17‏/03‏/2007

بعد قرار النيابة بإخلاء سبيل جميع المتهمين أمن الدولة يتلكأ في تنفيذ قرار الإفراج

تحديث
لا يزال زبانية امن الدولة يماطلون فى تنفيذ قرار النيابة الصادر مساء امس الجمعة باخلاء سبيل جميع زملائنا المعتقلين لا توجد بوادر حتى الان تدل على ما فى نيتهم ان يفعلوه
لا يزال زملائنا المعتقلون حتى الان محتجزين بقسم شرطة الظاهر ولا يوجد اى مبرر لاستمرار حجزهم
والى الان يصر جهاز امن الدولة على ان يضرب بقرارات النيابة عرض الحائط منتهكين بذلك كل الشرعية
نناشد جميع المدونين والصحافة الحرة فى بلادنا التضامن بالنشر
على كل المدونات وفى كل صحيفة حرة ليس فقط تضامنا مع زملائنا المعتقلين ولكن فضحا لممارسات هذا الجهاز الامنى الباطش الذى يخرب مصر وهم فى الحقيقة من يشوهون سمعة مصر ويهينون كل قيمة نبيلة لا تزال باقية فى هذا البلد

اننى اكتب ما اكتبه هنا وانا لست اعلم ان كنت ساتمكن من الكتابة ثانية ام لا
تابعونا ان كان لنا عمر واذا بقيت لنا حرية
___________________________________
إحنا قلنا إيه؟

قلنا إن النيابة قررت تفرج عن الشباب المعتقلين
عظيم جدا
الشباب خرجوا من مقر النيابة متجهين على قسم الظاهر اللي أصلا اترحلوا منه على النيابة
ممتاز

في القسم سعادة الباشا اللي ماسك أم الليلة هناك قال لهم يا جماعة أنا الناس دي أصلا مش تبعي
دول تبع قسم قصر النيل ومقدرش أفرج عنهم إلا لما تجيني تعليمات

أتاري الموضوع وما فيه إن البهوات بتوع أمن الدولة عايزين يرخموا على أم الشباب ويبيتوهم ليلة زيادة في الحبس
وبالتالي تم التلكؤ في تنفيذ قرار النيابة بحجة التحري عن محال إقامة الإخوة المعتقلين والموضوع كله مش أكتر من رزالة من شوية ظباط فشلة صدقوني ما فارقين كتير عن العساكر بتوع السي إس إف اللي هو الأمن المركزي لا مؤاخذة اللي هما مضرب المثل في الغباء

المهم

الشباب بايتين الليلة في قسم شرطة الظاهر ولن يخرجوا قبل الصباح
وقد سرب البيه المأمور اللطيف أبو دم خفيف أخبارا إن الولاد هايخرجوا ع الساعة اتناشر من ظهر السبت

لم نرحل من أمام قسم الظاهر إلا بعد أن اطمأننا على الشباب من خلال دخول الأستاذ أحمد سيف الإسلام المحامي إليهم في الحجز والذي أخبرني بأن حالتهم المعنوية عالية جدا ومهيصين جوة وكانوا طالبين جرايد أهم حاجة
شباب مثقف يا جماعة مش أي كلام

طب فيه معلومة مهمة

أبطالنا المعتقلين بعد رجوعهم إلى قسم الظاهر أضربوا عن الطعام ودا على فكرة خلى الظباط جوة يرتبكوا جدا ويتوتروا ع الآخر
برافو عليكوا يا رجالة وأهي رزالة برزالة
بس حفاظا على سلامة الشباب والذي يعاني بعضهم من مشاكل صحية متعددة طلب منهم الأستاذ سيف أن يأكلوا ويشربوا
ودخلنالهم أكل وسجاير وبعتنا حد يجيب لهم عصير فريش والعصير في الطريق... بس طبعا لأنه فريش فبيتأخر شوية

أحلى نكتة بقى في القصة الأستاذ أحمد سيف الإسلام (وهو بني آدم سكرة بجد) لما دخل يتطمن على الشباب في الحجز مكانش معاه سجاير - لأ مش سجاير للشباب سجاير ليه هو - فلطش علبة سجاير كلوباترا سوبر م الشباب المعتقلين جوة وطلع طبعا الحاضرين شربوها منه على أساس إنها حاجة من ريحة الأبطال!

