٢٩/٠٣/٢٠٠٧
٢٦/٠٣/٢٠٠٧
يحدث في مصر الآن... سحق القانون بالبيادة الميري
المصري أفندي يكتب من قلب الحدث:
عن مهازل تجري في اللجان النتخابية ويؤكد أن الإشراف القضائي وهم كبير ولا يوجد قضاة في اللجان بما يؤكد أن تنفيذ المادة 88 المعدلة التي تلغي إشراف القضاة على اللجان قد بدأ تنفيذه فعليا قبل حتى التصويت على التعديلات الدستورية
وأيضا أنباء عن انخفاض الإقبال على اللجان الانتخابية وخطف أربعة جدد من نشطاء كفاية
وشحن الموظفين والعمال و طلاب الجامعات إلى لجان الانتخاب للتصويت بدون حتي اثبات للشخصية
سيبكم بقى من قصة الاستفتاء ومهازله
ونرجع لزملائنا المختطفين
عندنا ما يزيد عن عشرين زميل من زملائنا اللي اتخطفوا امبارح ما يزالوا مجتجزين داخل عربتي ترحيلات ومرميين في الصحرا في العربيات... 19 ساعة محبوسين جوة العربية دي إنتوا مش متخيلين حجم التعذيب اللي بيتعرضوا له... لا هو ولا إضاءة ولا أكل ولا شرب ولا حتى قضاء الحاجة... وطبعا كلاب الداخلية اللي خاطفينهم مش عايزين يعرضوهم على نيابة ولا حتى يحجزوهم في قسم لأن هما عارفين إنهم عصابة وإن اللي بيعملوه فينا مش قانوني وبالتالي هما قرروا يدوسوا القانون بالجزمة ويدوسوا على أي قيمة نبيلة لسة ما ماتتش
============
وعلى هامش الأحداث
مساخر على عينك يا تاجر
البابا شنودة يدعو أتباعه إلى المشاركة في الاستفتاء والموافقة على التعديلات الدستورية
نوارة نجم تكتب عن صفقة قذرة لبيع الورد "يا معلم"!
وزنزانة تنتقد القيادات الذين تقاعسوا عن حضور الاعتصام
والتدوينة الجدلية التي نشرها المدون الإخواني النشط أحمد عبد الفتاح
والتي يزايد فيها على كل التيارات السياسية ما عدا الإخوان
وأيضا يزايد فيها على وطنية أشخاص بعينهم من المدونين والنشطاء
(أهي فورة غضب من ناشط محبط بسبب ما رآه بالأمس أم أنها تعبير عن عقلية إخوانية استعلائية تكفيرية إقصائية؟)
أنا شخصيا مش عاوز أحكم... اقروا انتوا واحكموا
٢٥/٠٣/٢٠٠٧
مبارك بدأ ضرباته الاستباقية لسحق المعارضة ضد تشويهاته الدستورية
أنباء تتردد عن اختطاف الأمن لجورج اسحاق واحتجازه من قبل جهاز أمن الدولة
ولا يزال مصيره مجهولا وحركة كفاية تدعو كافة المدافعين عن الحريات العامه وحقوق الإنسان بمطالبة السلطات المصريه بالإفراج عنه وتؤكد كفاية ان هذا الإجراء الهمجي من الأمن المصري لن يثني نشطائها عن الإستمرار في تظاهراتهم وإعتصامتهم وفعاليتهم ضد تزوير دستور مصر
كذلك قرر النظام أن "يديها كمان حرية" حيث تمت مصادرة العدد الجديد من جريدة الكرامة من قبل أجهزة الأمن المصرية
لكون العدد صادرا متشحا بالسواد حدادا على التشويه الدستوري المزمع إقراره وحمل الجريدة بوسترا لحركة كفاية بعنوان معا لخلع الدكتاتور

صورة من البوستر الذي حملته جريدة الكرامة المصادرة
(نقلا عن موقع حركة كفاية)
والآلاف من قوات الأمن المركزي تحاصر ميدان التحرير قبيل الموعد المحدد من قبل الحركة المصرية من أجل التغيير(كفاية) للاعتصام المفتوح الذي دعت إليه في الساعة السادسة من مساء اليوم الأحد 25 مارس 2007 للإعلان عن استمرار الرفض الشعبي للتشويهات الدستورية المقترحة من قبل النظام والتي ترسخ لدولة بوليسية تسحق الحريات والحقوق الأساسية للإنسان
نراكم في الاعتصام المفتوح في الحديقة المستديرة لميدان التحرير
الساعة 6 مساء اليوم وحتى صباح اليوم التالي
ولا أراكم الله مكروها في دستور لديكم
٢١/٠٣/٢٠٠٧
من مذكرات وطن يلفظ أنفاسه الأخيرة... عن تجربة اختطافي أكتب
الساعة 12:00 ظهرا
مينا: أيوة يا سارة إنتي فين؟
سارة: الطريق من الجيزة واقف... هقابل أحمد ونجيلك إنت فين؟
مينا: أنا في شارع قصر العيني وقربت من المكان... هستناكو
=====
مينا: أيوة يا أحمد سلامو عليكو (على أساس إن احمد إخوان وما ينفعش أقول له صباح الخير)
أحمد: وعليكم السلام أنا في التحرير مستني سارة وجاي لك إنت فين
مينا: أنا قدام شارع مجلس الشعب والدنيا لبش (أسير قدما في شارع قصر العيني على أمل ألاقي حد من الزملاء)
أحمد: خمس دقايق واكون عندك
=====
اللقاء المحوري:
الساعة 12:10 ظهرا
جيمي هود وهشام طليب يسيران معا في شارع قصر العيني قادمين من اتجاه التحرير ويقتربان من شارع مجلس الشعب فيلقاهما مينا فيلف معهما ويرجع تاني إلى ناصية شارع مجلس الشعب مخبرا إياهما بأن "الدنيا لبش جدا" عند شارع المجلس والمكان كله "متكردن" وشكله كدا هيبقى فيه اعتقالات تاني وخير إنشاء الله
في تلك اللحظات ينضم للثلاثة رابعهم فتحي فريد وهو مدمن اعتقالات وواخد موضوع الاعتقالات ده احتراف مش هواية... يرى ضابط الأمن المركزي (أبو شنب كث وجسم مصارع وإن كان بكرش وبيلبس نضارة شمس عادة) يرى فتحي فريد فيناديه قائلا له "ابعد يا فتحي مش هينفع"... فيعبر فتحي ورفاقه الشارع ليأتي الأمر في غضون 15 ثانية باختطاف الجميع من على الرصيف المقابل لشارع مجلس الشعب...
