا بتصميمه وكنت صاحب فكرة "كلنا عماد الكبير" ولم يذكروا اسم مدونتي وإنما اكتفوا بوصف الصورة باعتبارها "صورة نشرتها إحدى المدونات المصرية للتضامن مع عماد الكبير"... يا اخوانا يعني هو عيب لما الناس الكبيرة يلتزموا بأخلاقيات مهنية ويقولوا الصورة منقولة من مدونة كفاية حرام ومن تصميم الحاج جرجس؟ أنا بتغاظ جدا من الأسلوب الاستعلائي ده... سلامات يا ست ملكية يا فكرية... طب ما انا لما بانشر صورة من أي حتة ولا خبر من أي حتة باقول مصدره وبافتخر إني باتبع أسلوب مهني محترم ودا ما يقللش من مصداقيتي لكن يزودها... وبعدين مش من حقهم يقصوا ربع الصورة من تحت اللي كان فيه جملة "وعصا النظام في مؤخرة الجميع" من غير رأيي!!! يلا بقى ربنا يسامحهم بتوع العربية دول
===========

الكاريكاتير ده من رسم مدون اسمه هلال مدونته اسمها هلال رمضان

أفكاره هايلة فعلا





إيه رأيكم؟؟؟

هناك 30 تعليقًا:

tota يقول...

الحج جرجس
معرفتش اعلق على البوست اللى فات كنت متشوقة جدا للبوست ده وعايزة اعرف بالتفصيل ايه اللى حصل
الخط اولا صغير عينى وجعتنى يا حج كبر الخط شوية
هايل مقابلتك لوائل وللمحامى المحترم اعتقد انهم ناس لازم نفخر بوجودهم على الساحة وبيكون شرف عظيم اننا نقابلهم
عجبنى القاضى كمان انه لفت نظره قعدت اسلام وانه ناسى انه متهم مش باشا
محامى المتهم مستميت فى ايجاد اى وسيلة تشكيك لكن ان شاء الله الحجج الفارغة مش منطقية بالمرة واصل الموضوع مش عجيب ان المواطن يتعذب فى القسم مهياش بدعة ده للاسف امر طبيعى واللى بيعدى من غير تعذيب فى القسم هو اللى فعلا بدعة
بالطبع لا نملك غير الانتظار وان شاء الله عماد يحضر المحاكة القادمة
هو اسلام محجوز فين ويا ترى مرفه فى الحجز وبابا موصى عليه ولا ايه النظام
حتى تأجيل الحكم لحين مراجعة الشهود والسى دى هيكون اسلام برده محبوس وبيتعاقب قبل وبعد الحكم ان شاء الله
اهم حاجة عجبتنى تانى ان عماد الكبير كويس وده كنت فعلا عايزة اسمعه انه مش فى 3 شهور من الجحيم واتمنى تنتهى المدة على خير
شكرا على وجودك هناك وعلى كتابة البوست فور انتهاء المحاكمة لو تعرف كنت متشوقة وكل شوية ازور المدونة فى انتظار البوست ده اد ايه
تحياتى يا حج

كلام الليل يقول...

فين يا عم الحاج جرجس صور دلوع ماما و بابا و هو في القفص
كمان يا راجل انتوا ليه فرضين سوء نية لما يقعد يعني من حقه انع يقعد رجله وجعته ياعيني عليه مش متعود برضه يقعد في الاقفاص

Sharm يقول...

ربنا ياخده اسم على غير مسمى

.:.-=- ELGaZaLy-=-.:. يقول...

همممممممممممممممممممم


حج وجرجس ممتاز...بجد رهيب اوى انت كانك كاميرا نقلت الاحداص ...الله ينور بجد

يشكك فى الفيديو يعمل ارجوز دة حقة القانونى بس الله غالب...

ان شاء الله هايتبهدلو بجد الله ينور فى انتظار الصور يا جميل تحياتى

Reformer1976 يقول...

