١٦‏/٠٢‏/٢٠٠٧

خبر عاجل: عزيزتي المدونة احترسي من ذئب المدونات

عاجـــــــل


إلى كل زميلاتنا المدوِّنات هذا النداء العاجل
ورد إلى "كفاية حرام" عبر مصادر موثوق منها هذا الخبر العاجل

يتردد في الأوساط التدوينية أن ثمة مدون شهير ومدونته معروفة لكثيرين راود بعضا من زميلاتنا المدوِّنات على أنفسهن وتحرش بهن لفظيا والمستهجن في الأمر أنه حتى لم يكن يسعى معهن لإقامة علاقة عاطفية بل كان مبتغاه فقط معاشرتهن جنسيا وكأنهن فتيات ليل رخيصات... "كفاية حرام" استطلعت بعض ردود أفعال ضحايا ذئب المدونات وتبين أن الصدمة كانت هي رد الفعل المشترك بين المدوِّنات الضحايا اللاتي شعرن بالجرح العميق لكرامتهن الأبية إذ لم تكن تتصور أيا منهن أن مدونا زميلا يدعي الاحترام والخلق الكريم تند عنه مثل هذه التصرفات الحقيرة والأفعال الوضيعة

ومن جهتنا في "كفاية حرام" فقد أبرقنا إلى جميع وكالات الأنباء الدولية والمحلية نستنكر وندين ونشجب هذه الفعلة الشنعاء من هذا المدون الوضيع... ومن منبري هذا أؤكد أن أمثال هذا المدون المنحل ممن أنشأوا مدونات يشقطوا بيها بنات هم قلة مندسة بين جموع المدونين الشرفاء ولا تعبر عن ظاهرة متسعة النطاق أو سياسة تدوينية ممنهجة... هذا وأناشد السيد الذئب ألا يأتي ويعلق على هذا الموضوع وإلا فبشرفي سأفضحه إذا حاول يتدارى وسط جموع المعلقين

وعلى صعيد آخر في نفس السياق أقامت "كفاية حرام" منبرا تصويتيا أو استفتاء يتساءل عن العقاب الأمثل لهذا المدون الساقط أخلاقيا لكي ما نطهر التجربة التدوينية من زبالتها

لو مدون عامل نفسه محترم وابن ناس اتحرش بمجموعة من زميلاتنا المدوِّنات يبقى نعمل له إيه
نخصيه؟
نطلع دين أمه وبعدين نخصيه؟
نقاطعه وننبذه تماما وساعتها هو هيخصي نفسه؟
نتعاطف معاه - بروح امه - على أساس إنه عنده كبت وحرمان؟
نفضحه ونعلن هويته في تدوينة خاصة عشان عالم التدوين ينضف؟
Free polls from Pollhost.com
من الممكن اختيار أكثر من إجابة

هناك ٤٢ تعليقًا:

غير معرف يقول...

ياس يدى اكيد الراجل تعبان،
ويمكن يكون محتاج حاجه..
حالة انسانية يعنى،
وبعدين انت ليه مش ديمقراطى فى الاختيارات ..
يعنى انت بتحطنا قدام اختيارات كلها من نوع واحد وبتعاقب بيها المدون الذئب ..
أفرض مثلاً مثلاً يعنى انى عاوز اعمل زيه؟؟
مثلاً عاوز اقول انه خد الخطوة اللى انا عاوز اخدها من زمان..
جتك داهية..
مسيحى وكمان بتغلط فى المدونين الذئاب.

غير معرف يقول...

الحج جرجس،
انا بقى حاسس ان اكيد انت هتبدأ تعديل فى مجموعة اللينكات اللى عندك..
ولا ايه..
هههههههههههههههههههههه
قال ذئب قال...
وبعدين انت لازم تقولنا مين هما الضحايا عشان نعرف هما يستاهلوا ولا لا ..
بصراحه اكيد فيهم واحده خنيقة وتقرف ومتستحقش..
اصل أنا عارف الذئب ده رمرام

غير معرف يقول...

انا أختار التصويت التانى والرابع يا واد يا جرجس
عشان يبقا عبرة لغيره

الأنونيموس اللى قبل منى دة
حتى لو كانت فتاة ليل
التحرش بها ممنوع
تعرف ليه؟؟
لأنه عن غير ارادتها
وثانيا
الموضوع مش موضوع انها تستاهل ولا لاء
الموضوع موضوع فصام الشخص دة اللى وصل لحد المرض
الواد جرجس بيقول انه عامل فيها ابن ناس ومثقف وكذا وكذا
وعلى الجانب الآخر ييجى بروح امه لما يكلم واحد لسانه يدلدل ويعاملها على انها واحدة من اللى بيوقفوا تحت عامود جامعة الدول وبتتأجر بالساعة؟؟؟
طيب لما هو كدة
يعلنها صريحة مدوية من منبره هناك
انه فاتح مدونته للصيد
وانه عاوز يتحرش وخلاص
وقتها مش حيبقا فيه لا مرض ولا فصام ولا كدب واستهبال
على الأقل يعمل زى المثليين والمثليات اللى بيعترفوا بطبيعتهم
بس الفرق ان دول انا احترمت صراحتهم مع نفسهم وادام الناس
ملبسوش قناع الفضيلة

انما بقا لما يكون العكس؟؟؟

واد يا جرجس
اعمل فيه اختيار رقم اتنين واربعة
ولو تحط اختيار خامس برضه كمان اعمله فيه

جاتهم القرف
مللوا البلد

غير معرف يقول...

