١٠‏/٠٢‏/٢٠٠٧

الظابط كريم وأمين الشرطة بتوع الضرب ع القفا أمام المحاكمة... ولسة يا كلاب


مزيد من الانتصارات للمدونين والصحافة المحترمة

جريدة المصري اليوم تواصل نشرها لتوابع قضية الضرب ع القفا والآن الظابط وأمين الشرطة بيتحاكموا ومحبوسين على ذمة القضية وليعلم الجميع إن البلد خلاص بتقوم من موتها وعلى كل الأشكال الزبالة توخي الحذر من هنا ورايح... لن نرحمكم ولن نترككم وسنستمر نفضح فسادكم وانتهاكاتكم



بدء محاكمة الضابط وأمين الشرطة في واقعة «كليب القفا» واستمرار حبسهما

كتبت شيماء القرنشاوي ٩/٢/٢٠٠٧

بدأت محكمة جنح إمبابة أمس، أولي جلسات محاكمة الضابط كريم فارس وأمين الشرطة أحمد عبدالفتاح في قضية «كليب القفا»، الذي كشفت «المصري اليوم» عن هوية الضحية فيه، وباشر التحقيقات وائل حسين رئيس النيابة، وقرر في ساعة متأخرة من مساء أمس الأول حبس الضابط وأمين الشرطة وإحالتهما إلي محاكمة عاجلة بتهمتي استعمال القسوة مع المجني عليه إيهاب مجدي فاروق واستغلال وظيفتيهما.

عقدت الجلسة برئاسة المستشار خالد محجوب رئيس المحكمة وبحضور كريم أشرف وكيل نيابة إمبابة وأمانة سر هشام عبدالخالق. وقررت المحكمة تأجيل القضية لجلسة الأربعاء المقبل مع استمرار حبس المتهمين.

حضر الضابط وأمين الشرطة المتهمان من محبسهما جلسة أمس وسط حشد كبير من المحامين للمثول أمام المحكمة، التي عقدت جلسة نظر القضية داخل غرفة المداولة، والتف عدد كبير من أفراد الأمن حول الضابط المتهم لمنع الصحف من تصويره. كما حضر مأمور قسم إمبابة جلسة المحكمة لمعرفة قرارها بشأن القضية.

التمس الدفاع الحاضر عن الضابط إخلاء سبيله بأي ضمان، وطلب من المحكمة التصريح له بالإطلاع علي القضية، فرد المستشار خالد محجوب أن ملف القضية بحوزة النيابة، وصرح للدفاع بالإطلاع علي جميع مستندات القضية. كما طلب الدفاع شهادة رسمية من اتحاد الإذاعة والتليفزيون بالمؤهل الذي يحمله خبير الأصوات، الذي أكد تطابق الصوت الموجود بـ «الكليب» بصوت الضابط المتهم.

وأشار الدفاع إلي أن خبير الأصوات الذي أعد تقرير الصوت في القضية، لا يحمل مؤهلاً عالياً، وإنما هو مجرد فني أصوات باتحاد الإذاعة والتليفزيون، وأكد أن هذه النوعية من القضايا لابد وأن يكون خبير الأصوات فيها حاصلاً علي مؤهل عال.

وقررت المحكمة في نهاية الجلسة- التي استمرت ١٠ دقائق- تأجيل نظر القضية للأربعاء المقبل للاختصاص الرقمي مع استمرار حبس المتهمين والتصريح لدفاعهما بالاطلاع علي تحقيقات القضية.

وكانت النيابة، قد استمعت مساء أمس الأول لأقوال الضابط المتهم كريم عبدالله فارس حول الواقعة، وأنكر المتهم في التحقيقات معرفته بواقعة ضرب الضحية إيهاب مجدي فاروق، وقال إنه لم يكن متواجدا بسراي القسم أثناء الضرب ولم يأمر أحدا بضربه أو الاعتداء عليه ولا توجد خلافات شخصية بينه وبين الضحية الذي ظهرت صورته في «كليب القفا».

