٠٣‏/٠٢‏/٢٠٠٧

ضحية كليب الضرب ع القفا يبيت ليلته محتجزا بين يدي جلاديه... مدد يا عادلي مدد

تحديث 2

النيابة تواجه ضحية كليب القفا بأميني الشرطة
وتأمر باستدعاء الضابط "كريم بيه" لسماع أقواله

مواجهة ضحية «الضرب علي القفا» بأميني الشرطة المتهمين وإرسال الـسي دي لـ«الصوتيات والمرئيات» بالتليفزيون

النيابة تقرر إرسال السي دي الذي يحتوي على فيديو الضرب على القفا لقسم الصوتيات والمرئيات باتحاد الإذاعة والتلفزيون لبيان مدى تطابق الأصوات والصور الخاصة بالمتهمين والمجني عليه

النيابة وجهت تهمتي استعمال القسوة والضرب والاحتجاز دون وجه حق للمتهمين

علي زلط صحفي التحقيقات بالمصر اليوم يحكي في تحقيق النيابة معه كشاهد عن كيفية توصله ومعه زميلته دارين فرغلي إلى المجني عليه في منطقة إمبابة بعد أن سمع عن فيديو الضرب على القفا بقسم إمبابة


علي زلط الصحفي بالمصري اليوم (الصورة من عرباوي)

أمينا الشرطة المتهمان يعترفان بواقعة الضرب على القفا وبما نشر في المصري اليوم

النيابة قررت صرف إيهاب - بعد التحقيق معه - إلى قسم إمبابة لاحتجازه على ذمة قضايا أخرى

(ملحوظة هذه القضايا الأخرى هي 4 قضايا سرقة ومشاجرات المفروض إنها قضايا قديمة للمجني عليه والمفروض صادر بيها أحكام وفجأة افتكروها بعد ما كانوا راكنينها على الرف... شفتوا الحلاوة)

على فكرة منظمة الهيومان رايتس واتش رأيها في التعذيب اللي بتنتهجه الشرطة وسوء المعاملة والحاجات الوسخة دي إن الموضوع سياسة ممنهجة وليس مجرد ظاهرة عابرة وبالمناسبة برضه دا رأي حوالي سبعين في المية من زوار مدونتي الذين يصوتون في الاستفتاء اللي فوق على اليمين في جنب المدونة ... ابقوا خشوا صوتوا وبصوا ع النتايج
وبالمناسبة هتلاحظوا إن الجحش اللي بيراقب المدونة مصوت بنفرين على إن التعذيب دا ليس إلا ادعاءات كاذبة من معارضين هدفهم تشويه صورة البلد

وبالمرة بقى

فاكرين الخبر بتاع المصري اليوم أول امبارح بتاع البنت اللي حاول اتنين أمناء شرطة في محطة مترو السادات يعتدوا عليها في عز الضهر والبنت جريت منهم وصدرها عريان وفيه شهود شافوها وشهدوا معاها؟

المصري اليوم النهاردة منزلة خبر جديد بيقول إن البنت اتنازلت عن البلاغ بعد تسوية الموضوع مع أسرة أمين الشرطة الذين تفاوضوا معها وجعلوها تتنازل عن القضية

مش باقول لكوا خلاص هي بقت وزارة البلطجة رسمي وعيني عينك... آه عليكي يا بلد لا مؤاخذة
==================================

تحديث
متابعات المصري اليوم الصادرة يوم السبت 3 فبراير

النائب العام يأمر بالتحقيق في واقعة «كليب القفا».. بعد كشف «المصري اليوم» عن هوية المجني عليه
والشرطة تحتجز الضحية لـ«تنفيذ ٤ أحكام قضائية»
=============================
آخر تطورات قضية إيهاب فاروق
ضحية "كليب الضرب ع القفا" في قسم إمبابة

من موقع عرباوي

كتب حسام الحملاوي مساء أمس الجمعة متابعا تطورات قضية إيهاب فاروق ضحية كليب "الضرب ع القفا" ما يلي

استجوبَت نيابة شمالِ الجيزة صحفي التحقيقات بالِمصري اليوم علي زلط مساء اليوم الجمعة لأكثر مِنْ ساعتين، باعتباره "شاهدا" في التحقيقِ الحاليِ في فضيحةِ العادلي فيديو جيت. وقد حضر محامي واحد على الأقل مِنْ المنظمةِ المصريةِ لحقوقِ الإنسان مَع علي أثناء الإستجوابِ.

