08‏/02‏/2007

وائل عبد الفتاح فارس "الفجر" الشريف... أين أنت؟

وائل عبد الفتاح فارس ÷الفجر× الشريف... أين أنت؟

في زمن عزت فيه الرجال وصار فيه الخصيان هم أصحاب الصوت الأعلى لا يمكننا أن نقبل ولا أن نستوعب كيف ولماذا يختفي أحد آخر الرجال المحترمين في بلاط صاحبة الجلالة وهو الصحفي "الكبير" والفارس النبيل وائل عبد الفتاح. جميعنا نتذكر الدور الذي لعبه وائل عبد الفتاح في فتح ملف قضايا التعذيب وفضح ممارسات الشرطة السادية في التعامل مع المواطنين. وائل هو الذي فتح ملف الضابط الشاذ الذي انتهك كرامة المواطن أمجد حسين في "كمين الزعفرانة" وهو صاحب القضية الأشهر في قضايا التعذيب، قضية عماد الكبير واغتصابه بعصا مقشة على يد نقيب الشرطة إسلام نبيه وأيضا الكشف عن هوية الضابط مصطفى شحاتة ضابط قسم الهرم مرتكب فضيحة كليب الصفعات وكلا الضابطين الأخيرين أحيلا إلى القضاء مؤخرا. ملف قضايا التعذيب والانتهاك في وزارة الداخلية أسماه وائل عبد الفتاح قضية التنظيم السري للتعذيب في الداخلية، تلك القضية التي أثارت الرأي العام ليس على المستوى المحلي فقط بل وعلى الصعيد الدولي أيضا حيث اهتمت المنظمات الدولية ووكالات الأنباء العالمية بقضايا التعذيب في مصر والتي كان لوائل عبد الفتاح الدور الرئيسي في الكشف عن الكثير منها.

وائل عبد الفتاح فجأة اختفى من جريدة الفجر التي كان يعمل بها وينشر من خلالها ملفات التعذيب والفساد في مصر. لماذا توقف وائل عبد الفتاح عن الكتابة بالفجر؟؟ وما هو السر وراء هذا الاختفاء المفاجئ؟ أثناء حملة كشف ملفات التعذيب كانت ثمة ضغوط مرعبة على وائل لإرغامه على إيقاف حملته ولكنه لم يرضخ لضغوط ولا لتهديدات واستمر يفضح العديد من عناصر التنظيم السري للتعذيب بوزارة الداخلية غير عابئ لا بتهديد ولا بترهيب. وائل نموذج للصحفي الشريف الذي يقول الحق بشجاعة ولا يخش في قولة الحق لومة لائم. هل مورست ضغوط معينة على جريدة الفجر لإجبار وائل على الرحيل والتوقف؟ أهي صفقة للتخلص من صحفي شريف في زمن أغبر صار وجود الشرفاء فيه مصدر تهديد لكل من على رأسه "بطحة"؟

أسائل الأستاذ الصحفي الكبير عادل حمودة – رئيس تحرير الفجر - لماذا توقف وائل عن الكتابة بالفجر؟ هل وجوده صار يشكل خطرا على بعض الفاسدين وصارت الجريدة لا تحتمل وجود "مشاغب" شريف مثل وائل؟ وأسأل الأستاذ وائل عبد الفتاح نفسه... أين أنت يا رجل؟ إننا نفتقد قلمك ونفتقد شجاعتك ومجاهرتك. قل لي أين نجدك لكي نرتحل وراءك حيثما تذهب... فأنت قيمة تستحق السعي خلفها بل والحرب لأجلها فأنت ممن ينطبق عليهم كلام أمل دنقل "أنت فارسُ هذا الزمان الوحيد وسواك.. المسوخ!"

