24‏/01‏/2007

تعالوا مع بعض نحتفل بكرة بعيد شرطة إسود ومهبب على دماغهم


بكرة الخميس يوافق 25 يناير
يعني عيد الشوربة- اللي هي الشرطة لا مؤاخذة - وطبعا اليوم ده ذكرى
دفاع رجال شرطة محترمين من خمسة وخمسين سنة عن عرض الوطن وكرامته
أمام قوات الاحتلال في مدينة الإسماعيلية الباسلة

دا كان زماااااان أيام ما الشرطة دي كانت رجالة وطول عمر ولادك يا بلدنا رجالة

دلوقت الشرطة - اللي كانت في خدمة الشعب بحسب الدستور - بقت مش بتدافع عن عرض الوطن
لكنها بقت هي اللي بتنتهك عرض الوطن
وعصاية المقشة الشهيرة دليل على "الوضع" اللي آلت إليه الشرطة في المخروبة اللي كانت محروسة سابقا

المهم


بكرة الخميس 25 يناير فيه مظاهرة الساعة أربعة عصرا قدام نقابة الصحفيين
احتفالا بعيد اللشرطة الأسود المهبب على دماغهم
وزي ما قال أسد
بنحتفل بالشهدا الشرفا من الشرطة المحترمة بتاعة زمان
وبنعكنن عيشة أم الشرطة اللي مش شريفة بتاعة دلوقت
وزي ما قال شرقاوي نفسد عليهم أجوائهم الاحتفالية اللي بيجاملوا فيها القائد الأعلى للشرطة الرئيس مبارك
ووزير الداخلية سابقا (التعذيب حاليا) حبيب العادلي

طبعا الموضوع مش محتاج تجهيز ولا تفكير

الموضوع دا يستاهل التظاهر من أجله

وعايزينها وقفة رجالة بجد
عايزين الناس دي توصل لها رسالة واحدة
واضحة وبسيطة

مش هانسكت
مش هانخرس
هانفضحكوا واحد واحد
من أصغر أمين شرطة كلب مارس التعذيب ضد مواطن
لحد الرئيس الأعلى لجهاز الشرطة
مرورا بالأخ الإرهابي وزير التعذيب العادلي

بس خلاص انتهى البيان
نشوفكوا بقى في المظاهرة بكرة الساعة 4 قدام نقابة الصحفيين

هناك 21 تعليقًا:

كلام الليل يقول...

باذن الله هنكون موجودين في التظاهرة

بالمناسبة يا حاج جرجس انت عندك خطأ تارخي صغير و هو ان الاحداث كانت في الاسماعيلية مش في بورسعيد
الرجاء ان انت تصحح الخطأ

Reformer1976 يقول...

أشكرك يا عم جيفارا
هي كل مدن القناة باسلة ع العموم

Epitaph يقول...

اي والله
ان شاء الله بالتوفيق


افضحوووووووووهم
:)

بالمناسبة
ايوة انا شفت فيديو عمرو اديب
حتي بالامارة سبتلك تعليق علي الموضوع هناك اول ما نشرته

بس مهزلة
عارف امبارح الساعة اتنين بالليل مش كنت عارفة انام و كنت مضايقة
قمت فتحت الكمبيوتر دخلت علي مدونتك عشان اتفرج عليه ههههههه

ناهيك اصلا ان ماما الزملكاوية
فرجتها علي الفيديو برضه
ههههههه

علي فكرة انا بلغت ادارة النادي الاهلي انك كفاءة و زميل كفاح... و سيبنا منشور في جميع ارجاء النادي عن الزملكاوي المتطرف عمر قناوي
و الاهلي قاهر الزمالك...هو الحل

تحياتي

Reformer1976 يقول...

وحضرتك بعون الله عندك مانع شرعي من حضور المظاهرات ولا حاجة؟
إحنا عايزين الدماء الجديدة
خلصي كلية وهاتي الشلة كلها وتعالوا خدوا موقف في دنيتكوا دي اللي مش باين لها ملامح
==================

بالنسبة للزميل عمر قناوي أنا باتصور إننا ما نتخذش معاه أي إجراءات... كفاية عليه عقاب السماء واختيار القدر له ليكون زملكاويا... وانا طبعا مابحبش النميمة والاغتياب
;)

alnadeem يقول...

ok
i will be there

Reformer1976 يقول...

عم النديم بذات نفسه

يا باشا إنت تشرفنا يا باشا
============

بالنسبة للأخت الفاضلة اللي عابت في الذات الملكية لسيادتك... أنا معرفهاش يا باشا... وهي حاولت تجندني يا باشا... لكن أنا قلت لأ الزعيم ما ينفعش نتآمر عليه... وحتى لو كان زملكاوي... برضه مسيره يرجع لعقله
-----------------

نراك في المظاهرة بقى

zenzana يقول...

فين لنكات صلاح جاهين، الفاجومي، وامل دنقل؟

esraa يقول...

للأسف انا مش من كايرو
بس مش مشكله احنا معاكم بقلوبنا, ربنا معاكم بجد ويحميكم.

Reformer1976 يقول...

زنزانتنا الرائعة

اللنكات اتحطت في مكانها يا باشا
-----
هنشوفك بكرة في المظاهرة؟؟

Reformer1976 يقول...

العزيزة إسراء

على الأقل تقدري تعلني عن المظاهرة عندك في مدونة الأميرة المفقودة

3rby يقول...

