٢٦‏/١٢‏/٢٠٠٦

أخيرا... إسلام نبيه مرمي في الحبس ... جرب طعم الذل يا إسلام

عاجل من شرقاوي
تأجلت جلسة عرض المتهم إسلام نبيه أمام قاضي المعارضات إلى العاشرة صباح اليوم الخميس 28 ديسمبر 2006... يا ريت نكون موجودين أمام نيابة جنوب القاهرة... بمحكمة جنوب بباب الخلق... وجودنا مهم بجد
تحديث هام عن شرقاوي
بكرة الاربعاء الساعه 9 ونص الصبح هيتعرض الظابط اسلام نبية ورضا فتحي امين الشرطة واللى قاموا بأغتصاب وتعذيب عماد الكبير بقسم بولاق الدكرور ..يا ريت نكون موجودين .. نقوى عماد ونقول لظباط التعذيب ان هو ده مصيركم




يا شرفاء مصر ابتهجوا
.
.
أخيرا جهودنا أسفرت عن شيء
حبس الكلب إسلام نبيه الذي اغتصب عماد الكبير بعصا المقشة
.
جلادك اترمى في الحبس على ذمة التحقيق
.
.
نقلا عن مدونة شرقاوي
وائل عبد الفتاح : مفاجات جديدة فى قضية عماد الكبير:ـ


حبس اسلام نبيه 4 ايام على ذمة التحقيق

ـ1. اصدر بكر احمد بكر مدير نيابة حوادث جنوب القاهرة قرارا بحبس النقيب اسلام نبيه معاون مباحث بولاق الدكرور وامين الشرطة رضا فتحى أربعة ايام على ذمة التحقيق فى وقائع تعذيب عماد الكبير
ـ2. وكان مدير النيابة قد انتقل الى قسم بولاق الدكرور وعاين موقع غرفة التعذيب المعروفة فى لغة البوليس بالثلاجة..كما عاين الاماكن التى وصفها عماد الكبير فى اعترافاته الكاملة امام النيابة
ـ3. وفى نفس الوقت تقريبا استدعى مدير النيابة خبيرا متخصصا لتقرير رايه حول مسالتين الاولى هل التصوير يمكن ان يكون مفبرك..؟ و ثانيا مضاهاة الصوت المسموع فى الكليب بعينة من صوت المتهمين اسلام نبيه و رضا فتحى
ـ4. وكانت النيابة طلبت عينة من صوت كليهما فى نفس الفترة
ـ5. تقرير الخبير وصل قبل يومين مؤكدا عدم امكانية فبركة اللقطات المصورة وان الاصوات الموجودة فى اللقطات هى لاسلام نبيه و رضا فتحى
ـ6. وبناء عليه اصدر بكر احمد بكر قراره السابق فى حضور كل من اسلام نبيه و رضا فتحى
ـ7. وينتظر ان يعرض المتهمين غدا على قاضى معارضات للنظر فى تجديد حبسهما حسب قانون الاجراءات

ملاحظة مهمة:هذه هى المرة الاولى التى يحبس فيها ضابط على ذمة قضية تعذيب
.
لسة فيه أمل يا مصر
.
.
مازلنا نطالب بمحاكمة المذنبين الحقيقيين في قضية اغتصاب عماد الكبير
التي هي اغتصاب مصر

.نطالب بمحاكمة وزير الداخلية كرئيس لجهاز الشرطة
.
.
نطالب بمحاكمة رئيس الجمهورية كقائد أعلى لجهاز الشرطة

هناك ٣٣ تعليقًا:

مُزمُز يقول...

ألف مبروووك للمصريين بجد أنا حاسس إني ممكن أتفاءل تاني مع إني كنت بطلت ما يسمى بالتفاؤل
بجد شكرا على متابعتك الدائمة لهذا الموضوع شديد الأهمية
تحياتي

غير معرف يقول...

ربنا يستر ومتطلعش حركة قرعة ويخرجوا منها ويرجعوا شغلهم سعرانين اكتر من
الأول
أحسن الواحد بقا يخاف يفرح فى البلد دى
أحسن يصعب عليهم فرحنا يقوموا يكتمونا
ميهونش عليهم ننبسط شوية
لااااااء
ازااااااى ننبسط يعنى؟


يا خوووفى يا بدران

مراقب مصري يقول...

