
أيا كانت أراؤه... كريم سجين رأي
نهاره أبيض وصباحه لبن حليب وزود القشطة
لا أعرف كريم عامر ولم أدون عنده قبل ذلك ولم يدون هو كذلك عندي... ولم أر مدونته قبل صباح اليوم
مين كريم عامر ده؟ مش فارقة كتير
كريم هو أحد المدونين المصريين... بس هذه هي القضية
دماغه فيها إيه؟ مش مشكلتي
آراؤه توجهاتها إيه؟ ولا لي دعوة
أيديولوجياته الفكرية في أي اتجاه سياسي أو ديني؟ كفاية وجع دماغ مش دي أم الليلة اللي بنتكلم فيها
اسمه بالكامل عبد الكريم نبيل سليمان... شاب من الإسكندرية عمره 22 سنة (فقط)... طالب (سابق) بجامعة الأزهر
ليس هذا هو ما يهم بخصوص كريم
ما يهم هو أن كريم مدون مصري
كريم بيدون زيك وزيي... عادي يعني... إيه المشكلة .. مش افتكاسة يعني إن عندك مدونة.. عادي جدا زي ما عندك إيميل... فين الافتكاسة؟
الافتكاسة يا باشا إن كريم عامر مقبوض عليه
النيابة أمرت بحبسه على ذمة التحقيق... عادي أكيد عاكس بنت أو اتحرش مع المتحرشين ولا حاجة
لا يا باشا أبدا!!! هو دا برضه اسمه كلام؟ هو فيه حد م المتحرشين دول ممكن يلقى القبض عليه أبدا؟
كريم عامر يا سيدي نشرت جريدة المصري اليوم عنه النهاردة أنه قررت النيابة العامة حبس كريم عامر أحد المدونين المصريين أربعة أيام، بعد أن فصلته جامعة الأزهر، وقدمت بلاغاً ضده، ووجهت النيابة اتهامات له تتمثل في إذاعة بيانات وشائعات مغرضة من شأنها تكدير الأمن العام وإهانة رئيس الجمهورية، والتحريض علي قلب نظام الحكم وكراهيته والازدراء به والتحريض علي بعض طائفة الإسلام، وتكدير السلم العام وإبراز مظاهر غير لائقة بسمعة البلد والإذاعة عنها للجمهور.
جامعة الأزهر فصلته... عادي من حق أي جامعة تفصل أي طالب عندها
وبعدين قدمت بلاغا ضده... يمكن كان فيه في عهدته حاجة ومسلمهاش قبل ما يمشي من الجامعة
وفجأة الخبر يقول أن النيابة العامة بقى هي اللي وجهت لكريم (واللي بين قوسين هو أحد المدونين المصريين) واخدين بالكوا؟ وجهت له إيه بقى النيابة اللي هي عامة؟
خد عندك يا نور عين والدتك... الآتي
نمرة واحد. إذاعة بيانات وشائعات مغرضة من شأنها تكدير الأمن العام
(مش بقول لك م الصبح نهاره أبيض)
نمرة اتنين. إهانة الباشا رئيس الجمهورية
(صبح صبح يا عم الحاج)
نمرة تلاتة. التحريض علي قلب نظام الحكم
(كدة مرة واحدة... إخص عليك يا كريم)
نمرة أربعة. وكراهيته (أي والحض على كراهية النظام)
(الواد كريم ده طول عمره يكره النظام ودايما أمه كانت بتضربه عشان مش بيوضب مكتبه قبل ما يذاكر)
نمرة خمسة. والازدراء به (برضه الازدراء بالنظام)
(الازدراء دا مش بس إنه بيكره النظام لأ دا كان الولد الشقي دا كان بيعض أخته الكبيرة لو نظمت أوضتها)
ونمرة ستة. التحريض علي بعض طائفة الإسلام
(وكمان حصلت الدين يا كافر)
وبالمرة نمرة سبعة. تكدير السلم العام
(السلم العام دا كئيب جدا وعلى طول متكدر ومكدر اللي حواليه)
وأخيرا وليس آخرا. إبراز مظاهر غير لائقة بسمعة البلد والإذاعة عنها للجمهور.
(حد برضه يا كريم يتبرز في الشارع؟ وكمان تذيع ع الجمهور)
يا نهار اسود... دا كل تهمة من دول تودي في داهية .. لأ وغالبا وكيل النيابة تعامل مع الولد بمنطق إن ما كاتشي دي تبقى دي... بلاها سوسو خد نادية... ثمانية تهم مرة واحدة بحيث لو عرف محامي يدافع في واحدة أهو يبقى يتزنق في التانية
شغل جامد ... فكر جديد على أبوه
هذا الفتى أبو واحد وعشرين سنة هو اللي هيقلب نظام الحكم ويقلب البلد عاليها واطيها وتتحالف المؤسسة الأمنية في مصر مع المؤسسة الدينية للإيقاع به قبل أن ينفذ مخططاته ويعملها ويقعد على كرسي مصر
مش مستبعد خالص أسمع اليومين الجايين دول خبر في العناويين الرئيسية يقول
القبض على شبكة للمدونين المصريين... الشبكة تدبر لانقلاب عسكري وتسيء إلى سمعة مصر وشرفها
الشبكة تتقابل في السر في حتة فضا اسمها الفضاء الافتراضي
قوات الأمن تحاصر ميدان السيبر سبيس وتطلب من الجميع تسليم مدوناتهم
نرجع لكريم عامر
الخبر اللي نشرته المصري اليوم كان في سياق الحديث عن إدراج منظمة صحفيين بلا حدود الدولية لمصر بين أسوأ 13 دولة في العالم معاداة للإنترنت وقمع جرية التعبير من خلال الشبكة العنكبوتية
كريم اعتقل يا اخواننا في إطار حملة منظمة بيتم شنها وتصعيدها منهجيا على الدائرة الصغيرة دي اللي اسمها المدونين
اعتقال كريم يجيء في إطار "اضرب المربوط يخاف السايب"... ليس لدينا الآن - سواء اتفقنا مع كريم هذا أو اختلفنا فليست هذه هي القضية - سوى أن نتكاتف معا وأن نطالب بإطلاق سراح كريم عامر
كريم مؤمن أم كافر؟ من جديد ليست هذه هي القضية فالقضية هي الدفاع عن الحرية
القضية هي إيقاف هذه الجرافة القانونية الجاهزة تحت بند تهم هبلة ومطاطة وحمالة أوجه لتدمير مستقبل أي واحد\ فينا
يا جماعة كلنا كريم عامر
تضامنوا مع الحرية
تضامنوا مع كريم
(ملحوظة أكتب هذه التدوينة بعد مرور أربعة أيام بالفعل من اعتقال كريم ولا أعلم ما إذا كان لا يزال محبوسا أم لا)
برضه مش هي دي القضية
فتحوا دماعكوا معايا بقى الله يكرمكوا

بعد كريم الدور على مين فينا؟؟؟