عزيزتي توتا

تعليقك ركز فعلا على النقط اللي أنا فعلا فرقت معايا جدا جدا... ردي على تعليقك هو كوبي بيست من تعليقك
دايما انتي كدة قارياني
;)
============

كلام الليل

أظن بقى الصور بتاعة العبقري عمرو عبد الله مفيش بعد كدة!!! الراجل دا فنان بجد وطبعا كل التقدير لحسام الحملاوي اللي أنا سارق الصور من عنده
===========

أحمد شرم

أنا مش معاك في إن ربنا ياخده... أنا نفسي قبل ما ياخده يتحط الواد دا في وسط ميدان التحرير ويتربط من رجليه وإيديه ويقعد مكشوف نصه التحتاني واللي رايح واللي جاي يتف عليه واللي عايز يعمل فيه زي ما عمل في عماد أعتقد إنه حلال... مش دا برضه مبدأ القصاص العادل؟؟ هي الشماتة في الكلب تصح ولا ما تصحش؟؟
============

الغزالي

صدقني منعت نفسي من البصق عليه بالعافية وهو قدامي في القفص... لم أتعاطف معه على الإطلاق... كل ما كان يدور في بالي هو ما فعله مع عماد الكبير وكلي ثقة في عدالة الله قبل عدالة القضاء ولازم الكلب دا ياخد جزاءه... رأيي يا جماعة إننا لازم نشهر بيه أكتر من كدة شويتين... عندكوا الصور أهيه العبوا بقة بالفوتوشوب وحطوا تعليقات واشتموا وانشروا ف مدوناتكوا ولو نفع نعلق صور المجرم وتحتيها جرمه وشتيمته في كل الشوارع والميادين يبقى إشطة جدا

لأول مرة أفرح بالطريقة دي على كسرة شخص ما... كنت سعيد جدا جدا وانا شايف أبوه عينه مكسورة والكلب دا وهو فرجة للناس كلها... تجريس على أصوله

يا ريت بجد كلنا نكون موجودين المرة الجاية

ذو النون المصري يقول...

الحمد لله
انا فعلا سعيد جدا بالاحداث الاخيره في هذه القضيه و سعيد جدا طبعا لان عماد بخير
فعلا شيء جميل جدا ان كلنا نكون واضعينهم (عماد و الكلب)داخل دائرة الرؤيه
مش لازم نغفل عنهم ابدا
لك تحياتي و تقديري و للجميع علي هذا الجهد الرائع

احمد عبد الفتاح يقول...

بوست جميل ايه الجمال ده يا عم الحج ؟؟؟
أما بخصوص العربية فانا بقترح انك في الاول تبعت لهم وقولهم وبعد كده ممكن تتصرف ذي ما ان عايز

Ahmed Zaki Osman يقول...

هو دا التدوين بجد يا عم الحاج جرجس ، إسمحلى أحيك فعلا ، خصوصا بعد موقفك من أزمة وائل-عبد الفتاح ، دا الفضاء الجديد نقل المعلومات و الصور للناس . ربنا يسهل و يخلى كل ظبابيط التعذيب يتعظوا من وجود أسامة بيه فى القفص ، بس مش واخد بالك معايا إن التغطية على الحدث المهم دا موش و لابد ،، يعنى مفيش تحقيقات و لا إنفردات فى المصرى اليوم و طبعا نهضة مصر ، بس عموما يمكن اللى إنتا عملتو بيدفع أكتر و أكتر فى إعتبار أحد وظائف التدوين (أحد وظائف) هو عبارة عن نقل الحقيقة و نقل التفاصيل للناس .
لا أنسى فى هذا الإطار المؤطر أن أردد الأغنية بتاعت سر الأرض ، و لابد من يوم معلوم تترد فيه المظالم ، أبيض على كل مظلوم ، و أسود و مهبب و مطين و محبر و متنيل و زى الربراب على رجال وزارة حبيب العادلى ..........
بيننا الود

غير معرف يقول...

شعرت بالفخر الشديد أثناء قراءتي للبوست دة، وجعلت زميلاتي في العمل يقرأونه_رغم عدم درايتهم بالموضوع_ كنوع من التوعية بما يحدث في بلدنا المسكين....التغطية وافية جدا...كل تفصيلة كبيرة وصغيرة كانت جميلة جدا

أكتر إحساس إنتابني أثناء القراءة هو الرغبة الشديدة في الصلاة من أجل عدالة المحكمة، ليس فقط من أجل أن يتم اتخاذ حكم عادل ضد المجرم
ولكن أيضًا من أجل إظهار أن قانون الغابة قانون غاشم ومن يعمل به سينال مجازاته

يا رب أنصر عماد الكبير ...يارب انت أرحم من أي محكمة..من أجل البلد دي واللي بيحصل فيها...انت خد لنا حقنا يارب...انت المنتقم الجبار القادر على كل شئ...ارحمنا يا رب
مريم

شــهــروزة يقول...

