30‏/03‏/2007

النهايــــة - The End !!!

الإخوة والأخوات

في الحادي والعشرين من أغسطس من عام 2006 كتبت أول تدوينة لي


وقبل هذا التاريخ لم يكن لي أي انخراط سابق في الشأن العام وكنت فقط ممن يتابعون الأخبار والأحداث على شاشة التلفاز وكنت باشجع اللعبة الحلوة دايما... في وقت أزمة القضاة كنت منفعلا بما يجري وكان نفسي أكون جزءا من اللي بيحصل ووقتها كنت باتابع جريدة الدستور وبرنامج العاشرة مساء وباسمع عن اعتصامات شباب كفاية وعن مظاهراتهم كل خميس وعن اعتقال المدونين وعلى رأسهم علاء وغيره من الشباب وكنت باحس إني باغلي من جوا ونفسي أكون معاهم أو حتى قريب منهم

كنت مبهور بالتجربة بتاعتهم وبنضالهم البطولي لأجل قضية التغيير

وبكيت بالدموع وأنا أقرأ شهادة شرقاوي على تعذيبه وما حدث معه وحسيت بقد إيه بقينا رخاص في البلد دي



وبدأت أدون وأنا مش في دماغي أي هدف أكتر من أني أعبر عن اللي جوايا بالكلام وبس

وشوية بشوية بدأت أعرف الناس على الفضاء الافتراضي أولا ثم في الواقع اللي مش افتراضي بعد كدة

وعرفت وسط البلد ومقاهي البورصة

ونزلت أول مظاهرة في حياتي

وكنا يومها تلاتين واحد متظاهرين ومتحاوطين بحوالي خمس تلاف جندي أمن مركزي

وتوالت الفعاليات وتوالت التدوينات وتعددت المعارف وتشعبت دوائر العلاقات
وسعدت بمعرفة العديد من الأصدقاء والزملاء والرفقاء من كافة الاتجاهات والتيارات السياسية
فعرفت العديد من اليساريين والعديد من الليبراليين بل والإخوان المسلمين والأدهى من الحزب الوطني ولي أصدقاء من كل هؤلاء... وبالطبع فإنني سعيد بكل صديق حقيقي عرفته من خلال هذه التجربة وبكل رفيق وزميل تعاملت معه واحترم كل منا الآخر

لقد خضت تجربة التدوين حتى نهايتها وأيضا تجربة النضال السياسي والوطني وأيضا حتى نهايتها
وليس لدي جديد لأقدمه في أي من المجالين بعد الآن

كانت تجربتي قصيرة ولكنها كانت مكثفة بما يكفي لأن أكتشف أنه ليس بالفعل ثمة جديد تبقى عندي لأقدمه

وبناء عليه فإنني أعلن أنني أتنحى عن تحرير مدونة كفاية حرام وعن الانخراط في أي شكل من أشكال العمل السياسي
وأعلن أنني سأرجع لأصير مواطنا عاديا بين صفوف الجماهير

والله الموفق

هناك 34 تعليقًا:

غير معرف يقول...

الاخ جرجس النضال والكفاح ليس له نهاية طلما هناك رأى ورأى اخر فلابد من النضال ليتم تحقيق الاهدافزطالما الانسان لازال فيه قلب ينبض لابد من النضال ربنا خلقنا علشان كدا( وخلقتا الانسان فى كبد)الجندى يقدر يقول انا بطلت لحد هنا وهو فى ساحة معركة؟؟؟حقيقى كلنا اليأس من الاصلاح اتغلب علينا فى الفترة دى لكن الاكيد ان فيه امل وما فيش ليل الا ووراه نهار مهما طال

غير معرف يقول...

