01‏/03‏/2007

إلى عشاق الشيكولاتة في مصر والعالم العربي... احترسوا

من منا لا يعشق الشيكولاتة؟

من منا لا يذوب هوسا أمام إعلانات الشيكولاتة التي يذيعها التلفزيون حيث يتدفق سائل الشيكولاتة البني الرهيب أمام أعيننا حتى يجعل ألسنتنا تتدلى من فرط العشق الشيكولاتاوي السرمدي؟


احترس!!

لا تأكل قطعة الشيكولاتة التي في يدك الآن فالشيكولاتة فيها سم قاتل!!

لا، ليست دعابة على الإطلاق!!

الموضوع حقيقي ومؤكد ونشرت عنه البي بي سي ورلد

وأيضا موقع الأبحاث الطبية العالمية للأخبار

والمعلومات تؤكد أنه قد تم مؤخرا سحب مليون علبة من شوكولاتة كادبوري بأنواعها السبعة من الأسواق الأوروبية وذلك لاحتوائها على ميكروب السالمونيلا وهو مرض خطير لا يمكن علاجه جذريا بل يمكن مداواة الأعراض الناتجة عنه فقط. وبحسب المصادر الإخبارية وبتصريحات منظمة الغذاء العالمية ، تقول التصريحات : ( لقد تم فتح باب
التحقيق مع الشركة وتبين وجود تسريب لبعض نفايات المصنع بأحد خطوط الإنتاج الرئيسية التي تنتج الشوكولاتة بأنواعها السبعة ) وقد حذرت منظمة الصحة العالمية المستهلكين ونصحتهم بالإبتعاد عن منتجات كادبوريا نهائيا إلى أن يتم معالجه هذا الأمر ، وبالفعل تمت مقاطعة المنتجات وسحب كامل منتجات الشركة من الأسواق الاوروبية، كما ألزمت الشركة برد أموال المستهلكين الراغبين في إسترداد أموالهم .

والسؤال الآن... هل ستتخلص شركة كادبري من هذه الكميات الهائلة من منتجاتها الملوثة بميكروب السالمونيلا الخطير بحرق هذه النفايات أم أنها ستتخلص من النفايات بإرسالها إلينا؟ وهل وصلت هذه المنتجات بالفعل إلى شعوب بلادنا التي تاكل الحديد تاكل الزلط؟ وماذا يفسر وجود منتجات معينة لكادبري في الأسواق بأسعار منخفضة إلى درجة الغرابة حتى تجد قطعة الشيكولاتة الواحدة بسعر خمسين قرشا!!

أعتقد أن الموضوع جدير بأن نأخذ وقفة وأن نحترس جدا من التعامل مع منتجات هذه الشركة فالعمر ليس بعزقة... ويا عشاق الشيكولاتة... معلش استحملوا... فمن العشق ما قتل!!

هناك 11 تعليقًا:

غير معرف يقول...

سلام عليكم ورحمة الله وبركاته، أنا اللي كنت علقت عند حضرتك قبل كدة ...
بس ، ومبسوطة إني انا أول واحدة أعلق على البوست دة، بس مش عارفة هل المشكلة ف كادبوري بس ولاّ في الشيكولاتة عموما؟؟؟؟أصل أنا سمعت ان دة في الشيكولاتات كلها موضوع (السلامونيللا)دة بجد، وانا بجد قلقانة...لأني من عشاق الشوكولاتة...وانت كمان بتقول انهم لاحظوا دة في كادبوري اللي برة...أمّال اللي جوة بقى يبقى إيه أخبارها؟؟؟انا باكل في الشهر الواحد يجي اتنين كيلو كدة...وكمان لسة جايلي شيكولاتة من انجلترا(شيكولاتة بيضا بالبندق والرز المقرقش)والباكو كبير قوي...أعمل إيه؟؟؟أدوس فيها ولا أديها هدية لحد باعزّه؟؟؟وعموما يرحمنا ربنا
مريم

zenzana يقول...