مزمز

القضية ليست التفاؤل أو التشاؤم بل هي وجود الأمل في التغيير من خلال كل الأشياء الصغيرة اللي لما بتتجمع مع بعضها بتقلب الدنيا... فتتعدل

مراقب مصري يقول...

شهروزة الرائعة

هو طبعا الحبس على ذمة القضية مش معناه إنه اتسجن خلاص... بس معناها إنه القضاء جاد في محاكمة الكلب ده وفي إرساء العدالة... هنفضل متابعين الحملة وهنفضل متابعين القضية ومش هنرتاح حتى لو الولد اتسجن وهنفضل نفضح حوادث التعذيب في الأقسام وفي السجون لحد ما تتم محاكمة دولية للعادلي ولمبارك بصفتهما المسئولين الرئيسيين عن كل هذا الفساد

غير معرف يقول...

طبعاً هما فيهم العبر بس ليه اوصفهم بلفظ الكلب .. ده الكلب بيبقى وفى حتى ،
،
عموما انا شايف ان اخر حاجه جت فى كلام وائل وتقريباً هو ده قرار النيابة مقلقه شوية وهى وينتظر ان يعرض المتهمين غدا على قاضى معارضات للنظر فى تجديد حبسهما حسب قانون الاجراءات

.
يعنى ممكن يخرج بضمان اى حاجه ...
ويتم تحويل القضية لمحكمة الجنايات ،
على العموم هنشوف وفيه متابعه جديدة هنشرها بعد شوية .
تحياتى لتغطيتك الرائعة للموضوع

غير معرف يقول...

هو مش بتاع الفيديو بتاع القلام والتصبيع اتحبس
علي فكرة برضو فيه واحد ظابط اتسرح خالص في الغردقة بسبب انه قلع واحد طلع يقرب لاحمد نظيف وخلاه يبوس جزم العساكر واغتصبه في الطريق الصحراوي

بس زي ما قلتلك في البوست بتاع القلق الدولي
مش هارتاح غير لما يحس بعصايا في طي.. ويحس بالعزاب اللي بيحسه اي راجل لما تحصله حاجة زي ديه في ساعتها وفي حياته بعد كده
لما يحس مع مراته بعد كده انه مابيعرفش
او ممكن تجيله حالة ويتحول لشاذ ويبقي كله بمزاج
هو ده الحق
ابقي زورني في حزب المندسين
علي فكرة بعتلك دعوة لشباب من اجل التهييس

غير معرف يقول...

i do hope that something really happens
not just having them for 4 days then they get bailed out
as much as i would like to say that am happy but still i have this small peice of unsettling emotion, i wont say that am happy till both of them are for sure in jail after being sentenced not under invistigation.

salam
god bless u my dear friend
god bless all of u who r discovering and searching for all these facts

salam again

غير معرف يقول...

انا علقتلك تاني عالبوست بتاع اسمه ايه ده يا حفصة

غير معرف يقول...

بصراحة مش عارفة، انا بحاول ابتسم، لكن طلعت نص نص منى، خصوصا أن النيابة استخدمت الفعل فى زمن المستقبل، خصوصا ان فى بلدنا الاعمال بالنيات، خصوصا نيات اولى الامر، لكن ع العموم طشاش ولا العمى هو احنا كنا طايلين، ادى يوم جه وبقي فى ظابط مطلوب على ذمة قضية!!اخيرا شفتها، السؤال المهم هل فعلا هيطلعوا منها؟ ولا ممكن يكون فى محاكمة كدة وكدة؟على طريقة المحاكمات الشعبية؟ او يتم الاكتفاء بتسريح أو نقل سيادتهم من مقر الخدمةالى مقر تانى؟ زى ما حصل مع بعض الظباط فى قسم شرطة امبابة من كام سنة، ع العموم مش هنسبق الاحداث بكرة نشوف، ويتفضحوا كمان وكمان، فضيحة ال...

غير معرف يقول...

اه نسيت يا جرجس بيه، العنوان
http://zenzana.katib.org/
بس استنى كام يوم وبقي زورنى انت وحفصوتشا

غير معرف يقول...

الف مبروك يا جرجس .. هو ده الكلام .. الدنيا بتتحرك ..و بصفتى برجوازى عازمك أنت و الحبايب بعد العيد فى أى حته تعجبك ..
و باقولك أيه .. رأيى الشخصى سيبك من موضوع يوم الجمعه ده .. خلينا فى المهم .. مصر .. المصريين .. مسألة اخواننا السودانيين فيها جدل لسه .زيبقى نركز احسن
ماتنساش العزومه .. و كل سنه و انت بألف خير

غير معرف يقول...