مش من حقك ترجع انت يوم ما جيت كنت ملك لنفسك اما دلوقتى بعد ما بقيت واحد مننا اصبحت ملك لبلدك اللى نزلت علشان تحررها لو استسلمت يبقى ناس كتير لازم تستسلم ولو كل الناس هتستسلم يبقى كلا لازم ننسى كلمه مصر كلمه حريه لاننا ساعتها كلنا هنبقى عبيد يا مينا انت يوم مانزلت معانا اتضربنا سوا واتقبض عليك بقيت زينا احنا كلنا واحد كلنا قلب واحد يمكن مكنش ينفع تشوف حاجات كتير فى البدايه بس ده صدقنى مش هيضرك زى مانتا متخيل بالعكس انت كده اتقدمت كتير الحاجات ديه هيه اللى بتدى الخبرة وصدقنى انت يمكن تكون جيت قريب زى مابتقول بس انا عملت كتير اوى كفايه انك رفعت من روحى المعنويه اكتر من مرة وقت منا كنت تعبت وزهقت وفقدت الامل صدقنى انا اكتر واحده هافتقد وجودك جنبنا مش هلاقى حد اقاطعه دايما وهو بيتكلم ويعد يقولى يابنتى ادينى فرصه اتكلم وما اعيا واموت يجيب لى عصير ويفتكرنى بودع وفى الاخر يطلع عندى حساسيه من الشاى ثم احنا اتفقنا يتقبض علينا فى عربيه واحده اينعم انا بعتك اول مرة وسبتك لوحدك بس صدقنى المرة الجايه يانعيش عيشه فل يا نموت احنا الكل متقلقش بس مينفعش انا كده اول واحده هيأس صدقنى انت رفعت روحنا المعنويه كتير مش هسمحلك بس ثم انا عملت حسابى وجبت ازايز ولا مش عاجبك عامه اسأل رفيق الدرب اللى كان معاك هيقولك انا رجعت مخصوص علشان موضوع الازايز ده احنا مستنينك ترجع فى اللى انت قلته وتبقى معانا

قلقانه يقول...

ايه اللى انت بتقوله ده؟
بجد مش هينفع ترجع دلوقت
يا مينا فيه ناس كتير جدا بتحسدك انك بتعمل حاجه صح انا شخصيا منهم لانى مش قادره اعمل حاجه خالص
واذا كان على الحاجات اللى تقدر تعملها فانا متاكده انك تقدر تعمل كتير حتى لو مش هتشوف نتيجه اللى هتعمله كفايه عليك تبقى حاسس انك عملت اللى عليك
وبعدين ازاى ترجع لصفوف الحماهير تانى
اللاعب عمره ماينفع ير جع متفرج تانى
انا اساسا ماصدقش انك تقدر بجد
ولازم تعرف كمان انك صحيت ناس كتير وماينفعش تسيبهم دلوقت
كمل مشوارك اللى انت ابتديته

tota يقول...

حج جرجس
ما اقدرش اقول ان النضال له نهاية وان حب البلد بيقف عند مرحلة لان اللى انت بتعمله من خلال مدونتك هو المعنيين دول
ممكن احباطات كتير وممكن سلوك ناس كتير وممكن فقدان امل وممكن نتائج عكسية تحبط بس اكيد انه ده لفترة معينة
انا فاهمة فكرتك زى ما فهمت فكرتى عن التدوين كانت ايه وانتهت ليه بس انت تدويناتك كمان مختلفة والكلمة فيها ليها معنى كبير وهدفها واضح
زى ما قال الاستاذ احمد حلمى المحامى الطريق طويل وكل ما تقع هتقوم تانى وزى ما قال حنتكلم حتى لو ناوى تغير اسلوب التدوين ليه من خلال مكان تانى
اذا كنت ناوى على الاستمرار يبقى من خلال كفاية حرام بصورة مختلفة الا اذا كنت بتقفل صفحة كاملة مش عايز تشوفها تانى بكل ما فيها من حلو ووحش بكل امالها واحباطتها
ولو انها مرحلة ما ينفعش تلغيها من حياتك لكن الاختيار ليك ربما وقت شوية تكون فيه مع نفسك هو اللى هيوجهك صح للاتجاه اللى انت عايزه
اكيد انت اكتر واحد عارف خطوتك ايه
تحياتى

غير معرف يقول...

