14‏/12‏/2006

كلنا عماد الكبير... والعصاية يا عماد في مؤخرة الوطن

تابع على كفاية حرام آخر أخبار قضية اغتصاب عماد الكبير
المتهم فيها النقيب إسلام نبيه



لمتابعة محاكمة إسلام نبيه الضابط المتهم في قضية اغتصاب عماد الكبير اضغط هنا



يا فضيحتك يا مصر!!ـ
.
.
فضائح جديدة في قضية اغتصاب عماد الكبير
.
.
مصر كلها اتهتك عرضها يا رجالة
.
.
رئيس مباحث بولاق الدكرور يرغم عماد على تحرير بلاغ ضد جريدة الفجر
ينفي فيه صحة ما جاء من تفاصيل عن تعذيبه واغتصابه في قسم بولاق
.
جريدة صفراء تسمى الأهرام بعد منعها نشر الحقيقة قبلا
تنشر خبرا عن بلاغ عماد الذي أجبر عليه تحت التهديد
.
.
مدير نيابة جنوب القاهرة الشريف... بكر أحمد بكر يواجه عماد بفيديو اغتصابه الشهير
وعماد يقرر صحة كل ما جاء في الفجر وفي بلاغ ناصر أمين مدير مركز استقلال القضاء
.
جريدة المصري اليوم بعدما نشرت حقائق اغتصاب عماد في مقال فهمي هويدي الممنوع بالأهرام
.
متضمنا فيديو يصور لقاء عماد الكبير مع عماد أديب في برنامج القاهرة اليوم
.
جريدة الفجر كانت قد نشرت في عددها الماضي تفاصيل قضية عماد الكبير
ونشرت اسماء المجرمين الذين شاركوا في اغتصاب عماد
.
معاون المباحث إسلام نبيه هو من أشرف على اغتصاب عماد بعصاية المقشة
أمين الشرطة رضا فتحي السيد هو من صور جريمة اغتصاب عماد بكاميرا الموبايل
.
.
احنا عايزين إيه بقى؟
.
.
عايزين القصاص!!!ـ
.
.
عايزين شرف عماد وشرف مصر اللي اغتصبوه ما يروحش هدر!!ـ
.
.
عايزين كل كلب شارك في الجريمة يعاقب على قاعدة الجزاء من جنس العمل... جهز عصايتك يا عماد!!ـ
.
.
نطالب بمحاكمة وزير الداخلية ولن أنطق اسمه لئلا يتنجس لساني!!ـ
.
نطالب بمحاكمة رئيس الجمهورية بصفته القائد الأعلى لجهاز الشرطة!!ـ
.
مطالبنا عادلة جدا ومعقولة جدا
.
.
وَلَكُمْ فِي الْقِصَاصِ حَيَاةٌ يَا أُولِي الْأَلْبَابِ

هناك 52 تعليقًا:

alnadeem يقول...

صباح الفل يا حاج جرجس

أعتقد ان ده هو التوقيت المناسب لبدأ حمله مقاطعه الصحف بنت الكلب من نوعيه الأهرام والجمهوريه
الدعوه لمقاطعه هذه الصحف بدءا من أول يناير القادم
تحت شعار
عام جديد مع صحافه مختلفه
قاطعوا صحف المنافقين والكدابين
وبالمناسبه انا تسربت إلي معلومات مهمه حول ارقام توزيع الأهرام في العام الماضي
هقولها في وقتها
المهم ابتدي نسق مع المدونين اللي تعرفهم
وانا هنسق مع الباقي لبدأ الحمله
تحياتي

3rby يقول...

ممكن نعمل مظاهرة بس مش تبقي ولا كفاية ولا اخوان
تبقي مظاهرة بلوجرز ومانقولش فيها اي شعارات تدل علي اي حد
بيتهايئلي لو ده حصل ممكن تشد الناس
وممكن نوزع كل اللي حصل مكتوب في ورق


انت خلاص يا جرجس نسيتنا ولا ايه
مش بتعدي ليه؟

bluerose يقول...

مطالب عادلة جدا
أنا معاك يا حاج جرجس في أي حملة تنزي بدأها

Epitaph يقول...

يا ريت نقدر نعمل حاجة بجد

غير معرف يقول...

ابعت لى صوره عليها قاطع الاهرام والاخبار
وانا اعمل ال
HTML
ونلطعها على كل مدونه

ذو النون المصري يقول...

