٢٠‏/١٢‏/٢٠٠٦

يا عم فهمي يا هويدي ما تسيب أم المخروبة الأهرام وتخلص







جريدة صفراء تسمى الأهرام تمنع مقالا للكاتبالكبير فهمي هويدي
(تاني مقالة تمنع لهويدي خلال شهر)
نقلا عن مدونة ياخي أـ ـ ـ
تحدث منذ قليل السيد حازم عبد الرحمن مدير تحرير الأهرام إلى برنامج العاشرة مساء على قناة دريم الفضائية و أكد على ما يلي:سبب منع مقال فهمي هويدي من النشر هو تحيزه -المقال و صاحبه- للإخوان (الجماعة المحظورة لا مؤاخذة) و أنه يروج و يسوق لفكرهم.و أشار أن منع المقال ليس قمعاً لحرية الرأي لكن لا يمكن التسامح مع هذه (الأفكار).و حين أخبرته المحاورة عن إمكانية قيام فهمي هويدي بنشر مقاله في جريدة أخرى أجاب ساخراً:ما حدش حيقراله لأن الأهرام بيقراها 5 أو 6 مليون قارئ يومياُ بينما أي جريدة (أخرى) لا يزيد عدد قرائها عن (ألف) أو أكتر!!!!مش بهجص و لا ببالغ ده الكلام اللي اتقال بالحرف.بغض النظر عن صحة أو خطأ وجهة نظر "فهمي هويدي" فما حدث من منع و من ثم تبرير (هزلي) هو استمرار للمساخر في الصحافة القومية..بس حابب أسأل مسيو حازم عبرحمن: تفتكر بجد كام واحد قرأ و سيقرأ مقال فهمي هويدي الممنوع من (النشر) لا مؤاخذة؟!!دم دم تك صحيح .. :)
ومن جانبي... فكما نددنا بمنع مقال فهمي هويدي الشهر الماضي من النشر في الأهرام نعود ونقول كدة عيب أوي وزادت عن حدها أوي
أهرام إيه ونيلة سودة إيه... دي جرايد كذابة ومتدنية جدا جدا
حرام عليك يا أستاذ فهمي... ما تفقعش مرارتنا انت كمان ... سيب الأهرام بقى الله يرضى عليك وعندك المصري اليوم
بعد سنة بالظبط با أستاذ هويدي الأهرام هتبقى رهان خسران لأي كاتب محترك لأن مقاطعة الناس ليها بتزيد وهتزيد وهيفلسوا
سيــــــــــــــــــــــــــــــــبها بقى الله يكرمك
لقراءة المقال الممنوع على موقع إيلاف اضغط هنا

هناك ٧١ تعليقًا:

غير معرف يقول...

الله يخرب بيت شيطانك يا جرجس اغيب ازبوع الاقيك منيل الدنيا بالشكل ده
نهار اسود يوم ما استلمت مفتاح البلوجز
يا ابني كام مرة نبهتك امشي براحة و خد بالك من نفسك لكن لا حياة لمن تنادي
ايه ده اربع بوستات في ازبوع واحد
ليه يا بابا كده؟؟؟
ليه تكدير العقل العربي الغائم
و المصري الموحوس؟؟؟
جتك بتاع اديني رايحة اشوف انت كاتب ايه
ربنا يستر
متمششيش لوحدك
و متمششيش مع حد خليك قاعد في منازلهم لغاية ما نرفع عنك الحد
نصايب ايه دي يا خواتي

ميت مرة اقلك متتكلمش و تقول او تكتب كلمة اسلام عندك انت او على لسانك
عاوز حاجة انا و اصديكائك نبقى نحكيها عنك زي طريقة الاحاديث كده عشان محدش ياخد باله
اوووف
قلقت سكوني دلوقتي
ربنا يوريني فيك ازبوع
يتلقفوك فيه الاخوان او اللي مش اخوان و افرح فيك
هههههههههههههههههههههههههه
تمنياتي بردود نارية
خليك كده فرحان بنفسك
سلام الى حين

غير معرف يقول...