اة وماله
الفيديو مفبرك
وعماد هو اللى عملها فى روحه
وأجر اتنين زمايله يعملوها فيه وراح سحب من رصيده فى البنك علشان يجيب معدات وامكانيات يفبرك بيها صوت سى اسلام ابن عم نبيه المفترى عليه دائما وهو حمل وديع
وكل دة كدة من الباب للطاق وبتمويل افشخنجى من جهات معادية مهلبية
وكل دة عشان يشوه سمعة مصر

قال يعنى السمعة نضيفة ومقطعة روحها نضافة من تحت راس ولاد الـ..ولا بلاش احنا لسة عالصبح

محامى قفا
هو دة وامثاله اللى ودوا البلد ورا الشمس
هو وامثاله اللى طلعوا الضباع من محابسها وأطلقوها على الاسود
لحد ما بقا كل المجرمين خارج الأسوار
بينما ارتمى الشرفاء فى قاع السجون
صحيح
أصحاب العقول فى راحة

ربنا يسهل وياخد كام سنة ويتنفخ فى السجن هو كمان عشان يجرب القهر شوية
ويبقا عبرة لزمايله ويحسوا ان محدش فوق القانون

تحياتى للقضاة الشرفاء وأتمنى أتمنى يكون الحكم شافى لصدور المصريين

الصور معبرة وحلوة كأنى وسط القاعة بالفعل

ربنا كبير

ازيك كدة؟

موقف الاخوان رد مفحم لجرجس يقول...

ما سمعناش صوتك عن اعتقالات الاخوان
اللى انت بتهاجمهم على طول
تقدر تقولى مين عمل لبلدك اللى انت عايش فيها زى الاخوان
اى واحد تانى لو كان اتاخد منه فلوسه
كان اتشل لكن عشان الرساله من اجل الله
فكانت فى سبيله

boldozer يقول...

كارثة المجتمع المصري هي العنصرية... مسيحي و مسلم, قهراوي و صعدي,خواجة و أفريقي.. الاستعمار اصبح داخلي و الهدف السرقة والاستغلال..بلاش تخلي الاخوان منقذين.. ما اسخم من سيدي الا سيتي.. بننتقد الصهيونيه و احنا بنروج لنفس الفكر الطبقي الاستعماري و شعارنا هو الى الجهاد

Iron Cobra يقول...

جرجس :

مش ملاحظ حاجة في الصور أن أسم النبي حارسة وصاينة ننوسة عين أمة تختخ وربرب كدة عن الصورة الأولانية اللي أتنشرتلة ساعة ماكان خارج من النيابة ، تفتكر أية السبب ؟؟!!!
1- أن صحتة جت على الحبس و هوا الزنزانة البحري اللي يرد الروح .

2- أنة لا محبوس و لا حاجة و قاعد في بيت أمة اللي عمالة تزغط فية و هو زي عجول التسمين أكل و مرعة و قلة صنعة ، على أعتبار أن العملية كلها مجرد مسرحية عشان يخزوا بيها العين .

3- أن المحابيس بيقوموا معاة بالواجب على أساس الأنتقام ، و يمكن لأنة سوسو فرفور و يمكن فعلاً و اللة أعلم من ضمن العالم أياها و بياخد فية ، و بالأخذ في الأعتبار الخرافة السائدة من أن ممارسة الجنس بتخلي الطرف السالب ( المتلقي يعني ) يتدور و يحلو كدة ، هاهاهاهاه.

مجهول يقول...

جميل جدا تدوينك يا عزيزي
اول مره في مدونتك
اشكرك علي البوست الرائع
ادينا حنشوف حيحصل ايه
بس صدقني فيه حاجه بتتغير
حتي لو كانت بسيطه
احنا بنتغير للأفضل

شكرا مره تانيه علي العرض المتميز
وواثق ان قضائنا شريفا و سينتصر للحق
لك تحياتي

علي فكره انا مسمعتش عنك الا لما قريت اسمك عند توتا
مكتوب رفيقي في الفكر
....
قريتلك برضه بوست رائع اسمه هل هزا اسلامكم ؟ شكرا
رائع عزيزي بجد
ولكن هزا ليس من اسلامنا بشئ و شكرا ايضا
....
اسف لتعليقي علي موضوع سابق في بوستك ده

Sampateek يقول...

صحيح الصور مفتحتش و لا الكليب كمان
بس جهد ملحوظ و متابعة مشكورة للقضية

طبيعي ان الجزيرة متنقلش اسمك زي ما نقلت البانر
دايما الكبير مبيبقاش عنده نزاهة الصغير


ربنا يعطينا و يوطي نفوسنا

ازيك عامل اية؟

Reformer1976 يقول...

