٠٣‏/١٢‏/٢٠٠٦

طول ما في الصدر قلب ينبض ونفس يتردد... حدش جاب سيرة المخ في الموضوع

فاكرين التصريح العبقري بتاع طول ما في الصدرقلب ينبض ونفس يتردد أنا باق (على قلبكم لطالون؟)


(أنا باق على قلبكم ... رسالة للشعب أم للابن؟)...



طالما في الصدر قلب ينبض...

قلبٌ ينبض (زي ده كدة بس شغال)...

أما دا بقى فالقلب على ترابيزة التشريح



ونفسٌ يتردد...

ودي صورة الجهاز التنفسي "المتردد"
(أيوة غيرنا اسمه في التشريح بعد التصريح... حد ليه شوق في حاجة؟)...




بس السؤال بقى: هو ليه مجابش سيرة المخ؟

المخ هو أحد أعضاء الجسم ويعتبر من الكماليات غير الضرورية في أجسام الحكام العرب
(مش منطقي إنك تحط تكييف وباور استيرينج في عربية 128 موديل 1981)...

نحن في وطن قوانينه سهلة وبسيطة
فمؤهلات أن تكون رئيسا في المحروسة سهلة خالص

قلب ينبض ونفس يتردد...

ودا هيكون جوهر التعديلات بتاعة المادة ستة وسبعين...


قلب ورئتين وبالروح بالدم نفديك يا قلب الزعيم

عايزكم تدرسوا في الأحياء وفي التشريح أن أهم أعضاء الجسم هو القلب والرئتين وسيبكم من موضوع المخ دا خالص

.

.

.

فاكرين الإيد اللي على كتفه دي كانت إيد مين؟

.
.
.
.
.
.
.
.
.
.
.

برافو عليكم!!

ما أقدرشي أحط إيدي في بق الأسد!!

إسرائيل تؤكد: مصر عمق استراتيجي لإسرائيل (الله على الشراكة الاستراتيجية)

.

.

.

وأما بالنسبة للمعارضين

شعاري بسيط وواضح

الكلاب تسير والقافلة تنبح!!!ـ

شوفوا يا معارضة... كفاية عليكم جزمة مرشد الإخوان عشان تعرفوا يا ناكرين خيري زمني من زمن غيري

.
.
.
.
وأخيرا أقول لكم يا شعب مصر الغالي
اللي اتعمل في مصر في عهدي ما اتعملش فيها من أيام البتاع دا اسمه إيه....ـ
أيوة... محمد علي

هو مش كل حاجة في الدنيا ليها إكسبايري ديت؟ طب أمال فيه إيه؟؟؟؟

هناك ٨٠ تعليقًا:

غير معرف يقول...

و الله مانت فاهم حاجه .. ببساطه يا دكتور يا بتاع الطب و التشريح .. القلب لو وقف فيه له بديل جهاز قلب صناعى .. و الرئه لو وقفت برضه فيه ليها جهاز بديل أسمه رئه صناعيه .. المخ بقى .. مالووووووش
يبقى يجيب سيرته ليه ؟
فهمت بقى أن المسأله مش أنه يفضل عايش ؟؟ لآ .. ده حتى و تحول ألى جثه متوفاه و ركبولها قلب صناعى و رئه صناعيه ..برضه هايفضل على قلبنا .. فهمت بقى يا فالح ؟
و تنيل تيجى تعلق فى مدونتى .. جتك القرف

غير معرف يقول...

مفيش كبده وفشه يا حاج جرجـــس

Mongey يقول...

اشطه
حلو اوي الموضوع ده
بقالي كتير مقريتش كوميدي
حلو
و الصور وبتاع مظبط نفسك جامد

ذو النون المصري يقول...

علي فكره انا رجعت للتعليق الذي كتبته علي تعليقي القديم ،و تحياتي لك كمدون يعرف دبة النمله في مدونته
انا ايضا قرات البوست (احبها.....)حسب طلبك انا اري اننا توائم في التفكير و الاهتمامات لان نفس المشكله الفصاميه التي اشرت اليها انا ايضا اراها راي العين في مناسبات مختلفه اخرها كتبته في البوست قبل الاخير عن سلوكيات لجنة زكاه
تخيل ان في الصباح الباكر اثناء توجهي لمدرستي رايت شباب يزين الطريق باسماء الله الحسني مكتوبه علي الواح و اعمده معدنيه
منذ ايام رايت ايضا تلميذ يغادر المدرسه بامر المدير لانه لم يدفع

المصروفات

ذو النون المصري يقول...

البوست الجديد بصراحه حسب تقييم زمان يودي ورا الشمس
الصوره مع الكلمه ممتازين
بصراحه الفكره مبتكره جدا جدا جدا
تعرف يا اخي ان الابتكار حلو في كل حاجه
اكيد تلاقي افندينا بيلعن ام الابتكار و المبتكرين بسببك

ذو النون المصري يقول...

انا رايح اقرا البوست تاني
لك تحياتي
و الي الامام

ام العيال يقول...

جرجس
انت المخ يا باشا و همه بقيت الجثه
انت ناوي على ايه بالضبط؟؟
على رأيكو بلغتنا
بترزع بالطناجر
(يعني بتخبط بالحلل)
الناس دي ما بتجبش سيره حاجه هي ما بتعرفهاش؟؟؟
كابيش

tota يقول...

الحج جرجس
وبعد درس الاناتومى السابق والصور من اطلس
احب اطمنك اساسا انه تم التبليغ منذ مدة طويلة عن فقدان كام مخ من منطقة الشرق الاوسط
الا ان البلاغ لم يلقى اى صدى
ولوحظ من الفحص الاكلينيكى انه لم يكن مؤثرا مما ادى بالباقين الى اجراء عمليات تجميلية لازالة هذا العضو الغير مؤثر حيث ثبت ان اضراره اكثر من منافعه فهو يصاب باللاورام ويحدث الاما مبرحة
والفراغ الذى تركه المخ فى الجمجمة يمكن استبداله باى منتج لزج بشرط عدم التعرض للشمس وخاصة لو الحشو ايس كريم او مهلبية زى بتاعة البتاع بتاعنا

وكل واحد يخلى بالو من مخو

تحياتى

غير معرف يقول...

الدكتوره توتا .. غلط .. غلط كبير جدا .. الحشو بتاع البتاع بتاعنا مش ممكن يكون ايس كريم ولا مهلبيه ولا أى حاجه حلوه .. غالبا الحشو جله ..

غير معرف يقول...

الاخوان الاخوان الاخوان لازم تتدخل الاخوان فى صلب الموضوع احذف احذف حد واخد منها حاجة

مراقب مصري يقول...

إيبي الجميلة

التاريخ يذكر لنا أن أول حالة في تاريخنا العربي يعترف فيها بوفاة جذع المخ والمسماة اصطلاحا الموت الإكلينيكي كانت حالة الله يرحمه ويبشبش الطوبة اللي ف راسه (أقصد اللي تحت راسه) الملك حسين بتاع الأردن
ودي كانت أول حالة في تاريخنا العربي يعترف فيها بموت جذع المخ ومن ثم بؤمر بفصل الأجهزة اللي مخلية قلب الملك - الله يرحمه - بينبض ونفسه بيتردد
وتعلن وفاته الرسمية بعد نحو 72 ساعة من وفاته الإكلينيكية
إحنا هنا بس الطب متأخر شوية وما بين الوفاة الإكلينيكية إلى إعلان الوفاة الرسمية بناخد شوية وقت
اللي مات طبعا يا ناصحة مش الرئيس
(إنشا الله اللي يكرهوه)
لكن اللي ماتت يا سكرة هي مصر الله يرحمها... وبقالها خمسة وعشرين ما فيهاش غير قلب بينبض بالأجهزة ونفس يتردد بالفنتيليتور
خمسة وعشرين سنة والدكاترة بتوعنا وهم أصحاب المدرسة الفهلوية في المسائل الطبية مش راضيين يفصلوا الأجهزة ويشيلوا الخراطيم
لا عزاء للسيدات
(ولا للرجالة بعد ما لبسوا طرح)

مراقب مصري يقول...