وأضاف الضابط المتهم أمام وائل حسين رئيس النيابة أن الصوت الذي ظهر علي الـ CD ويأمر شخصا يدعي أحمد بالضرب ليس صوته، وقال الضابط إن الـ CD ربما تكون ملفقة بطريقة فنية لتوريطه، وأمرت النيابة بحبس المتهم ٤ أيام علي ذمة التحقيق وتقديمه لمحاكمة جنائية عاجلة بتهمة استعمال القسوة واستغلال الوظيفة.

هناك ٢٠ تعليقًا:

alnadeem يقول...

أظرف حاجه يا جرجس ان النظام منفضللهم وعامل عبيط وسايبهم يستلقوا وعدهم يمين وشمال
بس طبيعي عموما
هو النظام ملاحق ع البلاوي اللي بتتفتح له كل يوم من إضربات ومظاهرات عشان يقف يحمي ظباط الشرطه
علي الله بس يتعظوا
يا اما قلنالهم النظام مش هيحميكوا وهما مش فاهمين
يشربوا

zenzana يقول...

و لسه هياخدوا ع القفا كمان وكمان

ذو النون المصري يقول...

يا سلام علي الاحلام يا سلام!!!!!!يااااه
الضرب علي القفا اصبح جريمه فيكي يا مصر!!!!!و كمان تنعقد لاجل قفا مواطن المحاكمات!!!!!و يتسجن فيها ضباط شرطه!!!!!لالالالالالا
انتو اكيد عملاء للحكومه و بتضحكوا عليا

zenzana يقول...

هههههههه
لاء صدق يا ذو النون وكمان طفشنا المخبر اللي في مدونة جرجس
روح شوف البوست السابق والتعليقات اللي عليه

Amr Ahmed يقول...

احسن

عقبال الباقي

ياااااااااارب


تحياتي يا مان

elgharep يقول...

دى نهاي الجلادين محدش بيسأل فيهم وأن كان لما الموضوع بيخش فى السياسة
الحماة بتفرض عليهم ولا النورت
الغريب

Racha Khoury يقول...

جرجس جرجس مبروك على الاخبار الكويسة ويا رب دايما نسمعها

مدونتك جميلة بس تعرف انا وحشتني تحليلاتك زي زمان بلوجك كان في حتة من جرجس
مش عارفه يمكن اكون غلطانة بس كان فيها تنوع منك
حاجه ليك دلوقتي تمام وزي الفل بس على الاغلب كلها اخبار

مش عارفه انا بقول ايه بس سامحني لو مش بعلق ...يمكن بحب يكون كلامي لو معنى
ولي مش بفهم فيه بفضل اني متكلمش فيه

يا رب تكون كويس يا جرجس
ودايما مصر كويسة باهلها الحلوين

mariam يقول...

ايوه كده
خليهم يعرفوا ان الموضوع مش زى زمان
لأ كل واحد هيعمل حاجه
هياخد جزاءه
ان شاء الله تكون دى البدايه
و الباقى فى الطريق
و ربنا يفضحهم كمان و كمان
تحياتى ليك انك متابع الموضوع ده
ان كل ما اقرأ خبر جديد فى المصرى اليوم
افتح مدونتك على طول و اشوف تعليقاتك و تحليلاتك

ذو النون المصري يقول...

فعلا يا جرجس كلام رشا صح انت ليه بطلت تكتب تحليلات و اكتفيت بالاخبار؟
كلامك في التحليلات بقالك مده مبتكتبش فيه
ياريت يكون فيه اي مناسبه جايه في الطريق تتيح الفرصه لهذا النوع من الكتابه
طبعا بعد مناسبة ذكري غرق العباره السنويه الاولي الا اذا كان يمكن ان يكون فيها جوانب خفيه يمكن ان تصلح معها الكتابه التحليليه
تحياتي

ذو النون المصري يقول...

زنزانه
المخبر ساب جرجس و راح عندك و لبخ لشهروزه

مراقب مصري يقول...

