٠٦‏/٠٣‏/٢٠٠٧

أيمن نور من سجنه يكشف عن فضيحة جديدة لنظام مبارك

بالأمس الإثنين 5 مارس 2007 كانت جلسة محاكمة في القضية المرفوعة من الدكتور أيمن نور زعيم حزب الغد ضد المدعو ياسر بركات وآخرين بتهمة السب والقذف بحق الدكتور أيمن نور رئيس حزب الغد الأسبق والحاصل على الترتيب الثاني في سباق الانتخابات الرئاسية التي جرت في 2005

عقدت جلسة المحاكمة بمحكمة القاهرة الجديدة بالتجمع الخامس وسط تواجد أمني مكثف

لم يمثل الدكتور أيمن في هذه القضية في قفص الاتهام إذ أنه كان المدعي بالحق المدني في هذه القضية ضد ياسر بركات رئيس تحرير جريدة الموجز هو وصحفيين آخرين بنفس الجريدة ومن ثم فقد جلس الدكتور أيمن بين المحامين وخاطب هيئة المحكمة بنفسه وطالب بسرعة الفصل في القضية بسبب تضرره البالغ هو وعائلته وحزبه من جراء ما نشره المذكورون بحقه مما يندرج - قانونا - تحت باب السب والقذف

شهدت قاعة المحكمة حضورا مكثفا - ملأ القاعة عن آخرها - من مؤيدي أيمن نور وأعضاء حزبه
وسرعان ما ضجت القاعة بهتافات تطالب بالحرية لأيمن نور وأيضا بهتافات ضد النظام وضد الرئيس

تهافت عشرات الحاضرين حول نور لمصافحته وعناقه والاطمئنان على صحته في ظل تدهور حالته الطبية في السجن بسبب ما يلقاه من معاملة سيئة - متعمدة - وأيضا لكونه مريضا بالسكر وضغط الدم المرتفع ومشاكل بالقلب إلى جانب خشونة المفاصل ومضاعفات مرض السكر الخطيرة والتي تمثل بالفعل تهديدا حقيقيا على حياته

تم تأجيل المحاكمة إلى جلسة 3 يونيو القادم

وقد تحدث معنا الدكتور أيمن عن سوء معاملته في السجن ومصادرة حقه في المعاملة الإنسانية الكريمة

وقد كشف الدكتور أيمن عن مهزلة حقيقية وهي سرقة ملفه الطبي لإعاقة دعوى الطعن التي رفعها ضد قرار رفض الإفراج الصحي عنه

وبسرقة ملف نور الطبي يتوقف علاجه في السجن لحين إعادة فحصه من جديد وتقييم حالته الطبية
وعن هذه الفضيحة يقول الدكتور أيمن إنها مهزلة حقيقية
هذه ليست دولة على الإطلاق... إنها عصابة

وفي هذه الجلسة التقي نور بإيهاب الخولي رئيس الحزب المنتخب في أول لقاء بينهما بعد انتخاب الأخير رئيسا للحزب منذ أيام قليلة

وقد أشاد نور بتجربة الانتخابات التي جرت بنزاهة وحيادية في حزب الغد وقال أنها تعد نموذجا يحتذى من حيث الديمقراطية الحقيقية والتداول السلمي للسلطة وتقدم نموذجا نقيضا للتخليد والتأبيد في السلطة في كافة المواقع

فجر الدكتور أيمن نور مفاجأة نحن أول من نكشف عنها وهي عدم نيته في أن يرجع مرة ثانية لرئاسة حزب الغد أبدا!!! وأنه يتشرف بأن يكون عضوا عاديا في حزب الغد

وفي أثناء حديثنا مع الدكتور أيمن - الذي جرى وسط تواجد أمني مكثف - تلقى نور مكالمة من السفير ناجي الغطريفي رئيس حزب الغد المنتهية ولايته أشاد خلالها نور بالدور الذي لعبه الغطريفي أثناء فترة رئاسته وناشده الوقوف بجانب القيادة الجديدة في الحزب وأن يعمل - مع الجميع - على الحفاظ على وحدة الحزب في أعقاب معركة انتخابية شديدة الروعة وشديدة الاحترام - على حد قول نور

