10‏/12‏/2006

فضيحة مدوية... اختراق "أمريكاني" للمدونات المصرية





أولا: الموضوع دا عشان نبقى واضحين تقدروا تقولوا عليه نكتة رزلة
أو هزارة بايخة ممكن تكون مش لطيفة
لكن بجد مش مقصود بيه الإساءة لحد


ولا هي دعوة لمقاطعة مدونات معينة كلنا بنحترمها (ومازلنا وسنظل) ونتابعها بل ونستظل بظل شعبيتها وشهرتها
(تحس إنني بتكلّم من منبر الحزب الوطني الديموطيقي هههههه)

ومش عايزين في التعليقات شتيمة ولا أباحة من حد من فضلكم
هي ملحوظة لطيفة لاحظتها وأعتقد أساسا إنها صدفة غير مخطط لها إطلاقا
بس شيطاني التدويني وَزِّني قلت أشارك معاكم
وعادي هزارة ونكتة وتعدي
أوكيه؟؟

خش بقى بلغة الجرايد الصفرا على الخبر المتين

انفراد!!ـ

شركة أمريكانا
لسلاسل مطاعم الوجبات الجاهزة
تخترق المدونات المصرية
بحملة إعلانات مستترة على صفحات أكبر المدونات المصرية


في يوم واحد على أكبر مدونتين مصريتين على الإنترنت
إعلانات للشركة المشبوهة وثيقة الصلة بإسرائيل
على صفحات مدونة "منال وعلاء" وجريدة "الوعي المصري الإلكترونية

الإعلانات لم تأت في الأماكن المخصصة للإعلانات بالمدونتين
بل أتت في قلب موضوعات يقرؤها قراء المدونتين

وائل عباس في جريدة الوعي المصري يحشر إعلانا عن دجاج كنتاكي وسط حملة لهجومه على الممارسات الفاسدة لجهاز الشرطة الفاسد ويقول إذا فيه قتيل بيتقتل واتصلت بالشرطة فلن يردوا عليك ... اتصل بكنتاكي ديليفري أفيد لك
(هههههههه بصراحة عنده حق)
وراح يا مؤمن (ودا بالمرة إعلان عن مؤمن) لاطع صورة لكنتاكي ديليفري بس نسي يحط الرقم الساخن بتاعهم
(19900 لمن يبحث عنه )
ههههههههههه
كم تقاضى وائل عباس أجرا عن هذا الإعلان لتلك الشركة الصهيونية التي تدعم إسرائيل؟
(مش بقول لكوا عناوين جرايد صفرا هههههههه)
ها هي صورة الإعلان ونصه من واقع ما نشر بمدونة الوعي المصري التي كنا نحترمها
(وطبعا هنفضل نحترمها غصبن عن عين التخين)
(سوري يا وائل هو البوست دا تهييسة وزي ما تقول كدة أفية وحكمت)


أما أبونا الروحي في التدوين وعم المدونين المصريين كلهم
(برضه غصبن عن عين التخين)
المدون الأشهر في عالم المدونين العرب علاء سيف صاحب مدونة منال وعلاء فقد أغراه المال "الأمريكاني" (نسبة إلى "أمريكانا" وليس إلى أمريكا
فدون بوستا كاملا أو تدوينة بأكملها للإعلان عن خدمات ماكدونالدز التي يقدمها لزبائنه
وخصوصا خدمة الواي فاي التي تقدم خدمة الإنترنت المجاني السريع لزبائن المحل في معظم فروعه ... ـ
طبعا الإعلان ده خاص بحاملي اللابتوبات بس
يا خسارة عليكي يا مصر
في يوم واحد خسرتي إثنين من أعظم مدونيكي
وياريتك فقدتيهم في حاجة عدلة
لكن في حملة إعلانية جشعة أعمت أعينهما عن الصواب وضللتهما عن طريق الحق
وها هو إعلان المدون الكبير (كلما كبر المدون كلما كبرت سقطاته) ويا خسارة وواأسفاه... ها هو الإعلان المشبوه وقد صورته لكم من مدونة منال وعلاء قبل ما يحذفوه ويرفعوه حفضا لماء وجههم

(سوري يا عم علاء.... هي البوست دا طلبت معايا تهييس)




فعلا صدق المطرب الكبير ريكو عندما غنى أغنيته الملحمية الرائعة

راحت عليكي يا دنيا

وراح زمن الشهادات

....

....

هزيها بالراحة بالراحة

خلي الناس مرتاحة

هزيها بشويش بشويش

خلي الشعب يعيش


أمريكانا ذات التوجهات الصهيونية هل تمول وائل عباس في مؤامرة كونية لتزييف الوعي المصري؟


ملحوظة هامة: لكل غبي بيقرا ومحتاج الكاتالوج... الموضوع من تاني هزار وما هواش جد... لو كان وائل حاطط إعلان عن كنتاكي على الأقل كان حط نمرة التليفون... وأما علاء فالراجل بالفعل مهتم بحكم عمله بكل ما يخص حرية التعبير والاستخدام في شبكة الإنترنت وكل ما يتعلق بتقديم الخدمات الإلكترونية مجانا على الشبكة الدولية ومن ثم الراجل بيكتب بجد عن موضوع يهمه ويهم الآلاف ألا وهو توفير خدمة الواي فاي في مكدونالدز زالعديد من المطاعم والكوفي شوبس الأخرى.... سلام بقى أسيبكم واخد لاب توبِّي وجري على مكدونالدز وونا هناك هارن على كنتاكي ديليفري ييجيبوا لي الأوردر على هناك

هناك 96 تعليقًا:

مصرى متغرب يقول...

اية يعنى هى جت على المدونات ومش هاتخترقها امريكانا ياسيدى المهم احلى نكتة ان بيقولك منتجات امريكانا من افخر انواع القمح الامريكى منتجات مصرية 100 /100 ازاى مش عارف
انا لو من وائل عباس ارفع قضية رد اعتبار لان انت بتتهمة بالخيانة واهو هزار بهزار

غير معرف يقول...

كلها يومين و الإخوان حيعملوا ملصقات في مترو الأنفاق لمقاطعة المدونات الأمريكاناوية

غير معرف يقول...

ايه يا حاج جرجس الكلام ده كله ... اديك هتاخد قضية على الصبح اهو .. و ايه الافتراءات ده كله ... اديك وصلت الموضوع للاخوان كمان ... مش قلتلك يا حاج بلاش كده من الاول .. استلم بقى ده اخرة الحرية .. العيش و الحلاوة هيجولك مش عايزاك تقلق ... و انا هاتبع تحذيراتك المسبقة و مش هاكون غبية ;)

بس هو انت مش كده يا حاج جرجس عملت كمان اعلان للاتنين مع بعض .. هو حرام عليهم و حلال عليك ;)

غير معرف يقول...

يا امريكا لمي جيوشك. . .
دي مؤامرة يا حاج جرجس مش ع الإسلام وبس لأ لأ . .المرة دي علي مدوناتنا الأبية التي تملؤنا عزة وكرامة. . .

يا شماتة أبلة ظاظا فينا . . .

Alaa يقول...

النكتة كانت هتبقى ألطف بكثير لو شلت التحذيرات و الشروحات و الاعتذارات و نشوف فيه ناس هتصدق ولا لأ.

غير معرف يقول...

ايه يا عم جرجس ؟
فيها ايه لو كانوا قبضوا يعني قرشين حلوين؟
حتى ينفعوا نقوم بيهم محاميين عشان لو حد اتمسك و شكلنا حنحتاج محامي قريب عشانك يا سيدي
ههههههههههههههههههه

طارق
تعليقك موتني
فعلا كلها كام يوم و الاخوان يطلعولنا بحملة مقاطعة و تكفير

Ahmed Shokeir يقول...

لأ فيه فعلا مدونات باه فيها اعلانات تجارية بصحيح

مدونة جار القمر
فيها اعلان لطيران العربية

ودي خطوة جديدة واعتقد ان ده تم بعد اختيارها كأفضل مدونة عربية

tota يقول...

حج جرجس
تصدق انت مش هتجيبها لبر ابدا
وشكلك مش هترتاح الا بعد عملية انتحارية لتفجير مدونتك

قاعد بتبص على كل صغيرة وكبيرة فى كل مدونة وتطلع الاعلانات اللى مش باينة من اصله
ولنفرض يا اخى انهم عملاء
انت مضايق علشان انت مش لاقى ممول لا مصرى ولا امريكى

انت من ساعة ما طلعت فى التلفزيون وانت نفسيتك مش حلوة وبتهاجم فى المدونين والمدونات وده ليه ادلة هناقشها فى الامبراطورية

تحياتى

غير معرف يقول...

:) معقوله .. انا هاصدق :)

Reformer1976 يقول...

مصري متغرب

أمريكانا اخترقت كل حاجة
البلد ضاعت خلاص
يا عم دا حتى القطن المصري طلع أمريكاني مية في المية
أنا عملت حسابي في الناحية القانونية
حطيت تحذيرات تبين إن الموضوع تهريج
بس طبعا واضح لأي عيل أهطل معدي في الشارع إن الموضوع جد جدا طبعا والعيال قابضة يعني قابضة

Reformer1976 يقول...

tarek باشا

سمعت أن أول ملصق نزل بالفعل
ومكتوب فيه لا لعلاء ووائل
قاطعوا المنتجات التدوينية
قاطعوا المدونات الممولة بدماء الفلسطينيين في الشيشان
وبالمرة قاطعوا لبن نيدو
ولا شرقية ولا غربية
منوفية منوفية

غير معرف يقول...

يا حاج جرجس انت خلصت من المدونين المرتزقة و ميلت على المنوفيين ... ركز في كل حرب على حدى لو سمحت .. بلاش تلخبط القراء معاااااك ... واحدة واحدة

Reformer1976 يقول...