ايوة كدة يا واد يا جرجس متخفش
ولا يهمك حد، هنوريهم، النهاردة ف المترو اتسألت للمرة العشرين اذا كنت مسلمة، ولا ؟ تقريبا كدةالناس بتشبه عليا، كل حد يشوفنى، دى جرجس ولا اخوه؟ دى جرجس، ولا ابوه؟
ف الاخر المترو عطل فالسيدة زينب .
ما علينا شكلى فالاخر هطلع قريبتك، هروح اسأل امى أنا ابويا مين بالظبط، احسن الراجل اللى انا مطلعة عينه دا ف الاخر يطلع متبنيني زى افلام حسين رياض، والست فائن ايو فائن لا مؤاخذة حمامة،
المهم خبط والنبي فى اصحاب الدقون البلاستيك، و ميهمكش، احنا معاك احنا معاك/، لحد ....على ....اللى اكيد حمرا. ويجعله عامر
randa

غير معرف يقول...

رندا انا بموت في دين ام تعليقاتك
امتى بقى تفتحي مدونة؟؟
بليييييييييييز

غير معرف يقول...

حاضر يا ستى انتى تأمرى، انا هزورك قريب فى مدونتك يا حفصوتشا
انا عايزة اعرف انتى فلسطينية صحيح؟ متقلقيش، اصلي واقعة ف غرام فلسطيني، مشيبنى، لا ء بهزر دا صديقي وعنده 77سنة،
المهم عاجل الى جرجس.....
يا واد يا جرجس، ايه الحكاية مفيش كلام عن كريم عامر، فى مهزلة امبارح اتجدد حبسه 45يوم المرة دى
يا جماعة حد يرد عليا المهزلة ان مفيش غير محامية واحدة بتسافر له اسكندرية علشان تحضر معاه التحقيق، ايه مينفعش
نعمل حملة عندك يا واد يا جرجسسسسسسسسسسسسس
رد بقي يا مغلبنى
randa

غير معرف يقول...

إنت مسخرة :]

إصلى كنت لسة بتفرج على ال10 مساء و كنت عمالة اقول إييه دة

لو كان المتحدث مجنون يبقى المستمع عاقل...

دا قال بالحرف الواحد....
التوربينى عصابة إجرامية عادية أما الإخوان تهديد للأمن العام .... ماهو قتل الأطفاال ططوووظظظظ أهم حاجة سلامة حسنى من القيل والقال

ولاد الشواع يموتوا ماهم ولااد حراا*
أهم حاجة سيادة النمل فى الجامعات

الطلبة يضربوا بالشوم و المجرمين لا يقبض عليهم!!!!

غير معرف يقول...

على فكرة يا واد يا جرجس انا بطلت من اسبوعين اشترى الدستور، مع انها كانت اول جريدة اشتريها، لما حطيت رجلى ف المحروسة، من كام شهر، لكن راقب الكام عدد اللى فاتوا كدة من شهر، هتلاقى ايه الورنيش للاخوان شغال على ودنه، كمان وصلنى من مصدر موثوق فيه ان صحفى ما فى الدستور، اتمنع له مقالين، وعلشان نبقي محددين كانوا عن الاخوان يا حلووووووووو، ولما اشوفك هقولك هو مين؟ والمقالين كانوا عن ايه بالظبط.
والعنب العنب، انا هقلد دينا اهو.
randa

غير معرف يقول...

بقولك ايه يا واد يا جرجس،
السؤال المهم، هو كم نسخة يا ترى من الدستور، بيشتريها الاخوان كل اسبوع؟
انا عارفة الاجابة بس مش هقولك
(انا بقولها على طريقة هند رست ها!(
شكلى كدة مفيش زباين غيرى عندك النهاردة، امشي بقي بالمدونة بتاعتك دى مش عارفة اشتغل
randa

alnadeem يقول...