تعديل
انا مع الاختيار التانى والخامس

ولما تحط سادس ابقا اعمل حسابى فيه

Muslim&Quptia يقول...

تفتكر ياحاج جرجس (حلوة حاج دي منك) ان الحيوان(مع الاعتذار للحيوانات) المريض نفسيا (مع الاعتذار للمرضي النفسيين) ال***** (مع الاعتذار لل*****) هيكون ال
(اخير)
؟
انا مع كل الحلول ماعد التعاطف الصراحة
نخطفه يامعلمي؟:)

tota يقول...

الحج جرجس

الحقيقة ان كلمة عالم افتراضى واضح انها كلمة خطأ تماما
لان التدوين تحول الى العالم الواقعى بكل عيوبه ومشاكله وواقعيته ودنائته
بالطبع يوجد من نوعية هذا المدون الكثير
لا اعتراض على الفكرة فهى حق لك مواطن طالما الطرف الاخر يتفق معه اما عكس ذلك فهو تحرش واساءة ادب وسلوك غير انسانى بالمرة
انا مع الاختيار التالت بصراحة لان مقاطعة هذه النوعية من المدونين هى العقاب المناسب
متوقعة ان التدوينة سوف تحمل اغلب التعليقات من مجهولى الاسم وخاصة المدونين اما المدونات سوف تكون انطلاقة صرخة

تحياتى

bluestone يقول...

شوف يا جرجس أنا مع الحل التالت والسادس
صحيح الفضايح مش حاجة كويسة بس فعلا انا لا احترم اطلاقا اي بني آدم يبقى مزدوج وحقير بالطريقة دي
يعني فيه ناس كتير اختارت سلوك معين واعلنت عنه .. يعني ناس ألحدت مثلا وغيرهم اعلنوا ضرورة الحرية الجنسية وغيرهم اعلنوا انهم مثليين
ودول حتى لو اختلفت معاهم تحترمهم
لانهم اعلنوا بصراحة عن اتجاهاتهم ايا كانت
لكن احقر انواع البشر هما اللي باكتر من وجه وبيتعقدوا انهم اذكياء لدرجة خداع الناس عشان يحققوا اغراض حقيرة زي نفوسهم
رأيي نديله مهلة زمنية قصيرة جدا
يا إما يرحل بعيدا عن التدوين
يا إما يعلن عن نفسه بحرية وهو حر
يا إما الناي تكشفه


وعلى العموم سواء تم الكشف عنه أم لا
فدي في حد ذاتها سابقة في منتهى الخطورة

وعلى رأي توتا المجتمع الافتراضي بقى مجتمع مراية فعلا لكل أمراض واعطاب مجتمعنا للاسف

لكل

mohamed hassan يقول...

meen hoa?
who is this guy?

Ahmad Hegab يقول...

بص يا جرجس انت اساس هلكتنى من الضحك

و انا اخترت اننا نسيبة لحد لما .... واخدلى بالك يا عباس

انا مقدرش اقول الكلام دا يا جرجس يا خويا اصل انا ابن زوات


و بلاش دين امه لانه اساس معندوش دين


هموت و اعرف مين الأنونيموس دول اللى بيكومنتوا عندك دول علشان تعليقاتهم بجد تفقع

alnadeem يقول...

ما فيش فيك غاوي مشاكل
الإفيه يا واد يا جرجس انك هتربك حسابات الناس وكل واحد هيقعد يفكر انت قصدك علي مين وهتبقي أخر لخبطه
ههههههههههههههه

الأغاني للرأفتاني يقول...

طاب اشمعنى خايف ع المدونين من النساء فقط يا حاج جرجس..
ما هو جايز سبع البرمبه اللى عامل فيها دكر ده..له فى الوشين..رجال ونساء
ما هو ماحدش ضامن نفسه يابا
بعد عماره يعقوبان كل شئ ممكن

فالحل الامثل..انك تفضحه وخلاص

غير معرف يقول...

" من كان منكم بلا خطيئة فليرمها بحجر"
ايه يا حج جرجس فرقت ايه دلوقتي عن كهنة المعبد اليهودي ولا نسيت تعاليم السيدالمسيح السمحة؟؟؟؟

غير معرف يقول...

بص يا عم الحاج جرجس، الكلام اللى أنت كتبته فى هذا البوست التحذيرى خطير جدا. أنا مش هكون وصى على أخلاق و سلوكيات الناس طبعا، لان دا منطق فج مقبلوش على نفسى ولا على غيرى. لكن الموضوع ببساطة هو إن الناس لازم تفكر بجد فى "ميثاق شرف" يحكم علاقتهم ببعض. دا مش كلام كبير و لا مفحلط. بس دى ممكن تكون من خبرتى البسيطة اللى تشكلت تماما فى السنتين اللى فاتوا. فيه قطاعات من البشر هرت ودان الناس كلام عن التحرر و التقدمية و خلافه.خصوصا فى موضوع النساء ، بس فى مشكلة أساسية فى التطبيق العملى. بمعنى إنى ممكن أتكلم 10 ساعات متواصلة على القهوة عن حقوق المرأة ، و بعد ما أمشى ممكن أتحرش بأول واحدة أقابلها فى الشارع. هانقول إزدواج فى الشخصية و لا فصام ولا مرضى نفسيين ، كل الأوصاف دى إستعلائية و ملهاش أى معنى ، و متقدرش تفسر اى حاجة فى الدنيا. يمكن الحل فى النهاية يكون فى إننا عايزين رجاله جديدة و ستات جديدة، و إحتمال نكون عايزين مدونين جداد. هل ممكن نفكر بره الدايرة شوية، و نسأل نفسنا سؤال "من كان منكم بلا خطيئة فليرجمها بحجر؟". معرفش بس فى الآخر أقدر أقول إنى متحفظ على منطق الفضح، و الحل من وجهة نظرى المتواضعة هو الإبتعاد عن مصدر الإساءة و الإزعاج.....
بيننا الود
أحمد