======
لحظة الاختطاف
طبعا بدأوا بمحاصرتنا نحن الأربعة والتعامل معنا وكأننا مجرمين أو أننا خطرين أشقياء... وطبعا المعاملة الزفت لم تخلُ من شتيمة هنا وشتيمة هناك... أنا شخصيا تم ضربي وركلي "بالشلوت" كذا مرة أثناء تقييد حركتي... وكل ما كنت أحاول التأكد منه هو أننا سنكون جميعا في عربة واحدة... كان كل خوفي أن أؤخذ وحدي في عربة منفردة ويأخذون الآخرين في مكان آخر. كان أمر اختطافي قد صدرعن ذلك العتل ضخم الجثة كث الشارب قائلا لهم "هاتوا لي أبو دقن ده"... يبدو أنه كان فاكر شاكلي من يوم ما كنا معتصمين أمام محكمة الجلاء ساعة تحقيقات النيابة زملائنا اللي خطفوهم في "القبضية" الأولى يوم مظاهرة 15/ 3... طبعا في تلك اللحظات كان قد تم شل حركة أربعتنا وبدأوا في "تقليبنا" وإخراج الموبايلات من جيوبنا... وبدأوا يصرخوا فينا "بطاقتك الشخصية"... صرخت بدوري "وهو انا عارف أحرك إيدي عشان أطلع البطاقة"... كنت في تلك اللحظات تأكدت أن أربعتنا يصعدون معا نفس العربة... عربة الترحيلات الزرقاء... تلك التي كان مجرد منظرها من الخارج دائما ما يشعرني بالانقباض لمجرد تخيل أن شخصا ما يقبع في داخلها بلا هواء نقي ولا ضوء كافي!!!
على مدخل عرة الترحيلات سألونا عن أسمائنا ولكم كان إحباطهم عميقا عندما قلت لهم اسمي الثلاثي واكتشفوا أن "قضية الإخواني النشط" باظت عليهم على أساس إني مسيحي والدقن دي ليست ذات صلة!!! عندما عرفت نفسي قلت الدكتور فلان الفلاني ويبدو إن منظومة قيمنا المجتمعية لا تزال تعتبر الطبيب قيمة وسيما ولا تزال عقدة النقص اللي عند الظباط - ومن ثم صف الضباط وأمناء الشرطة - من أنهم كان نفسهم يكونوا دكتور وهما صغيرين بتعمل شغل جامد لأني لقيتهم اتبطوا جدا لما عرفوا إني طبيب وبدأوا يسألوني عن تخصصي ويتعاملوا معايا باحترام... المهم صادروا أيضا كاميرتي الديجيتال وباسبوري إلى جانب موبايلي... وإذ أخذت موبايلات الجميع لم نتمكن من إبلاغ أي أحد باختطافنا!!!
=========
داخل عربة الترحيلات
كان فتحي فريد هو الخبير بأمور الاعتقال السياسي فينا وبدأ يطمئننا أن عادي الموضوع بسيط ويا دوب بس هيلفوا بالعربية بينا لحد حداشر بالليل وبعدين يودونا أي قسم ونتعرض على النيابة تاني يوم والموضوع بسيط هناخد خمستاشر يوم حبس لحد ما الاستفتاء يعدي.... يا سلام يا عم فتحي على تفاؤلك يا حبيبي... مش عارفين من غيرك كنا هنعمل إيه... لمعلومات حضراتكم... فتحي خبير الاعتقالات هذا هو طالب في جامعة الأزهر وعمره 19 سنة وشوية... وبالطبع كان هو أصغرنا... بس في الظروف اللي زي كدة الزعامة مش بالسن... الزعامة بالخبرة
قبل ما يقفلوا علينا باب عربية االترحيلات طلبت من الكباتن اللي خطفونا - وبمنتهى الألاطة اللي في الحياة - أن نقوم بإجراء مكالمة تليفونية فهذا حقنا القانوني... طبعا قمة الاستهبال في الحياة مني إني أتصور أن الأشكال دي مقتنعة أصلا بالبتاع دا اللي باحكي عنه اللي اسمه القانون!!