كفاية حرام بالتعاون والتنسيق مع مدونة حلوة يا بلدي
قاما بتغطية جلسة الأمس وتسجيل حوار مع أيمن نور
المسجون حاليا بتهمة تزوير ملفقة لفها له زبانية النظام انتقاما منه لتحديه الرئيس في انتخابات رئاسية - غير نزيهة - حصل فيها نور على الترتيب الثاني

الفيديو التالي يغطي تفاصيل جلسة محاكمة الأمس التي انتهت بالتأجيل إلى جلسة 3 يونبو القادم


إذا لم فتح الفيديو ادخل افتحه من الوصلة دي

والتسجيل الصوتي التالي هو نص لقاء حصري أجريناه مع الدكتور أيمن يتحدث فيه عن العديد من القضايا على رأسها حالته الصحية وفضيحة سرقة ملفه الطبي وكذا عن رأيه وتقييمه لتجربة الانتخابات على مقعد رئاسة حزب الغد

إذا لم يفتح الفيديو خش من الوصلة دي

هناك ١٦ تعليقًا:

الأغاني للرأفتاني يقول...

اشطه يا حاج جرجس
مجهود رائع يامان

غير معرف يقول...

سبق رائع يا حاج
برافو عليك
بس عايز اعرف زنزتنة كانت عارفة السبق ده منين
ولا هو توقع لو كده
برافو زنزانة
علي فكرة انا بعتلك خبر حلو علي المايل بتاعك شوفه ورد علي

غير معرف يقول...

سبق رائع يا حاج
برافو عليك
بس عايز اعرف زنزتنة كانت عارفة السبق ده منين
ولا هو توقع لو كده
برافو زنزانة
علي فكرة انا بعتلك خبر حلو علي المايل بتاعك شوفه ورد علي

zenzana يقول...

لا يا فندم
انا اعتمدت علي تخميناتي بنسبة مية في الميةلان جرجس كتوم جدا بشأن بوستاته القادمة
لان ببساطة انا بعرف جرجس وكمان دعاء صاحبة مدونة حلوة يا بلدي والاتنين بيشتركوا في حبهم وتأييدهم لايمن نور
فلما الحاج جرجس يقول ان في مفاجأة علي مدونة كفاية حرام وحلوة يا بلدي وكمان كان في جلسة لقضية السب امبارح المرفوعة من ايمن نور ضد ياسر بركات
يبقي اقدر اخمن ان المفاجأة هي ان في بوست عن ايمن نور وبما ان الواد جرجس صديقي اروبة ومعقرب وعمل الهوليلة دي وافلام السسبنس والاكشن في انتظروا مفأجاة معناها ان الحاج جرجس لن يكتفي بمجرد نقل وقائع الجلسة
وهيعمل تسجيل خاص به مع ايمن نور
طبعا جرجس هرب من انه يدفع الجنية وكمان الشيكولاتة وقال انها مش مضمونة اليومين دول بس اطمنه اني مش هسيب حقي
ههههههههههه


جهد هايل يا جرجوري
keep on

tota يقول...

الحج جرجس
البوست اكاد اقول انه اكثر من رائع فى سبق فريد من نوعه وتوجه جديد للمدونة فى الحصول على هذه اللقاءات المميزة جدا
اللقاء مع ايمن يستحق اى مجهود بذل من اجله
الفيديو بيوضح بدقة مدى الاهتمام الذى حظى به ايمن نور ومدى الظلم المعرض له والاهانة المتعمدة التى لا تشير الا لدنائة الحكومة ده حتى الرياضة يا اخى فيها روح رياضية عيب يعنى ما يكنش فى السياسة اى روح
بصراحة انا سعيدة بالسبق ده وبالتحول الرائع فى مسار المدونة وان تكون البداية ببوستين فى منتهى القوة وكلاهما نقطة مهمة واحدة كانت بدايتها من عالم التدوين والثانية لا متنفس لها الا فى عالم التدوين
تحية فعلا واحترام وارفع القبعة لك على هذا البوست
تحياتى

أحمد عبد الفتاح يقول...

تسلم ايدك يا جرجس ادي البوستات ولا بلاش مش تقولي المدون الذئب
بجد البوست يجنن والمجهود الي بذل فيه رائع يارب كده دايما

alnadeem يقول...

دخلت التاريخ يا بطل بهذا السبق الفريد


تلوح في الأفق أطياف نصر يا جرجس
والله ما بهزر ولا ببالغ

Gid-Do - جدو يقول...