غير معرف يقول...

يا حج جرجس بما انك بديت بالخير كمله افضحو عشان والله خوفتني
دلوقتي حشك في كل المدونين

smraa alnil يقول...

انا مش هقولك ان التعليقات دي بتيجي عن طريق مجهول

فياريت اللي هطلبه منك تنفذه
لو انت بجد تعرفوا ياريت تفضحوا

لاني واحدة من الناس الي تعرضت لتعليقات سخيفة جرحتني وسببتلي الم

فعقاب المجهول دة فضحه بجد حتي يكون عبرة لمن يعتبر

مراقب مصري يقول...

الأنونيمس 1

على رأيك مسيحي وكمان بغلط في المدونين الذئاب... دا ولا أما أكون صبأت يا ابن أبي شفلحة
بالنسبة لفكرة إنك عاوز تعمل زيه فساعتها يا حلو حرص على أجزاءك الحيوية لأنها ستكون في خطر مبين وبعدين لابد من ذكر أن صاحب الريادة في موضوع الخصي كعقاب للتحرش هو المبدع الكبير علاء عبد الفتاح وحركة تلاتين فبراير المجيدة في حملتها التاريخية هتعاكس هنخصيك ومشروع إبرة تريكو لكل امرأة... الله يمسيك بالخير يا عم علاء يا سيف
===========

أنونيمس 2

هو الأنونيمس مالهم زادوا النهاردة كدة؟ دا عملا بالمثل القائل اللي على راسه بطحة يحسس عليها ولا إيه؟
لا أرى فرقا في التحرش الجنسي - بكافة أشكاله - بما إذا كانت البنت تستاهل أو ما تستاهلشي
بالنسبة للعبة الذكاء اللي بتلعبها يا فكيك مين اللي قال أصلا إن المدون الذئب على قائمة لنكاتي؟ التكهنات ممنوعة يا حلاوة
===========

شهروزة العزيزة

متفق معاكي تماما يا عزيزتي في طرحك والقضية الأساسية هنا ليست في أخلاقية إقامة علاقات عاطفيو أو حتى جنسية بين طرفين ناضجين وموافقين على العلاقة... البعض يختار إقامة علاقات جنسية وهذه اختياراتهم الشخصية التي لا مجال لمناقشتها هنا ولا حق لي بمناقشتها... لكن هنا القضية مختلفة... يعني عايز تشقط بنات... ميز إنت بتكلم مي... وعيب أوي لما أعامل بنت محترمة على إنها زي ما انتي قلتي فتاة رخيصة... ومن تاني بأكد أزمتي ليست في إقامة العلاقات من عدمه... اللي عايز يعمل علاقة مع أي حد براحتهم... بس التحرش ما هواش علاقة... عرض إقامة علاقة جنسية مع أي واحدة لمجرد كونها أنثى ماشية على رجلين اتنين دا شيء مبتذل
=============

مسلم وقبطية

أنا شخصيا مش مع فضح الشخص والتشهير به على الملأ والبوست بتاعي ما كنش هدفه فضح الشخص المقصود ولكن هدفه صرخة تحذير مش بس إن البنات تخلي بالها من نفسها وكأني باوعظ على منبر... لكن صرخة تحذيرية من فصاميتنا العجيبة في هذا المجتمع العجيب... أما بالنسبة للشخص فأنا أؤمن بمقولة لا تدينوا كي لا تدانوا وأنه من منكم بلا خطية ليرمها بحجر... وأيضا أن من ستر مسلما ستره الله يوم القيامة... لأجل ذلك لم أشر من قريب أو بعيد لهوية المدون ولن أفعل... وأما التصويت في الاستفتاء فكان هدفه استطلاع رأي الناس وليس بالضرورة الأخذ برأي أغلبيتهم.... في النهاية مدونتي هي بيتي وأنا اللي باخد القرار فيها وإن كان يهمني معرفة آراء حضراتكوا... اللي عاوز يقرر قرارات مختلفة يقررها في بيته اللي هو مدونته
وشكرا
==============

العزيزة توتا

في رأيي إن عندك حق هذا النموذج ليس شخصا واحد... برافو عليكي إنك حليتي الفزورة... هو مش ذئب واحد ولكنهم كثيرون والدليل الأنونيمس اللي على راسهم بطحة وجم يحسسوا عليها... ههههه
من تاني بأكد إن مش قضيتي مين يعمل علاقة مع مين بس التحرش حاجة تانية ومش مقبول ومش مبرر تحت أي ظرف
================