ذو النون المصري

في اعتقادي إن قضية عماد الكبير هي واحدة من أنجح التجارب التي أثرناها كمدونين وتابعناها إلى الآن - وما نزال نتابعها - والمهم هنا إننا ندرك دور الرأي العام المحلي والدولي اللي بينفع يتحرك بكل قوة تفاعلا مع مثل هذه القضايا... بس المهم إن القضايا تلاقي اللي يشتغل عليها ويتابعها بدون ملل أو توقف... ياما قضايا بتتفتح وتموت تاني قبل ما تجيب آخرها بسبب عدم استمرارية الزخم الإعلامي اللي وراها... يا ريت كمدونين نستفيد ونتعلم من تجربة قضيى عماد الكبير وبقية قضايا التعذيب وندرك إنه طول ما عندنا إيمان بالقضية ومكملين في متابعتها عمر ما حق الضحايا هيضيع
===========

أحمد عبد الفتاح

أشكرك على تحيتك وبالنسبة للعربية فأنا أكتفي فقط بأنني أشرت لاقتباسهم الصورة دون الإشارة لإسمي وخلاص على كدة... هنفضل طول الوقت نطالب بحقوق الملكية الفكرية ع النت وبرضه هنفضل نلاقي ناس مش ملتزمة بأصول المهنية... في اعتقادي إن اللي ما بيلعبش بالأصول بيخسر من مصداقيته مع الوقت وفي الآخر هيخرج برة الملعب
=================

عمنا أحمد زكي عثمان

أشكرك على التحية وأستغرب معك فعلا على تجاهل الصحافة التقليدية لحدث محاكمة إسلام على الرغم من أن محاكمته هي بمثابة درة التاج في ملف قضايا التعذيب (المعروف دوليا حاليا باسم العادلي فيديو جيت)... أستغرب أن المصري اليوم نشرت الخبر بتاع المحاكمة بصورة تقليدية للغاية في مساحة عادية جدا في صفحة الحوادث واكتفت بصورة واحدة من صور العبقري عمرو عبد الله اللي حضرتك شايف صوره هنا عندي... التدوين غالبا بيملا فراغ حقيقي في عالم الصحافة يا أحمد وفي عالم الإعلام عموما وهو كما قلت نقل الحقيقة وتفاصيل الحدث وهو ما رأيته بعيني في حدث محاكمة هذا الضابط... فعلى الرغم من كثافة حضور مصوري ومندوبي وكالات الأنباء والصحف وكل دول إلا أنني من خلال أحاديثي العابرة مع أغلب هؤلاء لم أجدهم ملمين على الإطلاق بتفاصيل القضية التي هي الحدث الذي أتوا لتغطيته... ودا يفسر لسيادتك ركاكة الأخبار اللي جات عن الخبر في الكثير من وسائل الإعلام برة وجوة... طبعا أستثني المصري اليوم من هذا الجهل (وإن كان ثمة قدر من التجاهل) وأستثني بالطبع الجزيرة ومديرها المجتهد حسين عبد الغني الذي كان موجودا بنفسه لتغطية الخبر وكان ملما جدا بكل تفاصيل القضية وغيرها من قضايا التعذيب في أقسام الشرطة المصرية
=====================



مريم

عماد الكبير هيخرج من سجنه بعد أسبوعين وهيكون حاضر معانا جلسة المحاكمة الجاية واللي غالبا هتكون جلسة النطق بالحكم على الكلاب إسلام نبيه ولربما رؤيته لمحاكمة جلاده تعطيه إحساسا - ولو محدودا - بالعدالة والقصاص... أما بقى لو الواد الزفت دا خد براءة على أساس إن عماد مفبرك الفيديو يبقى ابتسمي فأنتِ في مصر... وساعتها طبعا لابد من أن يحصل عماد الكبير على جايزة أوسكار أفضل مثيل لأن الولد أقنعنا فعلا إنه بيغتصب... وبصراحة الواد كمان بيكلف أفلامه حلو عشان تطلع بالجودة العالية اللي شفناها في الفيلم اللي الأستاذ محامي إسلام بيدعي إنه متفبرك... قمة العبث
====================