مش عارفة اقولك انت حر ودا اختيارك
ولا اقولك لا ارجع وبطل غلاسة
لان ف الحالتين هأيدك
انت اللى اقنعتني انزل الشارع بعد ما كنت مقاطعة واقنعتني بحاجات كتييرر ان بكرة احلى وانه بتاعنا احنا وان لازم نشارك منكبرش دماغنا كدة
لكن ف الوقت نفسه القناعة اللى انت وصلت لها دلوقتى عن التدوين وسككه انا كمان وصلت لها

وعشان كدة مش هقولك ارجع دون تانى

لكن لسه فيه امل
هنكمل لكن مش مع التدوين
مع حاجات تانية


انا تابعت المعركة اللى عند نوارة
بقولك
دا من غيظهم منك مش اكتر
لان بلطجية التدوين عاوزينا يا نمشي
ضمن القطيع يا اما نبقي ولاد ...
بالظبط زيهم زي الحكومة ومبارك
مفيش فرق هم كمان عملوها حكومة ومعارضة

اشوفك ع خير

غير معرف يقول...

مخبيش عليك انا اكتئبت وتنحت اول ما عرفت وانت عارف لما بتنح منظري بيبقي ازاي

لكن حاليا بعد الكونفرنس وقلبها مراجيح
بقولك انت قرارك صح وتوقيتك صح الاعتزال عندما لايكون هناك فرصة لتقديم الجديد
بس احساسي بيقول يموت الاعب ور جله بتلعب
ع العموم هستنى رجوعك هنتخفي ونعمل دكان دكاكيني سوا
ههههههههههه
سلام بقي عندي عزومة

الطـريـق يقول...

أحـا أحـا
لا تـتـنـحـــى

طبعا من حق أي حد يعمل أي حاجة في أي حتة مادام لا يتخطى حدود الآخر
هذا ما نؤمن به
تكتب متكتبش، تتنحى او متتنحاش أنت حر
لكن أليس نشر خبر تنحيك محبط للآخرين

اصل الحدوتة ليها خلفية فلسفية حول الأختيار
فاختيارك لموقف ما هو ليس اختيار لك وحدك بل انت تختار للآخر ايضاً
عندما قررت أن تكون مؤثراً
فقد كنت تقول ضمنيا أيها الآخر كن مؤثراً وبإعلانك وقف التدوين ومقدمة التنحي المحبطة تريد ان تنقل لنا رساله، انك حاولت ، وأفلست، وأنه لا أمل ويجب ان نفعل مثلك

ففي لحظة كهذه لا يمكنك التملص من الإحساس بالمسئولية
أنت حــر اختر ما تشاء لك، هي مسئوليتك تجاه نفسك والأخرين

هو مشروعك أختر له ما تريد وما تستطيع تحقيقة ومسئولا عنه

وصلت رسالتك
شكراً
.......
جماعة الطريق
هيباتيا، شهروزة، سـتردية

Sharm يقول...

جرجس

هو انت لما تقول رأيك في مدونتك و تحكي عن حياتك يبقى بتمارس وظيفة ممكن تتنحى في يوم عنها ؟

بدام بتحب البلد يبقى لازم تبقى ايجابي و تقول رأيك

يا ام تصفق و تقول برافو يا اما تكشر و تقول لازم نصلح

مش لازم تكشر دايما و لا تصفق دايما

واحد مصري يقول...

الحاج جرجس ....

عرفتك من مدونتك....منذ شهرين على ما اذكر....... طبيب فيما اعتقد...و اسمك مينا... قبطى وطني ....يعني مصري وطني تفاعلت مع كتاباتك انفعلت ببعضها و انفعلت على البعض الاخر...لكنني احترمت كل ما كتبت و باتت مدونتك من اساسيات يومي على النت.... ضحكت على تعليقاتك الساخرة و بكيت من الظلم الذي قراته و رايته ف كتاباتك او ما نقل عن الشرقاوي .... حزنت و غضبت على ما حدث لوالدك رجل الدين الوقور من بعض الغوغاء و الجهله ضحايا الجهل الديني فى الشارع و المدرسة و احيانا البيت.... علقت مرة واحدة فقط مستخدما اسم "واحد مصري" على موضوع الباب شنودة و اسلمة الكنيسة