يقول البعض كلاما غير مؤكد أن سبب ترك الأستاذ وائل عبد الفتاح لجريدة الفجر كان خلافه الشديد مع إدارة الجريدة بسبب الإعلان المستفز الذي وضعته الجريدة على صفحة كاملة للدكتور هاني سرور – عضو مجلس الشعب المتهم في قضية الدم الملوث وفلاتر غسيل الكلى الفاسدة – والذي كان يهنئ فيه هاني سرور الأقباط بمناسبة عيد الميلاد المجيد واعتبره دعاية فجة ومحاولة من رجل الأعمال المشبوه لتلميع وجهه بفلوسه على صفحات الجريدة التي يحترمها الكثيرون وخصوصا أن الإعلان تزامن مع فضيحة الدم الملوث المتورط بها السيد النائب هاني سرور ورفضت الجريدة أن تكتب في الموضوع اللهم إلا كتابتها موضوعا فيه غمز ولمز ضد النائب حيدر بغدادي – الذي أثار قضية الدم الملوث وشركة هايديلينا المملوكة لهاني سرور تحت قبة البرلمان – وأتى الموضوع الذي نشرته الفجر باتهامات مبطنة لحيدر بغدادي تطعن في ذمته المالية وتلمح أنه ليس فوق مستوى الشبهات.


هل هذا هو سبب ترك وائل عبد الفتاح للفجر؟ أم أن ثمة ضغوط أمنية مورست لإزاحة الرجل من الساحة عقابا له على فتح ملفات التعذيب في الداخلية؟ وهل استقال وائل بالفعل من الفجر أم أقيل؟ العديد من علامات الاستفهام وأيضا علامات التعجب في هذه القضية الشائكة. وأخيرا هل يتكلم وائل عبد الفتاح ويكشف أسباب "غيابه" عن الفجر على مدى الأسابيع الأربع الأخيرة؟ أم يتكلم الأستاذ عادل حمودة الصحفي القدير الذي نحترمه ونقدره ويضع حدا للتكهنات والشائعات المحيطة بغياب وائل عن الفجر؟ أسئلة ستكشف عن إجاباتها الأيام القادمة وربما التعليقات على الموضوع.


وفي النهاية أقول لوائل عبد الفتاح... تحية من جديد لك يا رجل اختار أن يكون رجلا فاكتسبت المصداقية لدى الجمهور وأحبك القارئ واحترمك. شكرا لك لأنك وائل عبد الفتاح.

هناك 20 تعليقًا:

غير معرف يقول...

عقبال المدونين

صفصف لادي يقول...

والله من منبري هذا ادعو وائل عبدالفتاح او اي شخص يقدر يوصله الرسالة انه يفتح مدونة و يستمر فيها زي ما استمر في الصحافة المطبوعة
و مؤكد برضو حيقدر يفجر قضايا و ينبه الناس و يقلب عاليها واطيها
اعتقد انه ممكن
و ارجة انه ميخليش حدود الصحافة المطبوعة تتحكم فيه او تشل حركته بعد الشر عليه من الشلل

سلام

zenzana يقول...

الاخ المجهول نمرة واحد
عقبال المدونيين علي ايه؟
انه يتوب عليهم من اشكال عادل حمودة؟
ولا هاني سرور؟
ولا الحزب الوطني؟
ولا النظام كله؟
في فرق احنا قاعدين مش مشيين وسايبينها
وائل صحفي يعني صحافة مطبوعة ممكن يمشي بعد رزالة المدير
احنا بقي ما لناش ريس
يعني احنا مش قفا
توب علينا يا رب من الاشكال العفشة

mano يقول...

مكنتش اعرف انه مشى من الفجر
ده جزاء الشرفاء
الغريبه فعلا انهم يسيبوا المصيبه
و يمسكوا فى اللى كشف عنها
حاجه غريبه

الى المجهول الأول
عقبال المدونين ازاى يعنى؟
انا متهيألى عقبال ناس تانيه

عفوا يا حج جرجس انى خرجت عن الموضوع

yasser_auf يقول...

