٢٩‏/٠١‏/٢٠٠٧

إحنا ما عندناش دم... أيمن نور بيموت يا ظلمة

هام جدا
أيمن نور من سجنه يكشف عن فضيحة جديدة لنظام مبارك

تفتكروا إحنا عندنا دم؟؟؟


طبعا الإجابة لأ

أيمن نور بيموت في سجنه عشان حريتي وحريتك



عائلة أيمن نور قدمت التماس لرئيس الجمهورية مش
طلبا للعفو منه عن أيمن نور على الرغم من إنه بريء

الالتماس كان لمجرد أن يتم علاج نور الذي يعاني من مضاعفات خطيرة لداء السكري الذي يعاني منه ومن مشاكل في القلب والأوعية الدموية ومن نزيف دقيق بشبكية العين وغيره من المصائب الصحية الخطيرة



الالتماس في حد ذاته يشير بشكل جلي إلى أن سوء معاملة أيمن نور في السجن وسجنه أساسا الذي كان محض تلفيق حدث ويحدث بأمر مباشر من فخامة الرئيس حسني مبارك وبالتالي فمجرد حصول أيمن نور على حقه الطبيعي في العلاج بحسب القانون المصري والمواثيق الدولية يحتاج إلى إذن السيد الرئيس



وبالطبع لم يستجب الرئيس ولن يستجيب
وحتى لو استجاب فهيستجيب بس عشان إعلامه يهلل له إنه الرئيس - لا مؤاخذة - الإنسان



مبارك بيكره أيمن نور وخايف منه ونفسه إنه يموت في سجنه قضاء وقدر

وعاوزه إذا طلع من السجن يطلع حطام بني آدم

واحنا بنقول لمبارك
إنت مش ربنا... وربنا على كل ظالم وانت ظالم

ولأيمن نور أقول
لا تموت لأننا نحتاجك ونريدك
لا تموت لأنك تمثل لنا غدا أفضل
لا تموت لأننا حتى وإن كنا متواطئين جميعا ضدك
إلا أنك لا تزال الحل الوحيد والأمل الباقي أمامنا
من فضلك يا دكتور أيمن... ما تموتش

ولكل جبان خايف يدافع عن أيمن نور أقول
استرجلوا شوية يا شوية شياطين خرس

ولإصلاحيي لجنة السياسات أقول
اتفوووووو

هناك ٤٣ تعليقًا:

^ H@fSS@^ يقول...

حسرة عليك يا ايمن يا نور
ما اشبه اليوم بالبارحة
زمان الشيعة تخاذلوا و سابوا الحسين لوحده مع انه هو اللي كان معاه الحق
و النهاردة نور هو اللي مرمي لوحده في السجن و المسماة بحركة كفاية قاعدين يطلعوا مظاهرات في ذكرى حاجات حصلت من 30 سنة
طبعا ما خلاص خربوها الناصريين و قعدوا على تلتها
يبقى احلى من كده ايه؟؟مافيش طبعا
حلو اوي النظام الناصري العتيق
جعجعة على الفاضي
لو كفاية عندها دم او تنتوفة شرف المفروض كانوا كل يوم يتعصموا و يتظاهروا كل يوم
كل يوم
مش بس في المناسبات
لكن حتقول ايه؟؟؟
احنا نمووووووووت و نعشق في المظاهر
مظاهرة عشان اسعار اتغيرت من 30 سنة
و مظاهرة عشان تحرشات
ومظاهرة عشان عيد الشرطة
و مظاهرة عشان ابصر ايه
و تضامن في ذكرى اخواننا السودانيين اللي قتلناهم
و مظاهرة عشان ابصر ايه

عشان الاسم ان طلعنا النهاردة وعملنا مظاهرة
زي اللي اكل لقمة من كل طبق لكن مشبعش
نغطي كل المواضيع عشان نثبت حضورنا لكن منوصلش لاخر الموضوع او عمقه
ليه؟؟
عشان فعلا مش عاوزين نصلح حاجة
لو كان من اول يوم اتسجن فيه ايمن نور كل يوم اتظاهروا بتوع كفاية و مذهب على صوتك بالخرى الناصري
كان اقلها نضمن للبطل ده انه يلاقي معاملة شريفة تحفظ حقه على الاقل في العلاج
لكن دلوقتي عبال ما نعمل حاجة عليها القيمة و تتواصل معانا منظمة شريفة ممكن الراجل يروح فيها
اللي فعلا عنده قضية بيدافع عنها لغاية اخر نفس في جسمه مش بس ينوه عنه بمظاهرة
و اعتقد قضية نور هي قضية كل الشعب المصري او على الاقل اللي قرر منهم انه ينضم لكفاية
و في حواري معاك يا جرجس قلت لي ان نور متقبضش عليه بسبب خذلان كفاية لكن عشان هو تحدى مبارك، الله!!!؟؟ يعني كفاية مصاحبة مبارك من تحت لتحت؟؟؟
احيه احيه بجد يعني
و اذا السبعين مليون مواطن شريف خذلوا ايمن نور خلاص
نريح نفسنا بقى
محدش يفتح بقه بكلمة لاننا راضيين بالقرف ده و ساكتين عليه و عادي اوي
طيب دي نصرة نور لو مش واجبة عشان هو بقى كخة طيب عشان احنا منحسش ان ادميتنا نفسها ماتت لما نشوف واحد بيموت و مش بنساعده
دي حتى اخلاقنا نفسها بقت اخلاق معفنة
و على راي المثل
قال مين فرعنك يا زفت
رد و قال ملقيتش حد بيقلي عاوزينك تطلع نور من السجن
انا مش فاهمة يعني هو بتوع كفاية المحترمين فاكرين انهم يطلعوا بمظاهرة النهاردة يطالبوا فيها بالافراج عن نور يقوم الرئيس يطلع تاني يوم طوالي يفرج عنه؟؟؟؟
مكنش حد غلب
اللي عاوز حاجة يفضل ماشي وراها و زمان اتقالت
مايموتش حق وراه مطُالب



انا بجد مفقوعة و ضغطي علي
حسبي الله و نعم الوكيل
خلوني افقد ايماني باي شئ
ده كفر
كفر من مبارك
و كف رمن كفاية
و كفر من كل مدعيين الحرية و التظاهر و الشجب و الادانة
طيب و النبي
قلي انت فرقنا ايه عن انظمتنا المتنيلة اللي بقالها ديزيليون سنة بتشجب و تنكر و تندد و تعرص و تتقحبن؟؟؟
والله مافرقنا حاجة

عندي اقتراح
لازم تحط مع البوست ده اغنية علي الحجار يا مصري
بجد تنطبق كلماتها بالظبط علي اللي بييحصل بالمللي

و ممكن كمان منير حط الدبلة و حط الساعة
و ان كانت الحجار ابلغ في الموقف ده اكتر

masrry metgharb يقول...