قد اكون محقا تماما عندما اقول ان المدونون و مدوناتهم ساهموا في اعادة بعض الوعي للكثيرين و ما زال هناك الكثير ليكتب و يفعل و قد لا اكون مخطئا اذا قلت بان المدون الذي يحترمه الناس تنشا بينهم و بينه صلة... يعتبرونه اخ لهم... صديق ... قريب عزيز او جار يسعدوا عندما يروه.... و اعتقد ان المدون لديه نفس التصور تجاه من يقراون له و يحترمون فكره حتى لو تعارض مع فكرهم ..... يعد ما سبق و لسبب او لاخر قررت الا تكتب ؟؟؟؟؟؟؟؟؟؟؟؟؟؟؟؟؟؟؟؟؟؟؟ يعني ايه يا حاج جرجس ما تكتبش....فيه ايه يا دكتور مينا يا ابن القس المبجل... و لو انت بطلت كتابه و انا بطلت قراءه و تعليق و غيرنا عملو كده ايه يبقى اللي هايفضل ... امال مين هايكتب.... مين هايرجع للناس وعبها او جزء منه؟؟؟؟؟؟؟؟؟؟ الكتابه ملكة للتعبير عن الاراء و الافكار الاحاسيس و المشاعر.. عن العلم عن الثقافة و المعرفة و الوطنيه و هي ليست متاحة للكثيرين.... قد يكون السبب انك زهقت ... اصابك الملل او القرف او الاثنين لكن ارجو الا يكون هناك اع عوامل اخرى وراء قرارك بالتوقف.....

و بعدين من مش من حقك ترجع زي م احد المعلقين كتب سابقا....(انا عارف ان انا اناني لما باقولك كده لانه من حقك فعل أي شيئ تراه مناسب لك)

اكتب يا حاج تاني ..اكتب با دكتور مينا.... اكتب علشان مصر ... علشان ابوك .... علشان اصحابك ... علشان المدونين الي اتحبسوا ... علشان بنتي امينه و امي اللي مستنياتي ارجع من سفر طويل ...علشان المصريين جوه البلد و براها... علشان عيالك وعيال كل
المصريين
واحد مصري

سـردية يقول...

أتوقف على التدوين احتجاجا على قرار

الحاج جرجس بالتوقف عن التدوين

مينا خليك معانا

أحنا اللي بيتقال عليهم: ماتوا وحلمهم في إيديهم

هــيـبـاتـيـا يقول...

تتوقف هيباتيا عن التدوين احتجاجا
لتوقف الحاج جرجس عن التدوين
التدوينة لن تُـحدث إلا لو عدل مينا عن قرارة

شــهــروزة يقول...

أتوقف عن التدوين احتجاجاً على إنسحاب الحاج جرجس من عالم التدوين
بقى في الوقت اللي احنا محتاجين فيه ندعم صمود بعض تسيبنا
ارفض ان إيدك تنسحب من إيدينا
شهروزة

Ayyam يقول...

السيد الحاج القس المحترم جرجس باشا المتنحى بى خليفه آل ثان قلاوون: ديه أول مره أعلق عندك، سمعت عنك لكن مقرتش كتير ربما لضيق الوقت، لكن عاده أحب أزور شهروزه مش علشان هيه حلوه وبس لكن بتعرف تعكنن عليه من وقت لأخر...عرفت منها أنك مش ح تكتب بسببك..قولت أنا حلو كده أخيراً ح أبقى مبسوط ومبقاش فى حاجه تعكنن عليه من أخبار مصر. أحييك أولا على التنحى، جملتك فكرتنى بتنحى جمال عبد الناصر بعد أحداث النكسه..قال والله نفس الكلام لما سمعت تسجيل له...الفرق أنى أظنك مصرى محترم وصادق فيما تقول أما عبد الناصر ربما قالها علشان يغطى البلوه اللى هوه وحكومه وقاده الجيش كانوا من أكبر أسبابها، أما أنت فلا أعرف لماذا تتوقف؟ أذا كنت خايف فلا ألومك ..كلنا زيك بنخاف ومعندناش وقت. ..لكن هيه ديه بلدنا سواء طلعت أو نزلت أو حتى لوحكمها دستور الأوغاد...أحنا جزء منها وهيه لازم تفضل عايشه بأى حال من الأحوال! لغايه مايأتى الأوان.. فكرت إزاى ده يحصل؟..أسهل شيء أنا تعيش بالصحبه الحلوه.. جوانا يعنى لازم تكون..ديه مش دروس فى الوطنيه لاسمح الله دا أنا غلبان فى الموضوع ده، لكن هو ده حقك أنك تتكلم وحق صحابك عليك أنك تفضل معاهم....حقك أنك تشعر بمصريتك المفقوده من خلال أصدقاء يشاركونك نفس الحلام ..من غيرهم تتوه وهمه تقل همتهم..سيبك من جمله المهببه بتاعت سعد باشا زعلول "مافيش فايده" وأرجع أكتب وقابل صحابك تانى ...أما لو أخترت أن تقفل الدكانه ياريت والنبى ترجع على الأقل شهروزه، علشان الواحد يعرف الأخبار...
أطيب السلامات ياود العم