القهوة العالية

أنا فاهم كلامك ومتفق معاه إجمالا ولكن فكرة الفضح مزعجة جدا بالنسبة لي... لا يوجد واحد منا بلا خطية أو بلا خطأ... وجميعنا نحتاج بجد لستر ربنا وستر الناس علينا في مرات مختلفة... قضيتي ليست ذبح شخص ما... ولكن إدانة سلوك معين وزي ما انتي قلتي... حرية الإنسان الشخصية شيء وخداع الآخرين شيء آخر والتحرش الجنسي قصة مزعجة جدا... بس برضه مش موافق على الفضح... هو مفيش أي أمل في رأيك إن الناس اللي زي كدة ممكن تتغير بجد؟
===============

كنوز

القضية ليست في الشخص لأنهم كما رأينا كثيرون ولكن القضية هي في فضح سلوك معين... في تدوينة سابقة ليا اتكلمت فيها عن فصامية المجتمع ذكرت تحديدا كيف إن مثقفي هذا المجتمع يحنجرون كثيرا عن حقوق المرأة والمساوة والحلابسة بالشطة والليمون ولا يستحون بعد ذلك أن يتعاملوا مع المرأة دي نفسها على إنها مزة جامدة أو مجرد شريك جنسي محتمل أي تشييء المرأة من شخص وكائن حي إلى مجرد "مكنة" أو صاروخ جنسي تستخدمه وبعدين ترمي الفارغ... واخدين بالكوا م الفصامية؟؟؟
==============

عزيزي أحمد المصري

الحمد لله إني ضحكتك... يا باشا تحت أمرك... بص بقى يا سيدي... بالنسبة لموضوع دين أمه فالمصطلح على بعضه لا يسيء لدين على الإطلاق هو تعبير مبالغة للدلالة على بهدلة شخص ما... أما كونه لا دين له فآسف فمرات الوضاعة تصير دينًا وعقيدة
==================

غير معرف يقول...

الحج جرجس مرة كمان،
انا صاحب اول تعليقين،
نلعب بقى لعبة الذكاء،
ايوة المدون الذئب عندك فى اللينكات بتاعتك،
وانت كده بتساهم ان ناس تنخدع وتروح تزور مدونته،
وبيتهيألى أنت على الاقل لازم تشيل اللينك والصورة،
ههههههههههه
وبعدين أنا فى مجموعتنا المباركه 30 فبراير:)
ومش هقولك انا مين دلوقتى،
،
بصراحه اللعبه عجبتنى والاخ اللى بيقول ان تعليقاتى تفقع فده كويس،
شهروزة..
ما أحنا بلديات بقى ومتقلقيش يا ستى..
والله انا غضبان بس انا عندى فضايح تانية ليه يعنى لو انتى عاوزة،
بس برضه هو اكيد اتحرش بواحده متستاهلش ويبقى حلال فيه ساعتها اى حاجه،
شهروزة مش هتقولى انا مين صح:)
وتوتا طبعاً لازم تبقى عارفه انى عارف ..
حج جرجس مسيحى وضحكتك ها ها ها ها

مراقب مصري يقول...

عم النديم

طبعا يا باشا اللي على روسهم بطحة كتير... كذا واحد النهاردة اتصلوا بيا عشان يتأكدوا ضمنيا إنهم مش هما المقصودين بالبوست... ههههههههههههه... مع إني قاصدهم برضه ضمنا.... ههههههههههههههه... الذئب مش ذئب واحد... الذئب ف كل واحد... هههه داخل كل رجل ذئب... إزاي تروضه أو تسرحه هي دي شطارتك يا حلو... مش البيه برضه جواه ذئب؟
نياههههههههها
================

المهاجر المصري
يا نهار اسود يا رأفت!!!! كل شيء صدقني ممكن... بس مين قال لك إن المتحرش واحد بس مش كذا واحد؟؟؟؟؟؟ ومدام أكتر من واحد يبقى حاتم رشيد احتمال قائم طبعا
================


الأنونيمس 3

يا سيدي متفق في موضوع لا تدينوا كي لا تدانوا... وبعدين الاستفتاء على عقوبة كان ما إلا استطلاع لرأي الناس مس إني هاخد بيه فعلا... لكن وصف السلوك نفسه وإدانته ما هواش ذبح ولا رجم للشخص... هو مجرد صيغة مبالغة هدفها توصيل رسالة قاسية تردع من تسول له نفسه الإقدام على نفس الفعل... ولكن بالطبعة الفعلة كثيرون
================

عزيزي أحمد زكي

عاجبني كلامك الحقيقة وعاجبني فكرة رجالة جداد وستات جداد ومدونين جداد وكأنك بتقول إنه المنظزمة القيمية القديمة كلها صارت تستعصي على الترقيع وإنما تحتاج أن يتم إحلال وتبديل للقديم بالجديد على كافة المستويات والأصعدة... برافو عليك... هو دا الكلام ومعاك في أن الفضح لشخص ما مش صح بس أنا ما عملتش كدة ومش هاسمح بأي تكهنات في المدونة ولا أي حد يحاول يفترض أو يتهم أي حد بدون دليل مادي على الكلام... شكرا
================

