25‏/01‏/2007

إمبارح كنت مع العظيم عبد الرحمن الأبنودي


امبارح كنت مع الأستاذ الرائع عبد الرحمن الأبنودي أحد أروع شعراء العامية في تاريخنا المعاصر... بيني وبينكم ما كنتش مصدق إني قاعد مع هذا الرجل المذهل... عبد الرحمن الأبنودي يا جماعة طلع مش بس شاعر رائع لكن الراجل دا إنسان جميل فوق ما حد يتخيل... ابن نكتة لأبعد حد ومتواضع بشكل يعجز اللسان عن وصفه... ابتسامته الساحرة تخليك مش عايز ترفع عينك من على وشه المصري على حق

أول حاجة قلتها للراجل الرائع ده إن التاريخ يا أستاذ أبنودي لسة ما اداكش حقك... بس مسير التاريخ يفوق ويعرف غلطه ومسير الناس في بلادنا تعرف يعني إيه عبد الرحمن الأبنودي... عبد الرحمن الأبنودي لمن لا يعلم مش بس أحد أروع شعراء العامية الذين عرفتهم مصر لكنه رجل كرس نحو ربع قرن من عمره لأجل التأريخ العلمي والموضوعي لأحد أعظم أدبيات التراث العربي على الإطلاق وهي السيرة الهلالية التي طاف وراءها مدن الصعيد بمصر بلد بلد ونجع نجع عشان يجمع أجزاء سيرة بني هلال ثم من مصر وصعيدها الجواني إلى تقريبا كل الدول العربية التي تتواجد فيها بقايا قبائل بني هلال وغيرها من قبائل العربان التي تحفظ السيرة الهلالية وترددها وتغنيها.... والرجل بما قام به ليس فقط أنه سجل وجمع أجزاء السيرة الهلالية كلها وأرخ لها لكنه حفظ هذا التراث القيم - هو كنز ثقافي لا يقدر بمال الدنيا للي يدرك يعني إيه تراث - للتاريخ لأجيال بعد أجيال لذلك فمن حقه علينا جميعا أن نكرمه ونوفيه حقه وهو بيننا

حكيت مع الأستاذ الأبنودي عن حاجات كتير منها أحوال بلدنا واللي بيحصل في بلدنا والطائفية البغيضة اللي بتطل براسها علينا بين الحين والآخر وافتكرنا سوا قصيدته الرائعة التي كتبها للقدس وشعبها المصلوب بيد اليهود... تلك القصيدة الرائعة التي غناها الراحل عبد الحليم حافظ في لندن عقب هزيمة يونيو 1967 وتقول كلماتها


ياكلمتي لفي ولفي الدنيا طولها وعرضها .
وفتحي عيون البشر للي حصل علي ارضها
علي ارضها طبع المسيح قدمه
علي ارضها نزف المسيح ألمه
في القدس في طريق الآلام ..وفي الخليل رنت تراتيل الكنايس
في الخلا صبح الوجود انجيل
تفضل تضيع فيك الحقوق لامتي ياطريق الآلام
وينطفي النور في الضمير وتنطفي نجوم السلام
ولامتي فيك يمشي جريح ..ولامتي فيك يفضل يصيح
مسيح ورا مسيح ورا مسيح علي أرضها
تاج الشوك فوق جبينه وفوق كتفه الصليب
دلوقت ياقدس ابنك زي المسيح غريب غريب
تاج الشوك فوق جبينه وفوق كتفه الصليب
خانوه... خانوه نفس اليهود
ابنك ياقدس زي المسيح لازم يعود ..علي أرضها

طبعا الأغنية دي نادرة جدا وأنا حطيتها النهاردة عشان تسمعوها معايا مع إهداء شخصي لكاتبها الجميل عبد الرحمن الأبنودي ودا اللنك بتاعها للي حابب ينزلها

على فكرة الأبنودي دا اللي كتب
عدى النهار ، أحلف بسماها وبترابها ، أنا كل ما أقول التوبة ، الهوى هوايا لعبد الحليم و عيون القلب لنجاة طبعا، وآه يا أسمراني اللون لشادية وللرائع منير كتب شوكولاتة ، كل الحاجات بتفكرني ، من حبك مش بريء ، برة الشبابيك ، الليلة دي

أستاذ عبد الرحمن الأبنودي تحية لك من قلب مصر يا ابن مصر الوفي ومستنيين من تاني شعرك يِقَوِّم مصر من تاني ثورة وتحدي ف وجه كل ظالم ... ربنا يخليك لينا

هناك 18 تعليقًا:

مصرى متغرب يقول...

يابختك ياجرجس
بجد الابنودة ده عظيم وانا متفق معاك ان التاريخ لسه مادهوش حقة لحد دلوقتى

على فكرة شكرا على اللينكات الجامدة جدا الى فى مدونتك تصور انا اول مرة اخد بالى منها

ياريت لو تقدر تحطلنا لينك لأشعار الابنودى بس بصوته وخصوصا قصائد الاسطى حراجى العامل بالسد العالى الى زوجتة المصون

Aoossa يقول...