عزيزى جرجس
انا لى رأى مختلف تماما فى موضوع ايمن نور
ولحد اللحظه دى مش عارف هاكتب اعلق اقول ايه ؟
اقول رأى الى انا عارفه ومتأكد منه
هاقولك مواقف بسيطه لمستها انا بنفسى لان الاستاذ أيمن من بلدنا فى الدقهليه

هل تعلم ياجرجس ان الذى حدث مع ايممن نور يذكرنى بما حدث مع كمال الشاذلى فهم رفعوه وعملوه وتستطيع ان تقول انهم صنعوه ثم لما صدق نفسه ودخل منطقة الخطوط الحمراء اوقفوه

هل تعلم ان معظم سهرات الكبار ومنهم كمال الشاذلى كانت فى عوامة ايمن نور على النيل حتى بعد الترشيح بفتره بسيطه
واليك قصة ترشيحه لانتخابات الرئاسه كما اعلمها ومتأكد منها
عندما رأى المطبخ السياسى ان كل المنافسين لمبارك ضعفاء ولن يحصلوا منافس قوى منهم يحبك شكل التمثيليه كان البحث عن شخص قوى يترشح ويبقى برده من رجالتهم
واقترحو ايمن نور وفى نفس الوقت رسمو القصة بحيث يخلوه تحت قبضتهم فى اى وقت
بدأو بتأسيس الحزب ولما كان من الممكن انك تاخد صورة بطاقة اى مواطن مصرى وتوقيعه مقابل 10 جنيه الا انهم قالولو انت لسه هاتلم توقيعات اضربهم اسرع وقد كان
وبكده يبقو عملوا الى هم عايزينه اولا اوجدو منافس لمبارك وثانيا حطوا المنافس ده فى جيبهم يعنى اى غلطه يشقطوه
المهم السيد ايمن سابوه قالولو قول الى انت عايزة ومثل دور المعارض زى مانت عايز
لكنه دخل فى المحظور قعد يشتم فى جمال وابو جمال وسخن الموضوع معاه وهنا بقى ابتدو يهدوه يا ايمن اهدا ماتنساش احنا الى عملناك وهو مصدق نفسه فقررو يعملوه عبرة وشيلوه قضية التوكيلات الى هما طلبو منه يضربها وهكذا

عزيزى جرجس ربما حاجتنا الشديدة الى بطل هى التى دفعت البعض الى اعتبار ايمن نور شهيد وبطل قومى وتناسينا حقيقته وكيف بدأ وقصته مع وزير الداخليه التى لا املك تفاصيلها
ولكنى املك تفاصيل وقعتين اخرتين مع ايمن نور شخصيا

الاولى احد ابناء بلدتنا وهو تاجر اقمشه اراد تهريب كميه كبيره من القماش المستورد من دبى الى داخل البلد المهم تم القبض على البضاعه ولجاء هذا التاجر الى السيد ايمن الذى اخرجها له من الجمارك مقابل مليون جنيه قالوه وقتها ان المبلغ د مش له ده للشاذلى

الواقعه الثانيه احد القادمين م الكويت اثناء الحرب عثر على صندوق به سبع ورقات فئة كل ورقه مليون دولار وهى ليست ورقه ماليه مثل المتداول فى ايدينا الان بل هى صك ملكيه لحامله من البنك المركزى الامريكى . المهم ان هذا الرجل بعد احداث سيبتمبر لم يكن قادر على تصريف اى ورقه من هذه الاوراق وكان بحاجه الى شخص مليونير تدخل هذه الاوراق الى حساباته دون ان يسأل البنك من اين لك هذا وبالفعل توجه الى ايمن نور وعرض عليه شراء الورقه ب800000 دولار ولكن ايمن رفض لانه واثق ان الرجل محتاج له ولن يستطيع تصريفها بدونه ولذلك عرض ايمن شراء الورقة ب350000 واتفقو فى الاخر بعد مناقشات ومداولات على 450000 وبالفعل باع الرجل لأيمن ورقتين فقط
هاتين الوقعتين كنت شاهدا عليهم كما كنت شاهدا على العديد من المواقف التى رفض فيها ايمن مجرد استقبال ابناء بلدنا الذين احتاجوا فقط تأشيرة من وزير لعلاج مجانى او وظيفه

اعلم ان هذا الرأى سيثير على الكثيرين ولكن كل ما ارجوه ان يكون هناك تحضر فى اسلوب الحوار . لقد قلت ما اعرفه واثق فيه ومتأكد منه

Egyptian Falcon الصقر المصري يقول...

السيد العزيز مصري متغرب

كل اللي انت بتقوله ده كويس، وكل الناس لها أخطاء مافيش حد خالي من الأخطاء، وأكيد لازم المجتمع يحاسب المخطئ على خطؤه. أنا مااقدرش أنفي أو أأكد كلامك والوقائع اللي انت أوردتها في تعليقك بس الناس ثايرة وهايجة على الموضوع لأسباب شوية مختلفة كما يلي:

أولاً: كل الأحداث اللي انت ذكرتها دي كانت تقريباً قبل ترشحه للإنتخابات الرئاسية، طب ليه مااتحققش معاه فيها وقتها وخد عقابه زي أي مجرم؟

ثانياً: إزاي النظام الحاكم يحاكم شخص بخطأ هو اللي شجعه عليه في الأساس؟ وازاي لما التوكيلات مزورة، لجنة شئون الأحزاب اديتله موافقة؟ وازاي اللجنة ماقامتش باللي عليها من فحص أوراق الحزب قبل منحه الموافقة مع إنهم خدوا 6 شهور قبل مايوافقوله؟ وازاي لما هو ثبت عليه التزوير، ماتمش التحقيق ولا عقاب أي مسئول في لجنة شئون الأحزاب ولو على الإهمال في التحقق من الأوراق والمستندات اللي منحت الموافقة على أساسها؟

ثالثاً: أيمن نور محامي يعني فاهم القانون كويس جداً، إيه اللي يخليه يعرض إسمه وسمعته للشوشرة، مع إن تحقيقات النيابة أثبتت إن التزوير كان في 1,000 توكيل فقط من مايقرب من الـ 2,000 توكيل، يعني فيه 1,000 توكيل صحيح غير مزور والقانون وقتها كان بيطلب 50 توكيل فقط؟

رابعاً: بغض النظر عن كل ماذكرته سابقاً، ماهي الجريمة الحقيقية هنا؟ إذا كان أيمن نور قد ارتكب كل هذه الجرائم فعلاً، فقد عوقب الرجل بالسجن 5 سنوات وبإنهاء عمله السياسي إلى الأبد. فهل من القانون في شيء، أن يعذب الرجل في سجنه ويهمل علاجه لدرجة أن يموت من المرض؟ هل هذا هو القانون؟ كيف ولماذا تأتى لنظام يدعي أنه يعمل سيادة القانون وأنه لايطبق قانون الطوارئ إلا على الإرهاب والمخدرات - وطبعاً ده كله كذب بشهادتنا جميعاً- ثم يؤخذ الرجل من السجن ليجري عملية جراحية خطيرة - قسطرة في القلب - ثم يمنع من رؤية محاميه وعائلته ويعاد في الرابعة والنصف فجر نفس يوم العملية إلى السجن بدون نقاهة ولا متابعة طبية ولايحزنون، ده ولا جراحات اليوم الواحد للتجميل؟

إن كل ماحدث ويحدث في هذه القضية وقضية طلعت السادات وغيرهم والـ18 أو 22 ألف معتقل بدون احكام في الزنازين المصرية ومعتقلات تحت الأرض، تجعل المرء يشعر أننا أصبحنا ولا سيبيريا أيام عز الشيوعية لو كنت تفهم ماأعني

3rby يقول...

انا عاوز ايمن نور يخرج لان مبارك ساجنه وانا ضد مبارك
ولكن انا مش باحترم ايمن نور
وممكن ادخل باللي بعد ما اتاكد من كذا واقعة حصلت مع ابويا

كلبوزة لكن سمباتيك يقول...

اقولك اية
لا نملك له الا الدعاء

ربنا يشفيه و يديله الصحة

و يقضي على الظالمين


امين

tota يقول...