الكوبرا الحديدية

ليست قضيتي أو أزمتي هي معلهش
بل هي أنه بالفعل هذا الشخص ليس واحدا بل هم كثرُ وكل مين على راسه بطحة بيحسس عليها يا باشا
وكلامك طبعا صحيح في حاجات كتير ومهم جدا إن الناس تاخد حذرها في العلاقات على النت أو في انتقال العلاقات من الواقع الافتراضي إلى الواقع الفعلي... ومن جديد نؤكد أنه حيثما توفرت الإرادة الحرة لدى أي طرفين في الدنيا لإقامة أي علاقة من أي نوع فهو حق أساسي للاتنين ولكن ليست هذه هي القضية هنا فالقضية هي قضية تحرش جنسي وإن كان لفظيا بفتيات غير موافقات على ما يحدث وأن يحدث هذا مع العديد من الفتيات من نفس الشخص فهذا يؤكد إنه متآمر واهبل
===================

الأنونيمس 4

مش من حقي أفضحه دا حق فقط للضحايا... واللي انا متأكد منه إني مش منهم.... هههههههههههه
==================

سمراء النيل

الضحايا كتير وصدقيني المجرمين كتير هما كمان وبالتالي اللي عايزة تفضح حد تفضحه - بس يا ريت في مدونتها - مش هنا... ويلا بقى سيح سي يا عم الحاج....

مراقب مصري يقول...

عزيزي أنونيمس 1 من تاني

مش هالعب لعبة الذكاء... مع إني أجيدها... وما تقدرش تنكر إن المواصفات بتاعة المدون الذئب دا تنطبق على الأقل على ييجي 300 أو 400 مدون... فلعبة الذكاء فعلا عيب تتلعب في الحتة دي... لأن بالفعل الكثيرون هم على نفس شاكلة أخينا ده... وبالنسبة لتشجيع مثل هذا الذئب على أفعاله فإنسى يا عمرو... الحرامي جبان ومن هنا ورايح كل الذئاب (يا امي) هيكشوا ويبقوا قمة في الأدب والأخلاق... وزميلاتنا المدونات هيبقوا صاحيين أوي والكل هيفضل يدور على المدون الذئب والمشكلة إن كل واحدة هتبدأ تحصر حواليها بتاع عشرة اتناشر ذئب وهلم جرا... يبدو إن الموضوع مش عايز يتلم وخلاص نرش مية وكل واحد على بيته بقى.... خير... أدينا مع بعض لحد ما نشوف هترسي على إيه... ومن تاني لعبة الذكاء ممنوع فيها التكهنات

لو هتلعب العب بالأصول يا حلاوة

هههههههههههههههههه

مراقب مصري يقول...

بالمناسبة يا أخ أنونيمس 1

ماذا تقصد تحديدا بكلمة بنت تستاهل أو ما تستاهلش؟؟؟؟؟

جاوب بقى يا فالح

مريض نفسى يقول...

ملحوظة غريبة وجدت طريقها الى مخيلتى وانا اتطلع لهذا العالم الغريب ان معظم المونات النسائية تستاثر بالعدد الكبير من التعليقات هذا لو كانت التعليقات دليل على نسب المطالعة ولكن تقريبا كل المدونات النسائية تتعمد الرد على كل كومنت فى كومنت لوحدة من اجل زيادة عدد التعليقات النهائية لصالحابراز الاهمية بين باقى المدونات مع ان معظم المواضيع التى تكون فى البوست_بدون زعل_تكون تافهة او اقرب للهيافة منها للثقافة بس كل واحدة حرة فى بوستها تكتب فية اللى هى عايزاة
الدور والباقى على الاخوة المعلقين الذين يتحولون بقدرة قادر وبمساعدة كى بورد ناعم وسلس اقول يتحولون الى اراجوزات ويتخذون صورة المستمع لمحمد طة وقد اخذ علقة من المخبرين المختبئين وراءة وهات يا هتاف باسم صاحبة البوست وترى كلمات من عينة بوست رائع هايل يا ابلة انتى قولتى اللى فى نفسى بالظبط وغيرها من الكلمات التى تنتهك وتتحول الكومنتات الى صالة مزادات فى اظهار مدى العشق والولة والهيام بالبوست الذى لم يأت بة الاوائل ولا حتى شوتايم
واخيرااعتبر بوست حضرتك دة ضربة فى الصميم واكبر اشاعة حصلت لغاية دلوقتى وكنت تنصحك بتاخيرة لااول ابريل
تحياتى للجميع

zenzana يقول...

احتمال كبير تتهموني بالهبل او المثالية الزيادة، لكن مش مهم
من امبارح وانا بتفرج علي التعليقات
اعتقد ان ف البوست دا في انتهاك لحرمة الحياة الخاصة للأخ الذئب، وكمان للضحايا اذا كنت يا حاج نزلت البوست من غير ما تاخد رأي حد فيهم هل اخدت رأي الضحايا قبل ما تنزل البوست؟ مجرد سؤال
السؤال التاني انت عرفت ازاي؟
هل الضحايا حكوا لك؟
ولو حكولك اتكلموا معاك بوصفك الصديق مينا؟ ولا الحاج جرجس صاحب مدونة كفاية حرام؟
لو كانت الاجابة التانية فدا بالتأكيد حقك انك تكتب عن الموضوع

لكن لو الاجابة الاولي
يبقي انت قلقتني اني مثلا مقدرش اتكلم مع صديق عنده مدونة عن حياتي الشخصية
والا بسهولة هلاقي كل اسراري ع مدونته

لا اظن ان سياسة العزل حل لانها بالظبط زي دفن الرؤؤس ف الرمال
انت دلوقتي خلتني أتسأل حوالين ميثاق الشرف الغير مكتوب بين المدونيين
هو فين؟ ولو مش موجود طب مش بنعمله ليه؟
شكرا
اسف للاطالة

غير معرف يقول...