انا اوافق بشده علي كلام النديم لاننا فعلا لم يعد لدينا وقت للانتظار وان لم نتحرك للقصاص ربما وقعنا في نفس المصيبه غدا
لا اقول ان منطقي اثور قبل مايجي عليا الدور
لا ابدا لان الثوره ضد ما حدث ليست مسببه بسبب بل لاننا جميعا بشر
و لو علم الاوغاد ان ظلم يقع علي واحد يثور بسببه الف واحد لفكروا قبل الظلم بل لتوقفوا مقهورين عن الظلم
انا مع مقاطعة هذه الصحف من الان لا من اول يناير كما يطلب النديم

ذو النون المصري يقول...

اعتبرني يا اخ نديم قد قاطعت هذه الصحف من الان

غير معرف يقول...

فيه ايه يا عم فين التعليق بتاعى ولا انا علقت فى حته تانيه وانا م واخد بالى
تقريبا انا علقت على موضوعك ده يا جرجس فى مدونه تانيه ههههههه
تقريبا كنت خايف من المقشه فاعصابى تعبت واتلخبط واكيد المكان التانى اللى انا علقت فيه صاحبه هيتجنن ويقول بيقول ايه ده

سمير يقول...

لعلمك انا متوقف عن قراءة هذه الاوراق منذ سنين ولكني استخدمها لاغراض اخري وكمان متوقف عن مشاهدت تليفزيون الرياده لانه حتي الشئ الوحيد اللي كنت اشاهده هي مباريات كرة القدم اصبحت اشاهدها علي محطات اخرى

سمير يقول...

لعلمك انا متوقف عن قراءة هذه الاوراق منذ سنين ولكني استخدمها لاغراض اخري وكمان متوقف عن مشاهدت تليفزيون الرياده لانه حتي الشئ الوحيد اللي كنت اشاهده هي مباريات كرة القدم اصبحت اشاهدها علي محطات اخرى

سمير يقول...

لعلمك انا متوقف عن قراءة هذه الاوراق منذ سنين ولكني استخدمها لاغراض اخري وكمان متوقف عن مشاهدت تليفزيون الرياده لانه حتي الشئ الوحيد اللي كنت اشاهده هي مباريات كرة القدم اصبحت اشاهدها علي محطات اخرى

غير معرف يقول...

فكرة هايلة يا نديم، كمان فكرة مظاهرة للبلوجرز، وتكون صامتة، من غير هتافات ولا بتاع ونروح نوقف ميدان التحرير مع لافتات بس، من غير ولا كلمة، على العموم انا مقاطعة اهرام واخبار وعزبوية، قصدى جمهورية من سنين، مش بشترى جرايد لان خسارة تمن الحبر والورق اللى انكتب بيها، بخصوص الاهرام بالذات انا ليه امنية بخصوصهم من يوم 11سبتمبر 2001، مش هقولها هنا لكن هبقي اقولك عليها يا نديم لما نتقابل.
randa

إسلام يقول...

الأخ العزيز جرجس : ـ

جميل قوى إهتمامك ومطالبتك بمعاقبة هؤلاء المجرمون ، لكن خليك فاكر أن أحنا فى مصر مش فى أوربا والعقاب مش حيكون بسهولة قوى كده ، لكن أنا لا أقصد طبعاً أن أشعرك بالإحباط بالعكس اللى حصل ده يعتبر نصر كبير جداً للمدونون ، وأكيد طبعاً عمل تأثيره

وأنا فعلاً مع الفكرة الجميلة بتاعة عمر وهى مقاطعة الجرايد القومية ، فعلاً المفروض نهتم قوى بهذا الموضوع ونعمل دعاية كبيرة قوى من خلال المدونات والمظاهرات وغيرها كثيراً خليهم يفلسوا

غير معرف يقول...

ايوا يا حاج جرجس خلى بالك من نفسك، احنا مش فى اطاليا تطالب كدة بالعقاب وهيتحقق فى ثانية، خصوصا ان فى قانون دلوقتى بيطبخ عشان يربي المدونين المش متربيين اللى زيك، (لكن والله يا جبل ما يهزك ريح-على راي الله يكحته مطرح ما راح ابو خراب قصدى عمار).
جرجس انا زعلانة منك لانك عزمت الناس كلها على حفلة الخميس وانا لاء، شكرا مكنش العشم، طب بالعند فيك يا بن الست الحاجة ام جرجس، سأهدر دمك، وهساعد الباشا الرئيس القادم القناوى، على تنفيذ خطته للتخلص منك، يعنى ممكن تلاقينى كده لابسة الفستان الشفتشي دا بتاع برلنتى عبد الحميد فى فيلم طاقية الاخفا، وقاعدة اغريك ع المدونة، أو انى اضحك عليك بسندوتشين من عند مؤمن، لحد ما نسممك زى المشير بالظبط، خلى بالك دا انا من اسيوط، وربنا يكفيك شر الاسايطة، وبخلهم كمان، عشان اطمنك مش هكون بخيلة ف السم، كمان خف تعوم فى موال الفسح دا خلاص يعنى مفيش غيرك حلو ومسمسم، قصدى قصير، دا انت اخرك مسكة ايد. سلام احسن هتطردنى من هنا.
RANDA

tota يقول...