الحاج جرجس

يادكتور اللى انت عاملة دة شغل صحافة محترفين مش مدونين ـ بس عاوز اقولك حضر شنطة فيها غيارين وبجامة وكام قميص علشان ممكن الناس اللى انت دست على صوابع رجليهم يعزموك عندهم كام يوم فتكون مستعد ـ الحقيقة انا معجب بالدكتور ايمن نور اولا لانة فى السن المناسب لقيادة بلد زى مصر اكتر من نصف سكانها فى حدود العشرين ـ على ما اعتقد ـ وكمان راجل مدنى يعنى مش جاى من الجيش وياريته كان اجل ترشيحة فى الانتخابات الاخيرة وكان ركز على ان الناس العادية تعرفة ـ يعملوا شعبية كبيرة وعريضة ـ اعتقد انة كان حيكون فى وضع احسن راجل زى دة مش لازم يكون فى السجن فى قضية تافهة زى اللى دخل بيها بجد حرام ـ اديك جرجرتينى وراءك وانا عارف ان مفيش وراء غير وجع القلب لكن زيارتك لمدونتى والشغل الكبير اللى انت عاملة هنا يخلى الحجر ينطق ـ وبالمرة عبقال الواد الضابط ماتطسة المحكمة الجزاء العادل له ولامثالة ـ الاشكال دية هيه اللى ليها السجن مش الدكتور ايمن نور ـ لك تحياتى واشكرك على انك عيشتنا مع الدكتور نور بالاتنين فيديو دول

zenzana يقول...

جدو يا جدو يا أحلي جد
(انا ماسكة ف رجل بنطلونك وبشد)انا عرفت احل الفزورة ممكن تخلي الواد جرجس بقي يديني الجنيه والشيكولاتة؟
طبعا مفيش حد هيقدر يحبس جرجس وانا موجودة
لحد ما يدفع اللي عليه

zenzana يقول...

نخليها جد بقي

أنا رأيي ان طالما في عدد من الجلسات قادمة خاصة بأيمن نور هو ان يتم اعادة تسليط الضوء عليه لان المسألة هديت شوية يعني شوفنا ف الفيديو قد ايه كان في ناس متابعة وحضرت الجلسة ليه ما يبقاش في حشد وان يتم دعوة الناس العادية انها تروح الجلسات ؟ انا معرفش دا ممكن يبقي ازاي بس ممكن نشترك سوا ونفكر
كمان المدونيين المهتمين بأيمن نور هيكون جميل ان يفضلوا متابعين الاخبار اول بأول وان ممكن الناس كلها يكتب في وقت واحد انه يبقي في تسليط ضوء
معرفش دي مجرد تكون افكار مش جديدة لكن مش مستحيل اعادتها تاني
شكرا يا جرجس علي مجهودك في اخر بوستين
لانهم فعلا من أفضل التدوينات وكمان سبق هايل

مراقب مصري يقول...

عم المهاجر رأفت الغالي

أشكرك على التحية والتشجي... قضية أيمن مش مجرد قضية سجين رأي عادي لكنها قضية مشروع مدنية دولة يحكمها نظام مستبد ويتربص بها أعداء الوطن و"المواطنة" يعني الدفاع عن قضية نور فرض عين مش فرض "كفاية"... ويا ريت الناس تفهم ده
================

عزيزي المصري أفندي الجميل

أشكرك على التحية... زنزانة عندها أجهزة مخابراتها الخاصة فيما يبدو... هدخل دلوقت ع الميل واشوف مفاجآتك
=================



زنزانة العزيزة

ليكي عندي يا حبيبتي باكو شوكالاتة كادبري بالسالمونيلا عشان أخلص من أجهزة مخابراتك اللي مسيحالي ف مصر كلها دي
وبعدين إيه حكاية إن البوستين (مثنى بوست مش مثنى بوسة) الأخرانيين دول هما أفضل بوستاتي؟ أنا كل بوستاتي تاريخية زي خطب الريس كدة
====================


المذهلة دائما توتا

طبعا بلا شك اللقاء مع ايمن يستحق اى مجهود بذل من اجله بس أنا هنا لا يفوتني أن أشكر الصديقة العزيزة دعاء عبد المنعم التي بدونها لم يكن ممكنا أن يوجد مثل هذا اللقاء وطبعا جزيل الشكر للسيدة العظيمة مدام جميلة اسماعيل التي سهلت لنا مقابلة الدكتور أيمن والحديث معه