يا حاج جرجس
مش ها ينفع كده يابا
الكلام كده طرطش على كل المدونين
وبعدين واضح من كلامك انه حد عبيط لانه مش بيلعبها بذكاء
وواضح انه ما وصلش لمبتغاه
يبقى ده لسه ما حصلش منزلة البوبي
مش الذئب
لان الذئب بيكون اجهز على الفريسة خلاص
لكن ده واضح انه واحد حاول يزبط فاتفضح
وبعدين يا عم الانونيموس انت حصرتها دلوقتي في الوصلات اللي حاططها الحاج جرجس
وفيهم انا وانت وعلاء سيف
يعني انت يا حاج جرجس لا افدتنا وكمان عوصتنا طين جنب الذئب بتاعك ده

غير معرف يقول...

لو انت راجل محترم لازم تفضحه
انت كده شوهت سمعة كل المدونين

بس أوعى فى الاخر يطلع انت

;)

مراقب مصري يقول...

مريض نفسي

برافو عليك يا أستاذ جبت التايهة هي إشاعة ومفيش ذئب ولا سفاح ولا أي حاجة ومصر أجدع من اليوتوبيا بذات نفسيها... يا سلام عليك إنت بس اللي فاهمني
==============


زنزانتنا المصون

يا بنتي إنتي كمان وقعتي في فخ شخصنة الموضوع؟ الموضوع حتى وإن كان عن شخص واحد إلا أنه بالطبع يصف العديدين في دنيا التدوين واللي فيها زي ما توتا قالت زي ما في الواقع الحقيقي بالفعل الصالح والطالح... وعادي يعني... أما بالنسبة للتعدي على الخصوصية فالله شاهد يا ستي إني في كلامي لم أشر لا لشخص المتحرش ولا لشخصيات الضحايا وبعدين مين قال إنه لازم يكون صاحبي؟ أنا الموضوع وصلني من مصادر معينة وقلت أنشره بسبب خطورته على الأمن التدويني ولم أكن أبتغ فرقعة ولا شهرة (لأني زي ما انتي عارفة مش ناقص شهرة) ههههههههههه
================

وائل عباس شخصيا في كفاية حرام

يا مرحبا يا مرحبا يا عم وائل
نورت المطرح
يعني أنا لازم أكتب عن الإخوة المتحرشين عشان تشرفنا؟ عموما حللت أهلا ونزلت سهلا

مين بقى اللي قال إن المدون الذئب على قائمتي المفضلة؟ ومين قال إنه لازم يكون صاحبي؟؟ أما بالنسبة لمين اتعاص ومين ما اتعاصشي فببساطة اللي على راسه بطحة بيحسس عليها وبعدين إنت جيت وعلقت ودا معناه إنك مش الشخص أو مش من بين الأشخاص المقصودة لأن أنا حالف بشرفي إنه لو واحد من المتحرشين المقصودين جه هنا أنا هافضحه... مجرد حضورك يا زعيم هو بمثابة صك براءة
هههههههههههه

وبعدين يا أستاذ وائل إنت أخلاقك فوق مستوى الشبهات طبعا ومصداقيتك لها وزنها وثقلها بين الجميع... تفتكر ممكن البي بي سي الدولية تختار واحد متحرش ضمن أكثر الشخصيات العالمية تأثيرا؟ دا حتى ساعتها البي بي سي تبقى خلاص بتهطل على روحها

بس قول لي بقى من واقع خبرتك التدوينية ليه الناس كلها سايبة القضية الأساسية وماسكة في معرفة هوية الشخص؟

مراقب مصري يقول...

عم الأنونيمس اللي فوق ده

لا يا عم المدونون الشرفاء مفيش أي إساءة ليهم على الإطلاق... وبعدين إحنا هنلعب مع بعض لعبة تشويه سمعة مصر والا إيه؟ شكلك الحزب الوطني بهت عليك وناقص تقول لي إني أنا كدة باكدر السلم التدويني العام وبهين رئيس الجمهورية بالمرة

يا عم روق يا عم

المدون الشريف ولا بيهمه من أي حاجة لأنه عارف إنه طاهر وهيفضل طاهر
ويا ام المتطاهر رشي الملح سبع مرات... ف مقامه الطاهر رشي وقيدي سبع شمعات

غير معرف يقول...

امال مش عايز تقول اسمه ليه؟
حتى عالشان الباقى يبعد عنه ؟

غير معرف يقول...