الحج جرجس

اللى بتقوله مطالبة ولا امنيه ؟
ولو امنية يبقى نركع وندعى بس والباقى على الله

لو مطالبة وده اللى حسيته من قوة الكلمات
يبقى تعالى نفعل المقترحات وبشراسة
زى ما قال عمر محدش فينا يدخل فى بيته جريدة صفراء زى ما انت وصفتهم
فكرة فارس فى بوسته الاخير ممكن كمان تنجح بمعنى قلب الرأى العام على الداخلية
اما محاكمة رئيس الجمهورية فدى الفكرة اللى اتناقشنا فيها واللى برده من ضمنها فكرة الفارس
برامج الفضائيات لازم تلعب دور مهم لانها عندها حرية كبيرة ودى كمان من افكارك
انا بكتب معاك افكارك انت وافكار فارس وبطوعها لخدمة الحدث ده
الجرائد تستمر فى حملة بدون توقف
المدونات لا تمل من متابعة الحدث
لا يضيع حق ورائه مطالب

علشان كده لازم نفضل وراه بشراسة وبلا توقف
تحياتى

غير معرف يقول...

هاى يا عم جرجس، طبعا الناس مقامات، سيادتك ف الحفلة، وانا قاعدة هنا اقرا عندك شوية وعند قناوي شوية، وهاتك يا تعليقات، انا قريت البوست اللى عن والدك، اى كلام هيتقال استحالة يخفف من حجم الماساة، او حتى يواسيك، لكن ممكن اقولك ايه القصة اللى معكننا عليا من امبارح، وخلتنى شتمت كل الشعب المصري ف المترو، وبالتحديد محطة المارى جرجس، بالتحديد عربية "السيئات"انا مسمياها كدة، الست هانم محجبة، وانا واقفة قدامها، سألتنى عن اسمى، سالتها عن السبب، وبعد الحاح منى، وبعد ما نصبت لها الفخ انى مسلمة، عرفت انها حبت تعمل الخير معايا، بما انها شايفة ان حالتى صعبة، وف ايدي عكاز صغير، انها قررت انها تسيب لى الكرسي اللى هى قاعدة عليه، معرفش انا ايه اللى خلى الدم غلى ف نفوخى، وشتمتها وعليت صوتى فالمترو كله، ان الشعب المصري، بنسبة 95%شعب زبالة، وانه حثالة الشعوب، وبصراحة من ساعتها وانا ف حالة ثورة، وغضب، مع حبة اكتئاب، فين مصر من تلاتين اربعين سنة، او فين مصر لما كانت ابواب قهوة الحرية فاتحة ابوابها، مش الناس مستخبيه جواها زى دلوقتى، انا مشفتش العصر دا لكن بحس بالغربة فالعصر الحالى، الاخلاق،والمبادئ والحرية، بتنقرض، وبصراحة انا عندى احساس بالقرف من المجتمع دا، وعن قريب هسيبه وامشي، انا كنت مبسوطة جدا لما قررت الرجوع المرة اللى فاتت، لكن من اول ما شفت خلق وسحن المصريين فى الطيارة، وتريقة ظابط المطار عليا اول ما وصلت، حسيت بالقرف اللى اتكرر امبارح مابين الساعة اربعة ونص والساعة خمسة، ف محطة المارى جرجس، هو يوم كان باين من اوله اتسألت مرتين امبارح اذا كنت مسلمة ولا مسيحية، منها مرة كانت ف مكان عملى الجديد بما انى الوحيدة اللي خالعة راسها، وعلي راى زميلة اخرى بحب البس تيشرتات اختى الصغيرة، مع العلم انى اخر العنقود، وكانت البحلقة والدهشة والاستغراب لما صرحت انى لبست الخرقة على راسي لمدة خمس سنين، بمزاجى وشلحتها بمزاجى، ولهذا قصة اخرى يا جرجوسي، اصلك بتفكرنى بصديقي روسي/جورجى اسمه سرجو، وكنت بقوله جرجوسي، او جرجس، بس انت اطول منه شوية. يلا باى كفاية عليك كدة تعليقات وانت يا عم هايص فالحفلة هناك مع الزعيم، طب وصيه عليا شوف لى منصب، زى وزيرة شؤون تحرير المرأة، ولو انى مش فمنست، لكن والله لاخلى ستاتك يا مصر، ولا بنات شاطىء ريمينى ف اطاليا، هبقي احكيلك عنهم يا واد يا دكتور فى الخباسة من ورا قفى الرئيس القناوى، يعيش يعيش، وينصره على مين يعاديه.randa

غير معرف يقول...