العزيزة ريكا

فيه فرق كبير
أنا عملت دعاية للاتنين فعلا
(بس بالمناسبة تقصدي مين بالاتنين؟)
(ماكدونالد وكنتاكي؟ ولا علاء ووائل)
ههههههههههه
المهم حتى لو انا بالبوست دا بعمل دعاية للاتنين فعلا
المهم أنها من غير فلوس
هما اتمسكوا والدولارات في إيديهم
قابضين لشوشتهم يعني

Reformer1976 يقول...

العزيزة sismima

المؤامرة أحاطت بنا من كل جانب حتى اختنقنا من رائحة العفن
لقد وقعنا في مستنقع قدري من المؤامرات النتنة التي لوثت الجميع بلا استثناء
ولكن حزني شديد جدا على هذين المدونين تحديدا
وا خسارتاه
أتفق معكي تماما يا عزيزتي دي مش بس مؤامرة كونية على الإسلام
لكن على كل القيم والمبادئ الأصيلة
إنهم يريدون هز ثوابتنا
واختراق تابوهاتنا المقدسة
لعنة الله على كل متآمر (واهبل)ـ

Reformer1976 يقول...

alaa

وكمان جاي برجليك إلى هنا أيها المتآمر الرعديد
التحيرات دي يا حلو فقط عشان المساءلة القانونية لكن الموضوع جد
وجد جدا كمان
بقى يا راجل بتختمونا على قفانا في وسط تدويناتكم وتقبضوا التمن
إخص عليكوا
بتسيئوا لسمعة مصر
مصر الطاهرة الشريفة متبرية منكم ليوم الدين
إنت مش ممكن تكون شربت من مية النيل
وأكيد كنت بترضع بيرة ساقع من غير ما يدفوها قبل ما تتحط في البيبرونة
إخص
لقد سقطت كل رموزنا الشمخاء في هذا اليوم الأسود
سقطت ثوابتنا جميعا واخترقت تابوهاتنا
فغشوا حوائط مصر بالسواد ولتتلفع الفتيات بلون المرارة
(هي المرارة بالمناسبة لونها إيه؟)

Reformer1976 يقول...

حفصوتشا

إنتي واخدة الموضوع هزار ودا مش صح كدة
الموضوع قضية قومية
وأمن تدويننا القومي بيخترق لحساب حفنة من المرتزقة
أترضي بأن تخترق مدوناتنا على أيدي هؤلاء العملاء القابضين؟؟
أما نحن فقابضين أيضا
ولكن ابضين على الجمر
وبعضنا قابض على الهوا بإديه ولا شيء إلا الهوا
وهما واكلينها والعة
دا ما يصحش أبدا
عيب
عيب
عيب

غير معرف يقول...

و احنا ايش عرفنا يا حاج جرجس انك مش قابض ... يعني هو اللي قابض بيعلق يافطة بيقول انا قابض...
ممكن تكون قابض للاعلان عن ماك و كنتاكي .. و ممكن تكون قابض عشان تزيد من شهرة المدونين .. و كله من تحت التربيزة و لا من شاف و لا من دري.

و انا اعتقد انك انت اللي عميل مش الناس التانية ...

Reformer1976 يقول...

أحمد شقير باشا

يا سيدي على عيني وراسي الإعلانات
بالعكس الإعلانات معنها أن المدونات بقى ليها مصداقية أكبر والشركات بتجري وراها عشان تعمل إعلاناتها
لكن في قلب الموضوع؟؟؟؟؟
لأ وأل لأ
دا كدة بيختمونا على قفانا
والعيال دي قابضة وقابضة جامد وبالدولار طبعا
والموضوع أكبر من إعلان
الموضوع اختراق للوبي الأنجلو صهيوني للمنطقة في إطار ترسيخ مفهوم الشرق الأوسط الجديد وتوطئة لفرض الهيمنة الأمريكية حتى على الفضاء الافتراضي

معا نتكاتف
معا نقاطع
مقاطع إيه مش عارف
بس هو دي اللي فالحين فيه
فداك أمي واختي وخالتي أيها الفضاء الافتراضي المخترق

Reformer1976 يقول...

توتا العزيزة

تجوع اسمها إيه ولا تأكل بمش عارف إيه
هيهيهيهييييييييه
لا للتمويل الأجنبي
ولا للتمويل المحلي
نحن فقراء
سنعيش فقراء ونموت فقراء
ولكن الكرام لا تباع ولا تشترى
(سيبك م الحمار بتاع ليبيا اللي بيشتري "الكرامة" ويدفع لحمدين صباحي)
شعاري هو شعار الاقتصادي العظيم أحمد بهجت
ليه تدفع أكتر لما ممكن تدفع أقل

هههههههههههههههه
نهاره قشطة

غير معرف يقول...

هو يا ترا كنتاكى وماك دلوقتى بيقدموا مخ سبايسى
طيب لو بيقدموا
ابقى ادى للراجل بتاع البوست اللى فات ساندوتش
عارف يا جرجس لما تدخل العمبوكه هبعتلك سندوتشين من كنتاكى زينجر سوبريم بس حاسب على عربيتك لتتسرق

غير معرف يقول...

صحيح نسيت اقلك المفروض العنوان يبقى فضيحة مدونية مش مدوية
يعني

غير معرف يقول...

يا حفصة الحاج جرجس قاصد كلمة ( مدوية ) عشان يخليها قضية شاملة مش خاصة بالمدونين فقط .. مش شايفاه مدخله كنودليزا و شرق اوسط جديد و هيمنة الحاجة أمريكا ( اللي هو شكله عميل عندها اساسا ) .. هو حاطط الكمة ده عامدا متعمدا ..

و كمان يا حاج جرجس مش ممكن انت قلبت التعليقات صفحة اعلانات .. يعني في الاول في المدونة ماك و كنتاكي ( و هعديها ماك و كنتاكي بس ;) ) و دلوقتي جريدة الكرامة و منتجات جولدي .. انت ايه حكايتك بالضبط .. مش بقولك شكلك انت اللي بتقبض ( مع تشديد الباء ) الناس ده كلها مش راضي تصدقني .

غير معرف يقول...

يا عم الحج البوست فيه اعتذارات وتوضيحات أكتر من الكلام نفسه! ودة ان دل فإنما يدل علي ان خبراتك السابقة مع ردود أفعال المدونين زي الفل والحمد لله

غير معرف يقول...

اخويا جرجس
عاوز تمشيها هزار ؟ طيب .. أنا هامشيهالك استمناء .. و ده رد فعل الأجنحه السياسيه الأشهر فى مصر .. طبعا باستخدام أسلوب التقمص للرد

الأول : من الفارس التقدمى التحررى اليسارى
أنها المؤامره الأمبرياليه الرجعيه على مصائر الشعوب المناضله .. و بطون رفاقنا الأحرار فى كل مكان .. من ليبيا العظمى ألى فنزويلا الأبيه مرورا بفلسطين و العراق ..أنها مؤامره اشترك فيها الغرب الرأسمالى اللعين ليصرف بها الشعوب عن قضيتهم الأشتراكيه التعاونيه التقدميه , و نعتبر هذه الأعلانات أعلان حرب على أحلام الشعوب و مستقبلها , و تأجيل للحتميه التاريخيه للتحرر الماركسى ..و عليه قررنا توجيه نضالنا التقدمى لمواجهة هذه الكيانات الغربيه القبيحه و عملائها .. و كما نقاوم فى فلسطين بعدم اعترافنا بالكيان الصهيونى ..ندعو كل رفاقنا لتوسيع نضالهم و عدم الأعتراف بكنتاكى و مكدونالدز ولا بعلاء ولا وائل عباس ولا بالحاج جرجس نفسه
________
الثانى : من فارس القاعده و الجهاد الشرعى المقدس
لم يرد فى السلف الصالح ذكر كنتاكى ولا ماكدونالدز ولا المدونين و لا الحاج جرجس نفسه .. و بالتالى فكل هذا بدع .. و كل بدعه ضلاله و كل ضلاله فى النار .. ايضا و رغم أن الدجاج أكله معروفه لدى السلف الصالح .. ألا أن الخلطه التى يضيفها المدعو كنتاكى تسمى بالخلطه السحريه .. و حيث أن السحر من الكبائر فأن الأدعى أن من يأكل حاجه سحريه يبقى كافر و يستحق أقامة الحد عليه .. و ايضا كل من يعلن و يدعو لأكل هذه الكبائر يعتبر محرضا على الفسق و الفجور
و قد أجمع الأئمه على أن أماكن تقديم هذا الطعام الحرام هى أماكن لهو وفسوق حيث يختلط فيها الرجال بالنساء دون عقود زواج شرعيه تحلل التحرش و التقفيش .. و بالتالى فأن هذه الأماكن هى دور شيطانيه تضلل الأمه و تدعو للرذيله .. كما أن كلا من كنتاكى و مكدونالدز مشتركان فى مؤامره ضد الجهاد الشرعى و قد ثبت لنا ذلك حين اتصل الأمير الشيخ اسامه بن لادن بأحد أرقام هواتفهم المعلنه و رفضوا توصيل أى هوم ديليفرى لبيشاور أو قندهار .. و بالتالى افتضح أمرهم و رغبتهم فى تجويع المجاهدين المؤمنين ..
و عليه حق عليهم جميعا العقاب .. بتفجير محلاتهم أينما وجدت .. و كذلك تفجير المدونين الكفره الفاسقين المعلنين عنهم .. أما بخصوص المدعوق الحاج جرجس ..و أظهارا لسماحة الأسلام سنتوجه له بالشكر أولا حيث فضح فجور الفاسقين .. ثم نقوم بتفجيره لاحقا لأنه نصرانى كافر
__________
الثالث : الفارس الناصرى القومجى الوحدوى
أنها مؤامره لتفكيك الوحده العربيه و شق الصف العربى .. و ألا لماذا يكون الهامبورجر فى دول الخليج من اللحم الضانى الملبس .. بينما فى دول حوض النيل من فول الصويا و اللحمه البرازيلى المعفنه ؟ انها مؤامره من أذناب الأستعمار و أعوانه .. الوحده العربيه مستهدفه .. مش عاوزيننا نرفع راسنا و ناكل زى الناس
مش عيب أنى أبقى فقير و استلف عشان آكل هامبورجر و فراخ مقرمشه .. لكن العيب أنى امص دم الشعوب .. أنى استعبد الشعوب
قرار جمهورى رقم تسعميه .. تأميم شركات كنتاكى و مكدونالدز شركه مساهمه مصريه

هيهيهيهيهيهه
____________
الرابع : فارس الحزب الوطنى الديموقراطى بالقوى

انه الخروج عن النظام و الشرعيه .. و تعمد تكدير الأمن العام و تعطيل العداله و أنكار للأنجازات العظيمه فى عهد الرئيس حسنى مبارك.. و قد قال بيان وزارة الداخليه أنه لم يتم الأبلاغ عن أى حالات هامبورجر أو قرمشه فى منطقة وسط البلد .. و تهيب الوزاره بالمواطنين عدم الاستماع للأشاعات و نشر البلبله .. فلا الخلطه سحريه طازه ولا البيج ماك كبير ولا حاجه .. ده عادى جدا يعنى
كما أن الأعلان عن شركات أجنبيه هو نوع من التخابر مع الأعداء المتربصين بالوطن و أمنه و سلامته


بص بقى .. لو انت افتكرت أى أجنحه سياسيه تانيه أبقى تقمصها انت ورد
و على رأى شهروزه
نياههاهاهاها

Epitaph يقول...