بص يا جرجس
انا قلبت يافطة من المظاهرة اللي فاتت
بس مالهاش علاقة بالموضوع
مكتوب عليها كفاية تجويع
اجيبها ولا لا
ايه رايك يعني

zenzana يقول...

ابيتاف حبيبتي حرصا على حقوق الملكية الفكرية، شعار الاهلي هو الحل منسوب لشخصي المبجل، فا بعد اذنك قوللي زى ما قالت زنزانة الاهلي هو الحل، على الاقل احسن بعض المندسين ينسبوا الشعار لحد عاكف علينا وعلي نفسه!!
لذا وجب التنبيه
وشكرا
جرجس معرفش اذا كنت هروح ولا لاء؟
بصراحة ما ليش مزاج!!
ممكن تشتم ، مصرح لك

Reformer1976 يقول...

عزيزي عربي

خلينا بالأكتر نركز فيما يخص الاحتفال بد بأبطال الشرطة بتوع زمان وإدانة ممارسات الشرطة بتاعة دلوقتي

فكر في لوحة مبتكرة واعملها من هنا لغاية ميعاد المظاهرة

Reformer1976 يقول...

زنزانتنا الرائعة

أنا عارف إحباطك من الليلة بتاعة المظاهرات... بس خلي بالك إحنا بنرجع نكتسب زخم من تاني... زخم كنا فقدناه من شهر مايو اللي فات... طبعا المظاهرات لوحدها مش هي القضية... لكن الزخم نفسه مهم... التعبئة الشعبية مهمة... إظهار للنظام إننا مش ساكتين ولا مأنتخين مهم جدا... نرجع تاني نرد على كل مناسبة بفعل والتظاهر فعل والاعتراض فعل والاحتجاج فعل والكتابة فعل ونشر الفيديوهات فعل وفضح القضايا القديمة فعل والوصول بصرخة الاعتراض على الأوضاع الراهنة للناس اللي في الشارع فعل

بندن في مالطة؟ يمكن... لكن مين قال إنه الآدان في مالطة مالوش لازمة؟ مين قال إن رسالتنا مش بتتسمع ومش بتأثر؟

لو ما جيتيش هبقى متفهم موقفك تماما لأنه إحباطك منطقي ومبرر بس أنا بقول ما قدامناش غير إننا نعافر وما نهمدش أبدا

لو بطلنا نحلم نموت
لو عاندنا نقدر نفوت
لو عدينا مرة خلاص
لو ردينا ضاع الخلاص
حبة صبر حبة حماس
يبقى الحلم صورة وصوت
لو بطلنا نحلم نموت

وانا شخصيا مش هاموت

tota يقول...

الحج جرجس
طمنى على المظاهرة ايه الاخبار

انت عارف انا غصب عنى مقدرش ادخل مظاهرة

انا شرحتلك واكيد فاهمنى

تحياتى

Reformer1976 يقول...

المظاهرة كانت جيدة جدا... غالبا كل ما المتظاهرين والمنخرطين في حدث ما بيكونوا مستقلين خالص كل ما بيكون الحدث أنجح

مظاهرة النهاردة تم الدعوة لها امبارح العصر بس، لكن الحضور كان معقول جدا وتركيز الناس كان رائع... تحية بجد لكل راجل من الرجالة اللي كانوا موجودين النهاردة (ولا يستثنى من هذا البنات اللي بمليون راجل وأولهم طبعا الرائعة أسماء علي)ـ

zenzana يقول...

وليه بس التنميط دا؟
شكر للرجالة اللى حضروا النهاردة؟
واحنا لاء؟
او لازم يتقال عننا البنت اللي بمليون راجل؟
طب وفيها ايه لما تقول الراجل اللى يساوي بنت؟

zenzana يقول...

شكرا ع اللنكات شوفتهم دلوقتى

ناقص اللون البنك اللى انت غيرته، هو فين؟

سيبها على الله يقول...

والله ياحاج جرجس مجهود تشكر عليه للغاية ولولا تواجدى خارج البلد ماكنت فكرت دقيقة واحدة فى عدم التواجد معكم ...ربنا يعطيكم الصحة والعافية...بس لى رجاء عندك ارجوان تنسى موضوع الاستاذ محمد عمارة فيما كتبه عن الاخوة المسيحيين وخاصة ان الرجل قام بالاعتذار وجل يا أخى من لا يسهو واعتبرها زلة لسان والمسامح كريم ....
ماننساناشى وحاول الزيارة من آن لآخر ...

Reformer1976 يقول...

عزيزي سيبها على الله

ملحوقة في المظاهرات الجاية

بالنسبة لمحمد عمارة ما قاله وكتبه كان قلة أدب وعادي الأدب للأسف ما بيشتروهوش دا ليه علاقة بالتربية والأخلاق... وهو ما عندوش من ده... حتى اعتذاره كان معيبا... وهو مش جديدة عليه قلة أدبه في الحديث عن المسيحيين... أتمنى أن اختلافنا على محمد عمارة لا يفسد للود قضية

أنا دايما باجي بلوجك وإن كنت في مرات لا أعلق

Reformer1976 يقول...

العزيزة زنزانة

الرجولة ليست هي الذكورة
الرجولة قيمة لا علاقة لها خالص بالجنس والتمييز بين الجنسين
يا ريت المدعوين رجالا في هذا البلد يصيروا رجالا بجد

لكي لا ننسى دم أحمد علي مبروك