أخى جرجس
مقاطعة الصحف العبيطه موجوده من الأول .. و مسألة المظاهره التى لا تنطوى تحت أى حزب أو جماعه أو حركه .. فكره جميله
أقتراحى فى هذا الموضوع هو أولا حماية و تكريم المصرى البطل الحقيقى .. المحامى الذى فضح بشجاعته و نجاحه كل الفاشلين على الساحه السياسيه حاليا .. لا حزب و لا حركه ولا جماعه ولا أى جهه قدرت تعمل اللى عمله المحام البطل و بعض الشباب معاه .. أعتقد تكريمهم فى الأساس هو البدايه اللى أولا تشجع الكل يتحرك من غير ما ستنى أذن من مرشد ولا رئيس حزب ولا منسق حركه .. و ثانيا تفضح فشل الفاشلين .. و يمكن تستفزهم ينافسوا لمصلحة مصر
أكرر .. الخطوه الأولى تكون بحماية و تكريم الأبطال الحقيقيين .. الذين يتضائل بجوارهم كب خيالات المآته الحاليين

و بالنسبه لمواعيدك اللى زى وشك .. فليلتك سوده بس أما اشوفك

غير معرف يقول...

النديم: ممتازة فكرة مقاطعة الصحف التمليك دي.. فعلا دة ممكن يكون عمل جماعي إيجابي حقيقي

حج جرجس: عجبتني جدا فكرة الجزاء من جنس العمل.. بعدين محاكمة رئيس الجمهورية

:)

يا لئيم انت

alnadeem يقول...

عزيزي عربي
شكرا علي استجابتك لدعوتي أو دعوتنا لأخذ رد فعل تجاه ما يحدث
وأحيي دعوتك للتظاهر
ولكن إسمح لي أنني قد اختلف معك جزئيا في الدعوه للتظاهر الأن
لماذا
لأن وجه نظري الشخصيه تقول أن التظاهر ليس هو شكل المقاومه الوحيد للنضال ضد هذه العصابه
المقارومه لها أشكال متعدده
والتظاهر هو احد أشكال المقاومه وليس كلها
وحيث أن قدرتنا علي الحشد ما زالت ضعيفه
وحيث أننا نمتلك ادوات أخري نستطيع من خلالها تعليم الي خلفوهم الأدب
فلنؤجل فكره التظاهر قليلا
او نكتفي بالتظاهر مع كفايه
وبالتوازي مع ذلك نستمر في مساراتنا
نسخر من نظامهم
نقاطع صحفهم
نعمل بطايق انتخاب وننتخب المعارضه نكايه في اللي خلفوهم
نفضحهم امام الرأي العام المحلي والعالمي
والوسائل كثيره ومتعدده
وسنتظاهر طبعا
بس في اللحظه المناسبه
خالص مودتي

شــهــروزة يقول...

هو فيه حد عبيط اصلا بيشترى الجرايد دى الا الناس اللى فى غيبوبة؟
او زى ما امى كانت بتشتريها لحد سنتين عدوا علشان نمسح بيه الزجاج او نلف فيهم حاجات ونخزنها فى الكراتين
او تديهم للجيران لانها بتتحرج من اللى يطلب ورقة جرنال وميلاقيش
كانت تجيبهم وترصهم للى يعوز من الجيران

انا لله فى لله مباطيقش حتى ابص على ام اسمهم
عاملة مقاطعة من اكتر من سبع او تمان سنين عنهم
كلها طبل وزمر وتهليل
حتى يا اخى لما بالاقى بالصدفة الصفحة الاخيرة بتاعت الاهرام دى
الاقى لسة لحد دلوقى مقالات ابراهيم نافع الفاسد ابن الجذمة الحرامى لسة بتنزل زى ما هى
ولا كأن حصل حاجة
هى صحيفة اصلااا قايمة بالفساد
لو مكانش فيها فساد مش حتبقا اهرام

حتبقا سقارة

انا مع القطيعة للجرايد الحكومية بكل انواعها
اهرام
اخبار
جمهورية
بكال توابعهم وملحقاتهم الخ الخ

وعاوزة منك له الهتميل بتاع ام مانشيتات المقاطعة

ومحدش رخم فيكم يطنش
لان اليومين دول روحى فى مناخيرى ومش طايقة مناكفة من حد

اما تخلص يا جرجس بانر لمقاطعة العزب التلاتة ابقا ابعتهولى على البوستة بتاعتى

تصبحوا على وطن

Reformer1976 يقول...