هههههههههه
البيانات و الاصدارات بتاعة فارسنا الاخير مهزلة هههههه

يا حاج جرجس

انا شبراوي الكوربة بيمول مدونتي
يبقي عليا اثم و لا ادفع كفارة و خلاص؟

ههههههه

غير معرف يقول...

يا فارس يا اخير موتني من الضحك
تسمحلي اكمل ؟؟
القافية حكمت و لازم نتخيل لو كان السادات بقى هو اللي بيلقي الخطاب مع العلم اني بموت في دباديب السادات و مقبلش حاجة عليه

"
بلغني وجود قلة بتحاول تفرق جموع الشعب المصري العظيم
و وصل الامر ا ا ا الى انه في جزء منهم بياخد فلوس عشان ياجج من الموضوع ده
و طبعا انا اتحريت عنهم و ثبت لي فيما لا يدع مجال للشك انهم مندسين و خونة تابعين للاتحاد السوفيتي
و حرصا منا على سلامة الوطن و المواطن
قررررنا
اغلاق جميع محلات كنتاكي ومكادونالدز
و ده عشان نقلل من حجم تواجد و تواصل المندسين
القرار خلص لكن انا بوضحه
و الى ان يتم التثبت في عمق التهمة
يجب ان يوضعوا قيد التحقيق
و الشرذمات اللي من شائنها تفكيك الوحدة الوطنية مش حتلاقي غير رد عنيف في مواجهة هذة الترهلات
بس القرار خلص

ربنا لا تواخذنا ان نسينا او اخطائنا
ربنا و لا تحمل علينااصرا كما حملته على الذين من قبلنا ربنا و لا تحملنا ما لا طاقة لنا به
و اعفو عنا و اغفر لنا و ارحمنا
انت مولانا فانصرنا على القوم الكافرين

3rby يقول...

شوف يا اخي اسرائيل ديه دولة بنت م..... في كل حاجة
حتي في البوست اتعميت علي ما قريتها


انا عايز اسالك سؤال يا جرجس انت اتعلمت اتش تي ام ال وعامل حملة للتجديدات في المدونة

الله يرحم ايام ماللينكات كانت بره البوكس وايام ما كنت حاطت 3 ساعات
مالها ساعة الكومبيوتر انا عايز افهم
لا بس بجد مبروك
وكمان ماشاء الله اللهم لا حسد علي الالف زائر كل يوم

غير معرف يقول...

حبيبة قلبى الصغننه أبيتاف
الشبراوى ورد ذكره فى كتاب الموصلى باعتباره من الثقات , بينما قال فيه الأمام البوصيرى أن طعامه يسبب الغازات .. و قد أجتمع العلماء على أن تمويل الشبراوى جائز ما لم يتوفر تمويل من سيتى بنك
و الله أعلم
_________________________________

الفاضله حفصولا أم مصطفيتش
أسعدنى اتفاقك معى على عشق و تقدير شخصية الشهيد العظيم .. الراحل أنور السادات .. بس خلينى أتخيله كان هايقول أيه .. و نشوف رأى الناس
بسم الله
العيال المدونين دول ..أأأأ .. أنا قلتلهم قبل كده .. أأأ أللى عاوز يكتب يكتب بس بلاش قله أدب .. أه
قوم أأأأأ العيال دى لما لقوا أن أأأأأ الناس بيصدقوهم .. قاموا نصبوا على شركات .. و مؤسسات .. ( يأخذ نفس عميق متقطع من البايب) .. كنت باقول أيه ياهمت يابنتى ؟.؟؟ أه .. العيال نصبوا على شركات و مؤسسات .. أجنبيه .. قالولهم نعملكوا أعلانات
لحد كده كويس .. البلد دى اللى عاوز يشتغل فيها يشتغل .. و اللى عاوز يعمل أعلانات يعمل .. بس المهم .. بلاش قلة أدب
ألاقى بقى بعد كام يوم .. العيال دى بتنشر صور فاااضحه
أيوه .. واحد ناشر صورة ورك عريان فى الأعلانات
همت تقاطعه : بس ده ورك فرجه ياريس
يرد بعصبيه ..: فرخه ولا حدايه .. كانت صورة ورك ولا مش ورك ؟
ترد همت : .. بصراحه .. أيوه ورك
يقاطعها بحده : شفتى بقى ؟ أديكى قلتيها بنفسك .. صورة ورك .. و عريان و ماعليهوش ولا ريشه .. دى تبقى قلة أدب
انا قلتلهم و حذرتهم .. و فعلا .. بطلوا شويه وبعدين رجعوا تانى .. نشروا صورة نفس الورك .. بس قال أيه مغطيينه بالخلطه السحريه .. فاهمين أنهم هايضحكوا على الشعب لما يوروهم الورك المقرمش .. لأ .. لألالالالالالا .. ده كلام مايتسكتش عليه أبددددا


أيه رأيك يا حفصوتشا ؟

غير معرف يقول...

و لك تسلملي يا رب يا فارس
هي دي التعليقات و لا بلا
انت تخيلته في حوار و انا تخيلته في خطاب محلسي شعبي خطير
الف رحمة و نور عليه


شفت اصل البيحبوا السادات دايما دمهم خفيف



سلام

Reformer1976 يقول...

صديقي العزيز ياسر شمس الدين

إنتا فين يا عم من زمان؟

لاوم يعني فضيحة مدوية تحصل عشان نشوفك هنا؟
الموضوع جد جدا يا ياسر
عيب أوي وائل وعلاء يخدعوا قراءهم بالطريقة المكشوفة دي

بالنسبة للمخ
الراجل الكبير يا سيدي ما بيحبوش
والناس كلها بتسأل إيه العمبوكة دي اللي أنا هدخلها؟
أنا شخصيا قلت لهم دي أكيد كلمة أبيحة

هههههههههه

وبعدين يا بني آدم
إحنا بنتكلم في قضية قومية ضخمة تهدد الأمة والدين والدنيا وانت قالبها هزار ومسخرة؟
رأيك إيه في العيال العملا دي؟
هتخش مدوناتهم تاني؟
ولا معانا هتقاطع؟


لو معانا جهز نفسك عشان أنا خلاص البانر بتاع الحملة شبه جاهز
لا لوائل ولا لعلاء
قاطعوا المدونات المشبوهة

وصورة لوائل وعلاء لابسين قراصنة وفي إيديهم دولارات خضرا
وعلم أمريكانا في الخلفية

mano يقول...
أزال أحد مشرفي المدونة هذا التعليق.
Reformer1976 يقول...

عزيزتي حفصة

الفضيحة تجاوزت كونها مدونية
هي فضيحة مدونية مدوية دولية كونية
وما زالت توابع الموضوع تتوالى
يقال أنه أمريكا طلبت سفيرنا في واشنطن للمناقشة بسبب تعرض مصالحها للخطر بسبب هبة المدونين الشرفاء لتطهير الواقع الافتراضي من المدونين العملاء المرتزقة جيوب الأمريكان في عالم التدوين


لذلك لنصرخ سويا صرخة مدوية

يا وائل قول لعلاء
احنا بنرفض العملاء

ويا علاء قول لاخوك
التدوين مش عزبة ابوك

وائل وائل يا عباس
وعي المصري عملته مداس

Reformer1976 يقول...

ريكا العزيزة

أنا لا أقبض بفتح الباء ولا أقبض أحدا بتشديد الباء
والإعلانات التي أتت في تعليقاتي وفي البوست لم أقبض فيها مليما واحدا ولم أقبض أحدا

نحن نجوع ولا نمد أيدينا
لا للعمالة ولا للخيانة
لا للبراجماتية ولا لإرهاصات الغزو الأمريكاني وكل محاولات تأسيس الشرق الأوسط الجديد والهيمنة اليمينية الأمريكانية

وائل معروف عنه ميوله اليمينية وحبه وعشقه للمرحوم السادات العميل الأمريكي والمطبع مع إسرائيل

إذن هو من المطبعين ومن كتائب كوبنهاجن وشقيق علي سالم ويقال إنه بيتفرج على قناة الهورَّا اللي اسمها الحرة يعني بتاع سي آي أيه رسمي

لنرفض الاختراق والمخترقين بفتح الراء وكسرها
لا لأمريكا
لا لإسرائيل
لا للسادات عميل أمريكا بتاع التطبيع
لا لأمريكانا
لا لمكدونالد ولا لكنتاكي
لا لعلاء ومنال
لا لوائل عباس والوعي المصري

قاطعوا لبن ميدو

Reformer1976 يقول...