طلبنا منهم أن يحضروا لنا ماء وأن نقضي حاجتنا... ما هو محدش عارف إحنا هنقعد على الحال ده لحد إمتى... جابوا لنا إزازة مية فعلا بعد شوية ورفضوا أن يخرجونا لقضاء حاجتنا.... كان تعذيبا حقيقيا أن تكون سجينا في صندوق معدني مغلق - إلا من بضع فتحات ضيقة جدا مغطاة بالسلك المعدني - وفي ذات الوقت تعاني من امتلاء مثانتك إلى حد مقاربة الانفجار... نعم كان تعذيبا حقيقيا خصوصا وأنت تحت ضغط نفسي رهيب لعدم معرفتك بما سيحدث لك وإلى أين سيأخذونك - وكل الاحتمالات مفتوحة - وأيضا في ظل اختطافك دون أن يعلم أحد عنك شيئا فلم نتمكن حتى من إجراء مكالمة أخيرة نخبر من هم في الخارج أننا قد اختطفنا
كان فتحي فريد في تلك الأثناء قد تم تعيينه - بإجماع صامت من جهتنا - متحدثا رسميا باسم مجموعة الأربعة المختطفة من شارع قصر العيني من أمام مجلس الشعب على أساس خبرته "المهببة" في الاحتجاز والاعتقال... ومن ثم فقد كان يصرخ فيهم من إحدى فتحات عربة الترحيلات طالبا من سيادة الرائد (وأعتقد أنه من ذوات الدم البارد) أن يمكننا من الخروج للحظات لقضاء حاجتنا... ولم يرد ذلك الرائد (والذي أعتقد أنه أحد التطورات الطبيعية للحاجة الساقعة) أبدا على صراخ فتحي - ممثل الشعب المختطف في تلك اللحظات - كان لابد من اتخاذ رد فعل قوي ومؤثر يجبر زبانية الجحيم أولئك على الإنصات لمطالبنا والرضوخ لها حيث أنها مطالب "طبيعية" جدا و"ملحة" جدا جدا... كما أنه كان من مصلحتهم ألا نلوث لهم عربة الترحيلات من الداخل بسيول الماء الدافئ التي كانت ستجعل جو ذلك الصندوق المعدني جحيما لا يطاق كنا نحن أول من سيتضرر منه...
صدمني حتى الغثيان رد فعل أحد أمناء الشرطة لمطالبتنا بقضاء حاجتنا عندما رد ذلك العتل الزنيم علينا قائلا "يا ابو شخة"... لا تتخيلوا حجم الصدمة النفسية التي شعرت بها من جراء رد الفعل المقيت هذا... إنه لا يدري من الذين يهينهم هذا النكرة... أهذا هو جهاز الشرطة الذي يقول دستورنا - الذي يسعون لتشويهه - أنهم في خدمة الشعب؟ أهؤلاء هم من نستأمنهم على أمننا وعلى خدمة مصالحنا بل والأخطر على تنفيذ القانون وأحكامه!! يا للعار!!
بدأ رد فعلنا عنيفا جدا ويعبر عن اعتراضنا على إهانتنا وتعذيبنا بهذه الطريقة القذرة فقد بدأنا بـ "خبط" أرجلنا في أرضية وجدران الصندوق المعدني الخانق في عربة الترحيلات... كن نصدر جلبة كبيرة ومزعجة حقا على أساس أن نزعج تلك الكائنات (ذوات الدم البارد) التي تتعمد إهانتنا وسلبنا حقوقنا الإنسانية البسيطة... ولكن رد فعل تلك الكائنات الزاحفة كان أن بعضهم سارع بإغلاق جميع فتحات عربة الترحيلات من الخارج فصرنا نحن الأربعة سجناء في ذلك الصندوق المعدني بلا ضوء ولا أوكسجين... نعم إنني لا أبالغ!!! هذا هو ما حدث... لقد تعمدوا خنقنا... هل يعد هذا قانونيا جريمة تعذيب مكتملة الأركان؟ إذن فليكن اعتبروا كلامي هنا بلاغا للنائب العام بتعذيبي أنا ورفاقي داخل عربة الترحيلات فقد قضينا ما لا يقل عن ساعتين كاملتين بلا ضوء ولا هواء نقي - من أصل أربع ساعات ونصف قضيناها داخل عربة الترحيلات وفي ظل حرماننا حتى من قضاء حاجتنا ووسط سباب رجال الشرطة لنا وإهاناتهم المتكررة فضلا طبعا عن اختطافنا من الشارع أصلا بشكل إرهابي ينم عن بلطجيتهم القذرة وازدرائهم بالقانون والنظام العام وتكديرهم للسلم العام والأمن العام وإساءتهم إلى سمعة مصر وشرفها أمام العالم كله إذ يتم نقل هذه الصورة سيئة السمعة عن مصر وعن نظامها وعن أجهزتها الأمنية.. يا للعار تاني!!!