رفيق النضال عمر النديم

نعم لمواصلة حملة مقاطعة الجرائد الصفرا بتاعة الحكومة
جاري حاليا إعداد الهتمل كود بتاع البانرز بتاعة حملة مقاطعة الجرايد القذرة بتاعة التحرير بسماعة التليفون
وسأحاول شرح كيفية نقل الكود إلى جسم المدونة ليصير شعارا ثابتا في مدوناتنا نرفعه في وجه صحافة العهر القائمة

طبعا فاهم إن بسبب كونك صحفي بالأساس فانت ركزت بالأكثر على الموضوع بتاع مقاطعة الصحف ودا مهم جدا بس خلينا نركز من تاني على قضيتنا المحورية ألا وهي مناهضة انتهاك حقوق المواطن المصري وتعذيبه على يد زبانية الشرطة وبتوع النظام

حملتنا الأهم هي كلنا عماد الكبير
والبوستر اللي في البوست برضه هقلبه هتمل كود وأبعته للجميع

تحياتي يا زعيم

Reformer1976 يقول...

عزيزي عربي

الموضوع دلوقت عدى قصة المظاهرات
المرحلة الحالية مرحلة تعبئة رأي عام شعبي ضد ممارسات النظام وانتهاكه لألف باء حقوق المواطن وهدمه لأساسات الوطن والمواطنة

حراكنا السياسي اليوم خلاص خرج من طور المراهقة إلى طور البلوغ وفي طريقه إلى الرشد... ودا اللي بدأ يؤتي ثماره

راجع انتصار عمال غزل المحلة
ودور المدونيني وناصر أمين ووائل عبد الفتاح في فضح ممارسات النظام ضد المواطن العادي والأكثر من الفضح هو تحريك القضايا والمثابرة في السعي

تعالى نكون كلنا على قد الزخم اللي اللحظة الآنية بتأكد لنا أنه زخم حقيقي واقعي سيأخذنا في نقلة نوعية لم تكن لتخطر على بال أحد

Reformer1976 يقول...

دكتورة بلوروز

شكرا بجد لتشجيعك
تابعي معانا وستجدي الجديد وحملتنا الحقيقية مكملة ضد كل فساد وكل انتهاك لحقوق المواطن ولشرف الوطن

تحياتي

Reformer1976 يقول...

إبيتاف السكرة

لأ متحطيش إيدك على خدك وتتمني نقدر نعمل حاجة
طبعا قادرين وعملنا وهنعمل حاجات
والبلد دي حالها هيتعدل يعني هيتعدل

وأيوة
بإيدنــــــــــا

أي حد يسألك هو انتي اللي هتصلحي الكون
حطي صباعك في عينه وقولي له أيوة... بس مش لوحدي

Reformer1976 يقول...

الرأفتاني الشهير بالمهاجر المصري

شكرا يا باشا لرغبتك في التعاون
قريب البانرز والبوسترات الخاصة بحملة
كلنا عماد الكبير وحملة مقاطعة الأهرام واخواتها هتكون جاهزة

دعمك مهم جدا يا رأفت
فوق ما تتخيل

Reformer1976 يقول...

أخي الحبيب ذو النون

متفق معك بشدة
التحرك على محورين
محور المقاطعة نمرة واحد والأهم التحرك العملي وتحريك القضية بشتى الطرق
ولنا في القصاص حياة
والقصاص مش بس عقاب الكلب إسلام نبيه
لكن بجد توقيف كل كلاب وخصيان النظام عند حدهم

Reformer1976 يقول...

ياسر شمس أخويا وحبيبي

طب التعليق ضاع أنا ذنبي إيه؟
ابعت غيره قوام
مستنيك

Reformer1976 يقول...

سمير
سمير
سمير

معلش بلاش الأهرام بالذات في الأغراض الأخرى... ابقى استخدم النبأ أو الأسبوع... أحد زملائنا الجراحين قال إنه الأهرام ممكن تجيب بواسير

معلش بلاش الأهرام بالذات في الأغراض الأخرى... ابقى استخدم النبأ أو الأسبوع... أحد زملائنا الجراحين قال إنه الأهرام ممكن تجيب بواسير

معلش بلاش الأهرام بالذات في الأغراض الأخرى... ابقى استخدم النبأ أو الأسبوع... أحد زملائنا الجراحين قال إنه الأهرام ممكن تجيب بواسير

Reformer1976 يقول...