إوعي تستني مني أني أفضل ماشي على النظام دا على طول في المدونة.... ما اقدرش... لازم برضه أرجع أعمل بوستات خنيقة أنكش بيها الإخوان واخنق على البابا ونشتغل سونة أبو جيمي وجيمي ابن سونة... يعني م الآخر ما تتعوديش على الشغل الجامد ده لأنه م الآخر بيطلع عيني وبياخد مجهود ووقت وانا بعون الله لو فضيت نفسي ليه يبقى مش هناكل عيش في سنتنا

بالنسبة للروح الرياضية اللي تتحلى بها الدولة - التي أسماها نور "العصابة" - كانت روحهم الرياضية الحقيقة في قمة تجلياتها في القرحة الأليمة اللي شفتها في رجل الدكتور أيمن نتيجة تقييده بالحديد عدة ساعات يوميا... روح رياضية صحيح... أقول لك سر ما تقوليهوش لحد؟؟ لاحسن يوقوا إني عاطفي... أنا بكيت بالدموع لما الدكتور أيمن شمر بنطلونه وورانا القرحة اللي ف رجله... بكيت على الراجل وعلى نفسي وعلى مصر
==================


عزيزي أحمد عبد الفتاح

أشكرك على تحيتك ربنا يفك سجن الدكتور أيمن وسجن كل سجين حرية في مصر من أول خيرت الشاطر وإخوانه لحد طلبة الإخوان لحد كريم عامر وطبعا ما ننساش طلعت السادات... لازم يا احمد كلنا (كلنا) نقف وقفة واحدة لأجل جميع سجناء الرأي والحرية... الحرية قيمة مقدسة لا يجوز التفريط فيها بأي مبرر
====================


عمنا الكبير الزعيم النديم

لا تاريخ ولا جغرافيا يا عم عمر
المهم القضية ترجع تتفتح تاني ويا ريت الكل ياخدوا الفيديوهين دول من على يوتيوب ويلزقوهم في مدوناتهم وخلي الناس تعرف عصابة مبارك بتعمل إيه في أيمن نور - اللي هو طبعا مش مسجون سياسي - ويشوفوا شهوة الانتقام القذرة لدى النظام الذي اختار أن يصفي أي بديل مدني يمثل بديلا حقيقيا لدولة مدنية يخرج بمصر من القرف اللي هي فيه

بس أنا معاك قادر ألمح في الأفق أطياف النصر الآتي... وهيه يا سيدي ربنا يسهل
وانت راجل مؤمن وقلب المؤمن دليلو يا زعيم
;)
==================


عزيزي الجميل جدو

هو دا كان فعلا هدفي الأساسي من نقل الفيديوهين إن الناس تعيش اللحظة مع الدكتور أيمن سجين الحرية وتحس بالراجل وألمه والقهر الواقع عليه من قبل من أسماهم بالعصابة وتسمع شهادة أيمن على الواقع اللي هو فيه في الوقت اللي تقرير مجلس الشهب عن زيارتهم لأيمن بيقول إنه في أتم صحة ويلقى أفضل عناية صحية وطبية على مدار الساعة... لأ والتقرير الخرا دا بيقول كمان إن الدكتور أيمن شكرهم وبعت الشكر لفتحي سرور على إنه اتكرم وبعت يسأل على أيمن... طبعا زي ما انت شايف وسامع الحقيقة كلها على لسان صاحب الشأن... ومش بعيد تلاقيهم بيطلعوا - كعادتهم - يقولوا التسجيل مزور... بس الحمد لله كم الشهود على اللقاء كانوا مئات من محبي أيمن نور ومئات من أعدائه من زبانية العصابة... أنا مش خايف على نفسي بجد يا عم جدو... أنا بقول كلمة حق واللي عنده رد عليها ييجي ويكلمنا

بالنسبة لقولك بأن المفروض أيمن كان يستنى شوية وما يتسرعش... أنا فاهمك ورأيك صح في العموم لكن في حالة أيمن كان يستنى لإمتى؟ لما جيمي يكون هو الرئيس بالفعل؟ ولا لما بتوع طظ ف مصر وضرب المعارضين بالجزمة يمسكوا الحكم ويقلبوها خلافة؟