فارسنا القديم أوي

هو ليه كل الأجهزة الحيوية في بلادنا بقت صناعي؟
تفتكر الجماعة الكبار دول أجهزتهم كلها صناعي وسيليكون ولا إيه؟
على فكرة
لو عملت كليك على صور الراجل هتتكبر جامد وتشوف العجب في ملامحه التي تحاول الكاميرات إخفاءها لكن كله بيتفضح في الكلوس أب
ركز على التجمعات الدموية اللي في ودنه اليمين
وبقع الشيخوخة الواضحة على جلد وجهه
فيه حاجات كتيرة من دي لو أستاذ باطنة من الجامدين حللها يقول لنا بلاوي عن الحالة الصحية للراجل

بالنسبة للتعليق على موضوعك... إنت عارف... مواضيعك بتعوز وقت على ما الواحد يستوعبها
ولازم عشان يعلق يكون مركز جدا وجد جدا مش في مود مسخرة وتريقة
وإلا زي البوست الماضي عندك هاتشتم واسمع من المنقي خيار على رأي وائل عباس... استنى عليا على ما اكتئب شوية وأقدر أرد عليك رد تحليلي كئيب م اللي انت بتحبه

ههههههههههه

مراقب مصري يقول...

المهاجر المصري
الشهير بالرأفتاني

فيه كبدة وفشة وطحال ولحمة راس بس لو عايز مخ بانيه للأسف كان فيه وخلص

فيه كمان مزاليكا لو عايز (طبعا لو تعرف إيه هي المزاليكا أساسا ولو ما تعرفش ما تسألنيش... هي مش ناقصة)ـ

مراقب مصري يقول...

مونجي

إنت فين يا عم من زمان
ثمة مثل صيني يقول رب صورة واحدة تغني عن ألف كلمة

انقر على الصور وكبرها واتفرج على الكلوس أبس هتلاقي مساخر

مراقب مصري يقول...

ذو النون المصري الحبيب

كلماتك بجد بترجع لي الأمل في إن فيه ناس لسة بخيرها في هذا البلد الكئيب

حسب تقييم زمان البوست دا يودي ورا الشمس
حسب تقييم النهاردة البوست دا كفيل بما هو أفظع من ما وراء الشمس
كفيل بأن يبقيك في مصر إلى الأبد
وهي لو تدرون أعظم عقوبة توقع على بشر

الفصام يا عزيزي هو كارثة الكوارث في بلادنا
وخصوصا الفصام بين الدين والأخلاق
كل قصد للدين ينتفي في مصر عندما ترى مستوى الأخلاق في مصر المتدينة وأعزاؤنا الفصاميون يرون أن الحل هو في مزيد من التدين
الحل هو الحرية
حرية العقول
حرية الأرواح
حرية الفرد
حرية الوطن

كنت في جلسة منذ بضعة أيام مع الدكتور سيد القمني وطرح أمامي نظرية مؤسفة لدكتور آخر اسمه العفيفي الأخضر
يقول فيها أن مصر لابد (واخد بالك من حتمية لابد دي) أن تمر بالتجربة الإسلامية في الحكم (حكم المتأسلمين) وتكتوري بنارها حتى تنبذها إلى غير رجعة بس بعد ما تكون دفعت التمن غالي
وساعتها ستبنى مصر الحديثة من جديد على أساس المواطنة والقومية المصرية والليبرالية الحقيقية

يا خوفي لا تتحقق هذه النظرية
كلنا هندفع التمن والمرحومة هتكون أول الخاسرين فعندئذ لن نكون دولة ولا قومية بل مجرد ولاية في إمبراطورية وهمية
مصير مرعب بجد

سعيد جدا بتعليقك وبكوني توأما فكريا لك
أشكر ثقتك الغالية
تحياتي

مراقب مصري يقول...

أم العيال الفلسطينية الرائعة

أنا يا أختي لا مخ ولا نيلة
أما إنهم الجتة أو الجيفة فدا واضح للأسف أنه حقيقي ويا خوي من صدق المثل القائل يأنه حيثما توجد الجثة هناك تجتمع النسور
الطيور الجارحة المتربصة بجثة هذا الوطن ستأخذنا في سكة زي الطين

مراقب مصري يقول...

العزيزة توتا

بعد البحث والتحريات
تم العثور على الأمخاخ المفقودة
ولكن ما أقدرش أقول المعلومات اللي عندي كلها دلوقتي
(الحتة دي عاملة زي حركات الواد شرقاوي لما بيبين إنه مهم.... ههههههههه)ـ
المعلومات المتاحة لغاية دلوقتي أنه تم ظبط الأمخاخ المفقودة في أحد محلات الكبدة والمخ بضاحية عين شمس
ويقال إن اسم المحل أولاد الشرقاوي

ههههههههههههه

المشكلة طبعا مش في كدة
المشكلة في حالات التسمم اللي نتجت عن أكل هذه الأمخاخ

مراقب مصري يقول...

المدون كازانوفا

أرجو أن تقبل اعتذاري الشديد لعدم تقبلي وجودك في مدونتي التي هي بيتي
حضرتك ضيف غير مرغوب بوجوده هنا
أكرر أسفي مع كل احترامي وتقديري لشخصك لكن لا يمكنني أن أستضيفك هنا لأسباب تعلمها أنت جيدا ويعلمها بعض من يدونون عندي
لا أحب الشتامين ولا أقبل بوجود المتطاولين

عذرا ورجاء أن تتقبل الأمر بصدر رحب
وشكرا لعدم عودتك من جديد

غير معرف يقول...

بيقلك كان فيه مؤتمر لمدى بيان نجاح عمليات نقل و زرع الاعضاء
الامريكي قام وقف و قال احنا كانت عندنا حالة لواحد اتفقعت عينه و حطينا بدالها عين قطة و هو دلوقتي بيشوف كويس اوي مهما كانت المسافة بعيدة
فالناس صفقت له
بعديه قام فرنساوي و قال
احنا كمان كان عندنا واحد طارت رجليه في الحرب حطيناله رجل حصان و هو دلوقتي ماشي رهاوان
قامت الناس مصقفة بحرارة اكتر
ساعتها قام العالم المصري قال احنا عندنا واحد حطيناله جزمة بدل مخه و سكت
فسالوه و هو عامل ايه دلوقتي؟
رد و قال
ده زي الفل و بقى رئيس جمهورية
هههههههههههههههههههههههههههه
دي من عندي

مراقب مصري يقول...

السيدة الفاضلة حفصوتشا أم مصطفى

الست دي يا باشا أنا معرفهاش
دي دسيسة ع المدونة يا باشا
الله يكرمك يا باشا
معلش يا باشا
يا باشا دي بتكتب من أمريكا وبتقول كلام مش كويس وأنا مش مسئول عن كلامها يا باشا

لأ يا باشا أنا أعرفها طشاش كدة
يعني باشوفها صدف
وهي ست غلبانة الحقيقة بتشقى على عيل يتيم اسمه مصطفى
بس ما عرفش ليه هي مفترية كدة وبتشتم في أسيادها

ما سعادتك عارف يا باشا
كل ذي عاهة جبار
والبت دي يا باشا عرجة ومصنجة يا باشا ربنا يحوش عن أولادك يا باشا

يا باشا زي ما انت قلت الكلاب تسير يا باشا والقافلة تنبح


يعني مسامح يا باشا؟
متشكرين جدا يا باشا

امشي قدامي يا ام مصطفى ومتبقيش تخبطي في أسيادك تاني

غير معرف يقول...