بص يا جرجس
والله العظيم العالم دي تستاهل
كل الناس صوتها اتنبح مع فهمي هويدي تطالبه بالتوقف عن الكتابه في الأهرام وهو اللي ما بياخدش موقف
طيب هتقولله أيه
ما هو يستاهل انهم يلاعبوه شمال ويمين


ثانيا بقي
فهم اللي خلفوني
انت زعلان عشان عشان منعوا مقال فهمي بادعاء انه بيدافع عن الإخوان
وفي الموضوع التاني انت بتهاجم ابراهيم عيسي عشان بيدافع عن الإخوان

إظهر وبان عليك الأمان

غير معرف يقول...

صدعت لى راسى بام الجرايد دى
يا ابنى ما هو خلاص محدش بقا بيشتريها
حتى لو حيلفوا فيها ترمس
لو مش حيشتروها علشان كذبها وفقدانها للمصداقية
مش حيشتروها علشان تمنها بقا غالى يا عم الحاج

دلوقتى بقا الجنية والجنية ونص بتاع الجريدة يشترىتلاتين رغيف عيش ويا دوب يمشوا الحال

او يشترى 15رغيف و75قرش فول ويقضوا بقية اليوم وتمشى الحياة

روق كدة يا عم جرجس

هاا جهزت لابانرات بتاعت المكاتعة ولا لسة؟؟؟
وحياتك اعمللى بانر كويس نونو كدة على اد السايد بار اللى عندى وصلحوووووو

على فكرة
الراجل فهمى هويدى دة انا باحترمه من زمان وكان اول واحد بافتح على النص صفحة بتاعته فى المرحومة الاهرام قبل ما نعلن وفاتها رسميا من البيت عندنا
هو وسلماوى
والبريد بتاع الاهرام اللى معظمه شكاوى تفطس من الضحك من التسيب والانحلال اللى فيها

لكن طالما هو عاجبه مكانه فى الاهرام سيبوه براحته
واللى بيشيل قربة مخرومة بتخر على راسه

يا مصر اكتب إليكي رسائلي يقول...

يسرني ان اتقدم بخالص التهاني وأطيب التمنيات بمناسبة حلول عيد الأضحى المبارك اعادة الله علينا وعليكم بالخير واليمن والبركات ، وكل عام وانتم والأسرة الكريمة بخير

مراقب مصري يقول...

ست حفصة

العمر واحد والرب واحد
وما بكتبش إلا اللي أنا مؤمن بيه
وغير كدة وا يهمنيش

مراقب مصري يقول...

راندا العزيزة

رفضي لللإخوان ولمنهجيتهم لا يجعلني أتناسى أو أنسى حقهم في الدفاع عن حريتهم وحقهم في التعبير عن أنفسهم وفي الترويج لما يؤمنون به بغض النظر عما إذا كانوا هم يؤمنون بالآخر أساسا أو بحريته أم لا

الحرية مبدأ
الحرية قيمة
الحرية لا تتجزأ

لأجل ذلك أدافع عن حق هويدي في نشر مقاله يدافع به عن الإخوان
وأدافع عن حق الإخوان في الحرية والعدالة

مراقب مصري يقول...

spellz

أكبر غلطة غلطا الإخوان في عمرهم
بصي يا دكتورة... أنا ما بحبش الإخوان وواضح وصريح في ده لكن إنه بتوع الوطني وصحافة أمن الدولة تتنطط على دين أمهم لأ
لما صحفي بحجم هويدي يحطوا مناخيره في التراب ويقولوله ايقى شوف مين يقرالك
وفي الآخر لسة مصمم يكتب هناك يبقبى يروح يموت بقى
أصل هي مش ناقصة فقع

مراقب مصري يقول...

النديم

بص يا باشا
فهمي هويدي كدة بصراحة أنا بدأت أفقد تعاطفي معاه... لأ للصبر حدود يا عمر

لما يحذفوا له من موضوع دكتوراه للبيع ويتقمص ويمشي ويرجع تاني قلنا ماشي
ولما يحذفوا له موضوع التعذيب الشهر اللي فات وبرضه استمر قلنا اللهم اخزيك يا شيطان
لكن كدة كتير
كتير أوي كمان
عجبك الحيوان اللي بيسخر منه ويقول يشوف مين هيقراله... طب بعد الكرامة فيه إيه يا عم
=============