أخي الحبيب فارس

خد عندك آخر الأخبار

الموضوع بتاع الاختراق الأمريكي الصهيوني للمدونات وصل البابا شنودة الثالث واتكلم عنه في وعظة الأربعاء الأسبوعية

تنحنح قداسته وقال
أحبائــــي
(بصوت واهن)

نحن نجتمع في هذه الليلةالمباركةلنقول مبارك شعبي مصر

(سكوت ونحنحة وإنصات شغوف من الشعب)

نعم مباركٌ شعبي مصر
هذه البلد باركها الرب
ولكن هناك أناس...
يبدو أن ضمائرهم ماتت...

الموت هنا يا أحبائي هو موت مجازي
فهؤلاء الذين باعوا ضمائرهم أخطأوا في حق أوطانهم أولا
وفي حق أنفسهم ثانيا

وسمعت أن وائل عباس قد ارتكب خطية
والخطية أحبائي هي أمر مهين لكرامة الإنسان الذي خلقه الله على صورته ومثاله

وائل خان خيانة في الحرام مثل عخان ابن كرمي...
وأيضا علاء باع ضميره وباع حياته الأبدية من أجل حفنة مال
يقول عنها الكتاب المقدس
أن خطية محبة المال هي أصل كل الشرور

وإذ ارتكبا هذان هذه الخطية الشريرة
وأحبا المال حتى عميت أعينهما عن البصر
فقد قررنا قرارا مجمعيا بحرمتنهما من الكنيسة ومن الأسرار الكنسية
(يهتف صوت من القاعة بس دول مسلمين يا سيدنا)
ولأنهم مسلمين فإنني أصر جدا على قراري ده لكي أثبت للجميع إيماننا بالوحدة الوطنية وبأننا نحب إخوتنا المسلمين ونعاملهم كما نعامل أبناءنا بالظبط
ومن جديد أؤكد أنه لن يدخل قبطي إلى مدينة القدس إلا مع إخواننا المسلمين (لأ مش قصدي الإخوان المسلمين)
(تضج القاعة بالضحك على مزحة قداسة البابا)
بركة الرب معكم إلى الأبد آمين
=====

ويقال أن أقباط المهجر أقاموا مظاهرات ضد البابا "الوطني" بسبب اضطهاده للمدونين عملاء أمريكا وحرمانهم من الأسرار الكنسية دون تقديمهم لمحاكمة كنسية عادلة

Reformer1976 يقول...

العزيز المتغرَّب عمر

آه يا ابني لو شفت اللي انا شفته في عالم التدوين
أنا بس كان كل خوفي وائل وعلاء ييجوا يأبحوا وعلى رأي وائل ييجي يديني من المنقي خيار
وبعدين الجريمة ثابتة عليهم
والدولارات اتمسكت في جيوبهم
ومن مصادر موثوق فيها
العيال دي قابضة يا باشا

Reformer1976 يقول...

إبيتاف العزيزة

سيبك من فتاوي الأخ فارس المسخرة دي
لا يفتى والحاج جرجس في المدينة
قيل في شبراوي الكوربة عدة آراء وليس رأيين فقط كما قال الزنديق فارس
وبغض النظر عن فحوى هذه الآراء إلا أن جمهور الفقهاء أجمعوا
وخدي بالك من كلمة أجمعوا على أن أي ما يؤكل في منطقة الكوربة وروكسي وكل ما له أي علاقة مباشرة بمنطقة العروبة (حيث يسكن الحاكم الجائر)
فهو حرام شرعا وهو من الثوابت التي لا يجوز هزها بالراحة بالراحة أو بشويش بشويش ... لا يجوووووووز
لا تهزوا الثوابت
لئلا تقعوا في المحظوووووووووور

Reformer1976 يقول...

السيدة الفاضلة حفصوتشا

طبعا أنتي والسيد فارس واخدين الموضوع هزار بما أنكم ساداتيين زي صاحبكم العميل وائل عباس

السادات اللي بتقولوا فيه شعر دا إنتي والأستاذ فارس البورجوازي المتعفن دا هو اللي سلمنا للأمريكان وقبض التمن برضه (عادي زي وائل وعلاء) وهو اللي سلمنا للإخوان وهو اللي سلمنا للصهاينة وعمل تمثيلية خطاب الكنيست
عشان يبيعنا للمؤامرة الأنجلو صهيونية
لا للسادات ولا وائل ولا لعلاء ولا لحفصة ولا لفارس

سحقا للخونة وتبا للعملاء

غير معرف يقول...

لا يا حاج جرجس
هنا حقلك وقف
اياك و المساس باي حد تابع للسادات
لا احنا امريكان و لا احنا عمل
يا جدع احنا اللي رجعنا الارض
ايه مش عاجبك؟
ما داهيى لتكون من بتوع الحقبة الزمنية السودا اياها؟؟
و فيها ايه لما وائل يعمل حملة اعلانية لكنتاكي؟؟؟
قلت لك مش مشكلة اهو قرشين حلوين ينفعوا وقت زنقة و بعدين مغيروش في منهجه ابدا
حتى العدد الاخير ولا قنابل النابالم

لا يا حاج

لا مساس بالسادات و اعوانه
اللي هما احنا يعني
معايا يا فارس و لا انا لوحدي هنا يا جدعان؟؟؟

Reformer1976 يقول...

عربي

إيه يا واد دقة الملاحظة دي؟
آه موضوع الهتمل دا طلع حكاية
إختراع
وتحس إن المدونة بقت في إيدك زي الملبن

المهم
رأيك إيه في فضيحة وائل وعلاء؟؟؟؟
هتقاطع معانا؟؟؟؟

Epitaph يقول...

يا صباح الفل

باقولكوا ايه
لا تمويل من امريكانا و لا تمويل من الشبراوي


البلدي يوكل برضه
احب انا الاكل البيتي

وعن اذنكوا بقي عشان الغدا

هههههه

غير معرف يقول...

ايه في ايه
يعني عشان واشل خد الموضوع بشفافية وحب يخلط بيه النقد الساخر يقى عميل ومرتشي ومش عارف ايه
ده الراجل لسا حاصل على اكتر من اربعة وسبعين بالمية من الاصوات في مسابقة افضل موقع ضد الفساد

طارق انت موتني من الضحك
صدقوني لو كل واحد بيحب بلده زي وائل لما بقي فساد

وشكرا
محمد العرب

Reformer1976 يقول...

حفصوتشا تاني


إيه حكاية الأرض التي رجعتوها لنا؟؟
أي أرض التي عادت ومازال ذلك الكيان الغاصب جاثما على صدر فلسطيم الحبيبة
أي أرض التي عادت والجولان محتلة والقدس مغتصبة
أي أرض التي عادت وفلسطين ضاعت بسبب السادات عميل أمريكا والغرب الحقير
(الغرب هو اللي حقير)
لقد أضاع السادات ببراجماتيته المفرطة آخر أمل لنا نحن العرب في إلقاء إسرائيل بنت الدزمة في البحر
سلمت يدك يا إسلامبولي
اللعنة على كل مطبع
وليحيا بتوع الحنجوري
لا للتطيع ونعم للحنجرة
نعم لدعاة الحرب
وليسقط عملاء السلام
ليسقط الجبناء الخونة

Reformer1976 يقول...

إبيتاف

بالهنا والشفا
بلدي أو بيتي لمهم حلال مش من أكل الغرب الكافر

Reformer1976 يقول...

أستاذ محمد العرب

لا شك ولا جدل حول أن الوعي المصري موقع مهم جدا ومفيد جدا
ولكن
الإعلان واضح جدا
ولماذا لم يبرئ وائل ساحته؟
لماذا لم يرد؟
لأنها لابساه لابساه
ولأنه عارف أن الفلوس لا توال في جيبه
(جنب الرصاصة في نفس الظرف)
لقد قبض وائل كما قبض علاء
وختمونا جميعا على قفانا
أنا كنت ممن صوتوا لوائل في الاستفتاء
ولكن لا تخرج بنا عن الموضوع

ما علاقة كنتاكي بفساد الشرطة؟؟؟؟
وكيف يمكن أن تكون مصادفة أن ينشر وائل إعلان كنتاكي في نفس يوم نشر علاء لإعلان مكدونالد؟
الشركة واحدة والموضوع طبعا مش صدفة

إحنا مش نايمين على وداننا ووائل وعلاء من النهاردة لازم يعرفوا إن احنا صاحيين لهم
ومش كل المدونين اللي يتاكل لحمه
نهاره أبيض

المواطن المصري العبيط يقول...

شفت يا عم جرجس انت عملت فيا ايه ؟ بعد تعليقك اللي سبته عندي مشكورا وجدت هذين التعليقين عندي، واحد من مجهول والثاني من واحد مسمي نفسه مسلم ثائر على الكفر والكافرين

ناس اتقوا الله بقى، هو انتوا ما وراكمشي حاجة غير اللعب بشرائع الله وفروضه على الناس

المواطن المصري اللي محدش يعرفله ملة ولا دين جاي يفتي ويحلل ويقول رأيه فيما لا يفهم. واللي مسمي نفسه الحاج جرجس ده جاي يقول يا ريت الناس تتعلم تقرا وتستوعب من كتابات الكفر والالحاد، ولم يجد غير الزنديق اللي اسمه فرج فودة علشان يبقى عبرة للفكر، والله عال قوي اللي بيحصل ده

الأول بتاع المجهول بيقول: والانقح من ده ان الحاج جرجس ده مسيحي وجاي يدي رأيه في الاسلام، أصلها ناقصة والله، وأنا شفت اللي كان مهببه عند البتاعة اللي اسمها المفروسة دي، الله يلعنه مطرح ما يروح هو والمواطن الأهبل صاحب المدونة دي ويلعن أبو كل من يمس الدين بسوء

والثاني بقى دخل يدعي علي وعلى كل الكفار زي ما بيقول وزي ما بيوصفنا جميعا: اللهم يالله يا حي يا كريم يامجيب دعوة من دعاك يا من يراني ويعلمني يا واحد احد يا من هزم الاحزاب اسألك بأني اشهد الا اله الا انت الاحد الصمد الذي لم يلد ولم يولد ولم يكن له كفوا احد اسألك باسمائك الحسنى وصفاتك العلى بأن تشل لسان واطراف من يستهزئ بديننا العظيم وبحبيبنا محمد صلى الله عليه وسلم
اللهم انخر عظمه وأوهن جسمه اللهم اجعل تدميره في تدبيره اللهم مزقه اربا اربا اللهم اسحق راسه وشل كيانه هو ومن ساعده في هذا العمل اللهم العنه وابعده من رحمتك اللهم انك قوي شديد العذاب اللهم اهلكه وعذبه في الدنيا والاخره اللهم ارنا فيه عجائب قدرتك اللهم انك على كل شي قدير وامرك بين الكاف والنون اذا قلت لشئ كن فيكون .. وصلى الله على سيدنا محمد وعلى آله وصحبه اجمعين والحمد لله رب العالمين اللهم آمين آمين آمين .. الامضاء: مسلم ثائر على الكفر والكافرين وخائف على الاسلام والمؤمنين

عربي كان عنده حق والله، ربنا يستر من العالم اللي مابتفكرشي تقرا الكلام من أساسه علشان تعلق عليه

Reformer1976 يقول...