هتلر حرق الأقلية اليهودية في عصره ومبارك يحرق الأغلبية المصرية.. التطور الطبيعي للاستبداد
(أعتقد أن الصورة من حسام الحملاوي)ـ
تجربة الإزازة البلاستيكية وإهانة الذات الإنسانية
كانت مثاناتنا (جمع مثانة) على وشك الانفجار ولم يتبق أمامنا وسيلة لقضاء حاجتنا سوى نفس الزجاجة البلاستيكية التي كنا نشرب منها الماء... لم تكن الزجاجة قد فرغت بعد ولم نكن على استعداد أن نضحي بما فيها من ماء لمجرد أن نفرغ مثاناتنا... في تلك اللحظات لم نكن نعرف متى وأين ستتوافر لنا زجاجة أخرى من المياه كهذه... قررنا أن نشرب كب ما في الزجاجة من ماء ودارت الزجاجة بيننا في رشاقة مذهلة من يد إلى يد ومن فم إلى فم حت فرغت تماما... استعداد للحظة التاريخية التي انتظرناها جميعا... زجاجة فارغة - سعة لتر ونصف - وثلاث مثانات ممتلئة - من أصل أربعة ... وكما تناولنا الزجاجة واحدا تلو الآخر في عملية تفريغها تبادلناها - نحن المزنوقون - واحد تلو الآخر لنعيد ملأها من جديد حتى امتلأت إلى نهايتها وأغلقناها بإحكام
نحو الساعة الثالثة والنصف عصرا فتحوا ثلاث فتحات من فتحات العربة لإدخال بعض الهواء وبدأوا في الحديث اللين معنا (يبدو أن الأوامر كانت قد أتتهم بالتخلص من آثار جريمة اختطافنا سريعا حيث كانت وكالات الأنباء العالمية والمدونات وموقع كفاية بدأت بافعل في نشر أخبار اختطافنا غير القانوني من الشارع) وكان من بين ما سألوه لنا إن كنا نريد أو نطلب شيئا... أنا طلبت مكالمة تليفونية وطلبنا أيضا طعاما بينما كان أعلى إفيه والنكتة الجامدة أوي هي طلبي بأن يأخذوا الزجاجة الممتلئة ويحضروا لنا "الفارغ"!!!! وكان ردهم في الحقيقة نكتة أكبر عندما قالوا لي خليها معاك وهنبقى نجيب لكم غيرها!!!
يا خوفي ليفتكروا السائل اللي جواها بيرة!!!
=========
أوقات الفرج
بعد بعض الأحاديث التي تبدو ودية مع مختطفينا نفينا كوننا أُخِذنا في مظاهرة وهذا حقيقي فنحن لم نتظاهر أساسا - ومن قال أن فعل التظاهر جريمة أصلا - ولكنا اختطفنا من الشارع وحتى فتحي فريد فهو صحفي ومن حقه تغطية مؤتمر النواب المعتصمين... يبدو في تلك اللحظات أن الأوامر قد جاءت لهم بالتخلص من آثار جريمة الاختطاف وإطلاق سراحنا فردا فردا وإعادة كل متعلقاتنا... لكم أغبياء هم ولكم متسلطين هم... بدأت عملية إطلاق السراح بمناداتي باسمي ولقبي... "دكتور مينا"... عايزينك... كان كل خوفي أن يخلوا سبيلي وحدي ويتركوا بقية زملائي... ولكن الحمد لله تم إطلاق سراحنا واحد بعد الآخر
==========
في النهاية
إن وطننا بات يحتضر... وإن هذه التشويهات الدستورية هي المسمار الأخير في نعش هذا الوطن المثخن بالجراح التاريخية أصلا وغير القادر على احتمال المزيد من التشويه والعبث... نعم كنا في طريقنا لإقامة تظاهرة سلمية كنا قد أعلنا عنها ونعم سنظل نرفض تشويهكم للدستور وسنظل نرفض تقنين جرائمكم وفحشكم وفجوركم وسنظل نقول للحاكم الظالم أنت ظالم ومظلم وزبانيتك الذين يحمونك هم طيور الظلام الحقيقيين وأنت يا مبارك أنت وعائلتك وزبانية جحيمك تدمرون مصر وتخربونها... إن القضية ليست قضية أن نحبك أو أن نكرهك ولكننا نرفضك لأسباب شديدة الموضوعية لا علاقة للمشاعر بها ولكن لها علاقة بتاريخ أمة قد سطرت فيه أنت واحدك أغلب سطور سواده وحداده ووكسته السودا... نعم يا عزيزي إن ما "فعلته" أنت بمصر - على حد قولك - لم يفعله أحد فيها من أيام محمد علي!! فحجم التخريب في الاقتصاد والسياسة والتاريخ بل ومستوى الانحطاط القيمي الذي بلغته الأمة في عهدك هو انحطاط وخراب غير مسبوق في تاريخ أمتنا وربما في تاريخ أمم الأرض... قلائل يا عزيزي هم من خربوا خرابا بحجم هذا الخراب... لن أقول لك ليسامحك الله فهو لن يسامحك فالله الذي تكلم بالبركة لشعب مصر لن يغفر لمن يأتي باللعنة والخراب على نفس الشعب الذي باركه الرب... حقا يا عزيزي "كفاية" عليك كدة... وكفاية على عيلتك وكفاية لنظامك ومنظوتك الخربة فاسدة الذمة... كفاية خراب بقى!!! ـ
١٩/٠٣/٢٠٠٧
متابعة عبثية لقضية التشويهات الدستورية المباركية
إحنا ليه عاملين دوشة وبنقول نرفض التعديلات الدستورية والكلام دا كله؟
ببساطة التعديلات دي تشويه حقيقي لدستور مصر ومن المهم جدا أن نفهم أن أي دستور في العالم في أي دولة في العالم هو بمثابة كتاب تشريعها المقدس وهو أبو القوانين في تلك الدولة ولا يجوز العبث به كأن مواد الدستور دي لا مؤاخذة شوية شعر زيادة بتشيلهم بحلاوة!! وإشطة شغال... لأ بقى لا هو إشطة ولا هو شغال!! ـ