مبروك علينا الخطوة المهمة دي .. اهي حاجة تخلي الواحد يفكر تاني انه لما يكون ليه حق و يفضل وراه ممكن ياخده .. مش عايزة افرح اوي دلوقتي و مش هتشائم بس كل اللي هقوله شكرا لكل واحد فضح اللي بيحصل ( وائل عبد الفتاح - ناصر امين - شرقاوي - ماك - وائل عباس - الحاج جرجس ... ) و عذرا ان كنت نسيت حد بس ربنا يكمل المشوار على خير فعلا و يبقى العيد و راس السنة وشهم حلو علينا .

كل سنة و انتم يا رب طيبين و بخير دايما و فاضحين ولاد ..... و يا رب العيد يعدي على خير المرة دي

حاج جرجس فرحتني بتعليقك عندي .. و على فكرة الجملة اللي انت اخترتها من البوست انا نفسي اخترتها بعد ما كتبته .. حاجة كمان القصة مش خيال اوي :):) يعني هي تقريبا حصلت مع اختلاف التسلسل الزمني في بعض الحاجات .. و يا رب دايما تقرأ حاجات كويسة و رقيقة زيي ( شفت كلامك خلاني اكون مغرورة إزاي .. اشرب بقى :):):) )
سلام

غير معرف يقول...

lastthink
فينا من رشاوى؟ طب انا كمان رايحة مع جرجس يوم الجمعة، ممكن اجى معاه العزومة؟ بلاش بخل، مش كفاية بتقول مصر للمصريين بس، ع العموم اشبعوا بيها اذا كنتوا تقدروا، و ورينا شطارتاك فى تطبيق الشعار.
ارفع الشعار!!
randa
صباح الفل يا جرجس وحفصوتشا

mariam يقول...

ياه اخيرا فى امل ان الواحد ممكن ياخد حقه
اخيرا فى حد هيحاسب على اخطائه
اتمنى دى تكون البداية
و يا ريت القضية يتحكم فيها و متتنسيش
شكرا ليك على متابعة الموضوع

غير معرف يقول...

الحج جرجس
عارف مقولة دولة الظلم ساعة ودولة الحق الى اخر الساعة

ليكن اخيرا مسار العدل والحق
المأخوذ بالقوة
طالما لا يطبق العدل على ارض بهية الا بقوة التكتل والضغط لتكن هذه وسيلتنا المجدية فى المستقبل فقد وعينا كيف تسترد الحقوق

اسلام نبيه يعاقب على اخطائه مثل اى مجرم لان الشرطة ليست فوق القانون

شكرا لكل كلمة دعمت عماد وناصر ووكيل النيابة
وشكرا لرجولة اختفت من مصر حتى اصبحت عملة نادرة نبحث عنها

شكرا ليك على المتابعة ولشرقاوى على مجهوده الذى لا يمكن انكاره

تحياتى

الأميره أوسه يقول...

أنساتى سيداتى سادتى
طبعآ أنا ملاحظه كمية التشاؤم
اللى فى التعليقات وده طبيعى
أنا عارفه أن فيه ضباط بيتم عزلهم من رتبهم كنوع من العقاب
على العموم لو أسلام نبيه أخد أستمرار
يبقا الموضع بجد لكن لو خرج بكفاله يبقا مفيش فايده
أنتوا عارفين الظابط اللى بيتسجن بيحصلوا أيه فيه السجن
بيلبسوه المساجين فستان بترتر
ويمسكوه صجات فى أيديه
ظباط كتير وأمناء شرطه أكثر أتسجنوا فى قضايا تخص الشرف بس مفيش أخبار كانت بتتنشر عنهم
أنت عارف يا جرجس
أنا خايفه تروح تساند عماد
يروحوا قبضين عليك
أهو واحد من المدونين وخلاص
لو حصل معاك مشكله
أى مشكله ولو صغيره
هددهم أنك تعرفنى
قول بالفم المليان
أنا تبع أوسه
(ده أنت هتاكل ضرب )
كل عام وأنت بخير
وسلامى لوالدك

ذو النون المصري يقول...

انا متفائل جدا بالاخبار و حاسس اناه ليست مثل كل مره
العدل قادم انشاء الله
----------------------------------
يا ست راندر التعليقات عندك لها نظام غريب كتبت تعليق لكن فشلت في ارساله ياريت توضحي نظام التعليقات عندك كيف نكتبه و نرسله
----------------------------------
و مبروك علي الاسم الغريب للمدونه
الزنزانه فعلا اسم من النوع الغير مالوف
----------------------------------
لك تحياتي

غير معرف يقول...