يا حاج جرجس
احرجتني وثبتني والله
بس عاوز اقول حاجة حسيتها لما قريت الموضوع تاني
وهو ان الذئب ده فيه حاجة كويسة
وهو انه دوغري
عايز يزيبط وبيقول عايز يزبط وش
يعني لا لف ولا دار ولا قال باحبك ولا عاوز اتجوزك ولا اجي اقابل بابا امتى والحركات القرعة دي
انا مش عارف انتم زعلانين من صراحته ليه
بصوا بقى من الاخر
انا راجل ذكوري ومتعصب جدا ضد افعال صنف الحريم
البت تحب اللي يستعبطها ويستغفلها وياخد احلى ما عندها وتديله عنيها كمان وبعد كده يرميها زي الكلبة بعد ما تكون اتعلقت بيه
وده علشان هو عاجبها وداخل دماغها فبتبلع كذبه بمزاجها
لكن اللي صريح وبيبين هو عاوز ايه من الاول هو اللي يبقى ذئب ؟؟؟
اسمحولي يعني أشخر !!!
يا ستي ما عجبكيش الانديسنت بروبوزال بتاعه قوليله لا يا عم يفتح الله وخالتي وخالتك واتفرقوا الخالات
واخيرا احب اقول
انا باحترم صراحة هذا الذئب

وفشر يا حاج جرجس
براءة في عينك
هاهاها

مراقب مصري يقول...

العزيز أنونيمس تاني

ماهو برضه الواحد لازم يبقى عنده حتة إنسانية وبعدين من منا بلا خطية فليرمه بحجر... أنا شخصيا لا أدعي العصمة... إنت عارف أنا حيا الله حتة إله صغير لما أكبر وابقى إله كبير (زي آلهة الإغريق كدة) أبقى بعون الله معصوم وساعتها هادينكم كلكوا يا كلاب وسأرميكم في جحيمي يا كفرة يا زنادقة يا متحرشين
بس الحمد لله من ستر ربنا إني إنسان خطاء ومانيش معصوم وبالتالي مقدرش أدين شخص - وخصوصا إنه كل اللي عندنا قرائن لا ترقى إلى مستوى الأدلة - واهمد بقى... دا السنة النبوية بتقول من ستر منكم مسلما ستره الله يوم القيامة
ولا إنت مش مؤمن بالقيامة يا زنديق؟؟؟؟
===================


وائل باشا عباس عمنا والحيطة التدوينية اللي بنستظل بظلها جميعا

طبعها أنا فاهمك بس حتى الذكوريين يا راجل المفروض عندهم أخلاق... يعني حتى لو انت راجل ذكوري وشايف الست لا تصلح إلا للجماع وحسب برضه لازم موافقتها يا راجل ولازم تبقى شيك في ذكوريتك... لأ لأ لأ إنت أفكارك الذكورية رجعية خالص... أنت عار على حركة تلاتين فبراير المجيدة

بس شفت الإفيه بتاع صك براءتك دا يا باشا؟؟ مسخرة
هههههههههه

مريض نفسى يقول...

متشكرين يا عم اعادة التشكيل1976

وابقى قابلنى لو ماطلعتش اشاعة وانت السبب فى اللخبطة الكدابة دى
عموما اللى على راسة بطحة بيحسس عليها
هذا ان كانت فى راسة فلتخبرنا انت ماذا تفعل فى بطحتك فصورتك المنشورة لا توضح وجود اى نوع من البطحات
فى راس سعادتك الكريمة

3rby يقول...

اقولك ليه يا جرجس ماسكين في الشخصية
المفروض نسيحله علشان لو عرض علي مدونة انه يشوفها ماتروحش ويتحرش بيها زي التانيين
انت كده دورك سلبي وبتساهم بشكل او باخر في التحرش
والساكت عن الحق شيطان اخرس
(لا مؤاخذة يعني)

kaed يقول...

إزيك يا حاج جرجس عارف يابنى الواطى حيفضل طول عمرة واطى

bluestone يقول...

بعد تفكير
لا مش هيتغيروا
وده رأيي
وحتى إذا حصل فالتغير لن يعيد الثقة
فيه حاجات لما بتتهز ماينفعش ترجعها لاصلها تاني
ربما تكون انت صح في مسألة الفضح
لانه حتى مع الاعلان عن هويته هو ممكن يدون في مدونة جديدة تماما باسم مختلف ويؤذي ناس تانية ..
معرفش حلها ازاي دي
لكن في النهاية التحذير العام وصل للجميع
وزي ما أشارت أيرونكوبرا في التعليق اللي في رأي أهم تعليق على التدوينة دي بخصوص نظرية الأمان الافتراضي

غير معرف يقول...

حج جرجس مش مسموح ليك تتكلم بلسان المدونين وتقول ان وائل هو مظلتنا التدوينية،
وكمان متتكلمش بلسان 30 فبراير،
دلوقتى كل اللى اتحرش بيهم الذئب اللهلوبه اكيد متابعين التعليقات مع انى عارف انهم اكيد برضه علقوا،
يا عم اللهلوبه ما تيجة وتعلق،
انت راجل شريف زى ما وائل بيقول عليك،
وشفتوا وائل بتاع الصفاء والنقاء:)
المهم دلوقتى،
جرجس التدوينة عن واحد بس،
ولسه حاطط لينك ليه،
واللينك مش بصورته هو،
هفضحك وهكتب عنه لو كدبتنا تانى...
انت كده بتخلى الناس تروحله تانى،
مع انى مش معترض على اللى هو قاله زى ما وائل قال،
وبلاش بقى شغل المسيحيين ده وتطلع نفسك الشهيد،
ولتسقط فروسيتكم الواهية:)
صاحب التعليق الاولانى والتانى..
ها ها ها ها

غير معرف يقول...