فعلا كلام العفيف الأخضر صح ... مصر لازم تتلسع من الشوربة علشان تنفخ فى الزبادى
و ساعتها واحد زى الأخ كازانوفا حايستريح لما يشوف الفوضى على أصولها و يشوف المعبد بيتهد على كل الرؤوس .....عندئذ نرجع بقى لعصر محمد على تانى ...نفسى أتفرج على مذبحة القلعة ....

غير معرف يقول...

معلش لو الحاج يسمحلي بس حابه اكمل كلام مع الاخ ريدر او القارئ
بجد كنت احب لو عندك بلوج نقدر نتناقش فيه
المهم

الاخ ريدير
انا كمان احب اتفرج على مذبحة القلعة الله الدم حيكون مش للركب ده حيكون فوق اعالي النخيل
و ده نظرا لكثرة تعداد السكان و زيادتهم عن زمن محمد علي و المماليك
لكن احب اعرف منك لو تقدر يا ريت
مين بقى اللي حيكونوا بيدبحوا في مين؟

سلامي و اتمنى اشوف ردك

غير معرف يقول...

الى لأخت أم مصطفى : أولا انت مش ملاحظة انهم بيعملوا تعداد استعدادا لتصنيع توابيت بعدد القتلى ؟؟ أنا كل اللى أقصده اننا نشوف الذبحة بالتصوير البطىء ... يعنى لو كمان ديجيتال بدل من النظريات المتعددة اللى طلعت
عليها و مين مات و مين هرب . بالنسبة لمين حايموت مين فى المذبحة المودرن .... أعتقد أن مافيش مدابح فيها حد كسبان .... برغم ان أى منتصر بيقول لك ان الحق معانا و لذلك انتصرنا ....أنا حتى لو معايا الحق ما اعملش زى الباشا بيقولوا أن فيه تنبؤ بحرب حاتقوم فى 2007 و ان كوريا الشمالية حاتكون السبب فيها...قدامك سكة من اتنين : ياحاتتفرجى يا .....مش حاتتفرجى لأن الأرض كلها حاتكون القلعة !!!

3rby يقول...

بوست حلو
اقري تعليقي في البوست اللي فات

ذو النون المصري يقول...

لسه.........!!!!!!!!!!!!!!!!!!!!!!!
لسه عوزينا نتلسع!!!!!!!!!!!!!!!
حرام عليكم
هو احنا ناقصين لسع؟
داحنا خلاص جلدنا اتحرق ولحمنا داب و بقينا علي العضمايه
مين ده اللي قال لازم نتلسع ؟اشوفه بس
هو خلاص اللي نبات فيه نصبح فيه
احنا بقالنا قرون عايشينها لسع في لسع مفيش غير اللسع
مجربناش حاجه غيره اكيد الشخص اللي قال لازم مصر تتلسع
ركز علي الجمله بيقول ايه
لوحدها في سطر اهه
بيقول (لازم مصر تتلسع )هو الاخ ده مصري فعلا
انا شاكك في الحكايه دي
هس مصر هتتلسع لا الشعب هو اللي هيتلسع و اكيد بسلامته مش هيكون عندنا في مصر (الشعب) الله يكون في عونك يا بلد

mariam يقول...

انت مسبتليش حاجة اقولها
البوست تحفة و جايب المفيد
بس سؤال برىء هو فى مصر فى حاجة اسمها مخ؟

ام العيال يقول...

i want to thant u so much
cause many people when they knew that iam Palestinian they avoid me idont knew why ???
but u are sooooooo kind
thant u for acsepting me as a friend
:-)

الأميره أوسه يقول...

والله زمان يا جناوى

أدينى نص كيلو قلب يا عم و زود الأورطى
ومعاه بنكرياس على شوية طحال
أنت ليه ماتكلمتش على الكبده
مش عارف أن الكبده مفيده للشطه
ولا أنت مش بتاكل من على الرصيف يا شقى يا أقطاعى
المخ بقا مش بحبه أكتشفت أنه بيجيب صداع
أفهم من البتاع ده أن مفيش فايده
يعنى خلاص خلصت
طيب ياريت حد يبعتللى فيزا سفر
لمنغوليا العظمى
بس يا جرجس أنت تريح مخك بقا وفكك
و خد الكلام على الرئه عشان الحويصلات الهوائية بتاعتك
ورينى قلبك كده أممممممممممم
يااااه أسود وشايل كتير من الريس
يا جرجس الريس بيحبك وباعتلك عربية الترحيلات لسجن طره
سلم على عمو بقا وقوله متشكر
شاطر يا جرجس

مراقب مصري يقول...

العزيز ريدر

فينك من زمان يا عم؟
المهم يا سيدي
ابارح كنت في حوار مع بعض الأصدقاء المهتمين بالشأن العام وكنا بنناقش كلام سي الأستاذ أخضر
وواضح أنه أغلبيتنا على قناعة بأن هذا المصير الأسود للأسفهو السيناريو الأقرب للحدوث
في اعتقادي أنه لا يزال بأيدينا أن نتجاوز هذا السيناريو دون المرور بهذا المأزق التاريخي ودون الاجتياز بهذه التجرية من خلال بذل المزيد من الجهد الحقيقي من قبل النخبة المثقفة اللي بجد نخبة وبجد مثقفة بالوصول برسالة التنوير إلى الشارع
ساعتها التيار الديي السياسي سيخسر رصيده الوهمي الذي بناه على الأرض
ويمكن ساعتها ربنا يكرم

مراقب مصري يقول...

العزيزة حفصوتشا ومعاها العزيز ريدر

اسمعوا آخر النظريات
البلد مش هتخش في البديل الإخواني بشكل مباشر
يقال أن الدولة أي الحكومة هي اللي هتتأخون (من الأخونة) أي التظاهر بالمنظر الإسلامي كما هو الحال مع الإخوان
وده لأن الحكومة بتلعب ع الكسبانة وعمرها ما هتخسر في دور القمار اللي بتلعبه لأي حد مهما كان
وفي عملية الأخونة النظامية هذه لن تخرج الجماعة (الإخوان الأصلية بقى) من المولد بلا حمص
فستزيد نسبة تمثيلهم في كل حاجة في البلد مش بس المجلس بتاع لا مؤاخذة الشعب
وكله مصلحة
نغع واستنفع سيكون شعار المرحلة
والشعار التاني
لتذهب مصر وشعبها إلى الجحيم وبالانجليزي تبا أيا الأوغاد المصريين وبالبلدي طظ في مصر وأبو مصر واللي ف مصر

يعني البلد هتبقى لوز
والنظام هيبقى عنب
نهاره أبيض

مراقب مصري يقول...

ذو النون المصري جدا

أيوة يا سيدي ريدر قارئ مصري جدا برضه
واللي قال إن مصر لابد أن تكتوي بنار تجربة الحكم الديني الإسلامي هو الأستاذ الدكتور العفيفي الأخضر
(أنا مش متأكد هو بيشتغل إيه بالظبط لو حد يعرف يا ريت يقول لنا)
وأنا باتناقش مع الكثيرين هذه الأيام في مدى مصداقية موضوع "حتمية" التجربة دي والاكتواء بنارها
نفسي بجد في بلد يقوم على أساس المواطنة وعلى أساس المساواة والإخاء والعدل
مش على أساس التفرقة المعيبة والتكفير الجاهز والبراجماتية النفعية المطلقة اللي احنا عايشين (دا بفرض جدلا إننا عايشين) فيها

يبدو أنه لو لم نتحرك كنخبة حقيقية
سيبك من النخبة الخرائية التقليدية من أحزاب شائخة وجماعات هبلة زي كفاية وجماعة دينية لها أجندتها الشديدة البراجماتية
سيبك من دول وخلينا في جنين النخبة الجديدة اللي بيتكون النهاردة واللي ممكن يكون فيه أمل جديد بجد وممكن هذا الجنين لو اتولد صح بجد يخلينا نتجاوز هذا السيناريو الخرائي اللي مصر بجد هتتحرق بسببه مش بس هتتلسع

يلا ربنا يكرم ويدي كل وحد على أد نيته السودا

مراقب مصري يقول...