ابتسم يا جرجس هي دي مصر يا جرجس
في هذا الزمن عندك ضمير و موش بتتمحلس و موش بتمسح جوخ و موش بتلمع جزم الاكبر منك

يبقي مكافئتك تاخد علي دماغك باي صورة ان كانت

عادي شغل ارهاب لو موش عاوز تبطل كتابة و تتلم ينضغط علي رئيسك يمشيك و دور بقي علي الي حيشغلك يعني تقدر تقول نوع من انواع ال...ص

ذو النون المصري يقول...

انا اري راي حفصه انه ممكن يفتح مدونه واكيد يقدر يواصل فيها الكتابه لكن المشكله منين ينفق علي اهله و اسرته اكيد هيلاقي التضييق عليه من كل ناحيه حتي لو كان فيه امل انه ينشر في اي صحيفه من خلال المدونه اعتقد ان الامل ده كمان غير موجود لانه استحاله يفصلوه في جريده و بعدين ينشر من مدونته في صحافه
صعب
ياريت يكون فيه حل اخر
اتمني انه يكون فيه شريف غيره في اي صحيفه ممكن يقوم بنفس الدور
اللي انا خايف منه انه يحصل معاه كما حصل مع قنديل من حوالي ثلاث سنوات من اعتداء عليه في الشارع بعد اختطافه و تركه عاريا علي الطريق الصحراوي

ahmEd_H يقول...

بص يا جرجس يا خويا
انت ليك حق تقلق بس علشان مانشككش فى زمة الجريدة لان عادل حمودة من الناس اللى فعلا بحترمها زى وائل عبد الفتاح برضه انا شايف ان وائل لازم يرض و يقولنا هو فيــــــــــــــــــــــن علشان نبطل مانحترش

و بجد انا حاموت و اعرف مين المتخلف اللى كاتب اول تعليق

Anonymous said...

عقبال المدونين

هىهىهىهىهى

yasser shams aldien يقول...

صباح الجمال يا حاج
انت هتشتغل شرلوك هولمز يا حاج ولا ايه
طيب فين المكافاه بتاعه البحث عن وائل
وانا اجبهولك من تحت طقاطيق الارض
حتى لو كان فى لاظوغلى اخر بلاد العالم

Reformer1976 يقول...

عزيزي المخبر

المدونون بيسألوك عقبال المدونين إيه؟ وبيقولولك إنت يا ابني ما عديتش على مدارس خالص تتعلم فيها عربي وتعرف تقول كلمتين على بعض... الله يخرب بيت معهد مندوبي الشرطة اللي بالإعدادية اللي بيدربوكوا فيه إزاي تبقوا أصنام... روح يا ابني جمع كلمتين وتعال اتكلم مع الناس الكبار
=====================

حفصوتشا الغالية

لما يكون فيه صحفي شريف زي الرائع وائل عبد الفتاح فهو مكسب حقيقي للصحافة الشريفة... يا فرحتي بمدونات قوية ومفيش صحافة شريفة... لذلك ندعو عزيزنا وائل علد الفتاح للرد على التساؤلات وحسم الشائعات وهو بس يقول لنا هو ناوي يكتب فين واحنا كلنا وراه... وائل عبد الفتاح مكسب لأي جورنال يشتغل فيه... ولو مفيش جرايد النهاردة ماشية بشرفها بجد يبقى وائل ساعتها يعمل جورنان واحنا معاه وهنشتري جورنانه
===================

عزيزتي زنزانة

أنا آسف إذا كان البيه المخبر عكر مزاج سيادتك بس لعلمك الواد برضه عامل جو للمكان وأهو يبقى عندنا في المدونة مادة خصبة للاشتغال... دعوة لجميع المعلقين... عندنا مخبر يا شباب في التدوينة... اشتغلوووووووه
===================

الجميلة مانو

بصي يا ستي... هو ساب الفجر وبجد لحد دلوقتي مفيش معلومة أكيدة هو سابه ليه... موضوع عادل حمودة وإعلان هاني سرور دا مجرد تكهنات قد تكون وقد لا تكون صحيحة لذلك نرجع ونؤكد لابد أن يخرج علينا وائل نفسه أو عادل حمودة برد على القصة بحالها