آه يا أنونيموس يابن الأنونيموس
ما علينا

شوف يا حاج جرجس
طالما المدون طلب التزبيط بالذوق يبقى كتر خيره
ويبقى كده ما اتحرشش ولا حاجة
وده اللي انت قلته
انت كل اللي مزعلك انه ما ضحكش على المزة وقال لها انه بيحبها زي باقي الذئاب ما بتعمل
وانت شايف ان كده عيب
لان تزبيط المزة حتما ولابد يتضمن الكذب عليها وتعييشها في الوهم وتعليقها في الحبال الدايبة
وانا شايف ان طالما الواد ما مدش ايده يبقى عداه العيب
ولا ايه؟

مراقب مصري يقول...

المريض النفسي العزيز

ده رأيك وأنا أحترمه... ولكن هل ادعيت أنا العصمة أو أنني لا أخطئ؟ كان نفسي يطلع رأيك مظبوط والموضوع إشاعة بس للأسف فيه أكثر من مدون ينطبق عليهم هذا البوست
============

عزيزي عربي

إن كنت أنت بلا خطية فلترمه بحجر... وليس من حقي فضح شخصية المدون لأن في هذا تعدي على خصوصيات ناس... لو حد من حقه كشف الشخصية فهن الضحايا أنفسهن وليكن هذا في مدوناتهن... أنا عندي معلومة وبس وقد لا تكون مؤكدة فالعهدة في النهاية على المصدر
============

العزيز قائد

فعلا مثل هؤلاء هو مناس واطية فعلا
============

عزيزتي القهوة العالية

كالعادة رأيك صائب والسؤال محير والقضية الأساسية تبقى هي توخي الحذر على الفضاء الافتراضي... وطبعا تعليق الكوبرا الحديدية مهم جدا ويرجعنا إلى أصولية التجربة التدوينية ومحاذير التعامل على الواقع الافتراضي عموما... وفي رأيي حفظ النذر اليسير من ماء الوجه للشخص المخطئ هو أمر إنساني بحت ومهم... وكفاية عليه - هو وأمثاله الكثيرون - كدة... وف رأيي نقفل بقى المناقشة وخلاص على كدة
============

العزيز أنونيمس

برضه التكهنات مرفوضة... وبجد كفاية لحد كدة... وبالنسبة لوائل وحركة 30 فبراير المجيدة أنا بهرج - إنت مهندكش حس دعابة خالص؟ - وانت عارف اعتزازي بالحركة وأبطالها البواسل وأنت منهم... فحركة تلاتين فبراير هي التي أعادت لنا الكرامة والعزة والإباء والشمم... مش برضه إنت عندك شمم؟؟ وبعدين حياة أبوك يا شيخ خلص بقى واهمد... كفاية كدة بجد

غير معرف يقول...

مش قادره اصدق
ان وائل عباس بيقول كده
انت مع المجتمع الذكورى يا وائل
انا كنت داخله اشكر المدون جرجس على موقفه
اتصدمت بكلام وائل عباس اللى انا اساسا بحبه جدا

مراقب مصري يقول...

عزيزي الرائع وائل عباس

ثمة نوع من التحرش يدعى التحرش اللفظي ودا مش محتاج مد إيد ولا تفعيص... وبعدين المنظور بتاعك بيلغي القضية من أساسها... يبقى خلاص الموضوع خلص... هو كان مباشر ودوغري وانت شايف إن ده مش عيب يبقى خلاص نقفل بقى الموضوع الله يكرمكوا ويستر على ولاياكو... وبعدين حاول تهدي الأخ أنونيمس يا وائل بما أنه زميل لك في مجلس قيادة حركة 30 فبراير المجيدة... 30 فبراير قرب خلاص ومش عايزين دوشة أثناء احتفالنا الثوري المتسع النطاق في هذا اليوم المجيد

مراقب مصري يقول...

وائل عباس من تاني

أديك هتخسر شعبيتك بين المزز يا عم وائل بسبب أرئك الذكورية... يا ست أنونيمس... وائل ما بيتكلمش جد... وائل بيهرج... خلي عندك حس دعابة إنتي التانية

غير معرف يقول...

الانونيموس الانثى
ما تزعليش
خلينا صرحاء
ليه البنت بتزعل لما الولد يكلمها عن مشاعره ناحيتها بصراحة ويقول لها انها مشاعر فيزيائية محضة
وليه بتحبه يستغفلها ويعيشها في عالم وردي وتسمحله يوصل لنفس النتيجة اللي هو اصلا عايزها منها
ده عيب ذكوري ؟
ولا عيب في الاناث ؟

غير معرف يقول...

هو برضه لما نبص للموضوع من الناحية الانثوية ما انكشر ان شكله وحش
لما البنت بتلاقي واحد بيقولها كده ها تقول هو ليه قال لي كده هو فاكرني ايه والحاجات دي
فهو برضه حد مش كويس
ولا تزعلي يا انونيموساية

مراقب مصري يقول...

أعزائي المدونون والمعلقون والأنونيمسون

نشكركم على حسن متابعتكم واسمحوا لي أن أغلق باب التعليقات وكفاية لحد كدة وربنا يستر على ولايانا

شكرا

الحاج جرجس
وكفاية بقى حراااام

لكي لا ننسى دم أحمد علي مبروك