halwasa-masrya يقول...

بص يا حاج..انا احتكيت بمدونين كتير وللاسف فة ناس منهم طلعت مش ناس والواحد بيفرح لما يلاقى حد محترم بيدون ..مش هينفع اقلك دون تانى عشان انت اكيد فكرت وخدت قرارك..بس كل اللى هقدر اقولهولك ..

خليك ايجابى متبقاش سلبى ومتسمحش لحد يحبط عملك بس

دى اول مرة اعمل كومنت عندك بس مش اول مرة اقرا حروفك . انا علطول بقرالك بس مش بسيب كومنت غير لما احس انو فى حاجة عايزة اقلهالك :)

ميت يقول...

بص بقي يامينا
من الأخر كده ، ومن غير لف ولا دوران
وعشان تبقي علي البلاطه
هتدون يعني هتدون ، بمزاجك أو غصب عن هتدون ، وأنا بقي بضهدك ،أه إنته أقليه وأنا أكثيره وبضهدك ، إنا إخوان وإنته مسيحي وبضهدك وبقولك مالكشي خيار يابني غير التدوين شئت أم أبيت ، لأنه مش بمزاجك
ولو وصلت إني أطلع لك خليه من مليشيات 8 إبريل وتعتقلك وتعذبك عشان تدون هعملها
تحياتي
الإرهابي ميت

مـحـمـد مـفـيـد يقول...

انا لم اعرفك لا منذ قريب جدا وده يمكن تاني تعليق لي عندك
طالما لينا كلنا هدف وفي مشروع رسمناه يبقي لازم نناضل ونكافل ونقاتل من اجله
لاتلقي الفوطه ولا تجعل الاخرون ينظرون اليك بعين المنهزم

استرح وعد الينا في اقرب فرصه ولنعتبرها استراحه المقاتل

ذو النون المصري يقول...

اخر ما كنت اتوقعه
اقرب ما ليه اودعه
من غير ما اشوفه
و لا اسمعه
و لا اشاركه لحظة مصرعه
شجر الزتون
يطرح سموم
يرميها من كتر الهموم
ع الارض
تحرق موضعه
ندبح تاريخنا
و نسلخه
و ان فاق ضميرنا
نوبخه
و بسن حامي
نقطعه
و نضحي بيه
و نوزعه
ييجي الشتا من غير مطر
و كانه غضبان م البشر
و الصيف اشد م التتر
بيموت اللي بنزرعه
اعطش
و ترويني الدموع
و الصبر مخلوط بالشموع
و الفجر موصوف له الطلوع
بس اللي يطلب مطلعه
نتبني كدب نسيده
و نعيش معاه و نايده
و نكون دعاته و ننشده
و اللي يعارضنا نمزعه
اخر ما كنت اتوقعه
......................
الشعر من كلمات /صبحي سعيد
شاعر اقليمي من كفر الشيخ
........................

mohmmed eltaher يقول...