ومن هنا باوجه نداء للأستاذ وائل عبد الفتاح... يا أستاذنا إنت بجد فارق معانا فريحنا وطمننا عليك... إنت كويس؟ طب نا عارف إنك كنت بتتابع مدونتي... يا ترى سامعني؟ رد عليا بقى الله يخليك يا بطل
==================

ياسر عوف

كان زمان النداء الشهير الصحافة فين التعـ..ص اهو... على أساس إن الصحافة كانت بتفضح التعـ..ص دلوقت أعتقد الهتاف ممكن يبقى التعـ..ص فين الصحافة أهيه على أساس إن مستوى الانحطاط في الصحافة عدى وفاق كل الحدود... ويا صحفيي مصر الشرفاء... لكم الله ... للأسف الزمن دا مش زمنكم... دا زمن المزالسين والمدلسين ومساحي الجوخ... لكن بإذن الله معاكم ووراهم لحد ما ننضفها... الضمير راجع هنا على مهنة الصحافة وعلى مصر كلها
====================

ذو النون العزيز

أنا كمان قلقان على الأستاذ وائل عبد الفتاح جدا... فيه لسة ناس شرفا في الصحافة طبعا ومنهم قنديل وغيره وزي ما انت شايف النظام أحمق جدا وغشيم جدا للدرجة اللي ممكن يعمل فيها أي حاجة مع أي حد

الحل في إصلاح مؤسساتي صحفي حقيقي... لكن خلينا ما نعممش القضية دلوقتي... مشكلتنا الآنية هي الأستاذ وائل وهو فين دلوقت وإذا كان أمنه الشخصي مهدد أم لا... وأسباب خروجه من الجرنان وبالتالي لازم يرد علينا ويقول لنا إيه الحكاية
====================

عزيزي الفنان أحمد المصري

أنا لغاية دلوقت ما شككتش في حد ولا فتحت النار على حد ولحد دلوقت محايد جدا وباقول إن اللي سمعته ده مجرد تكهنات وعلى الأستاذين وائل عبد الفتاح وعادل حمودة أن يوضحا لنا الحقيقة وبالأخص أن نطمئن على أمن الأستاذ وائل عبد الفتاح... لكن لو طلع بقى في المواضيع مواضيع يبقى إنسى... مش هنرحم أي حد بيحمي أي فساد وما عندناش غالي

بالنسبة للأخ المجهول بتاع عقبال المدونين ده الأخ المخبر اللي مراقب المدونة... معلهش أكل عيشه بقى يا أبو حميد... ما تدقش عليه... أو أقول لك تعال نشتغله كلنا هههههههههههههههه

Reformer1976 يقول...

العزيز ياسر شمس الدين

مش القضية البحث عن الأستاذ وائل عبد الفتاح والاطمئنان عليه وحسب وإنما الموضوع أيضا فهم هو فيه إيه جوة المؤسسات الصحفية اللي بنحترمها دي وليه الأستاذ وائل مشي... ليه دي قد يكون وراها حاجات كتير م اللي طرحت بعض احتمالاتها في الموضوع وقد يكون شيء مختلف لذلك فالقضية النهاردة ليست معلومات عن وائل وموضوع وائل ولكن القضية هي كلام وائل نفسه وكلام عادل حمودة أو جريدة الفجر عموما بشكل رسمي فيما يخص الموضوع... من الغباء إن الجرنان بيتعامل مع الموضوع كدة وكأن اللي مشي ده صحفي تحت التمرين مش واحد من أعمدة الجرنان اللي عاملين مبيعات للجرنان بس بسبب اسمهم

الجرنان الليمش فارق معاه قيمة الصحفيين المحترمين اللي فيه بينتهي إنه يتقلب خرابة ولنا في جريدة الدستور خير أسوأ مثال على ما أقول... يا ريت الجرانين اللي بتبيع كويس والجمهور بيحترمها وبيحبها تدرك حاجتين مهمين أوي ... إن القارئ هو اللي بيعمل نجاح الجرنان وقبل القارئ يأتي صحفيو الجرنان مش الجرنان اللي بيعمل صحفييه دا مبدأ ولا الجرنان اللي بيعمل جمهوره... الجمهور والصحفيين هما اللي بيعملوا أي جرنان وينجحوه أو يخفسوا بيه الأرض

يا ريت رؤساء التحرير يسمعوا ويفهموا يا عم ياسر

غير معرف يقول...