المواطن المصري الحويط

مش عارف أقول لك آسف واعتذر عن إنني تسببت لك في أن تجد هذه القاذورات في مدونتك ولا أعزيك وأعزي نفسي أن بلدنا كلها صارت مقلبا لهذه القاذورات

مش بقول لك عمر قناوي عنده حق وبلدنا داخلة ف حارة سد

عموما احترس
سيارة الوطن راجعة إلى الخلف
حاسب العمود

mano يقول...

انت جبت الفكرة الجامدة دى ازاى؟
طبعا مش حسد و لا حاجة
البوست جميل جدا بجد
على فكرة كنتاكى دليفرى 19019 مش 19900
انت عايز تخسرهم و لا اية

Reformer1976 يقول...

العزيزة مانو

الموضوع واضح جدا ولا لبس فيه
ومصادر وثيقة الصلة بوائل وعلاء أكدت أنهم في اجتماعات متواصلة مع ممثلي شركة أمريكانا لمحاولة إزالة آثار حملة المقاطعة التي أقامها المدونون الشرفاء ضد مدونة علاء ومدونة وائل
بالإضافة لتجديد دعوة مقاطعة ماك وكنتاكي

طبعا أنا قاصد أكتب رقم التليفون غلط عشان الشركة تخسر
هههههههههه

أمال إيه مفكراني عميل وقابض أنا كمان؟

غير معرف يقول...

فى ايه يا حاج جرجس...
فى ايه يا عم..
انت حاطط امريكا فى دماغك ليه يا با..
دا انا حبيبك

ولما الناس دى تيجى وتكـسر زجاج المدونه بتاعتى هتفرح انت كده..

طاب على النعمه عندا فيك لما نيجى مصر ..انا وانت ما احنا واكلين غير فى مطاعم امريكيه..

غير معرف يقول...

بصى يا حفصه
الواد جرجس ده أصلا بلوريتاريا .. يعنى مش لاقى ياكل هو وريسه .. و كل يوم أكلمه يقولى أصلى بادرس كورسات .. و يقفل بسرعه قال يعنى بيوهمنا أنه بيدى دروس لطلبة كلية الطب .. طبعا سألت عليه اكتشفت أن البيه بيدى دروس أحياء تانيه أعدادى .. و الراس بخمسين قرش فى الشهر .. و لو الواد نجح بيجيبو لجرجس شرز أو شوز من باتا .. طبعا لو الواد سقط و ده اللى غالبا بيحصل .. أهل الواد بيطلعوا دين جرجس و اللى خلفوه
فمن الآخر الواد ده حقودى و طمعان يلسن على المدونين الشرفاء عشان يتقاسم معاهم فى تمن الأعلانات .. يعنى بيعمل كده زى مفيد فوزى .. و لعلمك بقى .. قلة أدبه على قداسة البابا شنوده دى هى نوع من التماحيك فى ماكسيموس .. فاهم أنه لما يخبط فى شنوده .. ماكسيموس هايباركه بقرشين من اللى جايبهم معاه من أمريكا .. ياخى هأو .. كان غيرك اشطر
بصى يا ام مصطفى .. الواد ده سبق و اعترف عليكى قدام الباشا .. يعنى غالبا مرشد بس مش لاقى حد يشغله .. نفضيله بقى عادى .. و احنا مش لوحدنا يا حفصوتشى .. السبعين مليون مصرى بقولوا ولا يوم من أيامك ياسادات .. الله يرحمه و يبشبش الطوبه اللى تحت راسه .. عاش شجاعا و مات شهدا

غير معرف يقول...

و انت بقى يا زفت يا جرجس .. من الآخر كده .. عشوة فى الجريون و ميه نضيفه من بتاعتى بدل راس العبد اللى جابتلكم بلهارسيا دى و تخلص ؟ عشان الدوشه ووجع القلب ؟
ولا نظامك أيه بعنى ؟

غير معرف يقول...

طيب ممكن انحشر في الهيصة واهيص انا كمان؟

عبد الناصر - السادات - حسني مبارك ثلاثة من ضباط الجيش المصري تناوبوا علي حكم (زي تناوبوا علي اغتصاب كدة) هذا البلد الغلبان لمدة 54 سنة من اسود سنين هذا البلد.. وكل واحد بيسلمنا للي بعديه حسب مزاج أمه.. اصلها عزبة

مش معني ان عبد الناصر كان يتبني الفكر الاشتراكي القومي ان السادات كان راجل تحرري وزي فل.. ومش معني ان السادات كان يتبني فكرة الانفتاح علي الغرب ان عبد الناصر كان راجل وطني وزي الفل، ومش معني ان الاتنين ودوا البلد في ستين داهية ان حسني مبارك هوة اللي انقذها

الديكتاتورية هية الديكتاتورية يا بشاوات.. والحكم العسكري هوة الحكم العسكري.. واللي بيحب ناصر او السادات او مبارك الأب او الابن زي اللي حب ولا طالشي لأنهم مش فارقة معاهم أساسا تحبوهم ولا تكرهوهم هما كابسين علي أنفاس اللي خلفونا سواء شئنا أم أبينا.. حدش كان خد رأينا في حاجة؟ يعني احنا عاملين زي اللي عمالين بينضربوا في كل حتة ومن كل اتجاه وفي نفس الوقت بنتخانق الضرب علي قفا احلي ولا البوكس في المناخير؟

يوم ما نكون شعب حر ياخذ قراره بنفسه ويعمل حاكمه لرأيه اعتبار ساعتها نبقي نختار

!سحقا للديكتاتورية

سلامو عليكو

reader يقول...

الله يسامحك يا عم جرجس ...جرتنى لمستنقع الخيانة ...عامللى مدونة عن القلب و المخ و الساندوتشات اللى بتتخطف أقول معلهش يمكن عاوز يحبش التدوينة أتاريك طلعت امبريالى ...مش عيب تجر أخوك الصغير علشان يبيع و طنه و تقول احنا أقوى جهاز ساندوتشات ( مخابرات على رأى جميل راتب ) فى العالم ويا ريتها من بتاعة رأفت الهجان ...دى طلعت بالطحينة ..... ....الحمد لله كبدة الفيل معروف انها 100% وطنية لذلك أقبل عليها الجميع و قاطعوا المنتجات الأمريكية و كله بياكل الطعمية اللى الزيت بتاعها اتغيلر مرة واحدة بمناسبة الألفية التالته –بينى و بينك هو لو رحت مكدونالدز و قلت لهم اننى من طرف علاء حايوكلونى ببلاش ....أكل طبعا مش علقة ؟؟؟

Reformer1976 يقول...

العزيز الرأفتاني المهاجر المصري

أمريكا هي الشيطان الأكبر
وطبعا وائل وعلاء هما الشيطان الأصغر
اقرأ بروتوكولات حكماء صهيون لتفهم حجم المؤامرة الأميركية الصهيونية للهيمنة على العالم
يا بني سيبك منهم وارجع
ولا انت عاجبك مزز أمريكا يا فلاتي يا بتاع النسوان؟
ودا على فكرة الكلام من بق أبوك الحاج بذات نفسه يعني مش يافتري عليك ولا حاجة

هتقاطع معانا المدونات المشبوهة ولا لأ؟

Reformer1976 يقول...

الأخ البورجوازي فارس عصره وأوانه

بالنسبة لمكسيموس
أقول لك لا
لا وألف لا
لا للعمالة بكافة أشكالها
ولا لعملاء الإمبريالية
ولا للغرب الكافر والشرق النافر
لا شرقية ولا غربية
مهلبية مهلبية

ونحن كأقباط مصر الوطنيين لا نقبل سوى بالبابا المحبوب شنودة الثالث بابا لنا جميعا

وإما شنودة يا بلاش
واحد غيره ما يقهرناش
===============

بالنسبة للـ 70 مليون اللي بيتحسروا على السادات
عمر قناوي بيؤكد أن نفس السبعين مليون دول هيتنيلوا بكرة يتحسروا على أيام مبارك
تخيل!!!!!!ـ
أصل احنا شعب عشري وابن حلال
وانت عارف العشرة ما تهونش إلا على ابن الحرام

Reformer1976 يقول...

العزيز عمر

جبت المفيد بجد
قول والنبي للإخوة الناصريين يتنيلوا بقى
وللإخوة الساداتيين يلموا تعابينهم
بتوع اليسار بيقبضوا م القذافي
وبتوع اليمين بيقبضو من "أمريكانا"ـ
يعني كله بايظ
وكله مرتشي
يا سلام على الحياة بقى لونها شفتشي
واحنا لا صوتنا اتنبح
ولا ف مالطة بندن

Reformer1976 يقول...

عزيزي ريدر

كدة إنت فهمت التيتة
روح مكدونالد يا حبيبي وقول لهم أنا بتاع علاء ومنال
واغمز لهم بعينك الشمال
بس
هيدخلوك على جوة ويعشوك
من المنقي خيار يا باشا على رأي وائل عباس

بقول لك
أول ما شفت تعليق منك قلت بس دا أكيد هيشتمني عشان اتريقت على البابا
وبعدين لما ما لقيتش الشتيمة قلت الحمد لله ما خدش باله

ههههههههههههههه

ذو النون المصري يقول...

