١٦‏/٠٣‏/٢٠٠٧

اخر اخبار المعتقلين من نشطاء كفاية

تحديث
الساعة الثانية وخمسة وعشرون دقيقة
ما زلنا الان منتظرين امام مبنى محكمة الجلاء حيث النشطاء المعتقلون يتم الان عرضهم امام نيابة قصر النيل بحضور عدد من المحامين ووسط حضور امنى مكثف امام مبنى محكمة الجلاء ( عدد عربات الامن المركزى امام المحكمة فى حدود عشر عربات امن مركزى وقيادات بالامن) تابعونا وسنوافيكم بالتفاصيل تباعا

_______________

تحديث
الجمعة 16/3
الساعة 12 ظهرا
يتردد الان انه يتم ترحيل 21 معتقل للعرض امام النيابة فى مجمع محاكم الجلاء
وسوف يتم موافاتكم بأخر الاخبار تباعا
_________________________

طبعا حضراتكوا عرفتوا إن الأمن منع المظاهرة التي دعت إليها حركة كفاية لرفض التعديلات الدستورية

المظاهرة كانت مفروض تتعمل في ميدان التحرير الخميس الساعة خمسة






حشود أمنية غير مسبوقة تكدست في كل شوارع وط المدينة وعشرات من عربات الأمن المركزي
(قوات تفوق في عددها بالتأكيد قواتنا التي عبرت القناة في 73)
الصور من عرباوي

قوات الأمن المركزي كانت محاصرة الميدان من الصبح


عربات الأمن المركزي كان لا يمكن حصر عددها وآلاف من قوات الأمن المركزي كانت محاصرة كل منطقة وسط البلد
أغلب الضباط كانوا بملابس مدنية
نجح بعض (نحو مائتي متظاهر أو يزيد) المتظاهرين في الاحتشاد أمام حزب التجمع الذي كانت تجري به مهزلة انتخابات الحزب الناصري وهذه قصة عبثية أخرى بس مش قضيتنا



بعض المتظاهرين في شارع طلعت حرب بعد أن قمع الأمن قيام المظاهرة في ميدان التحرير


لم يكن أمامنا خيار آخر سوى الانضمام لزملائنا المتظاهرين في شارع كريم الدولة أمام حزب "التجمع"
الصور من عرباوي

هتف المتظاهرون ضد التعديلات الدستورية وأيضا نددوا بفضيحة تخاذل النظام أمام إعلان العدو الصهيوني واعترافهم بقتل مئات الأسرى المصريين العزل إبان حرب
1967



برضه عملنا المظاهرة يا عادلي وبرضه صوتنا وصل للعالم كله إن شعب مصر رافض تعديلات الدستور
الصورة من الجزيرة نت


أثناء التظاهرة أمام حزب التجمع بدأت الأخبار ترد باعتقال العديد من النشطاء و
قد وصل عدد المعتقلين إلى 32 معتقل
أعلن المتظاهرون في تصعيد جديد للأحداث عن
اعتصامهم حتى يتم الإفراج عن المعتقلين


بسلامته كان بيصور وشوش الناس اللي في قلب المظاهرة...
الصورة من عرباوي

كان الدكتور عبد الوهاب المسيري - منسق حركة كفاية - تحدث للجمهور المحتشد وأكد أن الأمن حادثوه تليفونيا وأخبروه أنهم سيضربون بقبضة من حديد وأنهم لن يسمحوا بالمظاهرة بأي حال من الأحوال


عبد الوهاب المسيري يكاد ينكفئ على الأرض أثناء هجوم قوات الأمن على المتظاهرين وضربهم
الصورة من العربية نت

وصلت الأخبار أثناء المظاهرة بأن زملاءنا المعتقلين تم ترحيلهم بعربات الأمن المركزي إلى الدراسة
ثم بعد ذلك وقفت بهم عربة الأمن المركزي فترة أمام
إدارة مكافحة النشل في صلاح سالم!!!