عزيزتي راندا

متفق معك أن معاقبة الكلاب دول مش هتحصل بالساهل... ومتفق معاكي إننا مش في "أطاليا"... لكن إحنا في مصر ولما اللي حاصل في القضية دي تحديدا يحصل في مصر دا معناه... إننا مش محتاجين نكون في أطاليا... محتاجين بس نكون بجد "إحنا"... إحنا اللي بجد... إحنا اللي أحرجنا الدولة باعتصامنا في غزل المحلة وجبنا مناخير النظام في الأرض ولبى مطالبنا مرغما وفوقيها بوسة وتحية كمان وقال إيه
شكرا للعمال للتصرف بتحضر واستخدامهم الوسائل المشروعة في التعبير

وزارة الداخلية بتقزول ممنوع المظاهرات... وعمالنا خليت الدولة مش تقول المظاهرات شرعية دا كمان الاعتصامات والإضرابات العمالية مشروعة وبيحيوهم على سلوكهم المتحضر

إحنا مش عايزين أكتر من الكلمتين دول
هنهري أمهم سلوك متحضر
وكل يوم من السلوك المتحضر دا لما نجيبهم لمس أكتاف

نهاره أبيض

Reformer1976 يقول...

العزيز إسلام

ردي على راندا كان عليك وعليها في نفس الوقت

اللي بيحصل مشجع جدا فوق ما تتخيل
تاريخ مصر يا اخواننا بيتعاد كتابته من جديد اليومين دول

راجع ردي على راندا

تحياتي يا جميل

Reformer1976 يقول...

أعز صديقاتي توتا

لا تتخيلي كلامك فارق معايا جدا جدا جدا
تشجيعك لعب دورا في إيقاظ إيجابيتي وتحريضي للآخرين على الإيجابية
قصة جيري فرقت معايا بجد
(اللي عايز يفهم إيه موضوع جيري روحوا على مدونة توتا واقروا بوستها الأخير... اللي أتمنى ألا يكون الأخير)

مواصلة الضغط والتحرك على كافة الأصعدة هو دا بالظبط اللي احنا محتاجينه وهنعمله ومش هنوقف

فيه زخم حاصل بشكل مذهل وكل اللي علينا إننا نكون على مستوى الديناميكية الرهيبة التي أنتجها هذا الزخم... شكرا بجد

Reformer1976 يقول...

فارسنا القديم

Big Shokran
وانتا فاهم بقى

:)

Reformer1976 يقول...

الغالية جدا شهروزة

الأهرام عمرها ما هتبقى سقارة
لأنها أصلا هي اللي بتنزل استلا
وما ينعش تحرق نفسها

(مانتيش فاهمة؟)
مش مهم الشوباب الباقيين فهموا وضحكوا بالفعل
ههههههههه

أستأذنك بس قولي لماما بلاش الأهرام في مسح الإزاز... قال لي أحد أصدقائي بتوع الإزاز إن مسحه بالأهرام قد يصيبه بسرطان إزاز... بعيد عن السامعين
وبعدين ساعتها هتبقى ورطة لأن مستشفى سرطان الإزاز لسة ما كملش

قوليلها تجيب الكرامة وتمسح بيها الأرض والإزاز وأي حاجة عايزة تتمسح
ما النظام ماسح بكرامتنا الأرض وحمدين صباحي مسح بالكرامة الأرض ومسح جوخ لدكتاتور ليبيا
وعادي

إلا بالمناسبة... هندخل الكرامة في حملة المقاطعة ولا لأ؟
والأسبوع بتاعة بكري عميل أمن الدولة؟
والقاهرة ملاكي فاروق حسني؟

مش باسأل خبثا ولا تخابثا

بس بسأل عسان أحضر البانرز

هههههههههههههه
لأ لأ

نيا ها هااااااااااا

على رأي واحدة تنينة* صاحبتي

(*تنينة هي أنثى التنين)
نياهاهاهااااااااا
(دي طبعا ضحكة التنينة)
حاسبي النار

Reformer1976 يقول...

العزيز جدا عمر (بتاع أيوة ممكن)ـ

يا فاقسني إنتا ومسيح لي
الواحد ما يعرفش يتخابث ع المتغطي في البلد دي

كدة برضه تفضحني

ركز بقى معانا يا باشا إزاي تساعدنا في حملة مناهضة انتهاك الوطن دي

دورك مهم جدا

نهاره إشطة

غير معرف يقول...

ازيك يا جرجس وحشني ومتأسفه على التأخير
بس انا متابعة التطورات وبصراحة انا شايفة ان الموضوع مدام اتفتح وبأكثر من اتجاه يعني دي بدايه كويسة وتدعو للتفاؤل بس طبعا لازم الاستفادة منها وتكملة المشوار عجبتني افكار فارس لما كتب في اخر بوست ليه ان المصري هو الي اتحرك ايوه المصري هو الي فايده يتحرك من غير ميكون داخل قالب يحده زي حزب او كده

الشعوب ه الي لازم تقوم بالتغير وبما ان الباب اتفتح يبقي انكمل وانا متفائلة فيكم قوي

والمدونة بتاعتك يا جرجس بقيت جامدة ايه ده ايه ده انا خايفه تاخذ الرئاسة من السيد النديم

:)
تحياتي واحييك قوي على الافكار الهايلة
وعلى عقلك الجميل قوي

مصرى متغرب يقول...