يا جدو إحنا لسة ما سبقش السيف العزل ودي المرحلة الوحيدة المتاحة أمامنا للعمل على طرح البديل الثالث الذي يمثله أيمن نور وحزبه المدني الذي ضرب مثالا رائعا في ممارسة الديمقراطية بعد انتهاء فترة السفير ناجي الغطريفي وتولي إيهاب الخولي رئاسة الحزب بفارق 16 صوتا فقط عن منافسه وائل نوارة... يعني ديمقراطية بجد... وجيل شباب واعي ينفع يطوروا حزبهم ويتنقلوا نقلة مختلفة تخليهم مؤثرين تأثير مذهل... ودا اللي مخلي "العصابة" متجننة منهم وعايزة تخنقهم بأي شكل
==================

زنزانة العزيزة تاني

بالظبط اللي انتي بتتكلمي فيه مهم جدا جدا... ويا ريت البوست دا يتاخد كوبي بيست ويتحط هنا وهناك وف كل حتة والفيديوهات على يوتيوب ينفع أي حد ياخد الأكواد بتاعتها ويحطها في مدونته... فيه قضية حق لازم كلنا ندافع عنها بكل قوتنا... لو القضية مش حق يبقى ما لهاش لازمة بس كلنا عارفين إن الراجل مسجون تلفيقا وزورا ومسجون عشان أساسا تطاول وفكر مجرد تفكير في تحدي النظام على طريقة "آدي جزاة اللي ما يسمعشي كلمة "ماما" تقولها" يبقى لازم ندعم قضيته كلنا وليكي عليا جدول جلسات محاكماته كلها يكون عندك وألزقه على باب المدونة بس المهم الناس تتجاوب معانا وا تتنحش التتنيحة المعتادة ومن تاني الدفاع عن أيمن نور فرض عين مش فرض كفاية يعني مش كفاية إن الناس تقرا وتتصعب ع الراجل وتقبل الصفحة وخلاص

غير معرف يقول...

هايل يا حاج برافو عليك ارفع القبعة تحية ليك يا مان ربنا ينصرك يا ايمن نور انت الامل اللى لسه فاضل لينا فى وسط الضباب اللى بنعيشه حالياوطول ما فلا ناس زى ايمن نور لسه فيه امل

مراقب مصري يقول...

في رأيي يا عم المجهول إن أهم ما في هذا اللقاء التدويني هو تصريح أيمن نور أنه لن يعود مرة أخرى رئيسا إلى حذب الغد أبدا وأنه يشرفه أن يبقى فقط عضوا في حزب الغد... عارف دا معناه إيه؟ إن حزب الغد هيخرج برة إطار الشخصنة ودا معناه إن الحزب مش هيبقى هو أيمن وأيمن هو الحزب - زي حزب البقرة الضاحكة كدة - لكن الحزب هيبقى منظومة قائمة وبرنامج وهيكل نظامي واستراتيجيات وأهداف ويبدأ يتحرك في تحقيقها سواء أيمن موجود أو مش موجود... ودا معناه إن المسئولية الآن على الأستاذ إيهاب الخولي رئيس حزب الغد أن يبدأ يمارس دوره الحقيقي والشرعي في رئاسة الحزب وتفعيل ديناميكيات التحرك الحزبي من جديد وضخ الدماء الجديدة في شرايين الحزب

دا كلام لو بدأ الناس بتوع الغد يفهموا أبعاده ويطبقوا الكلام عمليا يبقى النظام بيتخوزق من كل ناحية لأنه مش هيقدر يسجن عشرات ومئات وربما آلاف أعضاء حزب الغد والمتعاطفين معهم وبرنامج الغد برنامج سياسي حقيقي ويقدم بديلا حقيقيا وهو الحزب الوحيد اللي ليه فرصة حياة بين أشباه الأحزاب اللي موجودة على الساحة

ومن تاني ندعي لربنا إنه يفك سجن أيمن نور زعيم الغد وسجين الحرية

بيجاسوس المصرى يقول...