دا فيه مصايب سودا والشارع بيغلي والعالم كله مخنوق من مصر وبيتفرج على الهبل اللي بيهلوه وكأنهم بياكلوا طبق مهلبية (وكتر المكسرات حيات أبوك)...والنظام الأهطل مش متصور حجم الخراب اللي بيعمله في مصر وكيف سيكتب التاريخ أنه في عصر أحد حكامها - الذي كان يعاني من عته عقلي في حالة متأخرة - وابنه الذي يعاني من مونجوليزم غير قابل للعلاج أعادوها لعصور ما قبل التاريخ من خلال "حزمة" من التشويهات التشريعية التي أجروها على ما كان يسمى قبلا بالدستور الدائم لجمهورية مصر العربية
وقد تحولت مصر - يستطرد التاريخ - في عهد مبارك هذا وعهد ابنه جمال وعهد مراة الأول وأم الثاني إلى عزبة خالصة صرفة يتحكم فيها الثلاثة مع الابن الآخر اللي كان مشارك طوب الأرض في أكل عيشها "غصم واقتدار" - على رأي اللمبي- حتى قيلت نكتة عن أن أحدهم (طبعا أحدهم دا اترقى بعد كدة وبقى عضو ف لجنة السياسات) المهم إن أحدهم دا لقى مصباح علاء الدين ودعكه (سيبك من أن العفريت جاله تسلخات مش دي القضية) لكن العفريت طلع من المصباح وقال لأحدهم أنا علاء الدين صاحب المصباح... المهم أحدهم دعك المصباح تاني فطلع له عفريت تاني بيقول له وانا علاء مبارك شريكه في المصباح... وهكذا كانت مصر تحكم في تلك الحقبة المظلمة من تاريخ البلد
طب هو إيه مشكلة التعديلات اللي بنقول عليها تشويهات دي؟
سيبكم طبعا من إن التعديلات هتنسف كل ما يسمى بالمكاسب الاشتراكية التي اكتسبناها في انقلاب يوليو 52 وطبعا أنا راجل ليبرالي بورجوازي مش فارقة معايا الجزئية بتاعة المكاسب الاشتراكية دي اللي هتخلي الفلاحين والمال من هنا ورايح حشرات ونفاية بشرية كما كانوا في حجمهم الطبيعي قبل الانقلاب بتاع 52 وبحكم الدستور المشوه الجديد العمال والفلاحين دول بقى يروحوا ينتبهوا لشغلهم سواء في مصانع طبقة الأغنياء الجدد أو في إقطاعياتهم الزراعية كأجراء وعبيد بيشتغلوا عند سادتهم وما ينساش أي كلب فيهم نفسه ويروح يلعب سياسة ويمثل دايرته... خلاص كان زمان وجبر... وأما التعليم المجاني محدود الجودة فدا خلاص برضه بموجب التشويهات الدستورية مش هيبقى موجود وكله هيبقى تعليم عالي الجودة من هنا ورايح ومش هيتعلم غير الناس الكلاس والشباب الاستايل أما العيال البيئة الرمة اولاد الكلب اولاد بقية الشعب فدول يغوروا ف داهية يروحوا يتعلموا صنعة في أي ورشة ولا في أي مغلق خشب ولا يموتوا أحسن لأنهم مش نضاف أساسا وريحتهم وحشة
أما الأمن يا عيني على الأمن في ظل تشويهاتهم الدستورية فبموجب المادة 179 اللي هي لا مؤاخذة بتدستر حالة الطوارئ بشكل شرعي ودستوري سيمكن لأي ظابط عرة على كتفه أي حاجة بتلمع يعفقك من قفاك - وبشكل دستوري - وياخدك على الحجز لمجرد الاشتباه - وبشكل دستوري طبعا - لأنه فيه احتمال - ولو ضعيف - إنك تكون إرهابي ابن كلب وناوي تفنجر نفسك ومخبي مثلا المتفنجرات داخل مستقيم حضرتك وبالتالي سيتم فحص مستقيمك - وأيضا بشكل دستوري - وسيتم الفحص بعصا مقشة - دستورية أيضا - للتأكد من خلو مستقيم سيادتك من أي متفنجرات قد تؤذي الأمن العام أو تكدر السلم العام... وطبعا لو كنت ضارب كرنب وماشي في الشارع في بطنك متفجرات وغازات محرمة دوليا مثل غازي ثاني كبريتيد الهيدروجين وغيره من الغازات السامة فسيتم اكتشاف ذلك في القسم يا حلاوة أثناء الكفحص المستقيمي اللي هيبين إنك إرهابي وإبن كلب وسيتم نفخك يا حلو على منفاخ تمانية وعشرين ولما ينفخوك هينفخوك بغاز الهيليوم عشان تطير بخفة ودلع على أساس إن الحكومة هي الشابة وانت الجدع ومش هتعرف أساس وانت في الوضع الطائر هذا إنك تبص على رجليك فتقع
وفي ظل التشويهات الدستورية الجديدة سيتم إلغاء الإشراف القضائي الكامل على الانتخابات وسيصبح هناك لجنة اسمها اللجنة العليا للانتخابات قاعدين في مكاتب مكيفة بيشربه اسبرسو وكابوتشينو واللجان الانتخابية برة بيتم تقفيلها بعلم ومعرفة ظبابيط الأمن لحساب المرشح اللي عليه العين وإذا حاول حد من الكلاب أنصار المرشح اللي مش عليه العين يصر على موقفه ويخش يصوت ساعتها طبعا يطبقوا عليه المادة 179 بتاعة مكافحة الإرهاب ويطلعوا دين أمه ويفحصوه فحص مستقيمي - وكله بالدستور يا حلاوة - وابقى سلم لي ع المنفاخ وعصاية المقشة
عشان كدة منظمة العفو الدولية قلقانة جدا من التناحة الغريبة اللي الشعب الميت بتاعنا مستسلم بيها وهما بيفشخوه بالتشويهات العجيبة دي وكأنه مستمتع ومتلذذ بشكل مازوخي مرعب باللي بيحصل فيه والعالم كله مستغرب هو النظام الخرائي ده واخد البلد على فين في سنته السودا دي وكل دا وبتوع النظام يقولوا لك إحنا ولا يهمن من حد إحنا في بلد ديمقراطي الأغلبية هي تقرر والأقلية المعارضة من حقها تعترض بس تحط راسها برضه مطرح ما تحط رجليها وعادي كله ماشي... المعارضة تعارض وتجعجع وتضرب عن الجلسات وإحنا برضه أغلبية وهنقرر اللي احنا عايزينه وإحنا بلد ديمقراطي بنحترم فيه رأي المعارضين بس مش شرط إننا نعمل بيه وبعدين وعارضتهم دي يروحوا يمسحوا بيها ... مناخيرهم وا يقرفوناش