بالنسبة للبوستين اللي ورا بعض
الموضوع بسيط جدا
القصة وما فيها إني اشتريت الدستور الساعة اتنين الفجر عشان أقرا موضوعين فيها لواحد صاحبي
قبل ما اوصل للصفحة التانية اللي فيها موضوع صاحبي اتخبطت بالإعلان القذر اللي في الوش.... دا عيب أوي
أفتح صفحة تلاتة ألاقي الحوار الأهبل بتاع سي عاكف
أقلب الجرنال ألاقيه مش بيدافع عن الرية والعدالة لكن دعاية فجة ورخيصة وتبرير للعملة الهبلة بتاعة العيال
أنا لا اتنرفزت ولا اتعصبت ولا حاجة
هات الكاميرا واديها تصوير واعمل كولاج وصمم البوستر وفصص الحوار وادبها


سيبك م الدستور هارد عليك فيها في البوست بتاعها

المهم خلصت البوست ولسة هانشره لقيت خبر منع مقالة فهمي هويدي... طبعا اتنقطت
ومبقيتش عارف أنشر إيه واسيب إيه
=====================


طبعا أنا مع الدفاع عن حرية الإخوان ومع حقهم في التعبير عن نفسهم وعن أفكارهم والترويج لها
والمخطئ يتحاسب في حدود الخطأ
العيال دول غلطوا كذا غلطة
س مفيش واحدة منهم تستاهل الحبس والفشخ

لعلمك أنا لسة هاحلل مقال هويدي وأعلق عليه... نشري لبوست هويدي مالوش علاقة بمحتوى المقال... أنا قررت أنشر قبل حتى ما اعرف هو قايل فيها إيه
=====================

إبراهيم عيسى بقى لأ
مش بهاجمه عشان دفاعه عن الإخوان في أزمتهم
لكن الليلة على بعضيها
الإعلان الإخواني المدفوع
والحوار الدعائي الأهطل بتاع خالد رمضان
وموضوع تمجيد الكونج فو بتاع دسوقي رشدي
دعاية دعاية دعاية
مش دفاع وحرية ورأي يا عمر

واقرا أراء الراجل مسخرة حقيقية
الحوار سقطة كبيرة للدستور

مراقب مصري يقول...

شهروزتي السكرة

للأسف أهالينا لسة بيشتروا السخام اللي اسمه جرايد كومية ده
حملة المقاطعة بتجهز وهنعمل لها مدونة مخصوص
فيه مفاجآت كتيرة حلوة قبل نهاية السنة
انتظرينا
=================

برافو عليكي يا شهروز جبتي التايهة
اللي يشيل قربة مخرومة هتشر على راسه
إشرب يا عم فهمي

مراقب مصري يقول...

مصر أكتب رسائلي

واحشنا يا عم
كل سنة وانت طيب

يا مصر اكتب إليكي رسائلي يقول...

الأخ العزيز ريفورما
عدت لأعتذر عن التهنئة الأولى ، رغم علمي ان الكثيرين من الأصدقاء يهنئوك وتهنئهم كما فعلت انا ..
ودي تهنئتك الحقيقية ..
بمناسبة أعياد الكريسماس وعيد رأس السنة الميلادية يسرني ان اتقدم بخالص التهاني وأطيب التمنيات لكم والأسرة الكريمة اعاد الله هذه الأيام المباركة علينا وعليكم بالخير واليمن والبركات

غير معرف يقول...

راندا العسل
اي نعم انا نصي فلسطيني منهوب و نصي التاني مصري محبوس
شفتي خلطة منيلة بنيلة اكتر من كده
:)
يلا بقى اعملي بلوج عشان ازورك فيها

غير معرف يقول...

شوف أنا بقالي فوق ال4 سنين مقاطع الأهرام و الأخبار و أي جريدة قوميه
و نفسي كل الناس تقاطعهم لأنهم كلهم كذب و رياء و نفاق بس أزاي الناس تبطل تشتريهم مش عارف

غير معرف يقول...

يا ريت أول ما حملتكم تبدأ أكون معاكم

ذو النون المصري يقول...