عربي

شكرا
واقرا تعليقي على تعليقك في البوست اللي فات
:)

مراقب مصري يقول...

العزيزة مانو

شكرا على تشجيعك وعلى كلماتك الرقيقة
وطبعا مفيش مخ
دا يا أمي أصبح في تعداد الأعضاء المنقرضة زي الزائدة الدودية كدة يعني فيه بواقي ضامرة عسان تتدرس في التاريخ الطبيعي ويتقال في كتب الأحياء إنه زمان كان يوجد هنا (ويشيروا بالسهم للجمجمة)
عضو اسمه المخ
=================

دخلت مدونتك لأول مرة وأولا عجبني جدا اختيارك لاسم نور الصباح ... اختيار موفق
نور الصباح الجديد ده هو اللي بنحلم بيه ونفسنا نشوفه بيشق ستار الظلمة والعتمة اللي احنا مكمورين فيها دي

عجبني كمان موضوعك اللي بتسألي فيه عن حركة كفاية التي كانت
لسة هدخل أعلق عليه
بس مبدئيا سؤالك عن الله يرحمها كفاية هو نفس التساؤل في جوهره عن إذا كان لسة فيه مخ

ههههههههههه

والإجابة في الحالتين كان فيه وخلص

ههههههههههههه

بالمناسبة
كفاية عامة عيد ميلادها يوم السبت
سوري هو مش عيد ميلاد بالظبط
زي ما تقولي كدة الذكرى السنوية
مش حاسة إنه مفروض تقال هنا كلمة اسكندرانية أبيحة بدل الفول ستوب؟
يلا مالوش لازمة خلينا مؤدبين أحسن

مراقب مصري يقول...

أم العيال الفلسطينية الرائعة

I am aking ur words of thanks seriously not as a joke. Any pig whatever his nationality is ho avoids u coz of ur being palestinian is really a person who doesnt deserve to be human at all nor of course being a friend of urs. It's good from time to time to get rid of some of our so called friends while they are just unworthy of our respect nor of our precious friendship.

Review all ur relationships. Keep only the good ones & get rid of the others.

Of course you are my friend. A very dear precious friend to me. Greetings to Mr. Ahmed & to the "3eyal".

God bless you richly.

مراقب مصري يقول...

يا اخواننا أنا في حلم والا في علم؟؟؟
الأميرة أوووووسا عندي في البيت؟؟؟
إيه النور دا كله يا برينسيس
أهلا وسهلا وخطوة عزيزة

بصي يا ستي
يسر مسمط الحج جرجس لتجارة فواكه اللحمة أن يعلن عن توفر جميع الأصناف التي طلبتيها من فشة وكوارع ولسان (والموجود من النوع الطويل)
وطحال وبنكرياس وجواهر (اللي هي العينين لا مؤاخذة) وفيه مزاليكا للي عاوز (ومش هاقول لك هي إيه المزاليكا عشان الرقابة) وفيه كل حاجة بعون الله ماعدا الصنف اللي انتي عارفاه
ده كان فيه منه وخلص من خمسة وعشرين سنة
وإخوتنا الصيادلة قالولنا إنه دخل جدول ألف بسبب ما يحدثه من أثار جانبية لمتعاطيه
وأختنا حفصة بعتت من أمريكا تقول إنه المتوافر مكان العضو المذكور جزمة يتم زرعها في تجويف الجمجمة وبتعمل نفس الشغل وأحسن كمان

نمرة التليفون على ضهر البامفلت
والتوصيل للمنازل وبالسرفسة كمان

وكلوا من طيبات ما رزقناكم

غير معرف يقول...

حاج جرجس
تحياتى لهذا البوست الاكثر من رائع..
بيقولوا ان الرئيس الراحل الحبيب بورقيبة كان يحكم البلاد وهم واضعين له بامبرس وهى الحفاضات الخاصة بالاطفال الرُضع وبالتالى يا اخى هى جت على بتاع مصر ماهم كلهم فى الهوى سوى...

مراقب مصري يقول...

العزيز سيبها على الله

أشكركم على التشجيع
بوستك الأخير عن الحكام لطغاة الذين يجب أن يرحلوا هايل
وبالفعل لابد أن يرحلوا

أستأذنك تبعت لي الكود بتا البانر بتاع التعذيب اللي عندك في المدونة
أنا مهتم جدا بالموضوع ده


شكرا وأهلا بيك ضيفا عزيزا في مدونتنا المتواضعة

غير معرف يقول...

أنا موجو د ...حى أرزق...
كلامك منطقى ...انما يا عزيزى بغض النظر عن أى حكام ...أنت تعرف أن الشارع المصرى اسلامى ...أى أن الفرصة فاتت من زمان لتغيير الشارع لينبذ التعصب ...أنا شايف أن الفرصة كانت بعد اغتيال السادات مباشرة و محاولة قلب النظام بالعنف ...انما بسبب التربيطات ترك النظام التيار الدينى لأنه كان يستفيد منه و على ما أعتقد حتى الأن.
العفيف الأخضر بيكتب كتير جدا فى وطنى ...مش ممكن ما قرأتلهوش !!!!
الوضع الحالى موازى تماما لوضع ألمانيا قبل 1933 اضطرابات , بطالة , أزمة اقتصادية حتى خناقات الشوارع بين مسيرات للحزب النازى و الحزب الشيوعى مثلا و فى النهاية حكم من هو أكثر تشددا و تطرفا حتى أن هتلر كان يغتال معارضيه و يمشى فى جنازتهم ....المهم الحكم و السيطرة و تخرس كل الألسنة المعارضة فى سبيل الوطن مع ايضاح الفرق بين الجنس الأرى و بقية الأجناس و تصفية الأجناس المختلطة و اليهود و مافيش مانع من معاهدة عدم اعتداء مع الأتحاد السوفيتى الشيوعى عدو النازية ثم الانقلاب عليه بعد سنتين ....يعنى أنا شايف أن ده سيناريو مهدى عاكف واستحالة أنه يكون جاى لهدف أخر يقول أى حاجة فى الأول مش مهم و بعدين حايبقى يضبط أموره و ربنا حايسهل .
مش ملاحظ حاجة ؟؟؟تزامن افتتاح مهرجان السينما مع أزمة فاروق حسنى ؟؟؟ يمكن تشوف ده تعدد ثقافى محمود ..أنا شايف أنه شرخ هائل فى المجتمع لأن كل فئة بتعادى الثانية على طول الخط ...مش قلت لك ألمانيا 1933

غير معرف يقول...

اخى الحاج جرجس
اشكرك على الرد واشكرك اكثر على التشجيع...
انا عموما تحت امرك فى مسألة ولكنى لم افهم ماتريده بالضبط ياريتك يافندم توضح لى اى بانر تريده وهو الخاص بالتعذيب حقيقى لم افهم ياريت سعادتك توضح المطلوب وانا تحت امركم فما لدى فى المدونة هو ملك لكل المدونين وخاصة اذا كان يخدم قضية من القضايا التى تهمنا كمصريين ....

ام العيال يقول...

ايه يا جرجس بقيت بتبيع اكسسوارات الجاموسه
اممممممممممم جربي يا اوسه و قوليلي
:-)

غير معرف يقول...