الحج جرجس
يبدوا جليا النداء الموجه للرئيس كمن يوجه نداء بعد ان فقد الامل وليس عن قوة بل يشير الى سوء الحالة فعليا فما ظنى ان ايمن نور او اسرته بعد كل هذه المعاناه يطالبون بأى تنازل عن موقفهم الا اذا اشتد الحال فعلا بالرجل وهذا فقط المنشور على صفحات الجرائد وما خفى ولا يستطيعون قوله كان اعظم وواضح الحالة الصحية المتردية التى وصل اليها ايمن
مريض السكر تحت الضغط النفسى معرض لحدوث مضاعفات الى مالا نهاية واى طبيب بدون شك يقر بتأثير الضغط النفسى وحده ما بالك وهو مصاحب للسكر

ليس من حق احدهم معاملة انسان اى ان كانت تهمته بهذه الطريقة اللانسانية بالمرة والرجل ليس قاتل او متهم بجريمة تستحق عقاب بدنى واى ان كانت اخطاءه فلم يعامل حتى عتاة الاجرام فى العالم على هذا النحو
من حيث حرمانه من ابسط حقوق العلاج والمعاملة الانسانية

ان كان الرئيس بلا قلب وبلا عدل وكذلك الحكومة فالعدل والقوانين لها قلب ارحم واقرت واسنت بحق المواطن ان ساءت حالته ان ينقل لمستشفى ليبقى تحت العلاج والملاحظة
مطالبة بابسط حقوق لمواطن مصرى ناهيك عن كونه ايمن نور
تحياتى

abourrisha يقول...

الصديق العزيز\ جرجس

إن تعاطفنا مع أيمن نور يجب أن يكون نابعا من كونه مواطنا مصريا له الحق الكامل في الحرية وفي العلاج وفي احترام آدميته مهما كان موقفه السياسي وسواء كان شريفا تحركه دوافع وطنية مخلصة أو كان عميلا للنظام أو لأمريكا أو لإيران

المهم أنه في النهاية مواطن مصري يجب أن يتمتع بحقه في الحرية الكاملة في وطنه أو المحاكمة العادلة إن كان قد جاوز القانون.

مع التحية

غير معرف يقول...

عزيزى المحترم الصقر المصرى
ياصديقى العزيز نعم كل ما ذكرته كان قبل الانتخابات وهذا صحيح
اما لماذا لم يحاسب عليه فلأنه كان منهم
ولماذا تم تمريره من لجنة الاحزاب لان الاوامر بتمريره قد صدرت من فوق
اما لماذا ظهر كل هذا بعد ذلك فلأنهم غضبوا عليه

ارجو ان اكون اجبت استفساراتك

ما اقصده اننا يجب ان ننظر له على انه مواطن مصرى عادى اخطأ واخذ عقابه وليس كبطل قومى كا يحاولون تصويره

مع الشكر

bluestone يقول...

شوف يا دكتور
اولا انا اتفق جزئيا مع ما قاله مصري متغرب لسبب بسيط ربما لا املك التأكيد على مصداقية ما قاله وسرده من وقائع
ولكني اعلم ان تاريخ ايمن نور ليس فوق مستوى الشبهات تماما .. خاصة فيما يتعلق بثروته

الرجل لم يفعل ذلك لحريتنا ابدا
هو محامي شاب كان لديه طموح سياسي ضخم وجد فرصة طيبة لدى الناس وكانت لديه مؤهلات شخصية من كاريزما وخلافه وشخصيات في مواقع كبيرة ساهمت في صعوده او سمحت له بالصعود إلى حد ما

ولكن حينما بدأ في التطلع لاكبر مما توقعوا وجب فعصه زي غيره ولعل طلعت السادات مثال واضح على ذلك

الدرس المستفاد من قصة ايمن نور ايه؟ه
لو عايز تلعب مع الاسد
ماتمسكش عصاية من شيكولاته

يا تكون جاهز يا تروح بيتكم

ولكن رغم كل الشبهات اللي بتحيط بتاريخ ايمن نور
الا ان المعاملة التي يتعرض لها الرجل حاليا غير آدمية على الاطلاق
فالمطلوب تربيته لتجرؤه على الكبار
والتربية دي طبعا بتؤدي للاخرة عدل
بأشهر اسباب الوفاة في السجون واقسام الشرطة المصرية

هبوط حاااااد في الدورة الدموية

ارى انه يجب المطالبة بحصوله على حقوقه كبني آدم عادي وان تنفصل العقوبة عن العقاب

الفكرة بس اني ضد فكرة ان نور ملاك نازل من السما
وهو مش صلاح الدين
ولا سبارتاكوس محرر العبيد
وليس الامل الاول ولا الاخير للشعب المصري
لانه اصلا مفيش امل

اما حكاية الالتماس دي
واعتقد انها مدبرة من الكبار
وفيها غاية الاهانة لنور وغيره
ومفادها انه يجب عن تركع على قدميك لتستجدي حقك من خصمك

بيفكرني بقصة حياة مليكة أوفقير ابنة الجنرال المغربي محمد اوفقير الذي شارك في محاولة انقلاب على ملك المغرب محمد الخامس وبعد وفاته قضت هي ووالدتها واشقاءها اكثر من 15 عاما في المعتقلات حيث لقوا معاملة اسوأ من معاملة الكلاب ..
فهم ايضا ارسلوا التماسا للملك لكي لا يأخذهم بوزر والدهم وان يحصلوا على حق المعاملة كآدميين

المناشدة او الالتماس نفسه فيه اعتراف ضمني بالذنب.

bluestone يقول...

لما بسمع حكاية ايمن نور دي ليه دايما بفتكر الاية اللي بتقول
(الجميع زاغوا وفسدوا .. واعوزهم مجد الله)

غير معرف يقول...

عزيزي الحاج جرجس
كالعاده وقع الجميع في فخ شخصنه القضيه
وبالتأكيد ليس هذا هو الهدف من هذا البوست
أنا شخصيا دفاعي عن
أيمن نور هو دفاع عن مشروع سياسي أراه الأفضل والأمن لمصر في الفتره المقبلهو قد قلت هذا الكلام مرارا وتكرار
لأنه بديل مدني أولا
وي متلك شعبيه كبيره ومعقوله جدا بدليل ما يزيد عن نصف مليون صوت حصدهم في الانتخابات ومن المؤكد انه سيحصد أضعاف أضعافهم إذا اتيحت له أي الفرصه للمشاركه في أي انتخابات مقبله أي أنه باختصار أيضا نموذج قد تلتف الجماهير حوله وقادر علي الـتأثير فيها بما يعني ضمنا قدرته علي كبح الأمور في حاله حدوث فوضي بكل أسف نتوقعها وننتظرها في أي لحظه
ثالثا الراجل نشط سياسي وبرلماني ناجح لأكثر من عشر سنوات يعني ببساطه لديه خبره سياسيه حقيقيه من ممارسه في الشارع وبين الجماهير
يعني مش نازل علينا بالباراشوت زي الاهبل اللي عايزين يورثوه الحكم
وضيف علي ذلك علاقاته الخارجيه واسعه ودي نقطه في صفه لأن واحد مرشح نفسه لرئاسه الجمهوريه مهم جدا ان يكون معروف دوليا