عزيزى جرجس الى انتهك عرضه مش عماد دى بلد بحالها بناسها وخيراتها وكل مافيها والفاعل معلوم واحنا كلنا بسكوتنا مشتركين مع هذا الفاعل مش بس كدة احنا ولأول مرة فى العالم اصبحنا الجانى والمجنى علية نعم نحن جميعا انتهكت اعراضنا وبسكوتنا نحن جميعا شاركنا فى هذا الانتهاك .انا معكم فى مقاطعة هذة الصحف الصفراء وان كنت اعتقد ان هناك بالفعل حمله مقاطعة شعبية لها منذ زمن بعيد والدليل ارقام توزيعها الحقيرة وخسائرها المليونيرية ولكن لنفعل هذة الحملة لكل معارفنا واصدقائنا ولتكن فعلا صرخة نصدرها للعالم

غير معرف يقول...

عزيزي جرجس، بالنسبة لمقاطعة الصحف، أنا اخدت فيها خطوة من زمان، لكن زى ما قال عمر، انه ليس الشكل الوحيد للمقاومة، وزى ما انت قلت يله نهرى دين ام الحكومة تحضر، انا اخر مظاهرة حضرتها كانت فى مارس2003، الخاصة بالحرب على العراق، بعدها قررت انى مش هعملها تانى، لكن انت اقنعتنى النهاردة على الصبح، ان خلاص، ههرى ولاد الكلب دول تحضر، ومظاهرات، ولو قررت انك تنزل الشارع دلوقتى انا كمان هكون، بالنسبة لاطاليا انا بقولها على سبيل التنكيت، لان هناك برده، كان فى انتهاكات وقمع، على سبيل المثال اللى اتعرض له المصريين فى ميلانو قبل انتخابات برلسكونى مكنش حاجة بسيطة، ان جرت اعتقالات واغلاق مدارس لغة عربيى بذريعة دعم الارهاب، لكن اليسار فى الشارع الايطالى للسبب دا ولاسباب تانية حلفوا ليجيبوا مناخير امه الارض، ودا اللى حصل، لدرجة انى شفت ناس بتسافر لمدة 12 و13 ساعة قطار أو عربية وطريقة الاتوستوب، علشان توصل للجان الانتخاب، لان هناك فى نظام انك لو مقيم فى مدينة غير مسقط راسك، مينفعش تروح تنتخب فى لجنة فى المدينة اللى انت مقيم فيها، لازم ف المدينة الاولى، وعلى فكرة اللى طلع دين ابو برلسكونى هم جيل الشباب، يعنى زى ما انت قلت لسة في أمل فينا، لسه ما شخناش.بسبب اللى حصل فى المترو معايا من كام يوم، انا قلت البلد دى تخرب تعمر، انا مش قاعدة فيها، وانا لسه لحد دلوقتى دمى محروق، لكن والله دلوقتى ما انا متحتحة منها ومش هسيبها لولاد الكلب.
randa

غير معرف يقول...

بمناسبة الصور الحلوة دى خلى باللك احسن تتحاكم بتهمة العيب فى الذات الملكية، احسن دى مش اى صورة دى صورة ولى النعم. سلام يا جرجوسي
randa

غير معرف يقول...

البلد دى لازم تتفرمت

Reformer1976 يقول...

حبيبة قلبي الرقيقة جدا رشا

يا بنتي أنا قلبي زي الفهد نط اندلع
قلبي انهبش بين الضلوع و انخلع

طبعا الرباعية الأصلية مبتقولش كدة بالظبط بس المهم
إنك وحشاني جدا جدا جدا

لو قضايا التعذيب هي اللي هتخليني أشوفك كل يوم... هاتخصص تعذيب ولا يهمك

ههههههههههه

على الأقل هضمن إنه قدامنا ييجي عشر سنين على بس ما نخلص فضح فضايح التعذيب القديمة والتي لا تسقط بالتقادم

اللي بدأناه هيكمل ومش هنوقف ومش هنتراجع... ولو قطعوا من لحمنا راقات راقات إحنا بدأنا ومش هنوقف

ولابد الليل حتما هيكون له آخر

Reformer1976 يقول...

أنــــا حـــــرة

البلد دي صح لازم تتفرمت
بس مش أحسن نجيب ماذر بورد جديدة ونبتدي نشتغل على نضيف؟

غير معرف يقول...