انا كمان يا حفصوتشا نفسي راندا تعمل مدونه
لكن انا حاسس انها بتلم الزباين الاول من عند محل (مدونة )جرجس و بعدين هتخدهم منه
و بكره افكرك
حازر يا جرجس المدونه تسير الي الخلف

ذو النون المصري يقول...

يا مصر باكتب اليكي رسايلي
انا كنت ناوي انبهك للتهنئه لكن انت كنت يقظ لكن يا سيدي اود ان اذكر لك شيء اولا انا هنا مع اخواني المدونين
شايف !!حلوه اخواني المدونين دي؟
انا معهم اشعر باننا فعلا نعرف بعضنا من زمن طويل
كان ارواحنا تالفت قبل ان نوجد
انا متابع جرجس من مده و اشعر تجاهه بموده صادقه و هذه الموده مني لكل المدونين
هذه فعلا مشاعر اكنها للجميع
-----------------------------------
ما رايكم ؟نؤسس حركة الاخوان المدونين

ذو النون المصري يقول...

خالص التهاني للحاج جرجس بمناسبتي
عيد الاضحي
و عيد راس السنه الميلاديه
و كل عام و الجميع بخير
و امنيتي لهذا العام ان يبدا و لا يكون (------)موجود لا هو و لا ابنه
قولوا امين

ذو النون المصري يقول...

الهطل و السخام
الكلمتين دول علي لسان النسوان العجائز هنا في كفر الشيخ
اوعي تكون من هنا و احنا منعرفش يا جرجس؟

ذو النون المصري يقول...

الاهرام عدد يوم الثلاثاء هو طقس اسبوعي كنت حريص عليه كل الحرص لكن توقفت عن شراء الجريده كلها من مده
لا ادري ما الخطه التي تتبناها ادارة الصحف القوميه لتطويرها
انا واثق انه لا خطه علي الاطلاق
لكن ما المانع ان يترك كاتب كبير ان يقول ما شاء
المنع خصوصا للكتاب ذوي الحجم الكبير يعكس الهدف انا لم لعرف موضوع المقال الا بعد منعه
ولو لم يمنع ما عرفت فحواه
هذه السياسه (الحجب و المنع)عقيمه جدا و بالتجربه ثبت عدم جدواها الا بالعكس كما قلت
فين الامخاخ ؟
انا بصراحه مش قادر استوعب الناس دي بتفكر ازاي؟
كانوا عدوه و نشروه و خلاص و كان مقال و هيعدي
اهم جابوا لنفسهم المشاكل
يشربوا؟!!؟

غير معرف يقول...

ذو النون المصري
يا رب اميييين دعوة راندا وهى خالعةراسها (نعمة احفظها يا رب من الزوال)
لا وحياة جرجس اللى مشحتفنى، هو وعمر قناوى، علشان اديهم التقرير اللى عن النت ولا مؤاخذة الحكومات العربية، مش برسم ع الزباين ولا حاجة، وان كنت انت وحفصوتشا هتنورونى،
يا حبيبي يا جرجس انا فاهمة التيتة والله بس اللى يغيظ صح انك بدافع عن حد لامؤخذة سيرته على اللسان تبطل الوضوء، وبصراحة موضوع العيال اللى عملوا عرض دا خد اكبر من حجمه، وبكرة نعرف ايه اخر فبركة الموضوع، مش يمكن نصحى الصبح نلاقي قانون جديد اتفصل، ولا مادة دستور اطبخت، واحنا ف عز المعمعة دى اللى انت عاملها، يا جرجس، كمان بقولك ايه، احنا مفقوعة مرارتنا قوى طول اليوم النهاردة معاك، علشان موضوع لا مؤخذة العرض اللى بيقولوا عسكرى فى الجامعة، طب ما السنج والبلطجية دخلوا الحرم الجامعى،يعنى هو حرام على الاخوان ، وحلال للحكومة الواطية؟ اللى خلت من الحرم الجامعى ولا "حرم حضرة العمدة" طبعا انت عارف مين العمدة!!! ويجعله عامر
randa

غير معرف يقول...