انا بس عايز اقول حاجه للأستاذ مصري متغرب
أولا انا بحترم بشده أسلوبك المهذب في الكلام
ولكن من الواضح انه لديك خطأ ما في تتابع الأحداث وتسلسلها
أولا
أيمن نور حينما قرر ترشيح نفسه لرئاسه الجمهوريه
لم يكن الرئيس مبارك أصلا قد أعلن تعديل الماده 76
وما كانش مطروح في وقتها علي الإطلاق أنه سيكون هناك مرشحين امام الرئيس
وبالتالي حدوته انهم هما اللي زقوه يترشح عشان يعمل للانتخابات منظر هي حدوته غير منطقيه علي الإطلاق
أيمن نور بالذات هما عارفين كويس جدا مدي طموحه السياسي وانهم لو طلقوه مش هيعرفوا يلموه
نيجي لحدوته التزوير

هل من المنطقي انه لو زور
هيزور في ورق جميله اسماعيل؟
طيب ليه ما هي في الحزب وقدامه طول الوقت
وهل منطقي انه يزور توكيل ابوه المحامي الكبير والشهير جدا عبد العزيزنور؟
كلام ما يدخلش عقل عيل في ابتدائي

باقي الحواديت الشخصيه بقي اللي حضرتك ذكرتها يسعدني انني طبعا لا أستطيع ان احكم بمدي صدقها من عدمه لكنني والله علي ما اقول شهيد قابلت العشرات ممن يعرفون أيمن نور شخصيا ومن عملوا معه في الوفد والحقيقه معظمهم أجمع انه شخص ممتاز كل مشكلته هي طموحه الزائد

والمؤسف بل والمؤسف جدا ان المصريون أصبحوا ينظروا للطموح باعتباره جريمه
وشكرا

سيبها على الله يقول...

حاج جرجس مساء الخيرات
موضوع ايمن نور موضوع كرامة وطن ...مصر كلها تم اهدار كرامتها وتم ازلال شعلها وازاقتها الامرين ياريت الناس دى و وصلت الى سدنة الحكم ماينسوش نفسهم ..لقد وقفت مع هذا الرجل فى انتخابات الرئاسة الزائفة وحضرت مؤتمره والذى تم اقامته فى ميدان محطة مصر وكنت فد حضرت المؤتمر مع مجموعة كبيرة من الاهل والاصدقاءرغم علمى بعدم جدوى ذلك فى ظل هذا النظام.....
المهم فبه مبادرة كتبتها على مدونتى ارجوا الاطلاع عليها ومحاولة معرفة رأيك وياريت تكتب عنوان بريدك الالكترونى لان العنوان الخاص ب ريفورمر على الياهو اعتفد انه لا يعمل انتظر الرد...

ذو النون المصري يقول...

هناك كلمه قالها شيكسبير في مسرحية العاصفه دائما ترن في اذني كلما كان هناك حديث في السياسه
قال
و ليكن حبل مشنقته هو حبل النجاةلنا
كانها قطعه من حديث يدور كل يوم في مطابخ السياسه
مات صدام و كان بوش قالها لرامسفيلد
حلوا حزب العمل و الوسط و عرقلوا احزاب اخري نفوا ابو غزاله و عمرو موسي و الجنزوري
و اليوم ايمن نور
و نفس الجمله كان مبارك بيرددها لابنه و اعوانه كل مره
و ليكن حبل مشنقته هو حبل النجاة لنا

^ H@fSS@^ يقول...

اسم حضرتك مذكور عندي في التاج اللي جالي من انا حرة و انا رديت عليها و بدوري بلففه على البقاي
زوروني تجدوا ما يسركم

Unknown يقول...

ربنا معاه يارب
ومعانا اننا ننطق ونتكلم ان شاء الله مره واحده بس

أحمد المصري يقول...

هيا كلمة واحدة ..أنا شخصيا مقدرش أعمل غيرها عشان أيمن نور :حسبي الله ونعم الوكيل0

غير معرف يقول...

تصحيح بسيط . أنت ماعندكش دم ماتجمعش الكل واتكلم عن نفسك بس. هى فين ماما أمريكا اللى الافندى كان بيتعامل معاهم؟ ولا الست كوندى اللى قبلته واديته فلوس . أنا عمرى ماكنت متعاطف معاه انما كنت أحب ان سعادتك تكون مكانه .

مراقب مصري يقول...

العزيزة حفصة في اعتقادي أن كفاية ليست هي الكيان الوحيد الذي نلقي عليه اللوم في خذلان أيمن نور وبيع قضيته... كل القوى المسماة وطنية باعت الراجل عشان مصالحها وكله بيلعب على كله وزي ما قال أحمد عدوية كله على كله لما تشوفه قول له... إحنا بتوع كله
================

عزيزي المصري المتغرب

أولا مبروك المدونة الجديدة يا ريس... سعيد بإنشائك مدونة لأنك بالفعل تعبر بالكتابة جيدا وتقدر أن تصنع فرقا بالكتابة من خلال التدوين وسعيد أكتر بأن أول بوست ليك كان بعنوان أرى وأسمع وسوف تتكلم... كمل يا ريس وعلى بركة الله
لا أتفق معك في إن أيمن نور يمكن تشبيهه على الإطلاق بكلب من كلاب السلطة زي كمال الشاذلي... يا راجل بتتكلم في إيه بس... بالنسبة لأي لطخ في تاريخ أيمن فلن أقول لسيادتك سوى الكلمة الشهيرة التي قالها المسيح يوما وهي من منكم بلا خطية فليرمها بحجر وبالنسبة للعب أيمن مع النظام في وقت ما فلي تعقيبين أولهما أن قبل الحراك السياسي الحالي لم يكن اللعب مع النظام أباحة ومن الكبائر كما هو الآن والتعقيب الثاني هو أنه من المحمود لأيمن نور أنه خرج عن النص ورفض الاستمرار داخل المنظومة وطلع ببرنامج بالفعل يقدم حلا بديلا للقرف اللي احنا فيه
أعتز بأرائك وبوطنيتك
=========================

العزيز الصقر المصري

كلامك منطقي جدا... بغض النظر عن أي حاجة في الدنيا الراجل بجد بيموت في سجنه ولا يمكن التنظير والحنجرة - من الحنجوري - في إذا كان الراجل كويس ولا وحش ونسيبه يموت على إيد نظام باطش لا يرحم
=========================

العزيزة كلبوزة السمباتيك

دعاؤك له ينم عن قلب جميل وإنسانية رائعة لكن أعتقد أن في وسعك فعل ما هو أكثر من مجرد الدعاء... وليكن مثلا إثارة قضيته الإنسانية العادلة في مدونتك ذات الشعبية المتسعة
أشكرك
=========================

عزيزي عربي

بالنسبة لاحترامك من عدمه لأيمن نور عايز أقول لك إن التاريخ لو قريناه كويس هنكتشف أن فيه ناس في حياتها ما هو أكثر سوادا وكارثية سواء على المستوى الشخصي أو السياسي والتاريخ والشعب صنفهم على أنهم أبطال ورواد للوطنية وكل الحنجوري ده من أمثال سعد زغلول اللي كان مدمن قمار ومصطفى كامل اللي كان موافق على تأسيس وطن قومي لليهود في العريش وحتى صلاح الدين اللي ارتكب مذابح وحشية ... لا يوجد سياسي في التاريخ بلا أخطاء وحاول تتعلم يعني إيه موضوعية
======================

عزيزتي توتا

واضح تماما أن رغبة الانتقام لدى مبارك تجعله يريد بالفعل أن يرى أيمن يموت حرفيا كجزاء في رأيه أنه عادل على تحديه له ولسلطته شبه الإلهية

بالنسبة للعدل والقوانين اللي هما المفروض أرحم من الكلاب اللي بينتقموا من أيمن للأسف القانون والعدل مغيبين تماما من المعادلة في بلادنا
وشكل أيمن فعلا هيموت في السجن أو في المستشفى أو سيخرجون يوما ليخبروننا أن أيمن انتحر في سجنه
يا ظلمك وظلامك يا مصر
=========================