يا سي جرجس هي جات علي الشيكولاتة؟
ثم الخبر وفقا لمصدر موثوق فيه طبيا قرر الاعتزال منذ اسبوع ان الخبر دا معروف من سنة بالظبط


الي الاخ المهاجر الرأفتاني
اوعي تكون الشيكولاتة اللى جبتها لي من بلاد برة معاك من الشوية المضروبين وطبعا بما انك من بحري استرخصت وجبت لي من الكشك اياه بتاع الشيكولاتة المضروبة اللي ع اليمين بعد الشمال الاولاني قبل المطار وتكون دي مؤامرة تخلص بيها مني بما اني سيحت لك علي المدونة فين الشيكولاتة؟ لحد ما فكرت وقلت يلا خليني اسكت صوتها خالص عشان تحرم تسيح

مريم
يا تري ممكن نتقاسم شيكولاتة انجلند سوا طالما انتي خايفة تاكليها
ممكن تديهاني كلها هدية كدة كدة انا مش هاممنى اموت امتي
او نقسمها سوا بعد ما الدكتور جرجس يتناول المسئلة من الناحية الطبية اون لاين هو متعود علي كدة

شــهــروزة يقول...

أمممممممممم
أنا قلت الموضوع فيه حاجة طالما سعر البار رخص أوى كدة
يااادى النيلة
حتى الشيكولاتة اللى العيال طول النهار يلهطوا فيها؟؟

طيب نرفع قبعاتنا بقا للشركة اللى سحبت منتجاتها من الاسواق حفاظا على ارواح الشعب بدون فرض المسألة تحت قبة البرطمان لديهم
ودى يااا دووووووووبك
شوية شيكولاتة تستغنى عنهم فى اى وقت

أومال بقا بتوعنا اللى سابوا الدم الفاسد فى الاسواق ومتداول بين الايادى وهم عارفين انه فاسد ومتنيل بستين نيلة على راسهم وراس اللى خلفوهم
نعمل فيهم اية يا عم جرجس؟؟
وكمان لما اتنيل على عينه الموضوع واتفضح تحت لاقبة
الكتلة التواطئة معاهم قفلته ليـــــــــــــــــــه؟

حد يفهمنى بدل ما أصور لهم قتيل هنا

اتفووو على دة شعب
نستاهل ضرب الصرم وملناش ادنى حق نقول آى
أو لأ

وعلى فكرة
الشيكولاتة سعرها نازل من سنة وشوية
يبقا الزبالة بتاعتهم
وصلت لنا من سنة وشوية واستقرت فى مصاريننا من وقتها
ودور بقا على اللى حصل فى السر

3rby يقول...

قدييييييييييييييييييم
جدااااااااااااااا
الحوار ده اتزاع في حديث الصباح في الجزيرة من قبل ما يبقي برنامج طويل
من ايام ما كان 10 دقايق
بس فين الكولاته ام نص جنيه ديه
فيه السادة الصغيرة وشكس بس
وهم مش يستاهلوا حتي لو الشكولاته عدلة
صغيرين
سيبك
مافيش احسن من جالاكسي
وبنات جالاكسي

Reformer1976 يقول...

طبعا الموضوع قديم أنا عارف بس هو قديم في أوربا بمعنى إن الفضيحة دي حصلت من شهر يونيو 2006 بس السؤال فعلا هو الزبالة دي وصلت أسواقنا ثم مصاريننا ولا لأ وفي اعتقادي إنها بالفعل وصلت ويبدو إن المصيبة مش في كادبري بس... في اعتقادي إن العالم كله بيتعمل معانا كسلة نفايات كبيرة من أول الشكولاتة لحد أكياس ادم لحد فلاتر الكلى لحد المبيدات المسرطنة وما خفي ربما كان أعظم وأفدح ومين عارف نفايات العالم النويية نصيبنا منها أد إيه.. احساس خطير بجد اننا بقينا صفيحة زبالة للعالم