كذلك فإن إيهاب مجدي فاروق حضر أيضا إلى سراي النيابة. ومن غير الواضح بالضبط سبب وجود إيهاب الآن في سراي النيابة. وهَلْ هو هناك كضحيّة أم كشاهد؟ أَو هَلْ هو هناك لأن ثمة تُهَمًا سابقةَ وجهتها ضدّه شرطةَ إمبابة؟ وبالنظر إلى الطريقة التي هاجمتْ بها الشرطة بيته، واحتجاز عائلته، وتَعقّبه لإعتِقاله، يكون الاحتمال الأخير هو الأرجح.

ويردف حسام قائلا: ما زِلتُ أُحاولُ أَنْ أَحْصلَ على تفاصيلِ في هذا الأمر، لَكن يَبْدو أن أميني الشرطةَ أحمد عبد الفتاح وأحمد الورداني، ومعهما أمين شرطة ثالث أيضاً موجودون حالياً في مبنى النيابة، وقد وصلتني معلومات غير مؤكّدةَ بأنه ربما تقرر حبس كل منهم 15 يومَا بانتظار التحقيق الجنائي فيما اقترفوه من سلوك.

وفي تمام الواحدة من صباح اليوم السبت يضيف الحملاوي تحديثا بأن إيهاب قد غادر سراي النيابة، وأنه سَيُقضّي الليلةَ تحت تحفظ الشرطةِ في قسم شرطة إمبابة، حيث كَانَ قَدْ تعرض للانتهاك قبلا. ويجري التحقيق مع إيهاب على ضوء تهمِ بالاشتباك في مشاجرة بالشارعِ، وهي على ما يبدو تُهَمٌ موجّهة ضدّه بشكل مسبق مِن قِبل ضبّاطِ قسم شرطة إمبابة، لكنها كَانَت قَدْ أبقيت على الرف إلى أن أعلنَ عَنْ قصّةِ انتهاكه. وحَضرَت محاميةٌ من المنظمة المصرية لحقوق الإنسان الإستجواب، وقد فشلت مساعيها في ضمان إطلاقِ سراحه، ولو حتى بكفالة، بحيث ألا يُقَضّي الليلةَ في قسم إمبابة، خوفا على أمنِه الشخصي.

ويضيف الحملاوي أنه التقى والأستاذ شريف عازر المحامي من المنظمة المصرية لحقوق الإنسان والذي كان مع زميلته - محامية إيهاب - أمام مركزِ شرطة إمبابة يجلبون طعاما وأغطية لإيهاب.

هذا وسيمثل إيهاب صباح اليوم السّبتَ في العاشرة صباحاً مرة ثانيةً أمام نيابة شمالِ الجيزة، لمُوَاصَلَة التحقيقِ.

محامو المنظمة المصرية لحقوق الإنسان قالوا بأنّهم "سَمعوا" بأن أمناء الشرطة الثلاثة تقرر حبسهم 15 يوما بانتظار التحقيقِ بتهمة استعمال القسوة، لكن ليس هناك تأكيد رسمي. ولكن على أية حال، سيمثل أمناء الشرطة الثلاثة صباح اليوم السبت في سراي نيابة شمالِ الجيزة للإستجوابِ.

هناك ١٣ تعليقًا:

^ H@fSS@^ يقول...

الله يخرب بيت اللي يزعلك يا شيخ
عليا النعمة لو ربنا نفخ في صورتي لانزل انا و اجيبلك بتارك من العدلي نفسه
ايه ده يا شيخ طيب اذا مكنش عشان البنت المسكينة اللي حتتجوزك
طيب عشان خاطر الناس
ذنبي انا ايه كل ما افتح مدونتك الاقيك حاطط بوست جديد انقح من اللي قبله
لأو ايه
برضو انا الاولانية
يعني مكتوب عليا الشقى حتى و انا مرمية اخر ما عمر ربنا

و بعدين تعالى هنا
ازاي تقول مدد يا عادلي مدد
انت زنديق
المدد يا ايها المتزندق لا ياتي الا من عند الله
ولذلك و بناءا عليه حرام انك تقول
مدد يا سيدنا الحسين
ومدد يا سيد يا بدوي
و مدد يا سيد يا قناوي
و مدد يا سيدي المرسي ابو العباس


و اللي انت بتقوله ده بدعة و البدعة ضلالة و كل ضلالة في النار
و انا و انت ورقصني يا جدع

ترارار ترراررا

zenzana يقول...

اهلا اهلا يا حاجة حفصة.
حد قالك تقعدي على باب المدونة مستنية اي حاجة عشان تعلقي؟
ثم يا ستي سيبيه يتحبس عشان نجيبله عيش وحلاوة .

tota يقول...