طيب كفاية تهريج ونتكلم جد بقى

الصبح
هنرجع لزملائنا المعتقلين تاني من الصبح على قسم الظاهر عشان نتطمن على خروجهم بالسلامة
وعادي برضه لو مرواحنا هناك رزالة على حبايبنا الرزلين يبقى شعارنا هو
متظامنين مع زملائنا
متضامنين ورزالة برزالة

رزالة رزالة لحد ما رزالتنا تفوق رزالتهم


الصبح عايزين ناس كتير مننا تروح
خلاص يا شباب؟
إشطة عليكم
آه أنا بقالي كدة حوالي 72 ساعة ما نمتش فدماغي مهيسة


أنا نعسان جدا ولازم أنام لأني متدمر
الصبح قدام قسم الظاهر بقى

هناك 5 تعليقات:

نبيــذ يقول...

حلوه حكايه من ريحه الأبطال دى
;)

سرقة وتبرير علنى

أنا أشجب و أدين هذا الفعل السئ اللذى يدين سمعه مصر يا حاج جرجس

;)

عبقرينو يقول...

السلام عليكم

على موقع الإخوان الرسمى وعلى جريدة المصرى اليوم عدد السبت 3-17 أنى أحد شباب الإخوان كان بيوزع ورد على الظباط
أنا صاحب فكرة الورد وانا اللى كنت باوزع بس الحاجة المهمة جدا انى مش من الإخوان خالص انا مصرى وبس غير منتمى لأى حزب سياسى لنى من الآخر مافيش حزب عدل فى مصر
كمان انا باحترم الإخوان بس معترض معاهم فكريا ومعترض معاهم فى كيفية التنفيذ على الأرض
علشان كده باقول أنا مواطن مصرى يطمح للحرية ويتمنى ان يرى مصر مستقرة ولا للتمديد ولا للتوريث
وكمان يعنى من ليبرالى لإخوان أزاى يعنى , ولا اللى أتكتب ده علشان الإخوان يأكدوا أنهم كانوا مشتركين وبس؟

عبقرينو يقول...

http://3abkarino.blogspot.com/

غير معرف يقول...

السلام عليكم يا استاذ مع خالص تقديرى مش عارف لية كل ما ادخل مدونت سعادتك بحس انى حقابل هنرى كورييل بتاع حدتو زمان ايه القاسم المشترك مش عارف عموما مصر ستظل بخير ما دامت فيها رجال

Reformer1976 يقول...

العزيزة نبيذ

اسكتي بقى لاحسن الأستاذ أحمد سيف عرف إني نشرت عن موضوع علبة السجاير ده وبيهددني إنه يرفع عليا قضية سب وقذف وطبعا أنا قلت له إن أنسب واحد يرفع له القضية دي عليا ويكتب له فيها عريضة مفتكسة هو القاضي عبد الفتاح مراد حتى عشان تبقى عريضة الدعوى دمها خفيف

هههههههههههه
=============

عبقرينو

يعني إنت بتتهم الإخوان رسميا بسرقة حق الملكية الفكرية بتاع فكرة الورد المنيلة دي منك؟ خلاص يا فندم إحنا نخلي برضه القاضي عبفتاح مراد يرفع عليك عليهم دعوى ويقول إنهم جماعة إرهابية ومتخصصين في سرقة الورد ويعمل لهم عريضة دعوى مسخرة... ولا يهمك يا زعيم... بس ورد إيه يا راجل اللي رايحين تقدموه لكلاب الشرطة يوم المظاهرة... السياق مش مناسب خالص للي انت بتفكر فيه دا خالص... دول كلاب يا حبيبي وكانوا واخدين وضع الاستعداد للنهش والعض والنباح وتقول لي نقدم لهم ورد... يا راجل عيب عليك
====================


عم المجهول الشيوعي

المهم قول لي هنري كورييل دا حد كويس ولا إيه الأخبار؟ ويا ريت تفكر شباب جيلنا الصاعد اللي دماغه أبيض من الصيني بعد غسيله كلمة حدتو دي اختصار إيه

لكي لا ننسى دم أحمد علي مبروك