الله عليكم يا أبطال ، أنا بأشجع كل إنسان شريف اهتم بهذة القضية ، ويا رب القضية تاخذ مجراها ويتحكم على هؤلاء المجرمون عشان يعرفوا أنهم ماستعبدوش الناس ، عقبال ما يتحاكم المعلم الكبير

مراقب مصري يقول...

أخي العزيز محمد شرقاوي

مبروك علبك وعلينا يا معلم... الواد اتخيط ومش هينفع يخرج منها... حتى لو ما اتجددش حبسه... إنسى!!! القضية متكاملة... وفي اعتقادي إنه هياخد في النهاية حكم محترم

تحية إلى قضاة مصر الشرفاء

دول صدقني حائط الصد الأخير لينا في الزمن الاغبر ده

من تاني تحياتي ليك انت بالذات ولوائل عبد الفتاح

تحياتي كمان لدماغ ماك أول من نشر الفيديو بتاع اغتصاب عماد

لقاؤنا الصبح قدام المحكمة

مراقب مصري يقول...

عزيزي عربي

نشكر الله إن القانون بتاعنا ما فيهوش نص بيقول الجزاء من جنس العمل وإلا كان سبعين مليون عصايا هتتحرك من أرجاء المحروسة كلها نحو منطقة هليوبوليس بما كان سيؤدي إلى اختناقات مرورية لا طاقة لنا بها

كفاية علينا القانون الحالي بس المهم يتم تفعيله وتطبيقه على الجميع... دون استثناء

مراقب مصري يقول...

حفصوصة السكرة

اللي اتعمل خطوة مهمة ولسة هتكمل وبإذن الله هتكمل
========================


زنزانة الجميلة

ما تقلقيش
ابتسمي من ودنك دي لودنك دي
الحق خلاص بينتصر ومصر ينتصر
=========================


أخي الحبيب فارس قديم

شكرا مقدما على العزومة
وكل سنة وانت طيب
قضية عماد مهمة جدا جدا والحمد لله ربنا نصرنا فيها ولسة النصر الكامل يوم ما الواد إسلام يترمي في السجن ويتعلم الأدب

بالنسبة للقضية بتاعة اخوتنا السودانيين... هي جزء لا يتجزأ من نفس القضية الكبيرة اللي اسمها تجاوزات الداخلية وجرائم الوزير الفاسد حبيب العادلي ضد الإنسانية
العادلي لازم يتحاكم قدام محكمة دولية بتهم إبادة جماعية
بالعكس إحنا لازم نمسك في القضية دي تحديدا لأنها لابساه لابساه ودم السودانيين كان واقع وحقيقة

وعلى رأي بلو روز
أيا كانت حيثيات قضية السودانيين
مفيش اعتصام في الدنيا يتم فضه وينتج عنه هذا العدد المهول من القتلى

قشطة يا باشا
فضيحة مهمة جدا تستوجب محاكمته هو والقائد الأعلى محاكمة دولية واهو العيار اللي ما يصيبش يدوش

بس بجد إذا كان اغتصاب عماد نجحنا في أن نثير عليه كل هذا الضغط الداخلي والخارجي فما بالك بقية هي بالأساس ذات طبيعة دولية

أهو سكة تانية نطرقها ونشوف نتايجها إيه

ولا إيه؟؟
====================

مراقب مصري يقول...

ريكا الرقيقة

يا بنوتة يا قمورة
كل سنة وانتي كمان طيبة وجميلة
وبإذن الله السنة الجاية على قد ما الضلمة بتزيد شعاع النور كمان يزيد أكتر والضلمة تبان إنها ضلمة والنور يسطع بكونتراست عالي ومبهر يقول لنا إنه فيه أمل

طب أنا يا بنتي سترت عليكي وقلت إن القصة بتاعتك اللي ف مدونتك خيالية لازم تسيحي إنت لنفسك وتقولي إنك إنتي بطلة القصة

ماشي براحتك
ربنا يكرمك يا قمر في كل حاجة

مراقب مصري يقول...

الجميلة مانو

لا يضيع حق وراؤه مطالب
واحنا وراهم والزمن طويــــــــــل
وكل سنة وانتي قمر

مراقب مصري يقول...