الشعب بيغلي... مش عشان التعديلات الدستورية بس بيغلي من غلبه ومن قرفه ومن فقره ومن وساخة المناخ اللي النظام دا أفرزه... وزي ما انتوا شامين إفرازات النظام دا كلها يع!!! ‘إفففففف
الشعب اللي بيغلي ده هو اللي هيروحوا يصوتوا مكانه - لأن الشعب مش فاضي أصلا لتعديلاتهم على حد قول البقرة هلال ومركزين بس فس أكل عيشهم - ويقولوا نعم للتعديلات الدستورية بدل الشعب لأنهم أقروا إن الشعب أصلا برة اللعبة... ولما هو برة اللعبة ومالوش فيها يا اولاد الأفاعي الدستور ليه بيشترط إنه يتاخد رأيه في استفتاء عام يا شوية أوساخ عايزين الحرق بجاز وسخ!! من دلوقت بنقول للعالم كله مبارك مزور ونظامه مدمن تزوير وهيزوروا رأي الشعب في التعديلات ويقولوا إن الشعب - اللي باعتراف كلابهم منشغل عن التعديلات ومش فاهم يعني إيه أصلا دستور - وافق عليها... آه يا نصابين يا ولاد الإيه... منين الشعب مش فاهم ومنين موافق... ما تروح تموت يا علي الدين يا هلال وتموت يا زكريا يا عزمي وتموتوا كلكوا ونرتاح من قرفكوا ده.... خلوا عند أمكوا دم بقى

١٧/٠٣/٢٠٠٧
بعد قرار النيابة بإخلاء سبيل جميع المتهمين أمن الدولة يتلكأ في تنفيذ قرار الإفراج
لا يزال زبانية امن الدولة يماطلون فى تنفيذ قرار النيابة الصادر مساء امس الجمعة باخلاء سبيل جميع زملائنا المعتقلين لا توجد بوادر حتى الان تدل على ما فى نيتهم ان يفعلوه
لا يزال زملائنا المعتقلون حتى الان محتجزين بقسم شرطة الظاهر ولا يوجد اى مبرر لاستمرار حجزهم
والى الان يصر جهاز امن الدولة على ان يضرب بقرارات النيابة عرض الحائط منتهكين بذلك كل الشرعية
نناشد جميع المدونين والصحافة الحرة فى بلادنا التضامن بالنشر
على كل المدونات وفى كل صحيفة حرة ليس فقط تضامنا مع زملائنا المعتقلين ولكن فضحا لممارسات هذا الجهاز الامنى الباطش الذى يخرب مصر وهم فى الحقيقة من يشوهون سمعة مصر ويهينون كل قيمة نبيلة لا تزال باقية فى هذا البلد
اننى اكتب ما اكتبه هنا وانا لست اعلم ان كنت ساتمكن من الكتابة ثانية ام لا
تابعونا ان كان لنا عمر واذا بقيت لنا حرية
قلنا إن النيابة قررت تفرج عن الشباب المعتقلين
عظيم جدا
الشباب خرجوا من مقر النيابة متجهين على قسم الظاهر اللي أصلا اترحلوا منه على النيابة
ممتاز
في القسم سعادة الباشا اللي ماسك أم الليلة هناك قال لهم يا جماعة أنا الناس دي أصلا مش تبعي
دول تبع قسم قصر النيل ومقدرش أفرج عنهم إلا لما تجيني تعليمات
أتاري الموضوع وما فيه إن البهوات بتوع أمن الدولة عايزين يرخموا على أم الشباب ويبيتوهم ليلة زيادة في الحبس
وبالتالي تم التلكؤ في تنفيذ قرار النيابة بحجة التحري عن محال إقامة الإخوة المعتقلين والموضوع كله مش أكتر من رزالة من شوية ظباط فشلة صدقوني ما فارقين كتير عن العساكر بتوع السي إس إف اللي هو الأمن المركزي لا مؤاخذة اللي هما مضرب المثل في الغباء
المهم
الشباب بايتين الليلة في قسم شرطة الظاهر ولن يخرجوا قبل الصباح
وقد سرب البيه المأمور اللطيف أبو دم خفيف أخبارا إن الولاد هايخرجوا ع الساعة اتناشر من ظهر السبت
لم نرحل من أمام قسم الظاهر إلا بعد أن اطمأننا على الشباب من خلال دخول الأستاذ أحمد سيف الإسلام المحامي إليهم في الحجز والذي أخبرني بأن حالتهم المعنوية عالية جدا ومهيصين جوة وكانوا طالبين جرايد أهم حاجة
شباب مثقف يا جماعة مش أي كلام
طب فيه معلومة مهمة
أبطالنا المعتقلين بعد رجوعهم إلى قسم الظاهر أضربوا عن الطعام ودا على فكرة خلى الظباط جوة يرتبكوا جدا ويتوتروا ع الآخر
برافو عليكوا يا رجالة وأهي رزالة برزالة
بس حفاظا على سلامة الشباب والذي يعاني بعضهم من مشاكل صحية متعددة طلب منهم الأستاذ سيف أن يأكلوا ويشربوا
ودخلنالهم أكل وسجاير وبعتنا حد يجيب لهم عصير فريش والعصير في الطريق... بس طبعا لأنه فريش فبيتأخر شوية
أحلى نكتة بقى في القصة الأستاذ أحمد سيف الإسلام (وهو بني آدم سكرة بجد) لما دخل يتطمن على الشباب في الحجز مكانش معاه سجاير - لأ مش سجاير للشباب سجاير ليه هو - فلطش علبة سجاير كلوباترا سوبر م الشباب المعتقلين جوة وطلع طبعا الحاضرين شربوها منه على أساس إنها حاجة من ريحة الأبطال!