شهروزة العزيزة

موضوع إدعاؤ الدفاع بفبركة الفيديو هو أمر طبيعي جدا لأن مفيش قدامهم حاجة تانية لأن صحة الفيديو تعني إدانة المتهم إدانة نهائية وطبعا القاضي مش بياكل م الكلام ده بس هو من حق المتهم أن يحصل على محاكمة عادلة للآخر عشان لما يتسجن ويغور في داهية ما حدش يقدر يطعن في عدالة المحكمة أو إنه بسلامته ما خدش حقه في الدفاع وبعدين على رأي هاني رمزي في محامي خلع... ما هو لازم يعمل كدة يا أمي دا أكل عيشه... بس فكرة إن عماد كان بيمثل وهو اللي أنتج الفيلم العظيم ده وصوره على حسابه عشان يورط "دلوعة أمه" إسلام فكرة مفتكسة جدا... آدي يا ستي المحامين وآدي الظباط... وفي الآخر الحرامي ضحية كليب الضرب ع القفا رفض أن يشهد شهادة زور ويقول أيوة أنا شفت الظابط كريم من وشه وفي الوقت نفسه الكلب إسلام لما القاضي يسأله الكلام ده حصل يا إسلام ينكر ببرود وتلامة قذرة ويقول ما حصلش يا فندم... يا بن الكدابة يا وسخ... حرامي مش عايز يكدب ويشهد زور وظابط م اللي بيقولوا عليهم اولاد ناس بيكدب عادي جدا وكأنه بيندغ لبانة... شفتي الوساخة يا شهروز؟؟؟
==================


الأخ بتاع الإخوان

موقفي من اعتقالات الإخوان واضح ولا لبس فيه ولا يحتاج للمزايدة عليه من أي شخص... أنا ضد اعتقال شباب الإخوان لأنها قضية رأي ودا مش أول مرة أقول هذا الكلام راجع ما نشرته إبان تلك الأزمة وراجع البانر المنشور في مدونتي للمطالبة المستمرة بالإفراج عن طلاب الإخوان المعتقلين ظلما وزورا... بالنسبة لخيرت الشاطر وإخوانه فأنا ضد تقديم الرجل للمحاكمة العسكرية ودي حضرتك وساخة نظام... أنا أختلف مع الإخوان سياسيا بالطبع وفكريا لكنني لا أطعن في شرفهم ونزاهتهم وبيني وبينك أنا بحترم في الإخوان إيمانهم بقضيتهم في زمن غاب فيه الإيمان بأي قيمة وصارت فيه الفوضى هي السائدة ويكفي الإخوان شرفا وفخرا أنهم صمدوا على مدى ما يقرب من ثمانين عاما من القهر والملاحقة الأمنية واستمروا وواصلوا... سأظل أحترمهم يا عزيزي وأدافع عن حريتهم وفي نفس الوقت سأنقدهم وبشدة وأناهض سياساتهم وإيديولوجياتهم.... هل في هذا تناقض؟ بل هو عين الاتساق مع النفس ومع المبادئ التي أؤمن بها

بالمناسبة بقى ليه ما لقيناش للإخوان موقف رسمي من قضايا التعذيب ولا حضور في المحكمة في محاكمة إسلام نبيه وغيرها من قضايا التعذيب؟ لعل المانع خيرا
=====================



العزيز بلدوزر

أتفق معك في موضوع عنصرية المجتمع المصري... وحط كمان جنب أمثلة العنصرية دي، العنصرية ضد المرأة وضد أصحاب البشرة الغامقة... بص على النموذج اللي بين إيدينا في قضية النهاردة ألا وهو الكلب إسلام هو مثال متجسد للعنصرية... بص على ملامحه وعلى "استايله" وستكتشف إنه من تلك الطبقة الاجتماعية التي طفت على سطح المجتمع وتصورت نفسها فوق الجميع وهتلاقي إسلام ده واحد من آلاف من أبناء الزواج غير الشرعي بين السلطة والمال في بلادنا وكانت نتيجته هؤلاء النغول غير الشرعيين الذين عاثوا في أرضنا فسادا وكانت مقولته الشهيرة عشان تعرفي يا بولاق الدكرور إن مفيكيش راجل... ونغل آخر من النغول - هيمسك البلد كلها قريب - لسان حاله يقول عشان تعرف مصر كلها إن مفيهاش راجل... أنا مش شايف أي خلاف جوهري بين إسلام نبيه وجمال بمارك... نفس التناحة والتلامة ونفس فعل الاغتصاب اللي بيمارسوه مع الشعب كله ونفس الكراهية الشعبية لدلوعة أمه في كلا الحالتين... نعم يا عزيزي لقد أفرز تزاوج السلطة والمال في بلادنا تلك الطبقة الكريهة المنزوعة القيم والعديمة الأدب والتي نتج عنها غياب منظومة القيم من كل أنحاء المجتمع
==================