رفيقة الفكر الغالية جدا جدا توتا

فعلا يا توتا
دولة الظلم ساعة
(صحيح هي ساعة بس بتأر شوية هههه)
لكن دولة الحق لآخر ساعة
(ياه على شندوشت فول من عند آخر ساعة دلوقت)

(إوعى يكون النص اللي فوق دا نص ديني ولا حاجة... أنا مفكرها قول مأثور)

واخدة بالك يا رفيقة إزاي فعلا فكرة الضغوط بتجيب نتيجة؟
أنا نفسي عمري ما كنت متخيل أن الموضوع يمشي بالطريقة دي ويتصاعد بسرعة كدة... عارفة وائل عباس فاز باختياره أحد أكثر الشخصيات المؤثرة في العالم لهذا العام في استفتاء بتاع البي بي سي وفي رسالته التي وجهها للعالم بمناسبة اختياره توجه وائل بالشكر إلى الإنترنت وليس إلى شخص ما ... وعنده حق

الإنترنت النهاردة خلانا واحنا قاعدين ورا حواسبنا النقالة نثير أعتى القضايا ونحقق نتايج مذهلة وتاريخية
أنا في اعتقادي بقى إن حدث 2006 بجد هو إن حضرتك اقتنعتي بجدوى الكلام وبدأتي تتكلمي

وزي ما قال صلاح جاهين

الكلمة إيد
الكلمة رجل
الكلمة بــــــــاب
الكلمة نجمة كهربية في الضباب
الكلمة كوبري صلب
فوق بحر العباب
والجن يا أحباب
ما يقدر يهدمه

فاتكلموا
اتكلموا
اتكلموا

مراقب مصري يقول...

إيبيتاف المذهلة

مش هيخرج منها زي الشعرة م العجينة
لأن العدالة سبقت وفاتت زي السكينة في الحلاوة

ههههههههههههههههه

نهاره إشطة

مراقب مصري يقول...

معشوقة الجماهير النجمة المتلألئة في سماء التدوين

الأميرة أووسة

الله ع الواد إسلام ده وهو بالفستان أبو ترتر
يا لهوي
محتاج صورة بجد
افرح يا عماد يا كبير
الواد إسلام هيلبس الفستان

تخيلي يا برنسس أووسة كدة لو رجع حكم المماليك وبقة التجريس جزء من العقوبة الجنائية
مش بذمتك كان هيبقى اختراع تحفة؟؟؟
والواد اسلام يركب الحمار بالمقلوب والعيال يزعروا عليه ويقولوا أبو شخة اهو... على أساس إنه مش هيمسك نفسه ويلبي نداء الطبيعة على ضهر الحمار

صدقيني يبقى منظر حكاية

حتى لو طلع بكفالة
برضه هيتسجن في الآخر وفي اعتقادي لفترة محترمة... القضاء بجد عندنا محترم.. بس المهم القضايا تاخد سيرها الطبيعي وتوصل للقضاء المحترم ده

والحمد لله قضية عماد وصلت للقضاء العادل
اطمئني

على فكرة لولا بكر أحمد بكر مدير نيابة حوادث جنوب ولا كان فيه حاجة من دا كله حصلت

بكر أحمد بكر دا رئيس النيابة اللي واجه عماد بشريط الفيديو لما ضغطوا على عماد يكذب كلام الفجر

بكر أحمد بكر هو اللي قال له يا ابني ما تخافش
قول كل اللي عندك
إنت وأهلك في حماية النيابة

صدقوني وانا بقرا الكلام دا من أسبوعين في الفجر عينيا دمعت وبكيت وانا باشوف عماد وهو بيتنصف أخيرا وبيرخج من النيابة سعيدا وكأنه اتولد من جديد

الشعب دا كله بيولد من جديد يا أووسة

مراقب مصري يقول...

أخي ذو النون

العدل قادم لا محالة وعلى كل المستويات
قول يا رب
وكل سنة وانت طيب
========================


عزيزي إسلام

شكرا لتشجيعك
وبالفعل ما طالبت به هو عينه ما طالبت به أنا أيضا في نهاية البوست
ومين عارف

غير معرف يقول...