فيه أنواع من كادبري فعلا في السوق المصري سعرها وصل خمسين قرش ومين عارف لو حللنا البلاوي دي هيطلع فيها إيه

القضية بالطبع ليست في كون الموضوع قديم ولا جدي بس طرح قضية إننا سوق لنفايات العالم مهم جدا عشان نبدأ ناخد موقف كشعب محترم ونقول كفاية قرف... فاكرين السنة اللي فاتت لما مصر قبلت تعدي السفينة المحملة بالأسبستوس بعد ما عملت شريفة وما كانتش راضية تعديها في الأول لكن واضح إن مصر قبلت الرشوة وعدت لسفينة بكل الأخطار البيئية التي تحملها

كل ده محتاج وقفة ووعي شعبي حاسم وكفاية بقى وساخة وتلوث وقرف... ويمكن دي فرصة بالمرة نعيد المطالبة بمحاكمة "مسرطن" الزراعة المصرية الفاسد الكبير يوسف والي

حفظكم الله

tota يقول...

الحج جرجس
اعمل فيك ايه بس
انا عاشقة شيكولاتة لكن لن اتوقف لاسباب كثيرة
اولا بكتريا السالامونيلا متعددة الانواع كما تعرف يا دكتور ان معظم البكتريا تستجيب للمضاد الحيوى لكن ما لا يتأثر هو التوكسين الذى تفرزه البكترياولا يمكن القضاء عليه بالحرارة و التجميد وخاصة ذلك النوع الذى يحدث التسمم الغذائى والسالمنيلا معروفة من 100 سنة تقريبا
اطمنك بقى يا دكتور ان السالمونيلا موجوده فى البيض واللبن ومنتجاته من الابقار المصابة واللحوم والدواجن وبسهولة يمكنك عزل السالمونيلا وتصنيفها حتى اصبح تواجدها شىء عادى جدا وغير مفزع للشعب الجبار الا طبعا من الانواع التى تحدث التسمم عن طريق التوكسين او النوع المسبب للتيفويد وهناك انواع المحدثة للنزلات المعوية المعتادة التى دائما يعانى منها كل زائر غريب عن مصر وتستمر من 4-7 ايام والاعراض اسهال وسخونة والم فى الامعاء وخلاص واحيانا كمان لا تحتاج علاج ويخف المريض تلقائيا ما عدا الاشخاص المثبطين مناعيا تكون اصابتهم صعبة لضعف الجهاز المناعى
بالرغم من اننا نأكل نفس الطعام الا اننا بسبب تكون اجسام مناعية مضادة اصبحنا مقاومين
واخيرا يا حج كادبورى يتم تصنيعها فى مصر ولا يتم استيرادها وسبب انخفاض السعر والدعاية المبالغ فيها بمصرهو اسلوب تسويقى معروف يعقب اى خلل يحدث للمنتج وليس بسبب اى خلل فى المنتج المصرى نفسه
وبعدين يا حج كل السالمونيلا قبل ما تكلك ولو عندك شوكلاتة هاتها انا مقاومة للسالمونيلا وانا فداك يا حج

مع خالص تحياتى
شركة كادبورى مصر

ذو النون المصري يقول...

خلاص هبطل اكل شيكولاته
اصلها كانت علي الفطار كل يوم الصبح
هو فيه في مصر اكل بيتعدم؟
يا عم الحاج دي البقره بتموت و بتخرج من المحرقه للجزارين و بتتباع للمستهلكين و كله عادي جدا
هيعدموا الشيكولاته ؟؟؟مش ممكن

Reformer1976 يقول...