طيب كفاية تهريج ونتكلم جد بقى
الصبح
هنرجع لزملائنا المعتقلين تاني من الصبح على قسم الظاهر عشان نتطمن على خروجهم بالسلامة
وعادي برضه لو مرواحنا هناك رزالة على حبايبنا الرزلين يبقى شعارنا هو
متظامنين مع زملائنا
متضامنين ورزالة برزالة
رزالة رزالة لحد ما رزالتنا تفوق رزالتهم
الصبح عايزين ناس كتير مننا تروح
خلاص يا شباب؟
إشطة عليكم
آه أنا بقالي كدة حوالي 72 ساعة ما نمتش فدماغي مهيسة
أنا نعسان جدا ولازم أنام لأني متدمر
الصبح قدام قسم الظاهر بقى
١٦/٠٣/٢٠٠٧
اخر اخبار المعتقلين من نشطاء كفاية
الساعة الثانية وخمسة وعشرون دقيقة
ما زلنا الان منتظرين امام مبنى محكمة الجلاء حيث النشطاء المعتقلون يتم الان عرضهم امام نيابة قصر النيل بحضور عدد من المحامين ووسط حضور امنى مكثف امام مبنى محكمة الجلاء ( عدد عربات الامن المركزى امام المحكمة فى حدود عشر عربات امن مركزى وقيادات بالامن) تابعونا وسنوافيكم بالتفاصيل تباعا
_______________
تحديث
الجمعة 16/3
الساعة 12 ظهرا
يتردد الان انه يتم ترحيل 21 معتقل للعرض امام النيابة فى مجمع محاكم الجلاء
وسوف يتم موافاتكم بأخر الاخبار تباعا
المظاهرة كانت مفروض تتعمل في ميدان التحرير الخميس الساعة خمسة



حشود أمنية غير مسبوقة تكدست في كل شوارع وط المدينة وعشرات من عربات الأمن المركزي
(قوات تفوق في عددها بالتأكيد قواتنا التي عبرت القناة في 73) الصور من عرباوي
قوات الأمن المركزي كانت محاصرة الميدان من الصبح
عربات الأمن المركزي كان لا يمكن حصر عددها وآلاف من قوات الأمن المركزي كانت محاصرة كل منطقة وسط البلد
أغلب الضباط كانوا بملابس مدنية
نجح بعض (نحو مائتي متظاهر أو يزيد) المتظاهرين في الاحتشاد أمام حزب التجمع الذي كانت تجري به مهزلة انتخابات الحزب الناصري وهذه قصة عبثية أخرى بس مش قضيتنا

بعض المتظاهرين في شارع طلعت حرب بعد أن قمع الأمن قيام المظاهرة في ميدان التحرير

لم يكن أمامنا خيار آخر سوى الانضمام لزملائنا المتظاهرين في شارع كريم الدولة أمام حزب "التجمع"
الصور من عرباوي
هتف المتظاهرون ضد التعديلات الدستورية وأيضا نددوا بفضيحة تخاذل النظام أمام إعلان العدو الصهيوني واعترافهم بقتل مئات الأسرى المصريين العزل إبان حرب
1967

برضه عملنا المظاهرة يا عادلي وبرضه صوتنا وصل للعالم كله إن شعب مصر رافض تعديلات الدستور
الصورة من الجزيرة نت
أثناء التظاهرة أمام حزب التجمع بدأت الأخبار ترد باعتقال العديد من النشطاء وقد وصل عدد المعتقلين إلى 32 معتقل
أعلن المتظاهرون في تصعيد جديد للأحداث عن اعتصامهم حتى يتم الإفراج عن المعتقلين

بسلامته كان بيصور وشوش الناس اللي في قلب المظاهرة...
الصورة من عرباوي
كان الدكتور عبد الوهاب المسيري - منسق حركة كفاية - تحدث للجمهور المحتشد وأكد أن الأمن حادثوه تليفونيا وأخبروه أنهم سيضربون بقبضة من حديد وأنهم لن يسمحوا بالمظاهرة بأي حال من الأحوال

عبد الوهاب المسيري يكاد ينكفئ على الأرض أثناء هجوم قوات الأمن على المتظاهرين وضربهم
الصورة من العربية نت
وصلت الأخبار أثناء المظاهرة بأن زملاءنا المعتقلين تم ترحيلهم بعربات الأمن المركزي إلى الدراسة
ثم بعد ذلك وقفت بهم عربة الأمن المركزي فترة أمام إدارة مكافحة النشل في صلاح سالم!!!