الحج جرجس
مستضيف مزز ما قبل وبعد الحداثة اللى فوق دول
كل ما ادخل اعلق الاقيهم قدام الباب

المهم ان السيناريو محفوظ وبيكرر نفسه تانى ومش هتفرق كتير الحكاية عن سيناريو عماد الكبير

لكن الفكرة ان هيكون دائما عقاب لكل بلطجى حتى لو الضحية واحد من الشعب وفى النهاية الكفة هتتعدل لان العدد من الشعب فى اللمون والعدد من الشرطة مش بالملايين

ووراهم وراهم لما ينضفوا ويدخلوا المرضى اللى عندهم المستشفيات المناسبة للساديين

تحياتى

Ahmed Rashwan يقول...

أنا كل يوم أسمع فلان عذبوه
أسرح في بغداد والجزاير وأتوه
ما أعجبش م اللي يطيق بجسمه العذاب
واعجب من اللي يطيق يعذب أخوه
عجبي

zenzana يقول...

خلاص يا توتا هانم، يلا بينا يا بت يا مزة قصدي حفصة
احنا انطردنا وكمان الواد جرجس
مش هيدافع عننا (عادته ولا هيشتريها)، زي بعضه كل دا عشان احنا ولايا

zenzana يقول...

اه بت يا حفصة يا توتا هانم روحوا عند ذو النون عشان تعرفوا سر خطير عني
هههههههه

مراقب مصري يقول...

العزيزة حفصة

الكفر ليس مني بل من الذين جعلوا من هذاالعادلي ليس فقط وليا يتقال له مدددد بل جعلوه إلها فوق العباد وف بلدنا المثل بيقول لو انت في بلد بتعبد العادلي حش وارميله
=============

زنزانة الجميلة

تفتكري لو جبتي لي عيش وكفتة مش هيبقى أحسن م الحلاوة؟
=============

توتا العزيزة

اللي بيحصل دا مهم جدا جدا وتلفيقهم واضح ومفقوس للكل وبعدين الواد إيهاب لاقي برضه اللي يدافع عنه... المنظمة المصرية لحقوق الإنسان وكلت محامية عنه واعتبرت نفسها مدعيا بالحق المدني عنه يعني الواد مش متساب... وزي ما انتي قلتي وراهم لما يعرفوا فعلا إن الله حق
=============

المخرج أحمد رشوان

أنا بقى باعجب من الحيوان اللي ورا دا كله ومن قطيع البشر اللي هو شعب بحاله موطي وبيقول له اركبنا حلالك بلالك ودوس دوس دا احنا معاك من غير فلوس
============

Ahmad Hegab يقول...

أستغفر الله العظيم

على فكرة احنا طلعلنا صوت و انشالله مش حيسكت و اللى بيحصل دلوقتى ابلغ دليل على ضعف نظام القفا

ايه يا عم جرجس انت بتحرض الناس علشان تصوت ما كفاية ان اللى بيراقب بيصوت

مراقب مصري يقول...

عم أحمد المصري

تخيل إن الحمار فعلا صوت وغالبا صوت مرتين ودا إن دل على شيء يدل على حسن متابعته والقيام بمهمته على خير وجه

Ahmad Hegab يقول...

والله الراجل يشكر اهو بيعمل حاجه بدل ما يلعب كوتشينه لانه اكيد معندوش فيفا على الجهاز

هىهىهىهى

بالنسبه لمظاهرة المصوريين انا اول حاجه مكنتش اعرف

تانى حاجه كنت مسافر

مراقب مصري يقول...

الفنان الجميل أحمد المصري

لأ ابقى شوف تعليقات البيه المخبر كمان في موضوعي أيمن نور وموضوع تطورات قضية القفا... هتضحك بعمرك

بالنسبة للمظاهرات... المظاهرات لسة جاية كتير... تتعوض
:D

شفت اللنك اللي انا حاططهولك في
السايد بار عندي في المدونة؟ حاجة كدة على ما قُسُم

:)

egypt يقول...

العزيزة الغالية بشدة وباحترام اقبلي مني التهنئة علي المدونة الصريحة الجميلة هذه ولكن هل تعلمين ان طريقة الحدق يفهم في المدونة هي ارقس وعلي العموم انا ادعوك لزيارة المدونة الخاصة بي وهي www.foregypt-egypt.blogspot.com

مراقب مصري يقول...

السيد إيجيبت

حضرتك أنا ذكر وليس أنثى وده واضح سعادتك من البروفايل بتاعي واسم شهرتي

لكي لا ننسى دم أحمد علي مبروك