جرجس
وهى أم المرارة مالهاش مكان هنا؟
دى هى دى العضو الأكثر تحملااا وانفقاعاااا فى مصر المحروسة

=====
ثم قلب اية ومخ اية ؟
فين الاهم
اللسان راااح فين يا ظالم؟
ولا أكلته القطة؟


يا ابنى لازم الوصف التفصيلى لكل عضو له دور فاعل فى المستهلبية دى



ام العيااال
على فكرة يا عزيزتى
أنا نص أصدقائى فلسطينيين
وباموت فى كل نفر ونفراية منهم


توتة
والنعمة بامووت فى تفسيراتك


فى النهاية
جرجس
جااتك القرف
الواحد نفسه مسدودة خلقه
مش ناقصة قلبة معدة بالصور الكاريكاتير دى
يعععععععع

3rby يقول...

هاتروح مظاهرة زكري اول مظاهرة لكفاية يوم 12\12 ولا لا؟
رد بسرعة يا جرجس

مراقب مصري يقول...

العزيز ريدر أتفق مع رأيك تماما
ياااااه يا راجل
فكرتني بأيام نضالنا في ألمانيا سنة تلاتة وتلاتين
الأيام دي متتعوضش
يااااه إنت أصيل بجد
لسة فاكر أيام خناقات الشوارع بين مسيرات للحزب النازى و الحزب الشيوعى
فاكر وقتها كنا لسة عيال صغيرة والواد سنسن وقتها كان عنده خمس سنين
واحنا كنا بنسرق سندوتشاته في الفسحة في مدرسة هتلر الابتدائية المشتركة
وفاكر أم الواد سنسن لما جت اشتكت مننا لأبلة الناظرة على أساس إن احنا عيال شضلية وبنستعبط الواد وبناكل سندوتشاته
ياااااااه بس شوف الزمن يا راجل
إنت فضلت فقري وانا فضلت شحات والواد سنسن سرق كل سندوتشات البلد
الواد دا طول عمره رأسمالي متعفن
يلا ربنا يكرمه زي ما كرم اللي قبله

مراقب مصري يقول...

الأخ العزيز سيبها على الله

عندك بانر في السايد بار عليه صورة المواطن بتاع نعلش يا باشا الله يكرمك يا باشا وهو وصلة على موقع التعذيب في مصر
أتمنى أن ترسل لي كيف أضع مثلها في مدونتي
لسبب بسيط هو أننا لا نريد لهذه القضية تحديدا أن تموت ولا أن تحفظ في الأدراج
نفسي كل مدون يحطها عنده تضامنا مع كل ضحايا التعذيب

من جديد أحييك على ما تكتبه وأعتقد أنني سأزور مدونتك كثيرا فالجواب باين من عنوانه

سلامات

مراقب مصري يقول...

أم العيال التي تذكرني برقة فلسطين وصمودها النبيل

يقال أن الجاموسة لما تقع - بعيد عن السامعين - بتكتر سكاكينها

الأميرة أوووسة زبونة دائمة في المسمط
تعالي شفينا وستجدي ما يسرك

مراقب مصري يقول...

شهروزة العزيزة

من تاني بتجبريني أصلح لك معلوماتك
طبعا المرارة بتنفقع لكنها ليست الأكثر انفقاعا
المزاليكا تنفقع أكثر
بس دا طبعا في ذكر الجاموس
حيث أن أنثى الجاموسة ما عندهاش مزاليكا وآخر حاجة بتنفقع عندها هي المرارة
بس يا حرام المرارة لا يوجد منها سوى مرارة واحدة بينما المزاليكا فيه منها اتنين
=====================


طبعا اللسان كلته القطة
معروفة دي

أما حكاية الوصف التفصيلي اللي بتقولي عليه لكل عضو
لأ يا اختي
أتكسف

هههههههههههههه
======================


معدتك اتقلبت؟
خدي قرصين زنتاك 150 ووراهم كوباية فوار فروت
نهاره إشطة يا مهلبية باللحمة المفرومة

مراقب مصري يقول...

ولدنا العزيز عربي

بذمتك إنت رأيك فيه حكاية مظاهرة لكفاية بممناسبة الذكرى السنوية الأولى؟
إيه الهطل ده؟؟؟

يا ابني كفاية النهاردة زيها خلاص زي التجمع والوفد والناصري وغيره وغيره
فاقدة المصداقية من الناس
ماتت من زمان بسبب أنها راهنت على الأشكال الزبالة دي
لو كانت راهنت على الشعب اللي اداها المصداقية ما كانتش الله يرحمها وصلت للمسخرة دي
دا عهر سياسي
البت اتهبشت ورايحة تحتفل بعيد ميلادها في وسط الشارع
إيه الدعارة السياسية دي؟؟؟
بكرة نلاقيها واقفة على عمود في شارع جامعة الدول
إنسى يا عمرو

أي أمل يا باشمهندس عربي مش هييجي من الكيانات الأفاقة دي
هييجي من الناس اللي بجد
سيبك من كل الأشكال المصنفة والمقولبة سواء يسار أو ناصري أو وفد أو تجمع أو إخوان مسلمين
كله بيـــــــــــض فاسد
بيتلم على بعضه
وآخرته زي ما انت شايف
يروحوا يحتفلوا بعهرهم في الشارع
البلد خربانة وكفاية بتحتفل بعيد ميلادها
بلا وكسة
يا راجل خرجتني عن شعوري

غير معرف يقول...

الله يسامحك يا جرجس فكرتنى بأيام الفقر انما أنا ربنا فتح عليا و عملت عربية كبدة و من ساعتها الشغل عال العال و بعدين أنا كنت أنصح منك برضه و انضميت للحزب- واخد بالك- و حاولت أشترى صفقة محلات هانز باشا اللى فى كل ألمانيا –واضح طبعا – و انت عملت فيها بتاع مبادىء و رفضت تنضم لحزبنا ...اقول اية الحمد لله التجارة فى كبدة الفيل مربحة جدا و الناس كانت بتنبسط منها لأننى كنت باختار الفيل الصغير اللى كبدته طرية و طبعا بعد ما أخدت شهرة عالية اتجهت للعمل السياسى و خدمة أبناء ألمانيا و الحزب بيضع كل ثقته فى ...أنا فى الخدمة ...أسلك لك أى حاجة ...كانت أيام

3rby يقول...

ابويا بيقولي انها باظت علشان بقه فيه تكتلات سياسية جواها
يعني كنت مره في معرض الكتاب السنة اللي فاتت واللي كانوا بيقولوا الهتافات كانوا من الغد وقعدوا يهتفوا علشان الممثل ايمن نور الحكاية اتفضت
بس فكرة كفاية في حد ذاتها عبقرية
وبعدين اهو اي تلكيك علشان نعمل مظاهرة
مش احتفال وجاتوه وبيبس
حلوة بيبس ديه
بس ماتقولش افاقة
والدي عضو مؤسس في ادباء وفنانون من اجل التغيير وهو اللي كاتب البيان التاسيسي
هي باظت مش علشان عيب فيها بس علشان اخترقت مش اكتر
وبعدين ازاي هاتيجي من الناس
من غير تنظيم يعني؟
صعب اوي اللي انت بتقول عليه ده لان شعبنا هااادي لدرجة البرود ومش بيتلموا غير علي البنات او في الماتشات والاحتفالات بالفوز
مش اكتر

مراقب مصري يقول...