انا ارغب في اعطاءك نصيحه لوجه الله
لازم و لابد كل يوم الصبح و قبل متنام تقرا المعوزتين و قل هو الله احد
و تبحث عن كتاب للوقايه من المس السحر و هذه الكتب متوافره بشدهو الحمد لله يعني مش هدوخك ولا حاجه
ولازم و لابد تبحث عن نفس الكتب في الكنيسهلازم تقراها في الدين الاسلامي و المسيحي علشان المفعول يكون اكبر
فاهمني يا حج؟
ليه ؟
لان سحر و مس الدولار يقتضي ذلك
ان فشلت في العثور علي هذه الكتب يبقي الحل تروح تجدد الصداقه مع عبد الله مفتاح و هو هيدلك علي الكتب التي تحتاجها
بالمناسبه مش مس الدولار و سحره محتاج رقيه شرعيه برضه؟

غير معرف يقول...

مش هعلق غير ألف تحية لعمال غزل المحلة، روح يا واد يا دكتور، شوف الصور عند عمر، والتفاصيل وبيان عنهم على اللينك داhttp://www.hrinfo.net/egypt/afc/2006/pr1211.shtml
دلوقتى صدقت امى لما كانت بتقول "كل ما يكبروا بيخيبوا" مش عارفة الحقيقة هى كانت تقصد، لكن الله يخليكي يا اما، فنجانك ميخيبش، سلام بقي اصل عندى جلسة زار و قراية فنجان، اشتاتان اشتوت، ويجعل مدونتكم عامرة،
randa

ذو النون المصري يقول...

انا معاكي يا حفصوتشا ام مصطفي في موقفك من السادات
و ضد جرجس للمره الاولي منذ تعرفت عليه في التدوين
صحيح كله الا السادات
اي فساد اصاب البلاد في السنوات الاخيره لا يجب نسبته الي السادات
الراجل مات من ربع قرن ماله و مال اللي بيحصل الان
هو كان له نهج مخالف للنهج الشعبي في هذا الوقت
و الله يلعن الاسلامبولي و يلعن كل من شاركه في هذه الجريمه

ذو النون المصري يقول...

ياريت و النبي يا حفصوتشا تكتبي اي تعليق علي البوست الاخير بتاعي
لسه كاتبه انهارده
و ردي عليا هنا لاني مش عارف ان كانت الرقابه كده مرفوعه و للا لا؟

Reformer1976 يقول...

ذو النون يا مصري

موتتني من الضحك
مسخــــــــــــــرة

أكتر حتة عجبتني موضوع تروح تجدد الصداقه مع عبد الله مفتاح و هو هيدلك علي الكتب التي تحتاجها

مش هقدر أعلق على الحتة دي بالرغم إن الأفية هتموتني بس انت عارف مش عايز أقول حاجة تضطرني ارحب بحد مهم هنا في المدونة عشان يرد وساعتها هيبقى حقه
لذلك سأكتفي باجترار تعليقك وأضحك حتى أستلقي على قفايا من الضحك


مقولتليش
معانا في المقاطعة ولا لأ؟؟؟؟؟

Reformer1976 يقول...

ذو النون المصر من تاني

يا ابني موضوع سلمت يدك يا زفت الطين يا إسلامبولي دا تريقة طبعا
الاغتيال لا يمكن تبريره ولا الثناء عليه تحت أي ظرف من الظروف

طبعا
طبعا
طبعا

السادات له ما له وعليه ما عليه
زي ما كل واحد من الأربعة رؤسا له ما له وعليه زفت ما عليه
لكن إن الحل هو الغتيال لأ دا مرفوض تماما تماما
الإسلامبولي كلب وحيوان سافل هو وعبود الزمر وكل الأوغاد اللي قتلوا اولادنا في التمانينات والتسعينات
دول كفرة ولاد ستين في سبعين وأي حد يبرر اللي بيعملوه لازم يتعلق من رموشه ويتنفخ من ... من بقه

هي بس خدتني الجلالة في التريقة والسخرية
لكن آسف على التعبير

وبعدين إنت لو تقراني كويس تعرف إن أنا طبعا مع السلام مع إسرائيل
وأحترم السادات جدا في هذه النقطة تحديدا هو ورابين الله يرحمهم

أعتز بأرائك وتنويهاتك
شكرا لتنبيهي

غير معرف يقول...

احيي كل من ذوالنون و طبعا الفارس الاخير
الحمدلله مش لوحدي

بالنسبة للحاج جرجس فطبعا بانت لبته لما فلوس الاعلانات قرصته
و طبعا لازم يرمي الموضوع على السادات
معلش حسابك بعدين يا جرجس

مر باشاع
صحيح كلهك كانوا ضباط جيش لكن ضابط عن ضابط يفرق
و الدلائل كتيييييييييييييرة
في ضابط بيخش على طمع و في ضابط بيخش على وطنية و حاول يعمل حاجة بجد لكن القدر مامهلوش
طبعا بتكلم هنا عن السادات مش ناصر
لان ناصر القدر امهله كل شئ يحتاجة و هو اللي مرضيش بيه
يا سيدي السادات اقلهم في فترة حكمه لكن بص شوف هو عمل ايه
اعاد احياء الجيش المصري بعد انتكاسته
عمله حاجة كده زي ما بيقواموا العنقاء من تحت الرماد
و عمل و عمل و عمل
ممكن افتحلك مدونة بحالها بس عشان خاطرك و خاطره

سلام

غير معرف يقول...

تصحيح

عمر باشا
لانها ظهرت
مرباشاع

سلام تاني يا جدع

غير معرف يقول...

حفصوتشا هانم
أعلنها من هنا من على مدونة المدعوق جرجس أنك الوحيده اللى فهمتى قصدى من موضوعى الأخير .. و اللى عاوز يفهم و يمد ايده يشتغل .. ييجى يقرا تعليق حفصوتشا على موضوعى و ردى عليها .. متهيألى بقى ماحدش عنده حجه بعد حفصوتشا مافهمتكم الفوله

غير معرف يقول...

جرجس صديقي العزيز جدا على قلبي
كنت عارفة انك في النهاية حتصحى لصوت الحق النابض جواك و تنضم للناحية الكسبانة
اخلا بيك معايا و مع فارس و ذو النون
هههههههههههه

كويس انك رجعت لعقلك

اخويا ذو النون
عملتلك تعليق تست لكنه مظهرش
يبقى لسه عندك كبس عالحريات يا سيدي و انت لا تدري به
شوف
روح عندك عالداشبورد
منها
على كومنتس
انزل على تامن اختيار
هو ده اللي بتتحكم منه بطبع التعليقات
متاكده انك حاططها يييس
ابقى غيرها و حطها نووووو

في انتظارك
و نحن في الخدمة لكل واحد بيحب السادات
فقط
و
حصريا

على راي شهروزة
نياهاهاهاااهه

غير معرف يقول...

يعيش عمر قناوى يعيش، ولا ما حد فاهمك غيرك، وواحد غيرك ما ينفعناش، احنا وراك تخرب تعمر، انت جبت التيتة، شالو عبده جابوا شاهين، والمباراة مبتخلص، وف الملعب، فى هتيفة، ولا ليهم اى لازمة، اللى هو احنا طبعا، وبما ان فى اختيارات قفة ولا بوكس، فانا بشجع القفا، اللى القلب منه داب واشتكى، سلام بقي لما اروح اكمل فيلم الكيف، فيلمي المفضل، بما ان الله يرحمه قال "غطيني يا صفية دا مفيش فايدة"، سلام يا واد يا دكتور، سلام جلالة الملك عمر قناوى، لانى بصراحة بقرف من الجمهورية دلوقتى،وبطلت اشجع الاهرام، وبشجع ملكة بريطانيا، بركاتك يا ست.
randa

غير معرف يقول...

حفصة : للأسف لا يمكن ان أتفق معاكي.. من يحتكر السلطة ويتجاهل شعبه بل ويمرر السلطة لضابط صديق لأنه "مالوش في حاجة وبيلعب رياضة" لا يمكن ان احترمه او اتعاطف معاه تحت أي ظرف.. وعلي أي حال أنا شايف ان تقييم الرؤساء العسكريين لمصر من بعد الثورة ماهياش نقطة محورية الآن.. لكن كل من أحاول أن اقوله ان تغييب الشعب عن الشأن العام طوال الخمسين سنة الماضية وانحصار السلطة والنفوذ في يد حلقة ضيقة من البشر أدي إلي تشوه في الواقع الاجتماعي والسياسي في مصر وهو ما أدي للبلاوي السودة اللي بنعاني منها الآن.. مهما كان الواقع السياسي والاقتصادي والاجتماعي والأحوال الدولية..إلخ فإذا كان الشعب معدوم الدور في الساحة السياسية لازم تكون العواقب وخيمة وعلي رأي الله يمسيه بالخير أرسطو "كل إنسان يميل بطبيعته إلي التعسف في استخدام السلطة" وعلي ذلك فإن المطلوب الآن هو تغيير الطريقة التي يتعامل معها المواطن المصري مع الشأن العام ومحاولة إزالة الخوف تدريجيا.. لو دة ما حصلش يبقي أي كلام في سياسات داخلية أو خارجية تضييع وقت.. إزاي بقي دة ممكن يحصل؟ مش عارف تحديدا لكن اللي انا عارفه انه دورنا كمثقفين مصريين شباب يفترض اننا غير مغييبين من قبل الإعلام القومي او الغربي

غير معرف يقول...

الله يينتقم منك يا جرجس زى ما انت قاعد تسيح لى على موضوع النسوان ده
انا اللى عاوز ضرب الصرم

ام العيال يقول...