العميلة الشوكالاتية الأمريكاوية توتا

أيوة إظهري على حقيقتك وباني... هوة ده السبب الحقيقي لاعتزالك التدوين... إنك تبع أمريكا وشركات أمريكا... وتلاقيهم هما اللي كانوا بيقبضوكي عشان تدوني... ولما لقيوا تدويناتك مش بتخدم أجندتهم الأنجلوصهيونية الهادفة إلى "كدبرة" مصر والعالم العربي (الكدبرة على وزن العولمة) لأنك خدتي الموضوع جد وبدأتي تزيدي وعي النفس بنفسهم وبغرض وجودهم في الحياة وبدأت رسالك التدوينية توصل للناس وتأثر فيهم قلبوا عليكي وقالوا إحنا هنسحب التمويل (اللي هو عبارة عن أكياس الشيكولاتة الغامقة اللي بتيجي لك من خلال عميلهم المزدوج واللي مش هقول إسمه) وإنتي طبعا بعزة نفسك الأبية رفضتي الرضوخ لتهديداتهم بسحب المعونة الشيكولاتية وقلتيلهم اتفاقاتنا كلها "بخ" ومش عايزة شيكولاتاتكم وينعل أبو التدوين اللي هيخليني عميلة شيكولاتية وعنها ورحتي بطلتي شيكولاتة أمريكاني وتدوين مصري... واهو تبقي ريحتي دماغك من وشهم وقلتي الحل هو في الشيكولاتة المصرية وطبعا سقطتي في فخ الجواسيس الذي نصبته لكي ببوست الشيكولاتة كادبري وبدأتي تدافعي عن الشيكولاتة كادبري "المصرية" وتدافعي كمان عن سالمونيلتنا المصرية الحبيبة اللي خدت علينا وخدنا عليها... ولكن كما كان الله يرحمه يقول دائما "الصدق أقصر الطرق للإقناع" لذلك أشور عليكي... اعترفي بكل حاجة وصدر دولة تدوينستان مفتوح لكل أبنائها وسنغفر لكي عمالتك لولاية شوكالاتيا الأمريكية في مقابل أن ترجعي إلى تدويناتك المصرية الصميمة من جديد وليكي عليا وعد (وبجد) كل أسبوع باكو شوكالاتة غامقة في مقابل كل تدوينة جديدة كل أسبوع... أظن كدة متقدريش ترفضي... وكفاية إنك هتتمتعي بحضن تدوينستان الدافئ وضفاف نيل تدوينستان الوارفة ولن ينسى لكي الشعب التدوينستاني الذي طالب برجوعك هذا الموقف الكريم بل وربما جعلوكي ملكة تدوينستان بعد أن كنتي أميرتها

شكرا
;)

Reformer1976 يقول...

ذو النون حبيبي

طبعا مش هيعدموا الشوكلاتة ولا هيعدموا البقرة... هيعدموا ميتين اللي جابونا سواء بنفاياتهم أو بمسرطناتهم أو بدمهم الفاسد المهم... هيطلعوا عين اللي خلفونا بأي تمن وبأي طريقة... ابقى اقرا موضوع سباكة حمام الوطن عند أحمد زكي عثمان

Rasha يقول...

اول ما قريت الخبر خوفت وبعدين ضحكت انا مش من عشاق الشوكلاته بس البيت كله بحبها يعني ماما واختي واخويا وابويا مش بيعرفوا يعيشو من غيرها

بس هي مش وقفت على الشوكلاته كل حاجه بتجينا من بره بتكون نفياتهم وبتتصدر لينا ولان التجار بيجيبو الحاجات باسعار ارخص وبيكون مش فاضل على انتهاء صلاحياتها غير شهور معدودة والبضاعة دي بترمى عندهم قبل ما الناس والحكومة تاخد بالها في متابعة مش زي عندنا ولا حد بيسأل والكل بيدفع وبيغش الناس
اصل البني ادم عندنا رخيص قوي
ومات ربنا يرحمه في غيره

في ميت مرض في كل حاجه بناكولها وبتوصلنا مش وقفت على الشوكلاته!!!

يلا ملناش غير التويكس وبلاش كرنش

ههههههههه

ذو النون المصري يقول...

سباكة حمام الوطن!!!!!!؟؟؟؟؟؟؟؟؟
ايه الاسم الغريب ده؟
انا رايح اقراه
سلام

لكي لا ننسى دم أحمد علي مبروك