بجد أنت محظوظ
قعدت مع الأبنودى مره واحده
فعلآ الأبنودى شخصيه لها وزنها
تحس أنه معجون بمية النيل
والكلام بيخرب منه متسرسب
بس مترتب
أغنية عدى النهار بصراحه أبداع
أنا بحب أسمع حكاويه
حتى لما كان بيحكى عن أيام السجن
وصفها بأنها أجمل أيام
حتى القصايد جوه السجن
كان ليها طعم تانى
===============
بس أزاى وفين ياجرجس قابلت الأبنودى
الله يرحم زمان
كانت قعدتك طول اليوم مع سيد العجلاتى بتلعبوا قمار
وفى الصيف بتروح تعوم فى ترعة الذمر
أخبار المظاهره أيه
هههههههههه
شكلك ماروحتش
فاكر أخر مره عملوا فيك أيه
مفيش داعى للفضايح
سلام يا جرجس عاكف

tota يقول...

الحج جرجس
بقى ده السبب امبارح انك انسحبت بدرى
بس محظوظ يا حج
طبعا من منا لم يعرف الابنودى او يسمع لكنته المحببة وطريقته الصعيدية
او يعشق الاغانى التى كتبها

تجميع السيرة الهلالية الحقيقة موضوع لم اكن اعرفه
شكرا على الاضافة وشكرا للشاعر الذى بذل هذا المجهود

تحياتى

Reformer1976 يقول...

عزيزي المصري المتغرب

باجهز لك مفاجأة لنك تحفة لقصائد الأبنودي ملقاة بصوته ولكنته المميزة جدا... طبعا جوابات حراجي القط لحرمه المصون مش بس شعر عالي القيمة فنيا وأدبيا لكنه توثيق وتأريخ أدبي لفترة بناء السد العالي

Reformer1976 يقول...

أسئوسة القمر

طبعا أنا باعتبر نفسي محظوظ لإني قابلت الراجل الرائع ده والبعض قد ينتقدني على أنني محدث نعمة ... بس عايز أقول لك القضية مش مجرد مقابلة واحد مشهور... بس بجد الراجل ده قيمة وتاريخ وفن وأدب وثورة...

أغنية عدى النهار هتكون الأغنية القادمة مع إهداء خاص لأميرة مصر والكونجو والعمرانية الغربية سابقا

قابلت الأستاذ الأبنودي في بيت الدكتور أحمد الجبالي لأني كنت رايح أسجل غنوة عند الدكتور الجبالي... طبعا مش سولو... كنت مع فريق ودي المعلومات المتاحة دلوقتي

بلاش بقى تقلبي في ماضيا الأسود... أنا ما صدقت ربنا تاب عليا من سيد العجلاتي وفتحي الصرماتي

إنتي ما جيتيش المظاهرة ليه يا بنتي؟؟؟ النهاردة بجد التظاهرة كانت قوية جدا وكان فيها تحدي جميل ووقفة رجالة بجد

على فكرة أنا ما ينفعش أعلن عن تظاهرة زي دي وما اروحهاش... دا مبدأ

Reformer1976 يقول...

رفيقة الفكر توتا

الراجل ده يا توتا له سحر خاص... لما يتكلم بجد تلاقي نفسك بتسكتي خالص وتنصتي وكأن تاريخ أمة بحالها بيتسرد قدامك... سمعت له قصيدة المسيح بتاعته وكأني تلميذ بيستظهر شطارته قدام معلمه وابتسامته الرائعة بجد بالنسبة لي كانت بتحسسني بقيمة جميلة ونبيلة جدا... وأثنيت جدا على رجوعه للساحة السياسية ثائرا من جديد على فساد السلطة وطغيانها وقلت له افتقدنا ده فيك سنين والراجل برضه ابتسم وقال إنه خلاص ما بقاش حد نافع يسكت

zenzana يقول...

طبعا انا بلاش اعلق ، كفاية عليك دش النهاردة، بما اني اقعدتك مع حد متخصص في السيرة، عشان تعرف اني مش بق علي الفاضي، وانا بتكلم بشكل علمي،
المهم انا المفضل بالنسبة لي من الابنودى احلى حاجة اتكتبت بالعامية واللهجة الصعيدية وهي حراجي القط، اللى بدأت احفظها وانا عندى ست سنين
واحلى اغنيتين وطنيتين بموت فيهم مصر عادت شمسك الدهبي لفيروز وعدي النهار، اللى بسمعها دلوقتى
ولكن شكرا على اغنية المسيح ، وان كان اخويا هيوجع دماغي ، ومش هيسيب لى الكمبيوتر بسببها.