نتهي اليوم بخبر عن ترحيل المعتقلين و
احتجازهم في قسم شرطة الضاهر

يتم فض الاعتصام نحو منتصف الليل بعد ورود أخبار عن الإفراج عن 2 من المعتقلين

فيما يلي بيان بأسماء من تم اعتقالهم ويليه بيان بأسماء من تأكد الإفراج عنهم من بين المعتقلين

أسماء من تم اعتقالهم بحسب ما ورد من موقع كفاية

1 أحمد عبد الجواد

2 كريم رضا

3 محمد عادل صاحب مدونة ميت

4 عمرو عادل

5 عبد الهادي المشد

6 رامي توفيق

7 نائل يحيى

8خالد عبد الحميد

9 أحمد محمد

10 عبد الحميد عرفة

11 أحمد الجندي

12 وليد صلاح

13 أحمد علاء

14 محمد عبد اللطيف

15 بهاء صابر

16 ناجي رشاد

17 عمر إبراهيم

18 محمد مالك

19 حسام شعبان

20 محمود الورداني

21 ليلى عبد الحميد

22حمادة فيصل

23جاد الاسلام جمال

24فيكتور نجيب

25أحمد أبوستيت

26محمد محمود الشهير بعلي

27عامر عبد المنعم

28بلال (حزب غد)

29إسلام (حزب التجمع)

30مصطفى سيد اسماعيل (المدون مصطفيتش)

31محمد الطاهر (مدونة مواطن مصري واخد على قفاه)


ثم تم الإفراج عن المجموعة الآتية أسماؤهم

أسماء من أفرج عنهم

1-محمد الطاهر

2-عبدالخالق فاروق

3-أحمد الجندي

4-محمد إسماعيل,

5-فتحي فريد

6-أحمد اسلام

7-صلاح الوتيدي

8-محمد عبدالسلام قطري

9-محمد سعدعبدالحفيظ

10-محسن سميكة

11-د.يحيى القزاز

12-محمد بدر


تابع التفاصيل وآخر الأخبار عند منال وعلاء
وعلى موقع كفاية
وعلى مدونة النديم

واقرأ تغطية زنزانة لليوم
وتغطية دماغ ماك أيضا للحدث منذ بداياته الأولى
اقرأ تغطية العربية نت
والجزيرة نت
والبي بي سي أرابيك

For details about the demonstration & the detention of activists in English
Visit 3arabwy
& Noura Younis
============


هناك ٥ تعليقات:

bluestone يقول...

يادي النكد اللي على الصبح
توقعت بعض اللي حصل بس مكنتش متوقعة العنف ده
واضح ان ده اللون الجديد ولازم ناخد عليه .. المرحلة اللي جاية من أزهى عصور الديموقراطية ..

قلت قبل كده المظاهرات مش هي الحل المناسب دلوقتي
يا جرجس .. المظاهرات لا يشارك فيها إلا النشطاء والنخب
الشعب نايم في العسل والامر لا يهمه
وستبقى المعارضة على وادي
والناس في وادي تاني

سواق تاكسي قاللي من كام يوم لما سألته رأيك ايه في التعديلات الدستورية .. قاللي انا معرفش اصلا الدستور ده بتاع ايه ولا ايه فايدته اهم حاجة قوت عيالي .. هو الدستور هيوكلني)
ده المنطق اللي الناس بتتعامل بيه دلوقتي

لازم يبقى في آلية جديدة لمواجهة المهزلة اللي احنا فيها
لا الشعارات ولا مظاهرات كفاية والكلام ده ليه اي فايدة

هتمر زي غيرها

لازم تشتغل على الناس الاول .. لازم الناس تفهم ان يعني ايه دستور
وقد ايه مهم لحياتها اليومية واكل عيشها

ولما الناس تفهم هيتحركوا لوحدهم لما الأزمة تهدد لقمة العيش ..

اضراب واحد بألف مظاهرة يا جرجس
ولنا في رجال غزل المحلة مثالا رائعا

tota يقول...