ايه يا جرجس
انت باصص للعيال في اللقمه و لا ايه
طيب نعملك اعلان مخصوص
ايه رايك
كوكي كوكي كل الناس بيحبوكي
هههههههههههههههههههههه
وفرخه بتلف و تنط
اصلك بتشجع المحلي
سيب العيال تتبسط يا زينب

شفت خليت عربي يتتريق عليك ازاي
انا بهدي النفوس بس

Reformer1976 يقول...

الأخ ذو النون والأخ فارس والأخ عمر والأخت حفصة وعاكو المهاجر المصري في الزحمة بالمرة

بصوا بقى
أنا قلت السدات زفت كفرتوني
قلت السادات حلو برضه كفرتوني

أنا مش عارف أرضي مين فيكوا

عندكوا التعليقات كلها اتصرفوا فيها
اللي بيحب السادات يقرا الحتة الحلوة اللي بقول فيها السادات سيدي وتاج راسي وانا بتاع تطبيع وسلام ويعيش كامب ديفيد ويحيا علي وزة أصدي علي سالم

ةاللي مش طايق أم السادات عندك فيه تعليقات فيها شتيمة بالعبيط برضه
كله واحد ياخد الحتة اللي تعجبه
اللي عاوز ورك لا مؤاخذه المدونة مليانة اوراك واللي عاوز صدور الموضوع أصلا على وائل وكنتاكي وهتلاقي صدور بالعبيط

يعني ريد ميت موجود وايت ميت برضه شغال

ركزوا بقى معانا في القضية القومية الكبيرة التي اجتمعنا من أجلها
لكن نسيب الأصل ونمسك في الفرع دا حتى وائل وعلاء يشمتوا فينا ويعتقدوا إن احنا مدونين غجر

آخر الأخبار اللي عتندي بتقول إن علاء ووائل في لقات متصلة على مدار الساعة بسبب أزمة الإعلانات المسيئة... وفيه مظاهرات في الأزهر ضد الإعلانات المسيئة ويقابلها مظاهرات في الكاتدرائية المرقسية بالأنبا رويس بالعباسية بسبب الإعلانات المسيئة... إحدى الجرائد الكبرى في لبنان يتم إغلاقها وتسريح رئيس تحريرها بسبب إعادة نشره لإعلانات وائل وعلاء المسيئة... آلاف المدونين العرب يقاطعون مدونتي علاء والوعي المصري بعد نشرهما الإعلانات المسيئة والتيقن من تورطهما بالعمالة لأمريكا وإسرائيل


الموضوع كبر والرئيس الأمريكي اتصل بنظيره المصري للتأكد من صحة اضطهاد مدونين مصريين بسبب "تعاملهما" مع أمريكانا التابعة لوكالة الاستخبارات المركزية سي آي أيه... ويندد بشدة باضطهاد المدونين ويهدد بإلغاء المعونة الأمريكية إلى مصر
مالم يتم سجن المدونين "الفاشيست" الذين يطالبون برأسي وائل وعاء!!ـ

كل هذه التطورات وانتوا قاعدين تناقشوا السادات حلو والا كخة؟؟؟

أفيقوا وحددوا موقفكم!!ـ

مقاطعون لوائل وعلاء؟
أم مطبعون معهما ومن ثم مع أمريكانا وإسرائيل؟؟؟؟

اللهم فاشهد
إني قد بلغت

Reformer1976 يقول...

أم العيال العشرية

حددي موقفك بوضوح
هل أنتِ من المقاطعين أم من المُطَبِّعِين
أم من المؤلفة قلوبهم؟؟
===================


ملحوظة اتصل عى زيرو تسعمية تسع تسعات وأدخل اختيارك من بين الاختبارات السابقة وإذا كانت إجابتك بأنك من المقاطعين فستربح معنا الجائزة الكبرى وقيمتها...........
..................
ربع جنيه مخروم
من النيكل الخالص عيار أربعة وعشريم

غير معرف يقول...

يا حاج جرجس
كفرتك مين؟! و فين؟؟
شايفني اخوات مسلمين و لا سلف صالح
و لا وهابية و نطالك من السعودية ببرقع الحيا على وشي؟؟
ايه يا عم الحاج
ايش حال ما انا باركتلك انك عرفت الطريق الصح و قلبك دلك عالصراط المستقيم
وبقيت فاهم لبة السادات الله يرحمه

سلام يا خويا
الحق اقول لك انك فاجئتني
كفرتك؟؟؟؟
حرام يا شيخ دا انا بجري على عيل يتيم و مش ملاحقاها بوليس و لا انت و لا الاخوات المسلمين اللي فقعوالي مرارتي اللي اتشالت اساسا

:)

3rby يقول...

لا بجد تعرف انت بتفكرني بمين
الواد اللي كتبته عنه في بوست "عني"
اللي هو عامل صاحبي ومن ورايا بيعملي مشاكل
سبحان الله بتتكلم زيه بالظبط وهو بيمثل التهييس علشان يقول حاجة

ذو النون المصري يقول...

يا عم الحج جرجس انا مش فاهم المقاطعه دي ما الغرض منها ؟
اقصد ان مقاطعة البضائع الامريكيه مثلا ينتج عنها خسائر ماليه
ما المتوقع حدوثه اذا نجحت مقاطعة المدونات المذكوره حتي نقتنع بجدواها؟

ذو النون المصري يقول...

تبا لك سائر اليوم
سحقا لهؤلاء العبيد
يابني بكر يابني شيبه هذا جرجس يناديكم فاسمعواله انها النكبه ،،الغوث يا عرب
اليوم خمر و نسااااعء
معلش يا جرجس
اصل العيد قرب و مقرر افلام كل سنه بيرن في وداني من دلوقت ..هي صحيح بدري شويه !!!بس بيحصل لي كل سنه

ذو النون المصري يقول...

يا ست حفصه انا كتبت لنفسي تعليق و ظهر قبل ما تكتبي انتي ليه تعليقك ما ظهرش؟
و فين الكومنتس بالتحديد فيه واحده فوق و غيرها تحت البوست قبل التنزيل ايهما هو المقصود؟
انا فتحت الاثنين و لا توجد اختيارات حتي اختار الثامن منها
ارجو التوضيح السريع لاني فوجئت بزوار كثيرين لمدونتي شجعوني علي الاستمرار لم اتوقع زيارات لهم علي الاطلاق

ذو النون المصري يقول...

خلاص انا عملت الشيء المظبوط ياريت تجربي تاني

Reformer1976 يقول...

أخي العزيز ذو النون

يا عم الحج جرجس انا مش فاهم المقاطعه دي ما الغرض منها ؟

يا عم الحاج مقاطعة إيه؟؟
إنت صدقت بجد؟؟؟
الموضوع طبعا تهريــــــــــــج

حتى تعليقاتي كلها ساخرة ساخرة ساخرة ومسخرة مسخرة مسخرة

وائل من أفضل المدونين العرب والوعي المصري من أهم (إن لم يكن أهم) المواقع الخبرية الموجهة للمتحدثين بالعربية
وائل بالفعل شارك بفاعلية في فضح وكشف العديد والعديد من حالات الفساد على مدى العام الماضي ومنها تغطيته لأحداث التحرش بالصحفيات يوم الاستفتاء الأسود وفضائح تمويل جريدة الكرامة من الدكتاتور الليبي والعديد والعديد من الفيديوهات التي تفضح الفساد وتعريه... وائل بوعيه المصري كان من أهم من فضحوا ممارسات الشرطة السادية ضد المواطن المصري... بجد وائل ربنا يحميه... يعوزني الوقت والمساحة لتعديد ما قام به وائل والوعي المصري من محاربة الفساد على مدى العام الماضي

مقاطعة إيه يا راجل؟

ماذا أقول عن علاء؟
علاء هو عن جدارة الأب الروحي للتدوين
البوست كله تهييـــــــــــــــسة
تهييـــــــــــــــسة

أنا ما دستش في الموضوع بالسخرية دي إلا لما علاء فتح السكة أدامي بتعليقه إنه نقلب الموضوع وكأنه جد ونشوف إيه الأخبار

وزي ما انت شقت
كل المعلقين بلا استثناء هرشت الليلة إنها مسخرة وداست في التهريج ع الآخر

خلاص يا عم؟؟
هرجنا كفاية؟؟؟

استنى البوست الجاي هيبقى نكد نكد نكد

نهاره أبيض

Reformer1976 يقول...

إلى الجميع لختام الليلة

أكرر ما قلته سابقا في نهاية البوست

الموضوع من تاني هزار وما هواش جد... لو كان وائل حاطط إعلان عن كنتاكي على الأقل كان حط نمرة التليفون... وأما علاء فالراجل بالفعل مهتم بحكم عمله بكل ما يخص حرية التعبير والاستخدام في شبكة الإنترنت وكل ما يتعلق بتقديم الخدمات الإلكترونية مجانا على الشبكة الدولية ومن ثم الراجل بيكتب بجد عن موضوع يهمه ويهم الآلاف ألا وهو توفير خدمة الواي فاي في مكدونالدز زالعديد من المطاعم والكوفي شوبس الأخرى


خلاص؟
بخ

غير معرف يقول...

صباح الخير لكل الناس

ايه ده يا حاج جرجس انت قفلت الموضوع كده من نفسك .. ايه الديكتاتورية اللي انت فيها ده ... افرض حد عايز يعلق ليه تحجر على حريته ...قال ليبرالي قال ... و بعدين انا كنت مستنية لحد ما التعليقات توصل 100 .. كده زعلتني بجد :):):)
و ايه حكاية التنويه اللي انت عمله على البوست الجاي .. انت عجبك شغل الإثارة و التشويق ولا ايه ؟؟ ربنا يستر على النكد اللي جاي ..

غير معرف يقول...

ما فيش بخ
ده الاخوان جايين من الازهر مخصوص عشان يعملوا عرض عسكرى عندك تضامنا مع المقاطعه وانت جاى تقولى خلاص بخ طيب والناس اللى جايين دول نمشيهم ازاى وبعدين دول بيلعبوا كاراتيه وبوزو كمان وانا مش مسئول عن اللى هيحصل فى المدونه بتاعتك لو ازازها اتكسر او اتسابلك صاروخ صغير فى اى ركن فيها

غير معرف يقول...