عزيزي أبو ريشة

المشكلة يا عزيزي ليست في عدم معاملة أيمن نور كمواطن مصري له الحق في العلاج والمعاملة الحسنة في السجن بل المشكلة بالفعل هي في معاملته كمواطن مصري ومن ثم يتم تطليع تلاتة دين أمه عشان يتعلم الأدب... يا ريتنا نوصل بجد إلى ترسيخ حقوق المواطن في بلادنا ساعتها حاجات كتير هتتغير بس المشكلة إن المواطن في بلادنا جزمة ف رجل الحكومة
وأما العدالة والقانون في بلادنا فتحت جزمة النظام برضه
=========================

عزيزتي بلوستون

بالنسبة لتاريخ أيمن اللي ممكن يكون فيه أخطاء فمين فينا ما بيغلطش... بس هو بالفعل على فكرة خرج عن النص وخرج من إطار لعب دور الكومبارس اللي بيكمل التمثيلية وطرح نفسه بديلا حقيقيا ببرنامج ليبرالي بديل هو أفضل برنامج كان - ولا يزال - يمكن أن يخرج مصر من مصيبتها الحالية

بالنسبة لتعامل النظام معه في السجن وتعمد إساءة معاملته وتعمد قتله البطيء غير المباشر فالرغبة في الانتقام من شخصه هي الدافع الوحيد لدى مبارك ولدى النظام كله بأجهزته الأمنية وفي النهاية الحالة اللي وصل لها أيمن تدل بالفعل على مدى كذب أطروحة أن أيمن نور صنيعة النظام وبتاعه من البداية وحتى مسرحية الانتخابات... أيمن خرج عن النص ونعم خرج لأجل حريتنا وسيموت من أجل حريتنا والرجل سيصير أسطورة لا تقل في حجمها عن مانديلا سواء مات في السجن أو خرج ليتابع نشاطه السياسي من جديد... وهذا هو سر ارتباك النظام... هما عايزينه ما يخرجش عشان عارفين توابع خروجه وعايزينه ما يموتش عشان توابع موته بس الأزمة إنه لو فضل الحال على ما هو عليه هيموت بجد
=======================

عزيزي المجهول 1

أتفق معك في أن أيمن نور هو البديل الوحيد والأفضل لكل القرف اللي احنا فيه النهاردة ويا ريت الناس تشوف الموضوع زي ما انت شايفه... قضية تزوير التوكيلات وهي القضية الوحيدة التي أدين بها أيمن - وبالمناسبة لو كانوا يعرفوا يدينوه في حاجة تانية كانوا عملوا كدة - هي قضية تلفيقها واضح لأي عيل صغير ومش محتاجة فكاكة وتصديق ادعاءات النظام فيما يخص أيمن نور وفساده كلام عبيط أوي وغير متماسك وفي الوقت نفسه أيمن نور مش مجرد شخص... دا برنامج بديل متماسك وفكر جاد يخرج مصر من كارثتها بس يبدو إن مصلحة كل اللاعبين ع الساحة دلوقتي في استمرار كارثية الوضع عشان ياكلوا عيش
===========================

سيبها على الله

أيمن بالفعل بديل حقيقي وبرنامج صالح للتطبيق وتحقيق الإصلاح في بلادنا والبرنامج الذي قدمه أيمن هو البديل الوحيد والنهاردة عقلاء البلد بيطرحوه بالنص بس من غير أيمن ودا بيرجعنا لأهمية أيمن كشخص وككاريزما قادرة على تعبئة الجماهير لأجل حرية وطن يحتضر... من أجل كل هذا لابد من أن يخرج أيمن نور
=====================

عزيزي ذو النون

تخلص النظام من أيمن نور سيؤول في النهاية إلى دمار مرعب لهذا النظام لأن إجهاض الحل الليبرالي وهو الخلاص الوحيد لهذه الأمة لن يعني سوى إفساح الطريق أمام أسوأ البدائل والذي هو الفوضى الشاملة وهو ما لا نريده على الإطلاق لكنه بات حتمي الحدوث بسبب حماقة نظام أحمق وفي ظل حكم رئيس دولة لا يحكم وعاجز بالفعل عن اتخاذ أي قرار
======================

العزيزة إسراء

دعائك لوحده مش كفاية... على الأقل اكتبي وعبري عن رأيك في جريمة قتل يشارك فيها المجتمع كله لرجل كان فقط يريد أن يرى مصر أفضل... عبري بالكتابة وهذا أضعف الإيمان
=======================

عزيزي الدكتور أحمد المصري

إنت اتحسبنت كتير يا دكتور
إعمل حاجة بقى... على فكرة عاجبني جدا اسم مدونتك... "كن رجلا"... ما أحوجنا اليوم إلى الرجال الحقيقيين
========================

العزيز المجهول 2

أنا آسف إذا كانت عبارة "إحنا معندناش دم" جات ع الجرح عند سيادتك... بس معلش يا سيدي ما كنتش حضرتك مقصود بشكل متعمد بس طبعا اللي على راسه بطحة بيحسس عليها
بالنسبة لأمنيتك أن شخصي الضعفي أكون مكان الدكتور أيمن... يا ريت بس معنديش برنامج زي برنامجه ولا كاريزما زي كاريزمته وف نفس الوقت طول ما الراجل عايش مش محتاج أكون مكانه... هو فيه الكفاية بس ربنا يطلعهولنا بالسلامة... قول يا رب... ولا البيه ملحد؟؟؟؟

masrry metgharb يقول...

عزيزى جرجس
اشكرك على تعليقك
المدونه مجننانى مرة تفتح ومرة لا المهم ياريس انا معاك ان احنا ندعم ايمن نور كمصرى محتاج لمعامله ادمية بدل من هذا الامتهان الذى يعانى منه الجميع بس مازلت ارى ان نفعل ذلك لانه انسان مصرى وليس بطل قومى
اما بخصوص برنامجه فاحنا زهقنا برامج ياعم جرجس عايزين تنفيذ بقى
عموما انا بابقى سعيد وانا باتكلم معاك جدا وسعيد جدا لاسلوبك الراقى فى الحوار

ولو احتاجت اى مساعدات بخصوص المدونه العفريته بتاعتى هاسألك ياريس

مراقب مصري يقول...

عزيزي المصري المتغرب

تحت أمرك في أي حاجة تخص مدونتك وتظبيطها
موضوع أيمن نور فيه شقين أحدهما إنساني وهو المطالبة بحقه في العلاج كإنسان بيحتضر بسبب سوء المعاملة المتعمد في سجنه والشق التاني هو أيمن كبديل سياسي... لما بقول برنامج لا أقصد برنامجه الانتخابي وحسب لكن أقصد مشوعه البديل اللي ما خدش فرصة يدخل حيذ التنفيذ بسبب وساخة النظام اللي قرر ينسفه لأنه لديه مشروع حقيقي... العيب مش على أيمن إنه ما قدرش ينفذ برنامجه بالطبع العيب على السلطة الباطشة اللي بتقتل أيمن النهاردة واللي أجهضت مشروعه والعيب علينا اللي ما استوعبناش إن الرجل الإنسان العادي جدا ده اللي له ما له وعليه ما عليه كان هو الحل الوحيد اللي يخرجنا من لا مؤاخذة الزفت اللي احنا فيه دلوقت

سيبها على الله يقول...