يا حفصوتشا قلبي معاكى، بصراحة انت اختارتى ازفت شعبين عربيين و انتميتي ليهم، كان هيبقي اهون لو قلتى انك من جزر القمر ولا البرازيل، ولا من السنغال، أو حتى فنلندا، مع الاعتذار لصديقي تومى، لان الفنلنديين هم صعايدة شمال اوروبا، وبتطلع عليهم النكت، مش لانهم اغبياء لا سمح الله، لاء دا لانهم رد فعلهم بطيء شويتين،
المهم يا حفصوتشا انا بعرف احكى شامى خصوصا فلسطيني، ولى اصحاب من الملة الهباب دى كتير، وبعرف اطبخ مقلوبة وبحاول اتعلم صفيحة (فطير مع السبانخ او اللحم بيعملوا اهل غزة)ويا سلام ع المفتول، خلاص انا ديناصورات بطنى بتكاكى، بما ان عيد ميلادى قرب، فانا فاكرة اللىقبل اللى فات طبخت مقلوبة لحوالى 15فرد، برلين كلها كانت معزومة، وكل الناس سألت عن الاكلة اسمها ايه وكانت حوسة ما يعلم بيها غير الله، وفضلت اشرح واشرح...
على فكرة بما ان العنجليزي بتاعك اكيد افضل من تبعى كيف تترجم مقلوبة ف العنجليزي؟
randa

غير معرف يقول...

حاج جرجس
موضوع ممتاز تستحق عليه التصفيق ....فعلا نحتاج الى حملة ضخمة للمدونين لمقاطعة هذة الجرايد وخليهم
بعد
كده يروحوا يشحتوا بربابة او كل واحد من هؤلاء الحسالة يشوف له جامع يتسول منه اعتقد انه سوف يكون
اشرف له مليون مرة من مسح الجوخ اللى هم شغاليين به بقالهم عشرات السنين ....
ياريتك ياحاج جرجس تفكر فى هذا الموضوع وتتعمل حملة كبيرة فى المدونات ضد هذة الجرايد وخاصة جريدة
الاهرام ........

غير معرف يقول...

randa dear u can name it (upside down )
1- coz this is exactly the main thing we do when we cook maqloobah, we put all things in layers then " neqlebha"
2- coz this is the best description u can apply for the current situation for both countries or any arabic country as well, :)

salamati

غير معرف يقول...

حفصوتشا انتى جبتى التايهة، امتى هنشوفك
ف الامبراطورية، عند سيادة الامبراطور عمر، وولده نور؟
كل سنة وانتى طيبة
باى مناسبة تعجبك، عيد لحمة أو عيد راس او رجل سنة
randa

مراقب مصري يقول...

مصر أكتب رسائلي

وانت بصحة وسلامة يا سيدي بمناسبة كل الأعياد الوطنية والدينية... نسيت عيد النصر 23 ديسمبر
ههههههههههههههه
دا ذكرى اليوم اللي فيه حضرتك قوات العدوان السولاسي انثحبت من منتئة الكناه... ودا بناءا على دغت من أمريكا (ومع ذلك اسمه عيد النصر ههههههههه)

ما تقرا البوستين الجداد بقى يا عم وتعلق لنا عليهم كدة

مراقب مصري يقول...

السيدة الفاضلة حفصة أم نصين

قاتي أن نصك منهوب والنص التاني محبوس
وعلى القياس بالفرخة ذات النصين
والتي تحوي نص ريد ميت ونص وايت ميت

فأي النصين ريد ميت وأيهما وايت ميت؟
أم أن النصين ريديش وايت؟

السؤال على فكرة مهم جدا لأسباب أنثروبولوجية بحتة في تحليل الأعراق وتأصيل الأنساب وتجذير الأجناس

فأرجو ألا يفهم كلامي على أن فيه شبهة قلة أدب أو سخرية على الإطلاق

مراقب مصري يقول...

karakib

هل أقول كراكيب أم أنتوك أم هاني؟
المهم

الحملة في طور الإعداد وأخونا الرأفتاني بيساعد في الترتيب ليها
يا ريت اللي عنده أفكار يضيف لينا
هنخش بحملتين مهمين في وقت واحد
حملة مقاطعة الجرايد الصفرا المسماة القومية
والحملة الأهم هي حملة كلنا عماد الكبير وفيها الملف بتاع حادثة اغتصاب وتعذيب عماد

عايزين مجهودات الكل
على كل الاتجاهات
برة وجوة
وف النص
نهاره إشطة

مراقب مصري يقول...