ايه ياعم انت
بص سيبك بقى من الكلام دا ودون تانى اصلها مش ناقصه والنبى
وبعدين انا فاكرك غير كدا خالص بجد زعلتنى يا مينا
بص ياعم اسألك نفسك تانى انت كنت بدون ليه
انت حققت اللى انت عايزة من التدوين؟
وبعدين بعد التعب دا كله تيجى تجيب درفها
بص ياعم انا مستنيك على البورصه يوم الجمعه الجايه من الساعه 5 العصر لو فاضى تعالى
عوووودى يا هاميس
اقصد
عووود يا جرجس
صدقنى التدوين بقى جزء مننا وانت هتحس ان فيه حاجه نقصاك ارجع أحسنلك

مصرى يقول...

مايكونش الجاج جرجس ده
هو جمال الدين الافغانى وانا مش واخد باللى؟
نضال وكفاح و الوطن والدموع وصفوف الجماهير..تصدقوا ان عالم خايبه وعلشان كده حلال فيكم اللى حكومه بتعمله فيكم..بدل ما تقعدوا تتحايلوا وتعيطوا فكروا هتعملوا ايه
آل مثقفين آل

غير معرف يقول...

انا دايما بقرا مدونتك لكن اول مرة اكتبلك تعليقاتى بص انت حر يا سيدى فى قرارك فهذا ابسط حقوقك لكن كلنا كمفكرين وسياسيين وعمال وفلاحين وموظفين محبطين لكن كمناضلين غير محبطين وسنواصل النضال لان المسيح لم يعطنا روح الفشل بل الحق والقوة والنصرة والرب معك ومع مصر والمصريين

غير معرف يقول...

انا دايما بقرا مدونتك لكن اول مرة اكتبلك تعليقاتى بص انت حر يا سيدى فى قرارك فهذا ابسط حقوقك لكن كلنا كمفكرين وسياسيين وعمال وفلاحين وموظفين محبطين لكن كمناضلين غير محبطين وسنواصل النضال لان المسيح لم يعطنا روح الفشل بل الحق والقوة والنصرة والرب معك ومع مصر والمصريين

عولق المتعولق يقول...

وأعلن أنني سأرجع لأصير مواطنا عاديا بين صفوف الجماهير

---------------

لا لا لا

لا تتنحى لا تتنحى
يا اخي احة ...ياخي احة



انتا عايز الناس يبوسو رجلك ولا ايه

يا نهار ابيض يا جدعان

الواد صدق نفسه

تقولشي وائل عباس في اخر ايامه

يا اخي احة جدا

غور يا عم انتا وشخروزة صاحبتك

جتكو القرف
مليتو البلد

7ntklm يقول...

كويس يا مينا انك فتحت الكومنت انا لسه ملاحظ دلوقتى .

واكيد انت شفت رسالتى ليك على بلوج نوارة .

ياريت يا مينا تكون فترة توقف وسترخاء للمواجهة فيما بعد .

ولزم تعرف ان مفيش حاجة اسمها توقف عن التدوين لان العرفة عن مينا من خلال اطلعى على البلوج بتاعه كفاية حرام .
ان مش هيقدر يوقف اعصابة وحبة للوطن وصحابه وكل انسان بيعسى للاصلاح او التوعية وتفكيره عن ما يدور من فساد وانتهاكات .

ادخل فى اقرب وقت اتناقش معانا لو انت لسه حاسس بضيق

غير معرف يقول...

يا عم الحاج لو كان فعلا انت غرضك انك تعتزل التدوين كنت قفلت التعليقات او مسحت المدونه باكملها لكنك مثلك كمثل صديقاتك المدونات الذين يتمنون النداءات والتوسلات ما تقولش ان مصر هتضيع من غيركم
والله عجبت لامركم

Amenhotep®© يقول...

أنا مثل غيري من القارئين لمدونتك الجميلةو المتابعين لها في صمت و أنه من الرائع أن نري شخصية مسيحية مهتمة بمصلحة البلد لهذه الدرجة.لن أطلب منك أن تعدل عن قرارك ,تستطيع أن تتواجد حتي وان لم يكن كما سبق,و كل عام و أنت بألف خير بمناسبة الأعياد القادمة.,,

bentfalestine يقول...