حاج جرجس
شكرا على الرد...
بس انت رديت على نصف المداخلة والنصف الآخر للاسف تجاهلته ربما يكون بحسن نية...
عموما الجزء الثانى من السؤال هو

المهم فبه مبادرة كتبتها على مدونتى ارجوا الاطلاع عليها ومحاولة معرفة رأيك وياريت تكتب عنوان بريدك الالكترونى لان العنوان الخاص ب ريفورمر على الياهو اعتفد انه لا يعمل انتظر الرد...

مراقب مصري يقول...

سيبها على الله

فيه بالفعل مبادرة إلكترونية معمولة ضد التوريث وعنوانها
http://www.gamal-mubarak.com/help.php

تقريبا نفس الفكرة بتاعتك وللأسف كل اللي موقعين عليها لحد دلوقت مش مكملين 5000 واحد واللي بيوقعوا بيوقعوا بأسماء تهريج أو بأسماء غير حقيقية بما يفقدها معناها... لكن المبادرة موجودة بالفعل... لو عندك حاجة تانية تنضاف لما هو قائم بالفعل معنديش مانع خالص

أنا حاطط بالفعل البانر بتاع رفض التوريث من وقت طويل وهتلاقيه عندي في آخر السايد بار من تحت

سيبها على الله يقول...

الحاج جرجس
فى الحقيقة مبادرتى من المفترض انها خاصة بالسادة المدونين واعتقد ان وقعها سوف يكون له تأثير اقوى واكبر ولاسيما انى اريد أن أوضح للعالم اننا فى مصر نعارض التوريث وخاصة اننى اريد ان يكون الموضوع بكل اللغات الحية ليقرأها العالم كله هذا فقط للتوضيح وخاصة اننا فى منتدى شئون مصرية اول من اخرج هذة المبادرة...

مراقب مصري يقول...

أي اقتراحات لديك أنا معاك فيها خلينا نشوف تتعمل إزاي

غير معرف يقول...

هو تمن العماله بقى كام دلوقتى؟
وياترى ياليورو ولا الدولار؟
اه صحيح نسيت أن امريكا بعته بس كان نفسى أعرف بعته بكام

خليه فى السجن أحسن عالشان يبقى عبره لمن لا يعتبر

هو احنا هنلاقيها من الاخوان ولا من الخونه والعملا اللى بيقبضوا من بره

ربنا يخدكم ويريحنا منكم

غير معرف يقول...

الأخ المجهول اللي دمه محروق قوي وقاعد يتهم الناس بالعماله

هدي اعصابك الأول عشان واضح قوي ان موضوع أيمن نور ده عامل لكم هلع
يا تري خايفين منه ليه رغم انه في السجن؟
للدرجه دي هو راعبكم
وللدرجه دي ابتديتوا تتوتروا ان الناس رجعت تتلم حوالين قضيته من جديد

طيب هدي أعصابك كده وافهم كويس وكويس جدا ان قضيه ايمن نور يا فالح ما بقاش ينفع تتلم
أيمن نور من الأخر بقي رمز غصب عني وعنك
والناس هتشوفه بطل وشريف برضه غصب عني وعنك
وكل يوم زياده بيقضيه في السجن بيكسبه مصداقيه وشعبيه أكتر
وبعد ما كان بتوع الغد بس هما اللي بينادوا بالإفراج عنه
بقي الكل بيطالب بالإفراج عنه
الشيوعين
والناصريين
والكرامه
والوفد
والإخوان
والناس البسيطه اللي ما لهاش علاقه بالسياسه بس بقي في نظرهم الراجل اللي اتحبس عشان تحدي مبارك وابنه

إثبت بقي لكل دول ومعاهم بالمره النص مليون بني أدم أن ايمن نور مش بطل
والله لوقعدت تدن في مالطه انت وبتوع المباحث للصبح
إنسي
الموضوع فلت يا معلم

يا ريت تروق دمك كده وتهدي
أما التهديدات والأمنيات المبطنه بأنك نفسك تشوفنا في السجن
فلا أعتقد ابدا ولا يجب ان تعتقد انت ذاتك ان ده هيفرق في حاجه
لا هيفرق معانا
ولا مع قضيه أيمن نور
اللي زي ما بقول لحضرتك كده
خرجت عن نطاق السيطره

مع خالص تقديري

عمر قناوي

مراقب مصري يقول...

العزيز المجهول بتاع العمالة
كفاية عليك اللي اداهولك عمر
بس يا ريت تفهم
شرفنا دائما تجد ما يسرك

غير معرف يقول...

هاهاهاهاهاى ضحكتنى ياولد . دمى هادى وبارد على الاخر احسن من الناس اللى ماعندهاش دم.
افضلوا اضحكوا على الناس بالهبل اللى انتم سايقيونوا على الشيطنه. يابنى الرموز اللى انت بتتكلم عليها بتدخل السجن بتهم قوية مش تزوير. انت شفت رمز بيزور قبل كده؟ اه صحيح ماكل شىء جايز فى الزمن ده.
يابنى عالشان اثبتلك بس ان انتم مجرد طنطنه على الفاضى وناس بتوع شعارات وهتافات لما كل الناس اللى انت قلت عاليهم دى وافقين مع ايمن نور الرمز مش عارفين يخرجوا ليه؟ ده انت جبت كل قوى الشعب والمعارضه وطبعا نسيت تقول القوى الخارجية اللى انت بتستهبل ومش عايز تجيب سيرتها
ياترى فى حد يحب يكون معاه؟
لو فيكوا راجل واحد بس قال انه يحب يكون مع ايمن نور فى السجن يقولى على اسمه بس بما فيهم الجاج متولى صاحب الدكان اذا كان عايز ياخد شوية كاريزما من الرمز . يابنى انتم أجين من الجبن نفسه, ظواهر صوتية وبس . قال نخاف منكم قال, لا حقيقى ضحكتنى , لا ياسيدى احنا صدعنا بس من الابواق اللى عماله تكلكس على الفاضى والمليان دماغنا واجعنا انما يظهر لازم نعيش مع الصداع . معلش
نسيت ياشاطر تجاوب تمن العماله بقى كام دلوقتى؟

مراقب مصري يقول...

أعتقد حضرتك أفضل من تخبرنا بتمن العمالة بسبب خبرتك العريضة مع الأجهزة الأمنية وطبعا واضح جدا إنه بالرغم من أنك خايف تكتب إسمك وبتكتب بدون اسم لكن في الوقت نفسه بتتكلم بصيغة الجمع على أساس إنك مش بتمثل نفسك ويبقى فعلا السؤال الخالد اللي حضرتك تقول لنا عليه هو تمن العمالة بقى كام دلوقت؟ ويا ترى مبسوط وانت مخبر؟ شعورك إيه وانت بتدي تقارير لأسيادك في الجهاز الأمني اللي مسرحك؟ وبتقبض في ظرف؟ ولا فاتحين لك حساب؟ حكي لنا عن خبراتك الإنسانية التي أدت بك أن تبيع نفسك وضميرك لجهاز أمني؟ هل ضغطوا عليك؟ هل احتجزوا أحد أقاربك كما نسمع في مثل هذه الحالات؟ ربما انتهكوا عرضك أو عرض عزيزا لديك أو عزيزة حتى يجبروك على العمل لأجلهم... أخبرنا بتجربتك وسنتعاطف معك ونقلب الدنيا على دماغهم وما تخافش كلنا هنقف معاك

غير معرف يقول...