اوساوس ما خلاص جرجس عدي بفلنكات
خصوصا انه سجل النهاردة في البوتاجاز قصدى التفزليون لما كان ف المظاهرة، واتكلم عن عيد الشوربة ولا محمد سعد في اللي بالى باللك
هههههههههه

Aoossa يقول...

بجد أنا سعيده بيك
عندك حماس وطاقه
وشكرآ على ألأهداء
وبالتوفيق فى موضوع التسجيل
بس ليه سؤال بالنسبه لنشاطك السياسى
هل التدوين هو اللى شجعك على هذا النشاط ونمى أحساسك بالمواطنه وضرورة المشاركه أم أنك بدأت النشاط ده قبل التدوين
خاصة أنك أتعرفت من خلال التدوين على ناشطين سياسين أن صح التعبير
؟
أرجو الأجابه

Reformer1976 يقول...

البداية طبعا كانت التدوين والتجربة كانت ثرية جدا ومن خلالها اتعرفت طبعا على الناس المذهلة اللي بجد بتحلم بتغيير مافيش حل تاني غير إنه يحصل وإلا هنموت

قبل التدوين كنت متابع من بعيد لبعيد أول مظاهرة ليا كانت وقفة الشموع في ذكرى مذبحة السودانيين الشهر اللي فات

إدراكي يا أووسة إننا داخلين على مصيبة سودا ونيلة ولا تقارن بكل السواد اللي عدى ودا مخليني مستعد أعمل كل اللي اقدر أعمله عشان نمنع المصيبة دي إنها تحصل... بس اللي يغيظك إن الكل شايف المصيبة اللي داخلين عليها وعادي جدا الناس في بيس فظيع

Reformer1976 يقول...

زنزانتي الغالية

بالعكس أنا انبسطت جدا من الحديث النقدي حول تأريخ وتأصيل السيرة الهلالية وفي النهاية أجمعنا على أن دور الأبنودي كان عظيما في تأصيل السيرة والترويج لها والتعريف بها ودا دور عظيك في حد ذاته وفي النهاية الرجال لا يقاسوا بما يقولون أنهم فعلوه بل بما يسجله التاريخ أنهم فعلوه بالفعل... وأعتقد أننا جميعا متفقون أن الرجل بالفعل فعل الكثير

zenzana يقول...

ايه دا؟ هو النت رجع عندك؟

karakib يقول...

يا بختك
شكرا علي الأغنيه

Reformer1976 يقول...

كراكيب العزيز

إنت بس تحلم وأحلامك أوامر

جبهة التهييس الشعبية يقول...

إيه يا عم جرجس

إنت بتقول لي عامل موضوع عن ابوكي ويطلع موضوع عن الابنودي

انت بتستدرجني زي الشباب اللي بيضحك ع البنات ويقول: ماما نفسها تشوفك وتسلم عليكي بس هي عيانة في البيت تعالي اعملي لها شوربة؟

Reformer1976 يقول...

يا بنتي أنا حاطط لنك للوالد مسميه جيفارا مصر في السايد بار بتاع المدونة ونفسي أكتب عنه من زمان... بس أدي احنا فيها... خدي لي ميعاد منه في مجلس قيادة السطوح وأنا أجيله المقطم مخصوص... إنتي متعرفيش نجم دا بالنسبة لي غلاوته أد إيه... إعملي لي بس الميعاد وأنا أكتب مش بوست واحد لكن نعمل سلسلة حوارات مع هذا الرجل الجبار أحد أروع ثوار مصر... أحمد فؤاد نجم
هتعملي لي الميعاد ولا هتنفضيلي؟؟؟

غير معرف يقول...

funny_lolo:-
أنا أول مرة أشوف البلوج بتاعك ده النهاردة وأنا بدور عن أي معلومة عن الشاعر الكبير الأبنودي وبصراحة إنت ألهمتني الطمأنينة والراحة وشيلت الخوف من قلبي اتجاه شخصية عظيمة زي الأبنودي خصوصا وأنا معايا معاد معاه بكرة لعمل حوار لمشروع التخرج ، مرسي ليك ^_^
يا ريت بس ندعي للشاعر الكبير سنا ومقاما عبد الرحمن الأبنودي لإنه عامل عملية في عنيه إن هو يقوم بالسلامة ويرجع زي الأول وأحسن
:-)

Reformer1976 يقول...

العزيزة لولو

الشاعر الجميل عبد الرحمن الأبنودي هو أحد العلامات الفارقة بالفعل في تاريخ شعرنا العامي وأغانينا التي لها معنى عبر النصف قرن الأخير أو يزيد

وبالطبع هو ككل البشر له ما له وعليه ما عليه ومن منا بلا خطية؟؟ ربنا يشفي شاعرنا العظيم ويقومه بالسلامة

غير معرف يقول...

يا ريت كل الشعراء زي عبد الرحمان الابنودي و الله احنا بنحبك اوي اوي يا خال

لكي لا ننسى دم أحمد علي مبروك