اكل العيش ولا أكل الجرجير .
اسمها أكاديمية الشرطة انما كله عندك صابون.


وتموت نفسك ليه توتو خليك عايش
ولما تعرف هاتعمل ايه؟
ده حتى الانتحار حرام

محمد الشرقاوى يقول...

كل إللى عاوز أقوله أنى هحاول أوصل الكلام ده لوائل عبد الفتاح ويشوف أسئلتكم و يا ريت يرد،

mano يقول...

العزيز جرجس
اشكرك على البانر الخاص بالمسجد الأقصى
انا اضفته عندى لو مش هتضايق
شكرا

tota يقول...

الحج جرجس
وائل عبد الفتاح فى زمن عز فيه الرجال
فاكر مقولة الكواكبى
ما بال الزمان يضن علينا برجال ينبهون الناس ويرفعون الالتباس ويعملون بعزم ولا ينفكون حتى ينالوا ما يريدون

وائل واحد من الناس دى ويبدو ان الفجر ابت عليه ان يتم ما بدئه
نفتقد كلماته كما نفتقد وجوده
نتمنى ان يبلغه شرقاوى كما وعد
واتمنى من كل جريدة شريفة ان لا تكسر الاقلام النظيفة
ابقوها يقظة تبقينا احياء

تحياتى

abourrisha يقول...

تعرف يا جرجس
لو توسع الدايرة شوية تلاقي المسألة متخصش وائل بس
بص على أي صوت معارض
(سواء كنت معه أو ضده)
أيمن نور وحزب الغد
نعمان جمعة وحزب الوفد
الحزب الناصري
طلعت السادات
حركة كفاية
الأخوان المسلمين
القضاة
وغير ذلك كثير مما لا أتذكر
هناك خطة ممنهجة لخنق أي صوت بأي وسيلة سواء بالدسيسة بين أفراد الحركات المعارضة أو باختراقها وتدميرها من الداخل
أو باستخدام الفوة والبطش كما حدث مع القضاة وأيمن نور وكما يحدث مع الإخوان المسلمين حاليا

أي معارضة حقيقية من أي شكل غير مسموح بها نهائيا
وسيتم القضاء عليها بأي طريقة
ماهو مسموح به معارضة كرتونية ترسم لها الأدوار والخطوط الحمر ومن يتخطاها لا يلوم إلا نفسه

والحقيقة أنا خايف إن يكون عليك الدور علشان كده خد بالك من نفسك

وبعدين انت فين حسك مش واصل عندنا ليه أنا عارف إن الدنيا برد عندكو اليومين دول لكن عارف برضو إنك نشيط لا بيهمك برد أو حر

تحياتي أيها الصديق العزيز

zenzana يقول...

يا جرجس بقي اسمها اكاديمية مخابز الشربة
بلاش خلط بين الاكاديميات لو سمحت

Reformer1976 يقول...

العزيز محمد الشرقاوي

شرفت المدونة يا زعيم بتعليقك... وصل سلامي للعزيز الأستاذ وائل عبد الفتاح فارسنا النبيل الذي نفتقده جميعا وأبلغه بقلقنا البالغ عليه ويا ريت فعلا لو نسمع منه رد يطمننا عليه

شكرا يا بطل
==================

مانو الجميلة

أنا حاطط البانر أساسا عشان يتاخد في أكتر من مدونة ويتعمل حملة تدوينية لأجل إنقاذ هذا الرمز الحضاري العظيم وإيقاف آلة البربرية الصهيونية التي تهدم كل ما هو إنساني وجليل بهذه الحماقة وهذا الغشم
==================