عزيزي النديم

النظام بيتحلل وبتنهار دعائمه وزي ما انت دايما بتقول مش هيقدروا يلاحقوا لا على الأزمات الاقتصادية ولا على تبعات فسادهم... ولسة يا أبو نور... ليلة أمهم سودا بإذن واحد أحد
=======================

زنزانة الجميلة

إذا كانت عصا النظام في مؤخرة الوطن فالآن يد المجتمع صارت على قفا الفاسدين... وشكرا لكل محترم وشريف
=======================

ذو النون المصري

ما تحقق هو مكسب ليس فقط للشرفاء من المدزنين والصحفيين بل هو مكتسب ثمين لكل مصري وللمجتمع ككل
=======================

عمرو أحمد

لكل ظالم نهاية وهم نهايتهم خلاص قاب قوسين أو أدنى... صدقني الموضوع بكتيره تلات أربع سنين على أقصى تقدير

=======================

عزيزي الغريب

ما احنا حذرناهم تسعميت مرة لما هتقعوا ما حدش هيسأل فيكوا ولما هم هيقعوا برضه مش هيعبروا أمكم وكأننا يا عم بندن في مالطة... خليهم يشربوا
=======================

مراقب مصري يقول...

العزيزة الرقيقة رشا

وحشاني جدا وسعيد جدا بتعليقك وملاحظتك... أنا نفسي واحشني أسلوبي الأولاني وواحشني تعبيري عن نفسي دون قيود ودون أي اعتبارات خاصة بالقارئ... الأزمة أنني اخترت في التدوين توجها ما ذا طبيعة صحافية شعبية وأزعم أنني ساهمت من خلال هذا التوجه في الإضافة لبعض الحملات الصحافية الشعبية التي أثرناها كمدونين وخصوصا قضايا التعذيب... بحاول في مرات أنوع في المواضيع... فمرة اتكلمت عن عبد الرحمن الأبنودي ومرة تكلمت عن الدكتور سيد القمني ومرة موضوع عن أيمن نور ومرة موضوع عن محمد عمارة... يعني في اعتقادي إن فيه تنوع بشكل أو بآخر بس الأسلوب نفسه زي ما انتي شايفة برضه طاغية عليه النكهة الصحفية ودا يمكن بيفقدني جزئية مهمة وهي إني أعبر عن نفسي وعن اللي جوايا زي ما هو... وبيني وبينك جيتي لي ع الجرح لأني مفتقد دا جدا في المدونة وفي كتابتي عموما... أقول لك حاجة... مرات بلاقي إن مينا غيران من الحاج جرجس... فمينا هو المخ والدماغ اللي ورا الليلة كلها والحاج جرجس هو اللي بياكل الجو كله والحاج جرجس دا كمان هو اللي بقى يفرض على مينا يكتب في إيه ويصيغه إزاي... الحاج جرجس بالنسبة لمينا بقى زي الديسك المركزي في أي جورنان... الصحفي يفكر ويكتب وينطلق ويعبر وبعدين الديسك المركزي دا - بروح امه - يعدل ويصيغ الموضوع بما يخدم السياسة التحريرية للجورنان... الأسبوع اللي فات كنت بافكر أعدم الحاج جرجس واخلي مينا يستولي على المدونة ويشغلها لحسابه وبعدين تراجعت قدام سطوة الحاج جرجس وقدرته المرعبة على القمع وكله عنده بالمنطق والحجة القوية وطبعا رضخت وما قدرتش أفتح بقي واستمريت أمده بالأفكار والكتابات وهو - بسلامته - ينتقي منها ما يخدم سياسته التحريرية وبيحاول يقنعني إن دا أفيد لينا إحنا الاتنين وإننا هنقدر نأثر أكتر واحنا مع بعض وإننا هنقدر نحقق ما لا يقدر أحدنا أن يحققه واحده... خلي بالك إن الحاج جرجس هو النجم في حين إنه مينا مش نجم خالص ومش بيعرف يعمل الفرقعة والشغل بتاع الشو الإعلامي اللي بيعمله الحاج جرجس

أنا بفكر أسيب لجرجس "كفاية حرام" بما فيها وأروح أعمل مدونة جديدة أنطلق فيها بأرائي وأفكاري وعبثياتي وتحليلاتي بس ما زال جرجس بيهددني إنه عمري ما هقدر أنافسه ولا هاكون في شعبيته ولا هنجح من غيره... المشكلة إنه مقنع جدا هذا الدكتاتور... والأزمة الأكبر في رأيي أني باحبه

تحياتي
مينا (في غفلة من الحاج جرجس)ـ

مراقب مصري يقول...