انت حر باي قرار تتخذه و اي قرار وانا باثق انه مسؤول عنه .. بس جمله انه معدش اشي اقدمه سياسيا دي استفزتني يعني انا لما احس اني مش قادره اقدم اشي سياسيا لوطني اعتزل الناس؟؟
انا معرفتي فيك صغيرة زمانيا و لكني على ثقة انها منذ فتره طويله روحيا ..اتمنى انك تكون بخير عشان على الاقل نطمن عليك و قرار التدوين دا قابل للنقاش اذا انت حابب تناقش في .. مش يكون قرار نهائي غير قابل للتراجع او التشاور في؟؟
مش حقولك رح اعتزل التدوين لحتى ترجع بس رح استمر في التدوين عشان ترجع مش رح انسى انك في لحظة من اللحظات شجعتني ع التدوين و اصبحت ملمهمي التدويني تتراجع ؟؟
اشوفك و انت بخير و انت زي ما انت .. تحياتي القلبة و مودتي دوما

غير معرف يقول...

هل تعرضت للضغوط من المباحث؟؟
خلينا نتناقش ونتكلم
عنواني الالكتروني موجود على المدونة
اصل بصراحة خسارة مدونة اصبح لها قراء ونشطة بهذا الكم تتقفل
خسارة
سردية
شريف الصيفي

ذو النون المصري يقول...

انا باسمع كلمة المعركه عند نواره
و بلطجية التدوين
و عاوزيننا نمشي
مش فاهم صراحه جذور المشكله
ياريت اي حد بيدخل هنا يعرفني لينك نواره
.............

alnadeem يقول...

المواطن اللي مسمي نفسه أولأ المتأولأ ده

الواحد يرد عليك يقول ايه بس
كفايه عليك إسمك
واضح انه معبر عن شخصيتك

sokoothansawat يقول...

الجميل الحاج جرجس..معرفش ليه بقولك جميل مع اني ماشفتكش والحقيقة كمان اني مااعرفكش..ودي اول مرة ازور مدونتك واول بوست اقراه هو بوست اعتزالك...لكن الحقيقة..ان اول مره اسمع عنك كان ساعه اعتصام التحرير..كان ليا زميل هناك وكل شوية يبلغني باسماء الناس الي اتاخدت و احطه على البلوج بتاعة..من هنا عرفت اسمك..وعرفت عالم التدوين..والحقيقة ان من ساعتها والأمر بقى ادمان بالنسبه ليا..فمش عارفة انت ازاي هتخلص منه...المهم ان كل الكلام الجميل الي مكتوب هنا..خلاني احس بحاله عالية من التقدير ليك...الي اعتقد انها اكيد في محلها...انا لسه عند رأيي ان الصورة لسه مش واضحة في اذاهان الناس ايه الخطوة الي جايه..كله عارف دلوقتي الوضع شكلة ايه..لكن بكرة عبارة عن طلسم كبير محدش عنده جرأه يفكة..و زي ما كان رايي ان قرارك صح ولازم تقفل كفاية حرام..لان كفاية اصبح شعار مستهلك كفاية عليه لحد كده ...زي ما رايي دلوقتي بعد المظاهرة الجماهيرية الي عالتعليقات هنا بقولك خد اجازة وابدا من جديد..بفكر جديد..وهدف جديد....وحتى ناس جديدة...لو طريق صلاح سالم ما بيوصلش تعالى نجرب الأتوستراد...جايز يكون اقصر...خد بإيد كل الناس التايهين الي لسه مش فاهمين..وتعالى نعدي لبكرة...انا بكره الكلام الأكلاشيهات...المحفوظ الي فقد معناه...زي من جد وجد و من زرع حصد..لكن يحضرني اكلاشيه..مش لاقيه حاجة اصدق منه دلوقتي....كلام الجميل توماس اديسون..الي جرب 100 تجربة قبل ما يوصل للمصباح الكهربائي..فقال انا ما فشلتش ميت مره..انا لقيت 100 طريقة ما تنفعش.

غير معرف يقول...