ايه يا جرجس المصايب اللى انت عاملها عند سوسه المفروسه ديه
انا قولتلك مدونتك هتتفجر وانا وصيت على الموضوع ده هناك ان مدونتك تتفجر بعمليه استشهاديه او بصواريخ كاتيوشا صغيره كده

ذو النون المصري يقول...

ماشي ياحج يعني انا باختصار اتخميت المره دي
انا صدقت الكلام و مصدقتوش
علشان كده كنت ناوي اماطل في حكاية المقاطعه دي
كل خميمه و انت طيب

Reformer1976 يقول...

السيدة الفاضلة ريكا مبارك
(راعية الثقافة والأمومة والطفولة في مصر)


يا حبيبتي الدكتاتورية دي في دمي
لأن مصر هي أمي
وتبقي انت أكيد أكيد في مصر

أنا متفق معاكي في طرحك الهام بضرةروة وصول التعليقات إلى 100 قبل ما نقفل الليلة ونفض السامر

أنا عندي ردين على ياسر شمس الدين وبعدين رد على ذو النون وردي دلوقت عليكي يبقى أربعة
زائد خمسة وتمانين يبقى 89
ابعتي انتي بقى 11 رد مرة واحدة ويبقى المجموع خلاص 100

الموضوع بسيط وسهل

ههههههههههههه
هو انتي في الأحمدي؟؟

Reformer1976 يقول...

yasser shams aldien

يقال أن البوزو ليس من السنة وأنه من السلف الصالح على الرغم من أن علماء الأمة لم يجمعوا عليه بينما الكاراتيه فرض عين على كل إخواني وطظ في الشيتوس وأبو الشيتوس وكل ما في الشيتوس

نحن يا صديقي لا يهمنا تكسير إزاز المدونة فقد خلقنا الله أحرارا ولن نستعبد بعد اليوم... ولابد أن ندفع ثمن حريتنا من دمائنا ومن عرقنا ومن إزازنا
تخيل بقى لما يبقى عندك إزاز مكسر ومخلوط بالدم والعرق
بس خلاص يبقى عندك رادع أمني محترم
حط الإزاز المكسر على الدم على العرق ومكس عليه شوية بارود بتاع بمب العيد مع شوية مسامير على حبة مية نار وضع الجميع في زجاجة سفن أب
واحكم الغلق
(بعد ما تحكم الغلق مبروك بقيت مؤهل تحكم مصر)
أصبح عندك الآن عبوة ناسفة ترد بيها على المفجرين الكخة

عشات دماء الشعوب وعاش العرق

Reformer1976 يقول...

yasser shams aldien

بمناسبة الحديث عن الجدل الدائر ولا يزال في المدونة المذكورة

بذمتك ودينك سا راجل... شفت الهطل اللي احنا فيه؟ الحق اتدارى قبل ما يكفروك... وخصوصا إنك مسميني في مدونتك رسول الليبرالية في التدوين

ههههههههههههه

الحاج جرجس ورسول
يا نهار اسود ... دا كدة أهدروا دمك خلاص
ومش بعيد يسحبوا منك كارنيه الجماعة ويتهموك بشق عصا السمع والطاعة والزندقة والعياذ بالله وبأنك مشترك في المؤامرة العالمية لتنصير العالم وبأنك لا تؤمن أن محمدا (ص) هو خاتم المرسلين
وحتى تدريب البوزو مش هيخلوك تحضره تاني

حرَّص على نفسك
اللهم فاشهد إني قد بلغت

بالمناسبة لو المسلمين مش عايزين المسيحيين يتكلموا في الإسلام والقرآن كانوا ليه بقى بيعلمونا قرآن وحديث في المدرسة وكنا بنحفظه ونذاكر معاني الكلام وشرح الآيات؟؟؟؟؟؟
يبقى ما حدش ييجي ويقول لي ما انتاش فاهم إسلام ولا قاري... داحنا قعدنا ندرس قرآن وحديث من ابتدائ لغاية ثانوي... وبعدين المصاحف موجودة في المكتبات ولسة ما حظروش بيعها على ما أظن وفهم ما تقرأه بنفسك حق لأي شخص
ولا إيه يا بو ياسر؟؟؟؟

وبعدين بذمتك مش قراءتي للآية اللي بيقولوا إني "فسرتها" في حين إني فقط قريتها" معاهم مش كان شبه متطابق مع ابن كثير والجلالين؟؟؟

ابقى راجع الليلة على بعضيها وقول لي رأيك يا معلم

نهاره قشطة

Reformer1976 يقول...

يا عم ذو النون مقاطعة إيه وخميتك إيه بس

المقاطعة أصلا بقت كلمة مبتذلة وأعتقد ما بقاش فيه حد في الدنيا النهاردة غيرنا... شعوب هطلة بعيد عنك

مسيرها تتعدل ولسة فيه أمل
إدينا بس قد مية وخمسين سنة نتطور فيهم فنبقى بني آدمين!!!ـ

غير معرف يقول...

اولا يا حاج جرجس ما حدش يقدر يسحب منى كارنيه جماعه الاخوان المسلمين لانى معيش كارنيه ومش اخوان تانى حاجه
هو اللى حصل فى مدونه سوسه هبل لان ما فيش ايه او حديث فى الاسلام بيقول ان غير المسلم ما يتكلمش فى الاسلام
وزى ما قولتلهم فى مدوناتهم طيب ما القران بيقول ان الانجيل والتواراه محرفين ليه ادينا الحق للاسلام انه ينقد الاديان التانيه وما نديش الحق للاخر انه ينقدنا وللمسلمين كل الحق فى الرد
وللمسيحيين او اليهود ليهم حق انهم يرودا بس ولا المسلم يهين الاخر ولا الاخر يهين المسلم
وبعدين انا بختلف معاك يا جرجس فى كام نقطه اولها المساجد تانى حاجه
تفسير الايات
اقولك ليه
المفروض اللى يفسر ايه من القران لازم يكون عالم عشان يتحمل مسئوليه تفسيره للايه ديه ويكون بيتكلم على علم
حكم تفسير اى ايه لغير العالم عندنا ان المفسر يأثم حتى لو فسر الايه صح لانه اتكلم فى كلام الله بدون علم
عشان كده هما نقلولك تفسير ابن كثير بالحرف من على اى موقع من النت وكده لزوم العركه
تانى حاجه انت حر تقول اللى انت عايزه عن الاسلام يا جرجس وما تاخدش فى بالك الناس اللى بتهاجم بس الاسلوب يكون مش مهين لحد ولا فيه استهزاء وانت جايب لنفسك مشاكل بكلمتين بتقولهم دايما الهطل والهبل الفكرى ههههههههههههه
فاكر يوم ما اختلفت معاك فى حكايه والدك
كان فى حوار ممكن يكون كان بيتصاعد بس استمرينا فى الحوار انا وانت ومتهيالى ما شتمناش بعض ولا كسرنا ازاز مدونات بعض
والطبيعى ان يكون فيه خلاف فى بعض النقط واتفاق فى اخرى المهم ما نخسرش بعض يبقى فى مساحه ثقه بينا ان احنا اخوه فى الوطن
واللى حصل فى مدونه عشتار بينى وبينها وبين واحد تانى انت عارفه ده كان بسبب مش فكر لا كانت اهانات يا جرجس
يعنى كان عنوان الموضوع محرف ايه فى القران كان سب النبى عليه الصلاه والسلام فكان لازم الاهانه ترد باهانه
بس انا رديت باهانه شيك
حاجه كمان يا جرجس
فى موضوع اتهام القران للمسيحيه بالتحريف
القران تعامل بالعقل والحوار فى الموضوع ده
ولما يكون فى قضيه جدليه زى الحجاب انا من راى ان المسيحيين من اول الناس اللى يقولوا رايهم فى الموضوع ده لانهم من المجتمع وبيتاثروا بافكار وعادات المجتمع
فلازم يشاركوا فى هموم الجتمع اذا كانت دينيه او ثقافيه ولو مش عايزينهم يشاركوا نعملهم دوله لوحدهم ونسيبهم فى حالهم
اما بالنسبه لتسميتى ليك رسول الليبراليه
فى ناس مسميه نفسها رب الكيبورد والماوس وهما من الاخوان
ده تعبير لا يمت للكفر او للاسلام بصله يعنى
رسول يعنى مبلغ عن شئ ما
وانت بتكلم عن الليبراليه فى المدونات يبقى انت رسول الليبراليه
وانا عايز حد يكفرنى خصوصا انى موضوع البوست الجديد ممكن ناس كتير تكفرنى بيه

ذو النون المصري يقول...

ايوه خمتني ،يعني تقولي مقاطعه و انا اكدب نفسي و اكذب ما اقرا لاني متابع للوعي المصري من مده
و مش مصدق
انا قلت انت غلطت و لثقتي فيك انك لا يمكن تتهم احد دون ادله متمكن منها قربت اصدق
عموما المقاطعه كما قلت كلمه معرصه
و ملهاش لازمه
لك تحياتي

Reformer1976 يقول...

عم ياسر شمس الدين

نسيت كمان جنب الهطل والهبل الفكري تحط كمان الهوس الديني والتقيؤ الفكري والمنظومة الخرائية وفصامية المجتمع
كدة يبقى القاموس كمل

Reformer1976 يقول...

ذو النون العزيز

الله يسامحه علاء هو اللي زين لي بتعليقه فكرة إنه نمشي الموضوع وكأنه جد ونشوف ردود فعل الناس
بس بيني وبينك فقرة التقليد اللي اتعملت في النص كانت تحفة

غير معرف يقول...

ARE YOU STUPID?
americana is Kuwaiti 100%

غير معرف يقول...

الواحد مش عارف همه فين الناس همه بقوأناناس ومابقوش ناس ولآ هو ده النسناس الوسواس آللي تاعب كل الناس

un4web يقول...

مشكووووووووووور
http://www.alsadiqa.com

لكي لا ننسى دم أحمد علي مبروك