العزيز ريدر

يقال أن تجارة الكبدة هي أقصر الطرق للوصول إلى معترك الحياة السياسية ولك في الرفيق الشيخ هانز ديتريش حميدة خير مثال وهو القيادي السابق بالعديد من الأحزاب النازية السابقة التي كان دائما له الدور الرائد (والمقدم) في صنع فورتينة في داخلها (وفورتينة هي لفظة ألمانية قديمة تعني خازوق) بما يؤول إلى تجميدها في النهاية أو تسييحها من قبل جهاز أمن النازي الذي كان الرفيق الشيخ هانز ديتريش حميدة عميلا له إبان حكم هتلر النازي الله يرحمه... وقد بدأ الرفيق نضاله برضه زي حالاتك على عربية كبدة إلى أن انتهى به الحال عقبال أمالتك إلى كونه أحد أكبر تجار المخدرات في برلين المحروسة
وعلى الرغم من أن الرفيق هانز كان دائما في صفوف المعارضة إلا أن الحزب النازي الديموقراطي
وبالانجليزي
NDP
Nazi Democratic Party
يدين له بالفضل في إسقاطه العديد من الأحزاب كحزب الأحرار البروليتاري الشيوعي الإسلامي في ضواحي برلين الغربية
وأخيرا حزب الغد الهامبورجي الفرانكفوتري الذي حاول أن يخربه ويقعد على تله ولكن جهوده الكبدوية باءت بالفشل
تفتكر كان محتاج يزود الطحينة؟

غير معرف يقول...

طبعا يا سيدى مفيش حاجة عن المخ لان المعنى فى بطن الزعيم، والعلم ف كلاويه،
على فكرة يا حاج جرجس ايد الراجل مكنتش على كتف الاسد، صورتك مزورة، ايد شريكنا الاستراتيجي كانت تحت شوية مش فوق قوى كدة، ولا ايه يا اخى؟
بالظبط منتصف الجثة، يعنى اسفل العمود الفقريي،سلام بقي يا بونا انا كنت عند عمر وكتبت حاجة عن الراديو، كمان كتبتلك اخر تطورات الموضوع بتاعنا بتاع المقشاتو randa

مراقب مصري يقول...

يا عم عربي

أبوك عنده حق
ودا بيأكد كلامي
هي باظت بسبب التكتلات بس أي تكتلات؟ التكتل حاجة صحية لكن اللي كان في كفاية دا تشرذم فكل شلة عاملة على مصالحها وياكش تولع يا عم الحاج والبهوات الكبار بيهلبوا وهما قاعدين في مكاتبهم المكيفة
يا سيدي الفاضل لا أعيب هنا على الرجال المحترمين في كفاية وعلى أبطالها الحقيقيين ولكن شوية المستنفعين بها والمحركين لسياساتها... تجمع لقوى وطنية يعني ناس عايزة مصلحة البلد يحبقى يضم الإخوان إزاي يا ربي؟؟؟
دول عندهم أجندة مصر فيها مجرد ولاية ضمن إمبراطورية كبيرة
وتجمع وطني من أجل التغيير يبقى يضم إزاي التجمع بروح خالته والوفد وبقيت الأحزاب اللي أصلا جابتنا ورا
وتجمع وطني من أجل التغيير يحاول ليه يكتسب شرعيته من هذه الكيانات الوسخة؟؟؟ شرعيته من الشارع والشارع سحب شرعيته منه بمجرد أن وجده متحالفا مع الإخوان والناصري والتجمع والوفد وبقية الليلة الهطلة دي
كفاية لم تتكن لتتدنس بهذا القرف لكن قياداتها اختاروا التطجين
يشربوا
طبعا لابد أن يكون التحرك تنظيميا بس مين قال إنه يضم نفس الأشكال الزبالة اللي خربت دين أم البلد؟
فاهمني؟؟

مراقب مصري يقول...

راندا فاتنة روما ومحطمة قلوب شباب ميلانو

ما أبلغ عباراتك وأفصح تعبيراتك
المعنى فى بطن الزعيم، والعلم ف كلاويه
تعيش كلاوي الزعيم نعيش تعيش تعيش

بالنسبة للأوشاعة المغرضة اللي انتي بتحاولي تروجيها أقول لك ثكلتكِ أمُّكِ يا كافِرة يا من تُلَسِّنين على أسيادك بهذا الكلام العيب
هو بس كان بيعلمه قاعدة التنشين الأساسية التي تنص على وضع سن نملة الدبانة أسفل منتصف الجثة بالظبط في الحتة اللي انتي قصدتيها بس انتي اللي بتفهمي كل حاجة على تحت
نضفوا دماغكوا شوية بقى

المهم حكي لي شوية عن مغامراتك في روما
هو انتي كني ف روما البلد ولا روما المحطة؟

:)

غير معرف يقول...

ملعوبة يا عم جرجس

غير معرف يقول...

انت فين يا عم الحاج جرجـس
انا عــارف ان موسم الحج داخل وانت مشغول ومش عاوز اتقل عليك ولا اتصل بيك

وبينى وبينك..انا مش ضامن ان محمولك يكون معاك..
ما انت دايما بتنساه

ذو النون المصري يقول...

يا عم جرجس النخبه التي تتحدث عن قرب تكونها ان حاسس ان لا امل فيها لان النخبه كي تحرك الشعب فهي في حاجه الي القياده و القيادات هم دائما سبب الوكسه لانها كما اعتقد ستتحول الي قيادات خرائيه مثلها مثل غيرها من القيادات الحزبيه و غيرها
القيادات هتبيع كغيرها
عن التعذيب انا معك يجب الا ننسي اي قضية او حادثة تعذيب لان الاسياد لعبهم دائما علي الذاكره الضعيفه لنا ولو علم الواحد منهم ان صرخة المظلوم سوف يجار و يصرخ معها الف صوت سيفكرون كثيرا قبل ان يظلموا
بالنسبه للمسمط بتاعك عملت لكل واحد مكان اوعي تكون نستني يا راجل؟
هو الاكل عندك عالواقف و للا فيه كراسي؟

ذو النون المصري يقول...

الاخ ريدر
كبدة الفيل طعمها وحشه
حاول تطبخ الزلاليم

ذو النون المصري يقول...

يا دكتور جرجس فيه تجمعات دمويه في ودني اليمين
و بقع الشيخوخه علي وجهي ظاهره
استاذ باطنه مين يعرف يحلها لي


ياريت توضح شويه ايه معناها
عاوزين نطمن هيموت امتي؟

غير معرف يقول...

ياسلام ياحاج جرجس .....
دة انت طلبك اوامر وفى اى وقت انا تحت امرك وتحت امر كل الاخوة المدونين وخاصة هؤلاء الذين لا يرضون
باهانة
كرامة المصرى من قبل زبانية النظام والتى فاحت رائحته الكريه فى شتى انحاء المعمورة حيث شاهد هذا
الفيديو
الفظيع ملايين فى جميع انحاء العالم ...فكرة نشر الصورة على المدونات فكرة جميلة وياريت نحاول نشرها فى
كل المدونات عموما الصورة قمت بأخذها من مدونة الاخ ماك والذى كان له الفضل فى نشر هذا الفيديو وقمت
انا بربطها بمدونة التعذيب عموما من المفترض ان نكون كمدونين كتلة واحدة فى الوقوف ضد هذا النظام
القميئ والكريه لاننا بالفعل طفح بنا الكيل.......
قبل ان انسى شكرا لزيارتك لمدونتى وهذا شرف اعتز به

لا اعرف لماذا ترفض الكومنت حيث تظهر هذة الرسالة
Non è possibile accettare il codice Tag is not allowed:.

ياريت اى احد من الاخوة يعطينا رأيه فى هذة المشكلة واكون له من الشاكرين

alnadeem يقول...