أخويا جرجس
سبق ووضحت وجهة نظرى فى مسألة السودانيين دى و انا باتلكم عن الميديتشى .. و رأيى أن الداخليه نسفت بمذبحة السودانيين جهود خارقه لجهاز الأمن القومى وقتها لاستعادة النفوذ المصرى فى أفريقيا .. المسأله مش بس حقوق أنسان لكن كمان خيانه لأهداف الأمن القومى المصرى .. و معاك فى فضحها .. أنت عارفنى يعنى أحب اهدى النفوس

راندا .. تشرفى فى أى وقت .. أهلا بيكى و بكل أصدقاء جرجس و عمر قناوى

غير معرف يقول...

يا دكتور جرجس ... ربنا يسمع منك فعلا و تكون السنة الجاية كلها خير لينا كلنا ..

و ايه حكاية سترت عليا ده ... :):)يعني اللي يسمع كده هيقول ايه يا حاج ده هي ده بجد الفضيحة و التسييح :).. و كمان زودتها بأني سيحت لنفسي .. انا كل اللي قلته ان الحكاية ده حصلت .. حدش جاب سيرتي انا في الموضوع .. ده انت بجد بجد شرير :):):)
و على العموم يا سيدي مقبولة منك عشان بس السنة الجديدة و العيد و اهو كله بثوابه ..

مراقب مصري يقول...

الأستاذ فارس بيه قديم

بما إن سعادتك طلعت متفق معانا في موضوع السودانيين يبقى حضرتك مطلوب تكون معانا في الوقفة بتاعة يوم الجمعة وما تقول ليش عندك وقفة عيد

كله يهون يا أستاذ عسان أمننا القومي
ولا أمن الخروف القومي أهم؟

كل سنة وانت طيب

مراقب مصري يقول...

عزيزتي ريكا

طبعا أنا كان قصدي خير خير خير

ههههههههههههههه
بس انتي اللي فهمتيني غلط
ليه كدة بس
يلا نعلش
عفونا عنك

غير معرف يقول...

تشاو يا جرجس، انا شايفة انك متفائل قوى، هى خطوة باللتأكيد كويسة، لكن بصراحة كتير عليها قوى هذا التفاؤل، لان احيانا جدا الحكومة الواطية بتاخد بمبدأ الهيي الضغط الدولى والشعبي بعضمة، بما ان الجريمة ريحتها المعفنة فاحت ع الاخر، وان فى ضغط دولى ودا العامل الاهم، من الشعبي، يبقي خلاص اوسخ ناس فى مصر اللى هم اسلام نبيه ورضا فتحى، هيتم تقديمهم للمحاكمة، ودا خطوة هايلة مش كويسة بس، لكن بما انى من الطماعين فأنا بسأل يا ترى العقاب هيكون ايه؟ هل مجرد تسريح من الخدمة ولا نقل من سلخانة العمل الى سلخانة تانية، زى ما اتعمل قبل كدة كتير، ولا هتوصل لحبس دا بقي يا جرجوسي مربط الفرس بالنسبة لى، لانى شفتها كتير ناس تم سلخها وناس اتقتلت، وبعهدها تم نقل المحروس من العين الى سلخانة تانية.

شكرا جدا جدا lastthink
على الدعوة، هاجى يا فندم، لكن بالنسبة للنفوذ المصري فى افريقيا نكتة اضحكتنى ع الصبح، لانى اخر حاجة قريتها، او سمعتها عن الاهتمام بالامن القومى فى افريقيا كان من زماننننننن قوى قوى، يمكن يكون العيب فيا انا ، لان سمعى تقيل، لكن ما علينا، لكن ملاحظة ان تقسيم وزارة الخارجية الدول من حيث الاهيمية الى رتب من الف و ب وج و د، و تلات تربع الدول الافريقية ينتمون الى الفئة د، او ج بنعرف منه مدى اهتمام الحكومة بألامن القومى فى افريقيا.
ولااعتقد ان مذبحة اللاجئين السودانيين ضربت النفوذ المصري فى افريقيا بالجزمة ولا حاجة بالعكس دا ممكن تكون دعمته، بما ان اغلب حكام افريقيا جزم مستبدة مسلطة على الرقاب، وبتورى به الحكومة الواطية هنا الحكومات الافريقية وبتقول اهو احنا هنا فى خدمتكم احنا هنكمل لكم المسيرة، اللى معرفتوش تعملوه فيهم هناك احنا هنعمله هنا.
يلا اشوفك بقي ف العزومة.
وصباح الفل يا فندم.
randa

غير معرف يقول...

hi^^
plz add me :)
the__lotus__flower@hotmail.com
(every underscore is doubled ;)

لكي لا ننسى دم أحمد علي مبروك