اليك انت وحدك ايها الاستاذ العزيز و ابى الروحى فى السياسة والقلم
نحن مازالنا نحمل الغد على الاعناق فأستطاع كل واحد منا ان يقف امام الطاعون و خرجنا بأنتخابات تتحدث عنها كل الاحزاب المصرية
طال الاشتياق منذ ان رايتك اخر مرة فى مارس الماضى وقبل عام من الان
عينى تبكى كل يوم منذ ان ابتعدت عنا ولكن نتذكر كل يوم كلماتك الجميلة و امانتك التى تركتها لنا فنحن على العهد حتى ترى الغد و نوره فى ابهى صوره
فاعلم جيدا انى مقصر لابعد الدرجات و لكن اشكر جرجس من كل قلبى لان كل جواحى رأيت اليوم استاذى و الذى ذكرنى بالايام الجميلة و التى كنت فيها بجوارك ايها الزعيم
نحن ابناء الغد معك حتى نهاية الطريق
حتى اخر قطرة من دمائنا
تحياتى لك و التى ارسلها كل يوم لك من بيجاسوس المصرى و الذى تعلم منك الكثير والكثير ومازال يتعلم منك حتى الان

مرة تانية
شكرا ليك يا جرجس لانك مكنتنى بالفعل من رؤية استاذى و صاحب الفضل عليا فى هذه الحياة
و اسف على الاطالة

غير معرف يقول...

لا أدري ماذا أقول بعد كل ما قيل، ولكنني شعرت في جسدي كله بقشعريرة وأنا أقرأ وأشاهد فيديو الدكتور أيمن، وكنت أبكي من داخل قلبي على م آلت إليه الأمور معه ومع بلدنا المسكين...
شعرت بصرخة تخرج من داخلي صرخة هاتفة: حرييييييييية
حرية للبلد ولأيمن ولينا
ربنا يشفيك يا أيمن.. ويخرججك بالسلام
مع تحياتي الخالصة للحج جرجس الذي قدم لنا هذه الصورة الكاملة والشاملة للأحداث
وشكر خاص للتعاون الإعلامي وللزميلة دعاء، ولكل من تضامن مع د.أيمن..وربنا يرحمنا ويكون في عون أسرته المسكينة
مريم

غير معرف يقول...

حاج جرجس اتفق معك تماما فى كل اللى قلته بس مش الغد لوحده هو القادر على الاصلاح حقيقى تسجل للغد السابقة الاولى من نوعها ان الناس بتوعه مش بيدوروا على سلطة ولا على مناصب زايلة ولو تم تطبيق برنامجه الاصلاحى ونزوله الى قاع المجتمع اكيد هيكون له شأن اما بخصوص الاحزاب القائمة فهى هلامية ولا وجود لها فى الشارع .....غى ملحوظة صغيرة بالتأكيد كلنا بنكره النظام القائم بكل الفساد اللى هو فيه وعاوزين نغيره لكن كل اللى بنعمله اننا بنتكلم فين العمل الفعال اللى يهز ويزلزل اركان النظام؟؟ ماهو ايد لوحدها ما تسقفش لازم الناس دى تنزل لاعماق المجتمع المصرى ما تقتصرش على طبقة المثقفين بس الركيزة الاساسية هى المواطن المصرى البسيطولو نرجع لايام زمان سعد زغلول كان الطفل بيعرف عن سعد رغم انه ماكانش فيه وسائل اعلام زى دلوقتى ...ليه مانحاولش ناخد خطوات جدية ومؤثرة والفرصة قدامنا احنا حاليا فى اخطر مرحلة بتمر بيها مصر دى معركة بينا وبين الفساد اخطر قرار مصيرى فى تاريخ مصر الحديث (ده فى رأيى) هو اللى بتجرى صناعته حاليا وهو طبعا تفصيل الدستور على مقاس الوريث طب ليه ما نطرحش البديل؟؟عندنا مئات وألاف اساتذة القانون والمشتغلين بيه اغلبهم وطنين مخلصين سهل جدا انهم يقدموا البديل دستور مصرى ينبع من واقع مصر ويمثل الارادة الحرة بعيد عن المصالح وعن ترزية القوانين وطرحه سهل جدا على الناس من خلال الصحافة الحرة ...ونرجع كمان للتاريخ كلنا فاكرين وحافظين لجنة الوفد اتشكلت ازاى ليه ما نكررش الماضى من تانى ولتكن جماعة من الوطنيين المخلصين لمصر وتتعمل توكيلات زى زمان ليهم افتكر ده لو تم هيكون نهاية النظام الفاسد اللى موش ها يقدر يقف قدام ارادة شعب بحاله ..الاحتلال النجليزى زمان مقدرش يقف قصاده يبقى هايقدورا حفتة المنتفعين دول لا اظن!!! دى دعوة من خلال منبرك الحر ده اتمنى ان تجد لها صدى الغيور (المجهول)

لكي لا ننسى دم أحمد علي مبروك