الحج جرجس
ولا اى ايد هتقدر تسد النفس ولا تمنع نسمة الهوا تدخل الرئة
عايزين يسدو الكلام فى الحلق حتى الكلام بقى عزيز فيكى يا بهية
بس وحياة كل لحظة قلق وخوف عشناها ونفسنا مخطوف عليكم لا يجى يوم يكون كل نفس بتطلعوا من صدوركم برقبة كلب خاين من الكلاب اللى مالية بهية
اللى ايديهم مش طاهرة ولا نظيفة علشان تلمس واحد بيدافع عن حقه فى انه يعيش فى بلد ه من غير ظلم
الايدين القذرة اللى قبضت على ناس بطالب بحق بسيط حق حرية الانسان فى بلده من غير ما يسىء لحد ولا يخرب
وحياة غلاوة جنودك اللى اتهانو ومماتوش موتة الشهدا الاشراف اللى راحوا الحرب علشان يموتوها وكانت ايد مدنسة قذرة سبقاهم لموتة ما يرضهاش اى حد لتكون نفس الموتة دى مصير الخرس اللى هان عليهم دم ولادهم حتى الموتة دى هتكون بعيد عن منالهم
طول ما فى لسه ناس بتقول لا عمر الامل ما هيموت وهنفضل احنا عايشين على صوت امالهم
حمد الله على سلامة كل واحد رجع سليم والف سلامة على كل واحد ايد اتمدت عليه وعودة حميدة لكل معتقل افرج عنه وقلوبنا مع كل واحد داخل سجن علشان كلمة حق فى وش ظالم

غير معرف يقول...

isn't there some protest we can do...as bloggers..?! like a blank post.. the song as some did..?! we could do that!!


the news are terrible so far

Allah yostor

مراقب مصري يقول...

العزيزة نوارة

أبكيتيني وأنا أقرأ كلمات أغنية فيلم البريء وأسمعها في ذات الوقت... عموما الحمد لله إن زملاءنا أفرج عنهم جميعا وخرجوا بالسلامة
============

العزيزة بلوستون

طبعا الشغل على الناس مهم بمعنى رفع وعيهم وجعلهم يخرجون برة منظومة الغباء اللي حطهم فيها نظام مبارك لمدة 26 سنة لكن في الوقت ذاته التظاهر يبقى فعلا مهما ومؤثرا والدليل أنهم يقاومونه بكل هذا الغباء وكل هذه الغشومية... وفي النهاية أردنا بتظاهرنا توصيل رسالة للنظام وللرأي العام وللعالم كله بأننا لسنا مشاركين في طبخ هذه الطبخة الدستورية الوسخة وأن ما سيعلنونه قريبا من أن البرلمان وافق على التعديلات ثم بعد ذلك الزفت الشعب وافق - في استفتاء مزور قطعا - على التعديلات سيكون كله مزورا وغريبا عن إرادة الشعب... الرسالة وصلت فالنظام عرف إننا مش هنسكت على الوساخة اللي بيعملوها وأيضا الرأي العام وصلته الرسالة من خلال ما سمعوه عن المظاهرة وعن الاعتقالات التي حدثت بسبب رفضنا للتعديلات الدستورية وكذلك العالم كله عرف برفضنا وشاركنا الرفض والتنديد بما يفعلونه والنهاردة مثلا العفو الدولية أعلنت تنديدها بتعديلاتهم ودعت نواب البرلمان لرفض التعديلات

وفي النهاية نشكر السادة اللواءات والسادة رجال أمن الدولة وطراطير الشرطة كلهم نفرا نفرا على غبائهم وغشوميتهم التي أدت إلى مزيد من توصيل الرسالة للعالم كله وللرأي العام في مصر... كل مظاهرة وانتوا أغبيا وربنا يخلي لنا غباءكوا ويحمينا من غشوميتكوا
============

الرائعة دائما توتا

دولة الظلم ساعة ودولة الحق حتى قيام الساعة

شكرا على كل شيء
وأدين لكِ بالكثير جدا
=============

Epitaph

ممكن طبعا تعملي حاجات كتير
منها النشر والتعليق على ما حدث ويحدث
وممكن تعليق بانرات تشير إلى المظاهرات والوقفات التي ستعقد وإرسال لنكات ما ننشره على مدوناتنا بالإيميل لكل من تعرفينه وهكذا
افتكسي بقى وهتلاقي حاجات كتير أكتر مما تخيلي ممكن تعمليها
وطبعا دا لا يقل أهمية عن حضور المظاهرات بنفسك وكلنا بنكمل بعض

شكرا ليكي

غير معرف يقول...

It's going to be end of mine day, except before end I am reading this wonderful article to increase my knowledge.
My weblog ; rainbow titanium ring

لكي لا ننسى دم أحمد علي مبروك