هاهاهاهاها انا مش عارف امسك نفسى من الضحك. انا هابقى اجى هنا اضحك قبل ماأشتغل. بقى انت عايز تعرف شعورى, ليه .. هاتسرحه. هاتتعاطف معايا وتقلبها عليهم. لا لا لا مش ممكن مش عارف امسك نفسى من الضحك. طيب ياحاج جرجير اديلى اماره. ده الرمز الهمام اللى كل قوى الشعب بتأيده واللى الجميع بيحبه سعادتك مش عايز تونسه وتاخد شوية كاريزما وشخصية منه هاتتعاطف معايا انا؟ هاتلطملى على خدك ولا هاتعملى مظاهره فى نص البلد ولا هاتكتب فى الدكان انا متعاطف معاك.
انا بس حبيت أوريك أنك أجبن وأكبر منافق فى البلد دى.
عقوبة العماله يااستاذ ممكن اقولها ليك. تمن العماله انت بقى اللى تقولى عليه. ان شاء الله لما اشوف طلعتك البهية هابقى اقولك على اسمى. كنت فاكرك انت ولا اى حد من اللى بيجعجو رجالة انما كالعادة .......

مراقب مصري يقول...

العزيز المجهول

أنا آسف إني افتكرتك عميل للأمن لأن شكلك كدة طلع الأمن نفسه يا باشا... وحضرتك مش تقولي طيب ناويين تشوفوني إمتى عشان أبقى آخد بالي؟
يا راجل حد يكشف نفسه كدة للناس اللي بيتابعهم؟ إنت ما تعرفش إنه لما وليد الدسوقي وقع في الوقعة دي دفع التمن بإبعاده عن منصبه؟
قةل لي بقى بالمناسبة هو وليد فعلا راح المطافي ولا اتحول استيداع؟ ولا بيقف ينظم المرور في الشارع؟

طب لعلمك أنا بجد متعاطف معاك ولو أعلنت عن اسمك ورتبتك ممكن أشجعك تنضم لكفاية ونعمل قسم جديد في كفايو يبقة اسمه مخبرين من أجل التغيير ونتوسع شوية ونعمل صف ظباط من أجل التغيير وأمناء شرطة من أجل التغيير وصولا إلى لواءات من أجل التغيير

يسعدنا يا سيدي إننا بنطري على قلبك قبل الشغل وبتفرفش شوية

إحنا يهمنا فرفشة حضرتك
نهاره أبيض

غير معرف يقول...

مش ممكن. مش عارف امسك نفسى من الضحك بجد. لا بجد بجد شربااااااط. تاخد بالك تعمل ايه يعنى؟ هاتلبس بدلة وكرافته وتتشيك على سنجه عشره وتتكلون ولا هاتجرى على المطار طيران ونجيبك من قفاك من الطيارة. ماتقلقش ياسيدى أكيد هابعت ليك مرسال لما ابقى عايزك. بس المشكله هايقولولى جايب كلب بيهوهو ليه مكنت خليه يهوهو على النت هو احنا ناقصيين صداع.
ياسيدى الف شكر على تشجيعك للانضمام لكفاية , طيب مش تقولى الاول هاقبض كام؟ ولا هانضم بلاش كده؟
هو الصراحة اللى ناقص كفايه حاجه واحده بس انها تقول كفاية من أجل العمالة.
يابنى ماحدش بيلوث سمعته واسمه عالشان ينضم لحركة مشبوهة.
المهم أنت عرفت دلوقتى مش عايز اقبض عليك ليه؟ لما أقبض عليك , مين اللى هايفرفشنى وهايطرى على قلبى وبالمره خلينا نتابع اخر اخبار الهبل والشيطنه. عايز اعرف الهبل وصل لحد فين؟
مساءءءءءءءءءءءءءء الخير
انا شغلى بليل مش الصبح , عرفت انا شغال فين؟
انا نسيت ان معندكش مخ صحيح. بس دمك خفيف.

غير معرف يقول...

أوبس ده انت كاتب ان معندكش دم كمان. يالا معلش ماهو يمكن اتبخر من خفته. أمال انت عايش ازاى يابنى؟
تحب انقل ليك دم

مراقب مصري يقول...

العزيز المجهول

طمنتني يا راجل... يعني طول ما انا باضحك الناس كدة محدش هيقبض عليا؟ ممتاز... ليك عليا كل يوم فرفشة وتطرية ع القلب للصبح... بس ليه معلق على تدوينة أيمن نور بس... دا في شوية تدوينات بعدها عن ظباط بيتحاكموا وأمناء شرطة محبوسين وظباط بيتفصلوا من الخدمة عشان قللات أدب ووزير داخلية موروط ورطة سودا وظبط بيتبرعوا بدمهم لمرضى السرطان عشان لو ما ماتوش من السرطان يموتوا بالتسمم الدموي... تعالى كدة وقول لنا رأيك واضحك شوية... آخر ظابط بيتحاكم دلوقت بس عشان ضرب مواطن على قفاه... تخيل؟ مجرد القفا بيخوزق الظابط ويسجنه؟ ممتاز صدقني... آدي يا عم الفرفشة بتاعتنا ولسة هنفرفشك أكنتر واكتر...إنت بس تابع المدونة ولسة فيه مفاجآت جديدة كل يوم

غير معرف يقول...

هو فى حد بيقبض على أراجوزات. يلا ياعم خلى الشعب يتبسط وحتى توفر علينا تمن الاراجوز. بس بقى كده انت عكننتنى. ماتطمنش اوى يعنى.
ماشى ياعم ميرسى على الصور الحلوه اللى انت حاطتها فى الدكان. كمل يابنى الرسم السيريالى وقول كل اللى فى نفسك ماتحرمهاش من حاجه
الشغل كتير النهارده بس اكيد مش هارحمك ولا احرمك من زياراتى. برضه مش عايز تقول تمن العماله كام؟
وراك وراك لحد ماتقول.

alnadeem يقول...

انت يا حبيبي يا اللي قاعد تهدد الناس بالاعتقال
إستهدي بالله كده يا راجل
قول كلام غيرده
يا حبيبي الموضوع مش في أيدك انت حيالله عبد المأمور يقولوا لك اقبض علي ده تقبض سيب ده تسيب
بس هو ده دورك
فما تقعدش تعمل لنا فيها عبده المهم الله يكرمك عشان مش ناقصين صداع
هذا اولا
ثانيا بقي
يا سيدي الفاضل انت ليه واخد الموضوع علي أعصابك وبشكل شخصي

مضايقك ايمن نور خلاص يا سيدي ايه المشكله اهو في السجن
بتحب حسني مبارك؟
أيه المشكله برضه أهو في الحكم وقاعد وناوي يجيب ابنه
يعني ما فيش حاجه المفروض تنرفزك
كل حاجه تمام يا سيدي
والريس قاعد مكانه وربنا يمدد ويطول في عمره كمان عشان تنبسط
خلاص
انبسطت
هدي بقي اعصابك عشان اللي جاي في البلد دي ما يعلم بيه الا ربنا
ولله الحمد انا واحد دارس تاريخ وبفهم شغلي كويس
بالظبط كده زي ما حضرتك بتعرف تقبض علي واحد هربان او مشتبه فيه أو تلفق قضيه
انا بعرف اقرا التاريخ كويس
ده اللي انا درسته
وده اللي اتعلمته
وده اللي خدت فيه شهاده من الجامعه
وبقولهالك من الأخر
غرقانه غرقانه يا معلم
ع الكل
وياريت تنسوا موضوع التهديد بالاعتقال ده لأنه ماعادش هيجيب نتيجه
لا معانا ولا مع غيرنا
بالعكس يا افلح هتبوظوا صوره النظام بتاعك اكتر ما اهي بايظه خالقه
والله العظيم ودي نصيحه مخلصه لوجه الله من مصلحتكوا دلوقتي ما تجوش ناحيه حد

وخالص تحياتي

غير معرف يقول...