عزيزي الخبيث الكوبرا الحديدية

صايع يا واد من يومك وبالطبع أرفع لك القبعة على صياعتك الجامدة دي... أنا مستني حد يعلق التعليق ده يا باشا... لأني من أول ما شفت الواد في المحكمة وانا مستغرب هو الواد دا بقى عامل زي البغل كدة ليه... طبعا اختياراتك التلاتة مسخرة وخصوصا الاختيار التالت... ههههههههههه
بس أنا بيني وبينك قلقان إن يكون البغل ده بيروح بجد كل ليلة يبات في حضن أمه وهتكلم مع الأستاذ ناصر أمين عشان أسأله إيه الضمانات القانونية الممكن اتخاذها عشان نتأكد بالفعل إن ننوس عين أمه الوسخ ده بيبات في السجن زي الكلب وأيضا لابد أن نسأل أهل الخبرة والاختصاص في الأسباب المحتملة للزيادة الغريبة في وزن هذا العجل المسمن... يمكن بيسمنوه عشان يدبحوه على العيد؟ بس يا واد يا كوبرا الختيار التالت على أباحته لكن قمة في المسخرة والعبثية وأشكرك على مشاركتك في حملة تجريس الكلب إسلام بهذا التعليق العبقري
======================


العزيز مجهول

أشكرك جدا على تحيتك وتشجيعك
وبالطبع أنا أول من يعلم أن ليس ذاك هو إسلامكم... والسؤال في ذلك البوست كان استنكاريا وليس تقريريا
ولكن مواجهة وفضح مثل هذه السلوكيات التي تعكس صورة سيئة عن الإسلام هو فرض عين على كل مسلم بل وكل مسيحي من أجل مصر أفضل وأنظف... وقد قال الحديث الشريف أن نصرتك لأخيك ظالما لا تأتي إلا بأن تنهاه عن ظلمه... ولكن بعض الناس لهم آذان للسمع لكنهم لا يسمعون وإن سمعوا فلا يفهمون... قلوبهم اغلظت عن الفهم... واتفق معك جدا في أن ثمة تغيير حقيقي بدأ يحدث ولن يتوقف طالما كان لدينا الإيمان بما نفعله... وبعدين التاريخ ما بيرجعش لورا أبدا واللي بنكتسبه النهاردة دا مكتسب للتاريخ ولأجل أجيال ربما لم تولد بعد
==================


سمباتيك الجميلة

خففت حاجات كتير في الصفحة عشان الصغحة تفتح أسهل... جربي تاني... أشكرك على تشجيعك وبالنسبة للعربية - وليس الجزيرة - أتساءل طب هو ليه الكبير بيعتقد إن الالتزام بالمهنية عيب وليه زي ما انتي بتقولي الله لما بيعطينا بتوطى نفوسنا ونبقى كلاب؟ لو عندك إجابة يا ريت تقولي لي
==================

Iron Cobra يقول...

جرجس :

خدتلي بالك كمان أنة شفتر ( شفاتيرة كبرت يعني ) ، طبعاً أنا متأكد أنك عارف شفاتيرة دي يعني أية بس توضيح للناس اللي مايعرفوهاش شفاتيرة يعني شفايفة .

و طبعاً كلنا فاكرين النكتة المشهورة بتاعة الراجل اللي كان عمال يحدف للريس بوس في الهوا و هو عمال ينفخ في البشر في خطبة عيد العمال ، أفتكروا النكتة هتعرفوا شفاتيرة كبرت من أية و اللي مايعرفش النكتة يروح يسأل عليها .

Reformer1976 يقول...

الكوبرا الحديدية

مسخرة يا عم بجد... ضحكتني بصوت عالي

طبعا يا جماعة النكتة بتقول إن فيه خطبة ما لحاكم دول ما - غالبا مصر - كان بيخطب في عيد العمال وبيتكلم عن زيادات في الأسعار وأوكلكوا منين وكدة يعني ولوحظ أحد العمال أثناء الخطاب بيحدف بوس في الهوا فسئل الرجل إنت بتعمل كدة ليه
فقال
هو فيه ... (لفظة تعني جماع) من غير بوس؟؟

هههههههه
آدي يا عم قصة شفاتيره اللي كبرت
الواد عامل زي اللي بياخد هرمونات يا كوبرا... شكرا من جديد لمزيد من التشهير والتجريس للولد دلوعة أمه

ibn_abdel_aziz يقول...