الرائعة كالعادة توتا

كلماتك المقتبسة عن الكوابي تشخص بدقة أزمة هذه الأمة وتضع مبضع جراح ماهر على خراج الوطن وما زلنا نحتاج أمثال هؤلاء الرجال الذين يتجرؤون ويضغطون قليلا على المبضع لنتخلص إلى الأبد من كل هذا الصديد الذي تراكم عبر السنين

ومازلت أنتظر معك رد الأستاذ وائل عبد الفتاح كما وعد الشرقاوي
======================

أبا ريشة الجميل

كلامك سليم ولكن هناك الآن ضغط على العديد من الحلقات في سلسلة الفساد المترابطة - مظهريا - هذه، ونحن كمجتمع مدونين نشكل جزء من هذا الضغط على العديد من الحلقات التي أضعفناها بالفعل ولن نفتأ نواصل نضالنا حتى تنكسر كل حلقات السلسلة وينفرط العقد... وخلاص هما بيشطبوا وبيلموا الليلة خلاص وقريب أوي الليلة كلها هتنهار... تخوفي الوحيد هو الفوضى الشاملة وربنا يسترها

بالنسبة لزيارتي ليك طبعا البرد مش مبرر لكن أوعدك ستجدني عندك قريبا

تحياتي
==================

زنزانة العزيزة

من فضلك ما تغلسيش ع البيه المخبر لأنه مش سنك ده... وبعدين لو مات منقوط تحت إيدك، هتنبسطي ساعتها؟ ساعتها يحسبوها عليكي قضية تعذيب وتبقى أول قضية تعذيب فيها مواطن يعذب مخبر بالنقطة حتى الموت
نياهههههااااا

ahmEd_H يقول...

ايه دا هو الانتحار حرام

اتصدق مكنتش واخد بالى طيب يا عم بدل ما انت عمال تكلمنا من البعد التالت كدا ماتعملك مدونه و نقعد مع بعض نتكلم كلنا

غير معرف يقول...

انا اعرف اين ذهب وائل عبد الفتاح (الصحفي الشريف)

كان طوال الاسبوع الماضي ضيفا لدى العميل الامريكاني جلال طلباني في شمال العراق السليب يحضر حفلا بمناسبة تحرير العراق ونشر الديمقراطية والحرية تحت اسنة الحراب . الدعة كانت باموال البنتاغون وبرعاية العملاء طالباني وبرزاني .

اخوتي ان الشرف والنبل لا يتجزأ . لا يدعي احدهم انه ضد الظلم وضد
الاستبداد ثم يكون ضيفا على مستبدين يحكمان العراق بالنار والحديد ويتشبثان بالجنود الامريكان لئلا يغادروا . اسئلوا الاكراد عما يفعله طالباني وبرزاني فيهم من تكبيل حريات وتعذيب وسجن وقتل لأتفه سبب .

هل من الممكن ان يكون الصحفي هنا شريفا في نفس الوقت الذي يدين فيه بحسابه في البنك لعملاء الامريكان ؟

غير معرف يقول...

أخي محمد الشرقاوي

اذا انت صديق وائل ونعم الصداقة فأرجو ان تسأله : أليس من العار ان يذهب في ضيافة عميل دمر العراق ومازال يدمرها ويقتل اهلها ويشردهم ويجثم على قلب العراق المحتل برعاية الغزاة اعداء الامة ، ثم يعود ويتغزل به على صفحات الجرائد المصرية مستهينا بالشعب العراقي وبالشعب المصري ايضا ؟ أليس من العار ان يذهب للتهنئة باحتلال العراق ؟

واذا كان هذا رأيه في الغزو والاحتلال فهل يأتي اليوم الذي نجده فيه يرقص ويغني لاحتلال مصر وتقتيل اهلها وتشريدهم وتدمير آثارهم وكل متكسباتهم ؟

لكي لا ننسى دم أحمد علي مبروك