عزيزتي مانو

فعلا دي بس البداية والباقي في الطريق والتقيل ورا ومبسوط جدا إنهم شايفينا عيال هايفة وتافهو وما لناش لازمة في الدنيا ودا بيفكرني برباعية الرائع جاهين

أنا قلبي كان شخشيخة أصبح جرس
جلجلت به صحيوا الخدم والحرس
إيه خفتوا ليه قمتوا ليه
لا ف إيدي سيف ولا تحت مني فرس
وعجبي
=========================

ذو النون المصري

سؤالك جاوبت عليه في ردي على تعليق رشا... نهاره أبيض

Ahmad Hegab يقول...

اللهم انصر الحق

بجد الواحد بيطمن لما بيسمع الاخبار دى علشان الواحد فعلا بيوصل لمرحلة انه مش واثق فى اى حد فى الداخليه بس المشكله ان اغلب اصحابى و اقرايبى فى الداخليه و كلهم ناس محترميين جدا و ساعات بيحكولى على الحورات دى و ان ساعات بيحصل اكتر من كدا علشان كدا لما بسمع ان فى واحد من الظلمه دوا اتشد بطمن ان فى حد بيعاقب علشان الموضوع ما يتكررش و زى ما قلت يا جرجس البلد دى صحيت و بجد مش هتنام تانى


امال فيين صاحبنا مش بيتكلم ليه

مراقب مصري يقول...

عزيزي الفنان أحمد المصري

بالنسبة للناس اللي قد تكون محترمة في الداخلية في رأيي إنه حتى دول بيعانوا من اضطرابات سلوكية ونفسية مستترة ودا بيبان لك لما تلاقي تعاطفهم غير المبرر ولا المقبول مع أي كلب من اللي بيقعوا منهم لمجرد إنه منهم... هذه المنظومة القيمية المغلوطة المغروسة بعمق داخل كل شرطي دون استثناء سيحتاج حتى المحترمون منهم أن يعالجوا منها لتتم إعادة تأهيلهم من جديد لينخرطوا من جديد كمواطنين أسوياء صالحين ف مجتمع طبيعي... صدقني حتى المحترمين دول جواهم بلاوي مستترة لأن فساد الشرطة هو فساد منظومة وليس فساد أفراد ولككنا سنقبل هؤلاء المحترمين من جديد في وسط المجتمع - بعد إعادة تأهيلهم طبعا - وقلبنا سيكون مفتوحا للجميع
اللي بيحصل يخرجنا من دايرة الإحباط المفرغة ويقول لنا إنه لسة فيه أمل... بس محتاجين مجهود ضخم عشان نحقق الأمل ده

صاحبك كان هياخد جزا بسببنا فخلع بعد أن أمره رؤساءه بالانسحاب وإلا هيتجازى... مسخرة يا راجل

Ahmad Hegab يقول...

عزيزى جرجس أختلف معاك تمام

اى مهنة فى العالم فيها الكويس و الوحش و دا كلام علمى انه لايوجد قاعدة عامه تطبق على كل الناس يعنى مثلا مهنة التدريس من اشرف المهن بس ماينفعش نقول ان كل المدرسيين شرفاء لا فى منهم اللى انشاء الله اشوفة بيولع كدا و تكون معايا طفايه و مطفيهوش و هكذا فى البوليس فى الكويس و فى الوحش انت كل احتكاك او معظمه فى اعتقادى كان فى مظاهرات وعلى ما اظن انك متقدرش تقيم نظام كامل عن طريق وقوفك فى المظاهرات و حتى عن طريق كل اللى بنسمعه او بنشوفه فى الميديا