خسارة اني مرحتش
انا اصلا مكنتش عارف ان الباشا حيتحاكم في اليوم ده

بس انا فعلا خدت بالي ان الواد اسلان زادله كام رطل وملحوظة الحاج ايرون كوبرا مضبوطة

يا اما انتم يا كلاب يا مدونين يا مجرمين يا وحشين لما اخدتم صورة ليه في الاول كانت صورة في تانية اعدادي
ودي مؤامرة يا كناب يا مقنفين

او يمكن الواد اسلام
لما قعد في البيت جاله اكتئاب فبدا ياكل بقه
بيسموها ايه عندكم في علم المش عارف ايه
ايتنج ديسأوردر
ولعلمك انالو من المحامي بتاعه
ارفع قضية علي مصر كلها
عشان بوظتم نفسية الولد ومش عارف يخس تاني
حرام بجد يعني يا حاج اللي بتعملوه ده
وبعدين جت علي اسلام اللي حط عصاية في مؤخرة مواطن يعني
طب ما حسني حاطط برج الجزيرة كله وسائر ابراج النيل والكورنيش والتجارة العالمي وكل الابراج العالية
في مؤخرة مصر كلها
والزبون مرتاح يعني من زمان خلاص
وكمان
مدلدل رجليه

ابقي اشوفك المرة الجاية هناك
حتبقي شياكة لما اسلام وعماد
يكونوا مع بعض
وعلي الله ميحصلش تنازل
بطريقة اعجازية كالعادة

وتلاقي عماد واسلام بيحضنوا بعض علي غرار مشهد الحضن الجبار في عودة الندل
ويشغلولنا مزيكة

الارض لو عطشانة

الا صحيح انت حجيت امتي يا بني؟
:)
سلام
ونشوفك قريبا في اللي بالي بالك
وغيره من الامور ذات العلاقة واللي ماذاتشي

Reformer1976 يقول...

شريف باشا إبن عبد العزيز

تفتكر الواد بياخد هرمونات هي اللي عملتوا كدة؟ إحلو واتدور ومين عارف بكرة كمان يطلع له صدر... كدة يبقى ثبتت الرؤية هو مش بس كان بيعذب عماد لكن هو كان متلذذ بانتهاكه جنسيا ويعني هي أول مرة تحصل؟؟؟ ما هو ظابط كمين الزعفرانة قال لضحيته أمجد حسين إنت حظك إنك وقعت ف واحد مالوش في الستات أنا بتاع رجالة... وراح هوب مطلع "الديلدو" وكان عايز ينتهكه بيه

آدي يا عم الشرطة اللي في "خدمة" أم اشعب... أي خدمة... وعادي يا باشا العدالة للجميع وظابط لكل مواطن وعصايا لمؤخرة كل مواطن

الله يخرب بيوتهم علمونا الأباحة وقلة الأدب

طبعا عماد مش هيتنازل تحت أي ظرف من الظروف وهو باعت من سجنه بيطمن الناس عليه وبيقول إنه ورا الكلب ده لحد ما ياخد حقه... في المحكمة شفت أخو عماد فقلت له أخوك راجل لأنه ما بيسيبش حقه... آه يا بلد محتاجة مليون عماد ما يسيبوش حقهم

أشوفك يا باشا في اللي بالي بالك طبعا
بس بالنسبة للأمور ذات الصلة واللي ما ذاتهاش أنا اليومين دول مش مستقر من حيث النقعر البؤري واللا مركزية المتمحورة حول فرعية المضمون ودلالات الجوهر في صلب البؤرة وبالتالي لسة بافكر

سلام يا زعيم

zenzana يقول...

لاء يا سيدي مايسامحهمش ولا يكسبهم بتوع العربية، وانت أصلا ايه اللي يسكتك؟ دي حقوق ملكية فكرية

تغطية المحاكمة هايلة جدا، كأني كنت بحضرها أسمحلي اقول دا أفضل بوست انت عملته من ساعة المخ والفشة بتوع اللي ما يتسماش

كان ليه نفس الملاحظة الخاصة بربربة ننوس عين امه
الظاهر ان صحته اخدت ع السجن والواجب اللي بيتعمل معاه هناك
بس يا تري الواجب من المساجين ولا ظبابيط الداخلية؟

zenzana يقول...

يا احمد يا زكي
دي غنوة ذئاب ولا ذباب الجبل يا حبيبي

شــهــروزة يقول...