نفسى بجد نقاطع الجرايد الصفرا؛ لكن إحنا شعب ما يعرفش ثقافة المقاطعة أصلا؛ يعنى ممكن نقاطع حاجة تضرنا مش تفيدنا و مش ممكن نقاطع حاجة بتضرنا فعلا

Reformer1976 يقول...

egyptos

عندك حق
بس المجتمع دا ينفع نغيره
واحدة واحدة وزقة ورا زقة هتحصل

غير معرف يقول...

حقيقى حكاية الزقة دى طويلة قوى يعنى من وجهة نظرى كدة قدامنا ييجى كام قرن كدة على ما يتزحزح من مطرحه

Moe-New York يقول...

Nice logo again, Is it "Dream"? one of Salvador Dali's.
(I am testing my memory).

غير معرف يقول...

طول العمر العسكر عسكر... بس الناس .. الناس كت ناس.. وكان الحلم قبالي براح... وساح يا بداح

ساح يا بداح ....ساح يا بدا يا سؤال جراح... ما الذي كان ومعدش وراح
سامح الفخرانى

واحد تاني يقول...

*******عــــــــــــــاجل********
عزيزي المدون شارك معي (الفكرة ان يرى الجميع ما فعلوه ومن هنا استعين بك كنت ناعم التناول دائما في مدونتي هذه بمكتوب لاني متوقع غلق مدونات اخرى وليبقى لي صوت آثرت تخفيف الحدة في كلامي ومواضيعي في حدود ما يسمحون ... ولكن لما حدث ما حدث اضطر للبوح)تقبل تحياتي وبعد

///عزيزي عزيزتي ... هذا جاد جدا وليس مزحة///
عفوا لاقتحامي مدونتك،،،،
اغتصاب بعد تعذيب مواطن مصري بقسم شرطة مصري
في ادراج بعنوان،،
(مصر مش كده)،أو (ممنوع الصمت....عماد الكبير عرضك عرضنا)،،،،،،،
اكثر من مرة يحذف من مدونتي ولا اتذكر كيف، لا اريد ان اسيء الظن،،،
لذلك هنا رابط الشريط والادراج في حال اردت رؤية الشريط ولكن ،
ارجو الاهتمام بالتعليق،،
انا ليس لي غرض شهرة، /فأنا لا اعلن عن شخصيتي ، وايضا لم ولن اشترك في مسابقات افضل المدونات/
انما ليعلم من حذف وصلة الشريط من مدونتي اننا جميعا رأينا الفضيحة التي أراد التستر عليها،
هنا رابط شريط التعذيب،
http://img216.imageshack.us/img216/3641/policewl1.swf
رابط الادراج على مدونتي

http://2faris.maktoobblog.com/?preDate=2006-12-26%2022:16:00&post=168829

،،،،ويا عالم جايز التعليقات او المدونة كلها كمان ياريت تهتم،،،،،
ان قمت بنشر تعليقي هذا او توزيعه على اكثر من مدونة فتكون وقفة منك معي ضد من يحاول التعتيم فلا تبخل بنسخ التعليق وتمريره لمدونة اخرى
،،،،،،، وايضا ليعلم أن رسالتي وصلتك أو راسلني على ايميلي fareselmasrry@yahoo.com ....تحياتي ...(واحدتاني) والسلام

Reformer1976 يقول...

Egyptos

اعتقد أن الزقة بدأت بالفعل
وفيه قوة دفع حقيقية بتتنامى في المجتمع

دلوقت تقريبا فيه إضراب أو اعتصام كل أسبوع تقريبا

والظابط اللي بيتحاكم دلوقت

فيه حاجة جديدة جدا بتحصل في بلدنا يا مصري

يمكن نشوف تغيير حقيقي في حياتنا أو بالكتير في حياة أولادنا

Reformer1976 يقول...

Moe-New York

إيه دا يا معلم
برافو عليك
هو سلفادور دالي بجنانه وحلاوته وغباوته
وأعتقد اسم اللوحة فعلا حلم

شكرا جزيلا لمتابعتك

Reformer1976 يقول...

سامح الفخراني

السؤال دا فعلا محيرني
ما الذي كان ومعدشي وراح

تفتكر إيه؟

Reformer1976 يقول...

واحد تاني

جهدك رائع في نشر القضية وفضح ممارساتهم السادية

مبروك عليك وعلينا كلنا الظابط اللي اغتصب عماد النهاردة قدام المحاكمة والتهمة لابساه لابساه

MAKSOFA يقول...
أزال المؤلف هذا التعليق.

لكي لا ننسى دم أحمد علي مبروك