والأن أتكلم

بختنا كده يا حاج جرجس
المصيبه يا جرجس ان قرايتي الشخصيه للي هيحصل في مصر تؤكد أننا سنترحم علي أيام حسني مبارك وحاول تفهم كلامي صح
حسني مبارك بيسلمها لكارثه غير مسبوقه في تاريخ مصر تماما كما فعل صدام حسين كان العراقيين يتمنون زوال حكمه لكنهم لم يكونوا يدركون أنه بسبب ما فعله صدام في البلاد فأن انهيار حكمه سيأتي بكوارث
بكل أسف ربما نترحم علي أيام حسني مبارك
بكل أسف

غير معرف يقول...

طب بالعند فيك يا حاج جرجس، انا حطمت قلب برلسكونى نفسه، ومردتش اسلم عليه، والله بجد، المهم طبعا بعدها هو اتنحس ف الانتخابات ، بما انى دعيت عليه وانا راسي عريانة، ايوة راسي...،لانه قبض عليا لمدة 3ساعات فالقسم، والله، لحد ماطلعنى مسؤول حزب يسار الوسط، ويحيا رومانو برودى، اما مغامرات روما، وميلانو، وبلونيا، وفنيسيا، وغيرها، فا بكل غرور وتكبر عليك، وانا حاطة السليمة على المخلوعة خالص، اقدر اقولك لما نتقابل ما تيجي نتقابل يا اخى يوم الاحد مش هروح الكنيسة لكن ممكن هكون مع توءمى ف الصياعة، حوالين السندباد، ممكن تاخد رقمى من عمر وكلمنى، او خد منه الاميل بتاعى واكتب لى، اوك، سلام انا عندى شغل الصبح.randa

غير معرف يقول...

انا شفت تعليقك اللى عند عمر، انا مبعرفش فى هندسة المدونات وبصراحة صوتى اتنبح فى انى الاقي حد يعلمنى، لكن كل اللى اعرفهم الحمد لله اندال، لكن انا بحاول اتعلم، الخوف ان اهلى صعايدة، وانا مغامراتى امتدت للدول الاسكندنافية فالشمال، وجورجيا جنوب روسيا ف الشرق، واسبانيا فالغرب، فا لو اتعرف هنطخ يعنى هنطخ، غير انى قلقانة انى ابقي المطار السري رقم 2، لكن فى فكرة انى اكتبها عنجليزى او طليانى استغلالا ان عيلتى مبيقروش الا صعيدى، هههههههه، اما موضوع المقشة، ممكن نستبدلها بمنفاخ عجلة، او حاجة من الحاجات دى، لكن المهم احنا ممكن انا انضم لمجلس الطفولة البائسة، او حموم الانسان، ونوصل للست رقم اونو، وانا متأكدة ان قلبها كبير، وبالتأكيد هتمولنا حملة منفاخ العجلة دا، وممكن تلاقي بكل بساطة، البوليس بيفتش فالشارع، هل كل مواطن شايل المنفاخ بتاعه ولا لاء؟ دا طبعا زى حملة حزام السيارة، بما ان حبيبنا اكيد طلع بنسبة من المبيعات، اكيد يطلع بنسبة من المنافيخ، او حتى نتفق معاه ع المقاولة، واكيد هيوافق لو معانا كارت من الستو هانوم، هههههه يلا كفاية احسن اتحبس، randa

غير معرف يقول...

معلش الحاج جرجس لو يسمحلي
طبعا يسمحلي

الاخ ذو النون المصري
انا قلت اكلمك هنا عند الحاج بما انك مش موجود في مدونتك ابدا
انا كتبت لك تعليقات في موضوعين لغاية دلوقتي و بعد ما بكتب التعليق مش بيظهر عشان حضرتك لسه مشغلتش الرقابة
فيا ريت لو تشيل الرقابة على التعليقات
و يا ريت لو ترد علينا يا سيدي و بلاش تقل المدونين ده

سلامي

ذو النون المصري يقول...

انا اسف جدا يا ست حفصوتشا انا و الله ما اعرف ان فيه عندي رقابه غير دلوقت
انا رايح اشيلها حالا بعد اعداد البوست الجديد

مراقب مصري يقول...

عمر ... بتاع أيوة ممكن

متشكرين ع الزيارة يا عم الحاج وأخبار امتحاناتك إيه؟
خطوة عزيزة يا باشا
وكفايا إنك صديق الرأفتاني الكبير
عايزين نشوقك في مصر قريب

ما تقطعشي الجوابات

مراقب مصري يقول...

العزيز إسلام

حلوة أوي حكاية رئيس خالي مخ دي
عاملة كدة زي كشري خالي تقلية وزود العدس وحياتك
ممكن نبقى نفتح ركن للكشري في قلب مسمطنا العظيم

شكرا على الفكرة

مراقب مصري يقول...

العزيز جدا ذو النون المصري

أولا: مكانك محجوز في ترابيزة أول صف وجنب الشباك كمان ع النيل في مسمط الحاج جرجس لفواكه اللحوم وبقايا الأعضاء البشرية

مش عارف ليه بيرن ف وداني دلوقت حالا هتاف العيال البلطجية اللي أجروهم في الحزب الوطني السنة اللي فاتت يهتفوا للريس
يا مبارك دوس دوس إحنا معاك من غير فلوس
===========

ثانيا: بالنسبة للأعراض اللي انت ذكرتها والبقع اللي ف الوش والتجمعات الدموية اللي ف شحمة الأذن وغيره فدي للأسف يا باشا معناها إن المنتج اللي في إيدك دا خلاص إكسبايرد ومنتي المفعول من سنين... وغير صالح للاستهلاك الآدمي

رجاء التخلص من العبوة في الحال في مكان آمن لئلا يستعمل من قبل آخرين
يفضل إلقاؤه في مزبلة التاريخ

هههههههههه
الله رحمك يا كارل ماركس
كان فقري أوي كارل وابن نكتة طحن
قال مزبلة التاريخ قال
اللي عمر ما عدى علينا زبال يقول لنا مش عايزين ترموا حاجة في مزبلة التاريخ
لما خلاص العزبة عفنت وريحتها فاحت
يبدو أن حكومة العزبة خصخصت مزبلة التاريخ واديتها لشركات أجنبية وبرضه كلت عليهم فلوسهم والنتيجة زي ما انت شايف ... صرنا نحن مقلب زبالة التاريخ البشري كله

طظ فيك يا ماركس
وسوري انت طلعت حمار
خيرها في غيرها

مراقب مصري يقول...

سيبها على الله

فيه أخبار جديدة في موضوع زبانية التعذيب
خش عند أسد وشرقاوي
الواد السواق اللي تم اغتصابه لقيوه
وعرفوا اسم الكلب اللي اغتصبه والحيوان اللي صور بالموبايل
نهاره أبيض

مراقب مصري يقول...

توأمي الفكري وشريكي في الكفاح
النديـــــــــــــم


حسني مبارك بيسلمها لكارثه غير مسبوقه في تاريخ مصر تماما كما فعل صدام حسين كان العراقيين يتمنون زوال حكمه لكنهم لم يكونوا يدركون أنه بسبب ما فعله صدام في البلاد فأن انهيار حكمه سيأتي بكوارث
بكل أسف ربما نترحم علي أيام حسني مبارك
بكل أسف

بجد حزنت جدا لمجرد قراءة هذه الكلمات يا عم عمر... على قد ما قرايتك شكلها مظبوط وواقعي على أد ما نفسي إن دا ما يحصلش

يعني مفيش خلاص ف إيدنا حاجة نعملها؟
أمال فين الزفت الحتمية التارخية بتاعة الأستاذ كارل
الله يخرب بيتك يا ماركس

مراقب مصري يقول...

المهاجر الرأفتاني الشهير

سيح سيح يا عم الحاج
دا انت ناقص كمان تقول للجمهور على الملأ إني باقفل موبايلي معظم الوقت هربا من الديَّانة

ههههههههههه

أنا موجود ابقى تعال
مستنيينك ما تتأخرش

مراقب مصري يقول...