اعتقد انك اخذت القرار الصائب يا مينا , انا اعرفك جدا و اعرف قلبك و اعرف ما تفكر به و كنت اصلى انك تكون فى المكان المضبوط و ليس مجرد مظهرات بتقوم بيها . لعل الظروف هى ما قد دفعت بك الى هذا القرار و اشكر ربنا على هذا . اعتقد ان مكانك انت عارفه كويس جدا و ليس ببعيد عنه بل قريب جدا منه . المكان المفضل بالنسبة لك و المكان اللى انت دفعت فيه الثمن و ضحيت فيه كثيرا و تريد ان تكمل المشوار فيه و هو طريق واحد . وانت عارفه كويس . اشجعك على قرارك هذا لعلك قد فوقت من الغفلة هذه . انت شخص غالى على قوى يا مينا و انا اعزك مثل اخى و لن يخطر ببالك من هو الذى يكتب اليك يا بطل و صديق العقبة .

ikhnaton2 يقول...

مش عارف ليه عندى احساس إن دى اكذوبة أول أبريل. على العموم ملعوبة يا حاج، كنت هأعملها قبلك :)

3rby يقول...

اولا الاخ عولق المتعولق:
بطل علوئية يا علء

الاخ جرجس:
اولا انا كنت متوقع الحكاية ديه بقالي فترة بس ماكنش عندي وقت اقولك للاسف
انت بس انتجت كتير اوي في فترة صغيرة اوي اوي
يعني كنت بتكتب موضوع كل يوم وساعات اكتر
كنت مدايق من كده بس كنت حاسس انك فرحان
يعني الاول مواضيعك التحليلية العميقة كانت حلوة جدا زي المواطن المصري العبيط
بس لما قلبتها نشرة وكده صحيح اتشهرت في فترة صغيرة اوي بس اكيد انت ماكنتش مقتنع باللي بتعمله فمارضتش اقولك
ده غير الاحساس اللي بيجي بعد المظاهرات والصوت اللي بيقول من جوا استفدت ايهبس الراحة بتاعة الزعيق والصوت العالي بتغطي عليه لكن كمية المظاهرات في الفترة الصغير غطت علي الصوت العالي وصوت ايه الفايدة ظهر اكتر
اكيد مواضيع زمان مفيدة اكتر علي الاقل المدونة بتبقي مختلفة عن الاخبار
انا بس باقول رايي
ممكن تعمل مدونة للاخبار وتسيب ديه للكتابة او العكس
كمان انت لو كنت استنيت ساعة واحدة بس بعد الشعور ده ماكنتش هاتكتب وكنت هاتفكر وتعرف ان القرار غلط
هم عايزنا نسكت
فترات الاكتئاب ديه جاتلي كتير وبتيجي علي فترات وبتعدي
يعني قرارك مش هايضرك لوحدك
فاكر فترة الاكتئاب الاجتماعية بعد حرب لبنان وبعد حوادث التحرش
انت كده بتضر نفسك وبتضرنا بانك هاتقفل المدونة ده غير انحالتك ديه ممكن تتنقلنا
لازم نعملك حجر
استجم شوية ونفض للي بيحصل لان اللي ماتغيرش علي مر 36 سنة مش هايتغير في السنة اللي بدات فيها تدوين وخليك هادي اكيد هاترجع في رايك وماتخدش في بالك المجهولين المعرصين دول

اسف لو رايي دايقك شوية بخصوص تغير اسلوب كتابتك

رب ضارة نافعة
تعرف لو سيبت التدوين هاتخلص من تدوينة كنت هاكتبها في زكري اول موضوع كتبته وكنت هاضحك كل واحد من المدونين علي نفسه
مش باقولك كده علشان تسيب التدوين
عادي يعني ابقي ردهالي
واسف علي الاتاخير لاني لسه قاري دلوقتي

arab girlscool يقول...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
شات انحراف
انحراف
منتديات منتديات عرب كول
غلا الروح
شات غلا الروح
شات صوتي
شات مغربي
قوانين الشات الصوتي
برامج كام وصوت

لكي لا ننسى دم أحمد علي مبروك