أممممممم
جرجس
شكلك عينك من الواد بعد ما ربرب وتختخ واتدور واحلو كدة
وبقا عامل زى بنات الريف اللى بخيرهم لسه

شكيت فيك خلاص يا جرجس

نيااهاااهااااااا

Reformer1976 يقول...

زنزانة العزيزة

بفكر أعمل بوست عن الفشة والمخ وعلاقتهما بالتعذيب في أقسام الشرطة
ههههههههههه

الواد شكله فعلا مش مظبوط ولربما فعلا الظبابيط اللي في القسم موجبين معاه

أحمد زكي مصر إن الأغنية دي بتاعة سر الأرض في حين إن أنا متأكد من صحة معلومتك... الأغنية فعلا من ذئاب الجبل بس برضه اللي يقول عليه زكي أكيد هو الصح

هههههههههه
============

شهروزة اللي سنتها مش هتعدي

إمشيييييييي
أنا ماليش في القرف ده... هو بس الواد فعلا زيادة وزنه مريبة... وتلاقينا ظالمينه والحكاية كلها إنه ممكن يكون عيان وبيتعاطى كورتيزون ولا حاجة

قال عيني منه قال... ثكلتكي أمك

zenzana يقول...

عيب عليكي يا شهروزة
وانا اللي بقول عليكي عاقلة وبتفهمي
جرجس مالوش في اي حاجة من دي
عيب كدة

غير معرف يقول...

إنتو كدة مايعجبكوش العجب ولا الصيام في رجب تنتكو ورا اللراجل لحد ما دخلتوه القفص منكم لله دي اخرة خدمتو للأمن والامان لاافراد الشعب الزبالة إللي مايستهلوش.
هو يعني كان عمل إيه دا كل اللي عملو علشان الواد عماد الوحش دا يتعظ ويخاد بالو من مستأبلو وعلشان في عيال وحشين فى الحتة يخافو يعملو أي شقاوة.
مش أحسن ما كان يحولو على النيابة والواد عماد ساعتها كان حيتحبس ويضيع مستأبلو دا.
دا جزاء اللي يطبا روح القانون!!!.
طلعت روحكو

غير معرف يقول...

Warm welcome to Alnemat TheGrace Arabic Christian Internet Magazine, We love you! Please visit us at:

http://www.TheGrace.net

http://www.TheGrace.org
http://www.TheGrace.com
نتمنى لكم الفرح والسلام والمحبة لأن السلام افضل من الحرب والمحبة افضل من الكراهية كما ان النور والحرية أفضل من الظلمة والقيود.
سلام لكم في محبة الله. نتأمل زياراتكم الكريمة لموقع النعمة موقع مجلة النعمة يقدم كلمة الله الكتاب المقدس الإنجيل رسالة السيد يسوع المسيح قراءات مختارة مواضيع مصيرية قصص واقعية شهادات شخصية ترانيم ممتازة ردود مؤكدة كتب بنّاءة رسوم تسالي تأملات يوميات
Bible in Arabic Audio Read search Studys Stories Testimonies Hymns and Poems Answers Books Links Daily devotions Acappella Music Graphics /Alnemat Journal Arabe Chrétien La Grâce la Revue Arabe sur Internet offre La Sainte Bible Al-Injil L'Evangile de Jésus Christ gratuit, Bienvenue a La Grâce.
Arabic Christian Magazine The Grace offering the Arabic Bible النعمة تقدم الإنجيل الكتاب المقدس

غير معرف يقول...

It operates in conjunction with your i - Tunes account, or you can have a number of other connections, based upon what you
want to view. This software can convert DVD to various video formats such as MPEG-4,
AVI, WMV, FLV, 3GP, VOB, etc. In this day and age it is impossible to stay on top of all the latest pieces of technology.


Also visit my blog ... apple tv review

غير معرف يقول...

It is a GPS Smartphone and enabled with A-GPS with Google Maps allowing
you to navigate through your city, or an unknown one, with ease.
These are community cards and they are dealt to
the center of the table. The design of the
phone with slightly round configuration makes it common to the looks
of the Samsung Galaxy Nexus.

My webpage ... samsung s3

غير معرف يقول...

The press conference saw the intro to hardware enhancements about the
Samsung Galaxy Note 2, and the profound interpretation of its major system
functionalities. 5 million plus Samsung Mobile USA Facebook
fans and 3 million Samsung Mobile US Twitter followers to participate in the celebration, including
an exclusive performance by artist, Kanye West. This review is
focused on the new concepts introduced in the Brink of War expansion.



Here is my site: samsung galaxy note 10.1

لكي لا ننسى دم أحمد علي مبروك