أنا عارف ان نظام البوليس فيه قصور رهيب زى مثلا فى النجدة يعنى انا فى اكتر من مناسبة اتصلت بالنجدة و عمرها ماجات تخيل ولا مرة و علشان منجبش الغلط على الناس اكتشفت انى انا اللى كنت غلطان لانى كنت بقولهم على الحقيقة بس اكتشفت ان علشان البوليس يجى لازم تقول ان فى واحد ضرب التانى بالنار و مات و الكلام دا طبعا اذا كنت ساكن فى حته جامدو انما اجارك الله لو كنت ساكن فى منطقة شعبيه فا انسى لانك لو قلتلوا فى التليفون ان فى واحد مات حيقولك أدفنوا و اتصل بينا نجى نشرب قهوة فى العزا و بالمرة ناخد قرشين علشان الميكرفون و زى ما قلتلك صدقنى بجد ان اعرف ظباط محترميين جدا و ناس بتراعى ربنا فى شغلها و مهما حصل فى رب حايحسب

Scorpio™ يقول...

يا سلااام

يلا عقبال كل ظالم فالبلد

يارب بلدنا تنضف بقى

مراقب مصري يقول...

عزيزي الفنان أحمد المصري

أقل احتكاك لي بالشرطة هو الذي كان في المظاهرات والكام مظاهرة اللي حضرتهم كانت من النوع الهادئ اللايت االلي الشرطة فيه بتقف أو تقعد تتفرج علينا وبعد ما نخلص توقف لنا تاكسي كمان لو محتاجين... مش دي القضية... بمعنى أن حكمي ليس انطباعيا... ثمة حقيقة يا عزيزي تؤكدها العديد من الشواهد وهي أن ضابط الشرطة في بلادنا - على وجه التعميم - يتربى في أكاديمية الشرطة بشكل منهجي على الفظاظة والقسوة والتعالي على خلق الله... دا كلام له مصادره وبعضه موثق بفيديوهات... حتى اولاد الناس الكويسة اللي فيهم بيتغسل مخهم... وممكن تلاقيه معاك في الحياة العادية يبدو وكأنه بني آدم سوي وطبيعي وعادي جدا... بس شوفه في قسم الشرطة... بلاش... شوفه في بيته مع مراته وهما لوحدهم... أنا أعرف ما أتكلم عنه وأعرف ما تقصده... في إحدى المرات تحدتني صديقة أن ليس كل ضباط الشرطة هكذا وأنها تعرف بعضهم وهم في غاية الذوق والأدب والأخلاق ثم هالها أن رأت هذا الضابط الذي تقصده وهو المهذب الراقي ابن الناس متعاطفا بكل قوته مع الكلب إسلام نبيه وقت محاكمته وكيف ينضح إناؤه بالحقد والكراهية على الضحية عماد الكبير الذي اغتصبه الكلب إسلام... وسبب حقده هو أن هذا الحشرة "عماد" قد ضيع مستقبل ابن زميل لهم في نفس "العصابة"... إنها ثقافة عامة ولكنك لن تراها إلا عندما تضغط على أوتار معينة في داخلهم... أحد أصدقائي - أو كان صديقا لي وهو طفل صغير - عندما دخل كلية الزفت الشرطة قالوا له من دلوقت ورايح تنسى بقى شغل العيال واصحابك اللي كنت تعرفهم تبطل تعرفهم... إنت دلوقت بقيت فوق الناس دي كلها... دا الكلام اللي بيتقال يا عزيزي جوه كلية الشرطة وهو المنهج الموازي غير المكتوب والذي يتلقاه الطلبة يوما بعد يوم حتى يصلوا إلى ما هم عليه من درجات متباينة من الفصامية... فبعضهم فصامي حاد أو بارانويد حاد كما في فيلم زوجة رجل مهم أو بعضهم فصاميته مستترة كالشاب الهادئ اللطيف ابن الناس إسلام نبيه اللي فصاكيته بتبان بس في القسم مع الغلابة... صديقي صدقني إنهم جميعا أشكال وسخة

شكرا

مراقب مصري يقول...

سكوربيو

يسمع من بقك ربنا يا اخويا

Ahmad Hegab يقول...

^_^

لكي لا ننسى دم أحمد علي مبروك