طيب أنا أسمى محمد الشرقاوى..
ورينى همتك يا معلم..
قولى أى حاجه كده تعرفنى بيها أنت مين..
سيبك من جعجعة النديم والحج جرجس..
خليك معايا انا ..
انا حتى سبت كفاية..
مبيدفعوش كويس ..
اتنيل بقى وقولى انت بتشتغل فين بليل ماهو فيه كارول والتونسى ..
بتشتغل فى انهى واحد..
الواحد برضه عرف النصيحة متأخرة قلنا نروح نشوف حد تانى يمولنا غير كفايه..
بيوزعوا الفلوس على نفسهم يا جدع:)
ومش بيدوا الشباب وانت عارف بقى ..
ابقى قولى ..
وبلاش تهددنى بالاعتقال ولا تهدد غيرى ..
نفذ علطول يا معلم وهناك ممكن تديله كمبيوتر وهيدلعك عالاخر..
هيكتبلك بوستات جامده..
ومعنديش مانع ابقى مع ايمن نور ده الراجل انتوا خليتوة بطل وشريف حتى لو كان حرامى وكداب..
ويعنى ماهو برضه منكم وشبهكم..
ولا دلوقتى بقى كخه

غير معرف يقول...

طيب مش تقول كانوا بيدوك كام؟
ولما تكبر شويه يابيبى ابقى اقولك انا فين؟
لما دايرة معلوماتك تكبر عن الاتنين دول هاتبقى تعرف
كان نفسى اكمل معاك انما مش فاضى
معلش
فرصه تانية ياشرقاوى

غير معرف يقول...

مسالة التشكيك فى ابمن نورونزاهتة ومدى صدقة يمحية انة على الافل مش من اعضاء الحزب الوطنى اللى هوة ملئ بالفاسدين والمحتكرين ولو كان يريد منصب اعتقد انة بقدراتة الذاتية التى لايشكك فيها احد كان ممكن يصل الى مواقع مسؤلة عن صنع القرار داخل لجنة السياسات على الاقل وقد عرض علية سنة 2000 ان ينشئ حزب سياسى هو وجمال مبارك واتصل بة حسنى مبارك لاجل هذا ولكنة رفض اما لماذاتم اللموافقة على اخراج حزبة الى النور دون عن ا حزاب اخرى فهذا بالطبع ضغوط امريكية لاعلاقة لة بها غير ان امريكا ترى فيةنموذج لشخصية لبيرالية ممكن الممكن ان تستطيع ان تحكم مصر بالديم قراطيةوفي نفس الوقت قادر على تحدى الاخوان المسلمين دون اللجوء الى اعتقالهم اوتعذيبهم حتى لايكتسبوا تعاطف الشعب ولو كان ايمن حتى شخصية انتهاذية منافقة فيجب علينا نحن كشعب التعاطف معةواخراجة من السجن لانة مسجون بتهمة انة وصيف رئيس الجمهو رية وليس بسسب التوكيلات والذى بداخل حزب ايمن نور يعرف ان الاف التوكيلات صحيحة مائة بالمائة واقسم باللةويكفى حزب ايمن نور انالعشرات من شبابة قد قبض عليه فى احداث مساندة القضاة واحداث 6ابريل امثال احمد ماهر واسراء عبد الفتاح والذى يذيدنى حماسة لايمن نور هو تايد معارضين امثال كمال خليل لة والسلام

غير معرف يقول...

ايمن نور هو زعيم الامة القادم باذن الله لانه نصير الفقراء والمساكين لانه يريد الحرية لهذه الامه التى اهدرت دمائها فى الداخل والخارج متى تاتى لنا بالنور يانور متى يعلى شان هذى الامة اصمد اصمد وواصل فالنصر قريب باذن الله قال الله تعالى فى كتابه العزيز الا تنصروه فقد نصره الله ... الله معك ونحن كلنا معك اخوك الصغير محمد

غير معرف يقول...

الزعيم هو الزعيم ونحن عيناك علينا زعيما يانور ونحن معلقين عليك كل امالنا وطموحنا وطموح الامة ان تنقذنا من الفساد ومن الحزب اللى يقال انه وطنى ولكن اين الوطنية فى حزب يرئسه عز الذى اوشك ان يشترى البلد هذا ليس حقد صدقونى لكنى رايت امام عينى اعفاءات ضريبية لاحمد عز تتعدى الملايين فى احمد الجمارك يلا الحمدلله ولكننا ننتظر الامل والامل فيك يا نور

غير معرف يقول...

صدق او لا تصدق بسم الله الرحمن الرحيم
الحاج ابو الهيثم للعلاج بالقران الكريم لعلاج جميع الامراض المصتعصية سواء كانت هذه الامراض ناتجة عن اعمال سحرية او امراض عضوية مثلا المشاكل الزواج او المشاكل الطلاق او التاخر عن الزواج او التاخر عن الحمل او الامراض مثلا السكر وكل الامراض لمزيد من الاستفسار يرجي زيارة موقعن او الاتصال بنا عبر الارقام التالية 0020101473823 او0020162720790 عبر الايميل ham.ed82@yahoo.com او الحاج ابو الهيثم اwww.aboualhaitham.com
اما با النسبه لرجال الاعمال من خلال الرؤيا والبحث هناك مفاجات كثير وكثير جدا بمشئة الله نشرح الصدور وتسير العقول وتثلج القلوب وتنجح الاعمال فكل ما يريد معرفة المفاجات يتصل بنا الحاج ابو الهيم
0020102588311,,,,,.,,,
الحاج ابو الهيثم من فلسطين ومقيم في مصر

غير معرف يقول...

أخ أبو جوري: .السلام عليكم .هل لديك معلومة دقيقة حول ما إذا كان نظام الدراسة اختلاط لكلا الجنسين؟ .و مما أثار استغرابي خلال قراءتي لشروط الالتحاق بالبرنامج للطالبات أن الشركة غير ملتزمة بأية مصاريف تتعلق بالمحرم خارج المملكة. و هذا الأمر يخالف عرف و سياسة الابتعاث في الدولة حيث تحرص مثلاً وزارة التعليم العالي على تحمل تكاليف اقامة المحرم مع الدارسات في الخارج. ما رأيك في هذا الأمر أبا جوري؟ ألا تتفق معي بأن الشركة طالما أنها تعمل على توفير نوع خاص من التعليم لطلابها السعوديين مطالبة أيضاً بأن تسهم في بناء شخصية متمسكة بهويتها الاسلامية و الوطنية و هذا في النهاية سوف يكون من صالح الشركة ؟ أم تراني بالغت في سوء الظن بمقاصد واضعي نظام الابتعاث في الشركة؟ إن ما ساءني هو مسألة عدم وضع أي اعتبارات دينية في ابتعاث بناتنا السعوديات. لا نريد تشجيع بناتنا و اهاليهم على أن يقدموا التعليم على أي شيء آخر و يتجاوزا ضوابط الشريعة خاصة و ان الجميع يعلم بأن المردود المادي بعد تخرج هؤلاء و استلام وظائفهن في الشركة سيكون مغرياً بالنسبة للكثير من أولياء الأمور مما سيجعلهم يتنازلون عن مبادئهم طوعاً. تحياتي

لكي لا ننسى دم أحمد علي مبروك