راندا محطمة قلب بيرليسكوني

أنا بجد ممكن أساعدك في عمل مدونة
إنتي بس جهزي شوية فلوس جامدة كدة وأنا أظبطك
وعندك أحلى بلوج لأحلى راندودة وكتر الدقة على طبقين ممبار واتنين لحمة راس خالي مخ

بالنسبة لأهلك الصعايدة دول ما تقلقيش
هما مش فاضيين لك
سيبي أبوكي يتخانق مع امك ويطلقها تاني
انتي بس ما تصالحيهومش على بعض عشان يفضلوا كدةى مشغولين ويحلوا عن نافوخك

ههههههههههه

سلامي للأسرة
(بالمناسبة الأسرة هي لبنة المجتمع)
سلام مربع للمجتمع يا عم الحاج

مراقب مصري يقول...

حفصوتشا أم مصطفى

خدي راحتك يا أختي
بيتك ومطرحك
تقوليش قاعدة ف غرزة

ههههههههههه
على فكرة
عاملين حظر تسول ف المدونة عندي من 5 لسبعة كل يوم
عشان بنعمل مينتينانس
خلي بالك من بتوع البلدية وخلي بالك م العربيات دا انتي بتجري على عيل يتيم
(سلامي لمصطفى)
إنجغا

غير معرف يقول...

بقى كده يا حاج جرجس؟
انت شوية تهزقني قدام الضابط و شوية تقلي خلي بالك من البوليس و انت بتجري على عيل
ايه التسييح ده؟
لعلمك بقى ابني كسيب و مش محتاجه اجري عليه
هو اللي بيجري عليا
هو يكتب و انا اطبع عالجاهز
هههههههههههههه

كده يا حاج جرجس
مكنتش مستوكعة منك كده؟
ماشي يا عم الحاج
نجيلك في الافراح

والنبي اتوصى عندك باتنين كيلو كبد و كلاوي و خلى المخ على جنب

معندكش حاجة نباتي؟
مش بحب اللحمة

طب الاقي مومممبااار
ده الوحيد اللي بحبه

غير معرف يقول...

بقلك يا عم الحاج
و حياة ابني مصطفى متبقاش ديكتاتوري و تجبرنا اننا نسمع الاغنية
مش معقول اسمعها كل مرة ادخل البلوج عندك
ابقى خليلها لينك نقدر احنا نتحكم فيها براحتنا

مش كده و لا ايه؟
سلام

غير معرف يقول...

هاى يا واد يا دكتور، وحشتنى يا عم، خلاص مدونتك بقيت الدواء بتاع قبل النوم، انت والواد التانى دااللى بينفي الحقيقة العلمية"الارضو كرويتون تلفو حول نفسوها"، بالنسبة للممبار انا متحيزة اكتر ل"مقادم الغنم" عند العهد الجديد، فكرنى يوم اعزمك، او اقدم لك رشوة، هناك بس انت هتتفرج بس بما ان انت دكتور هتكتفي بالشرح بس، اوعى تفتكر انى بهزر، بالنسبة للمدونة انا اطول ان الحاج جرجس ببركاته وكرماته، يساعدنى، بس يا حلو لازم تستنى لحد ما اقبض اخر الشهر، أول مرتب، اللى نزل للنص بعد الاتفاق عليه مع جهة العمل، هههههه،اه والله، بالنسبة لامى وابويا ابشرك، عملت فصل بين القوات، هو عند الست مامته(والله)بس لسه على وش خلع ضرسه،لكن الكارثة يا حليوة أن أمى هطعيط، لذلك هضطر اعيط معاها مجاملة والا تمسك صدرها وتقوللى قلبي قلبي على طريق ماري منيب،وهضطر اطنش قعدة الامبراطورية، او التكعيبة، ولا حتى قهوة حماد، مخبأى السري حاليا، أما اخونا اللى هو ابويا هيعمل فيها كازانوفا، وهيقفل الموبيل، وهيفتحه بس، عشان يكلمنى ازودله الرصيد بما انه مبيفهمش فى الية الشحن، بيعرف بس، يبعتلى اس ام اس "كلمنى شكرا" يعنى غرمان يا قلبي ف الحالتين، سوا مع بعض او اتطلقوا، طبعا انا حاولت اعزل من البيت واستقل، يعني اسكن لوحدى، هما وافقوا انى اغير الشقة، لكن طبعا وهما معايا يعنى قاعدين على قلبي لطالون، مع الاعتذار للحرامي الكبير قوى قوى، والعنب العنب.

مراقب مصري يقول...

يا ست حفصة

إنتي عارفة أنا مش قاصد أهزقك
(حلوة أهزقك بالقاف دي)
ولا حاجة
بس هي القافية
(برضه بالقاف)
هي اللي حكمت
أما بالنسبة لديكتاتوريتي في إرغام زبائن المدونة على سماع الأغنية الملحمية الرائعة لا باظت ولا خربت... طبعا معروف أن مواليد التور دكتاتورات
أنا مواليد ستة خمسة والراجل الكبير قبليا بيومين يعني نفس الدكتاتورية وزيادة حبتين

my advice to u
press End button on the right side of ur keybord
will take u to the bottom of my blog
where u will find the player that is causing u all this headache
press stop
وادعي لي

ههههههههههههههههه

مراقب مصري يقول...

العزيزة راندا

يسعدني أن أكون بديلا طبيعيا صحيا عن حبوب النوم المزعجة المدمرة للجهاز العصبي
يعني لا صلح نافع مع أهلك ولا طلاق؟
سيبك منهم وروحي اشتغلي رقاصة
هههههههههههه

غير معرف يقول...

ومين قالك انى محاولتش اخدت بالمثل اللي بيقول "العرجة تغزل برجل حمار" ، لكن انت عارف كل شغلانة يطلع لى فيها عفريت، لكن المرة دى اختلفنا على توزيع النقوط، فاتهمت من صاخب المخل بانى والعياذ بالله اخوان شيوعيين، شيوعيين لانى عاوزة توزيع النقوط بالعدل، واخوان لانى كنت برقص، ولامؤاخذة لابسة فانلة برقبة، وشراب اخضر باستيك من فوق، بس ما تقلقش هعمل الخميرة قريب بما انى بشتغل فى "مخبز الى" فاهمنى انت طبعا، بعدها هاخد فلوس المستثمرين وهج على اطاليا، الله يرحم ايامك يا اطاليا، vafancolo، بلاش اقول معناها لكن مش عايز شتامين، randa

مراقب مصري يقول...

راندا

تصدقي بإيه؟

إنت بجد بجد
مسخـــــــــرة
لأ أنا كدة خلاص أدمن تعليقاتك
أوعي تمشي من هنا أبدا

بقى اشتغلتي رقاصة يا ولية والعرجة ترقص برجل حمار وفي الآخر تطلعي شيوعية وإخوان... دا انتي هتقطعي يا أمي... ما تعرفيش إن المدونة دي ملبشة؟ عملاء للإخوان وعملاء سوفييت شيوعيين وعملاء لأمن لا مؤاخذة الدولة

أنا بقول ترجعي أطاليا بتاعتك دي أأمن لك
صحيح برلسكوني وحش وبتاع تحرش بس بدل ما تتقطعي هنا يا أمي

نهاره أبيض

غير معرف يقول...

Do you hаvе a spam problеm on thiѕ site; ӏ аlѕo аm
a blogger, and I was curious about your situatіon; ωе have created
ѕome nіce practiсes anԁ we are lооκing to trade technіques with
other folks, why not shoot me an е-maіl іf interеsted.


Alsο viѕit my blog poѕt: home depot garden center
Also see my webpage: home depot garden center

لكي لا ننسى دم أحمد علي مبروك