نتهي اليوم بخبر عن ترحيل المعتقلين واحتجازهم في قسم شرطة الضاهر
يتم فض الاعتصام نحو منتصف الليل بعد ورود أخبار عن الإفراج عن 2 من المعتقلين
فيما يلي بيان بأسماء من تم اعتقالهم ويليه بيان بأسماء من تأكد الإفراج عنهم من بين المعتقلين
1 أحمد عبد الجواد
2 كريم رضا
3 محمد عادل صاحب مدونة ميت
4 عمرو عادل
5 عبد الهادي المشد
6 رامي توفيق
7 نائل يحيى
8خالد عبد الحميد
9 أحمد محمد
10 عبد الحميد عرفة
11 أحمد الجندي
12 وليد صلاح
13 أحمد علاء
14 محمد عبد اللطيف
15 بهاء صابر
16 ناجي رشاد
17 عمر إبراهيم
18 محمد مالك
19 حسام شعبان
20 محمود الورداني
21 ليلى عبد الحميد
22حمادة فيصل
23جاد الاسلام جمال
24فيكتور نجيب
25أحمد أبوستيت
26محمد محمود الشهير بعلي
27عامر عبد المنعم
28بلال (حزب غد)
29إسلام (حزب التجمع)
30مصطفى سيد اسماعيل (المدون مصطفيتش)
31محمد الطاهر (مدونة مواطن مصري واخد على قفاه)
ثم تم الإفراج عن المجموعة الآتية أسماؤهم
أسماء من أفرج عنهم
1-محمد الطاهر
2-عبدالخالق فاروق
3-أحمد الجندي
4-محمد إسماعيل,
5-فتحي فريد
6-أحمد اسلام
7-صلاح الوتيدي
8-محمد عبدالسلام قطري
9-محمد سعدعبدالحفيظ
10-محسن سميكة
11-د.يحيى القزاز
12-محمد بدر
تابع التفاصيل وآخر الأخبار عند منال وعلاء
وعلى موقع كفاية
وعلى مدونة النديم
واقرأ تغطية زنزانة لليوم
وتغطية دماغ ماك أيضا للحدث منذ بداياته الأولى
اقرأ تغطية العربية نت
والجزيرة نت
والبي بي سي أرابيك
For details about the demonstration & the detention of activists in English
Visit 3arabwy
& Noura Younis
============
١٠/٠٣/٢٠٠٧
مظاهرة بميدان التحرير الخميس 15 مارس للتعبير عن رفض التعديلات الدستورية

تدعو الحركة المصرية من أجل التغيير (كفاية) كل ناشطيها ومختلف القوى الوطنية للإشتراك في مظاهرة بميدان التحرير في الخامسة مساء الخميس الموافق 15-3-2007 وذلك للتعبير عن رفض التعديلات الدستورية التي يقوم بها الحزب الوطني من جانب واحد والتي تهدف في الأساس الى إستمرار الحكم الديكتاتوري للبلاد وتوريث السلطة وإلغاء الإشراف القضائي على الانتخابات
لازم كلنا نكون موجودين٠٩/٠٣/٢٠٠٧
وقع ع العريضة وما تستناش الاستفتاء
دا نص العريضة
To: Egyptian Government
وقعوا على عريضة شعبية ترفض التعديلات الدستورية
---------------------------------------------
مقدمة: توافقت على صياغة هذه العريضة القوى السياسية التالية:
حزب العمل - الإخوان المسلمين - الإشتراكيون الثوريون - كفاية
نحن الموقعين أدناه من أبناء شعب مصر, من مختلف فئاته, وحرصا على المصلحة الوطنية العليا, نرفض التعديلات الدستورية الأخيرة للأسباب الآتية:
2 – أن هذه التعديلات تكرس استعباد الشعب خارج معادلة الحكم وذلك بإلغاء المادة (88) الخاصة بالإشراف القضائى على الانتخابات حيث أن إلغاءها يسمح بتزوير إرادةالشعب.
3 – إن تعديل المادة 179 بالنص على قانون للإرهاب أسوأ من قانون الطوارىء يعصف بثلاث وثلاثين مادة من الدستور - باب الحريات وباب سيادة القانون – والتي تصون الحريات العامة والخاصة للمواطنين وتخضع الجميع لسيادة القانون، وتحمي استقلال القضاء وحصانته.
4 – لقد تم تعديل المادة 76 مرتين الأولى من أجل التمديد فى العام الماضى والثانية من أجل التوريث هذه المرة والشعب المصرى يرفض مبدأى التمديد والتوريث فنحن شعب يرفض الاستعباد "متى استعبدتم الناس وقد ولدتهم أمهاتهم أحرارا؟!!!
1 - أن هذه التعديلات لا ترضى طموح الشعب المصرى بل تعد اعتداء على حقوقه فى التعبير عن نفسه وإرادته. 5 – أن عدم تعديل المادة 77 يؤدى إلى حكم أبدى ويمنع التداول السلمى للسلطة ويكرس الفساد ويصادر حق الشعب فى اختيار حاكمه.
Sincerely,
من فضلك ادخل وقع هنا إلا إذا كان عاجبك "طبيخهم" للدستور - ودا حقك طبعا - بس "اشرب بقى يا حلو" وما تجيش تشتكي بعد كدة!! ـ