ذو النون باشا

أنا كمان أكتر واحد عاوز راندا تعمل مدونة... خلي المدونين يهيصوا شوية بدل الغم اللي بنغمهم بيه
حتى لما حضرتك تطلب بوست فرفشة أروح برضه قالبها غم ببوستين أسخم من بعض
==========

عاجبني أوي موضوع الإخوان المدونين
أهو على الأقل أحسن من اخوان الملثمين
وكل سنة وانت يا سيدي طيب
===================


إلا هي كفر الشيخ تنطق بفتح الكاف ولا بضمها عشان لو بضمها يبقى قول للشيخ يستخبى اليوين دول
===================

حضرتك بتتساءل قائلا انا بصراحه مش قادر استوعب الناس دي بتفكر ازاي؟
ببساطة الناس دي ما بتفكرش

======================

قريب حملة المقاطعة هتكون جاهزة ونهاره أبيض

مراقب مصري يقول...

العزيز سيبها على الله
شكرا على تشجيعك الحملة في الطريق إليك
ومعاها حملة كلنا عماد الكبير
اقرا كمان البوست اللي تحت البوست دا بتاع تحليل حوار مرشد الإخوان
مسخرة

3rby يقول...

انا بس عاوز اقول شوية معلومات
الاهرام في الفترة ديه بتوزع ما بين400 -و350 الف وبتنزل لحد ما وصلت ل200 الف وعمرها ما جابت المليون...عمرها في تاريخها

والصحيفة التي كسرت حاجز المليون هي اخبار اليوم بين مليون و100 الف -ومليون و200 الف ودلوقتي بتنهار وبتوزع حوالي 200 الف

اما الاخبار اليومية ففي اقصي حالتها بين 900 الف- ومليون و100 الف وده كان زمان يوم الحد علشان الملحق بتاع التلفزيون

والمصري اليوم بتوزع ما بين 70 الف-و100 الف
والفارق ده بيتقلص لان الناس كانت بتجيب الاهرام علشان الكتاب العمالقة اللي فيها ومنهم كتير بيكتبوا في المصري اليوم دلوقتي

اما الاخبار فاللي خلاها تكسر حاجز المليون ان علي امين كان لما يجتمع بالصحفيين كان بيقلهم عاوز تبسيط عاوز لما امشي في الشارع اشوف اللي بيمسح الجزم بين الزبون والزبون يقرا الاخبار كمان مش تقيلة زي الاهرام

اما دلوقتي اللي بيحصل في الجرايد ديه هبل
ولا اكتر ولا اقل
علشان كده هاينهاروا قريب

مراقب مصري يقول...

عربي العزيز

شكرا على المعلومات القيمة دي

وأفهم من كدة إنك معانا في الحملة؟؟

غير معرف يقول...

مش ناوى تعمل حملة غطونى وصوتوا؟؟
حاكون أول من يرقع بالصوت وحياتك

حملة اية يخويا دى اللى بتتجهز كل دة؟
حملة فى تسع تشهور؟؟

وحتولد امتا؟؟

كدة الاهرام اصلاا اتعمل لها دعاية من تحت راس حملة المقاطعة اللى بتحنسنها بيها دى


يلااا بقا اشتغل فيها وخلصها قبل ما الاهرام تكسر المليون من تحت راسك

مراقب مصري يقول...

شهروزتي الغالية

قولي الحاجة للواد رأفت
هو اللي خد الصور وشغال عليها
شكله اتقفش في نيويورك
أمن الدولة انتي عارفة واصل وإيده طايلة
وهو فقري وأي حد يقابله يقول له يلا ع البوكس
وهو غلبان هيعمل إيه؟
بيركب البوكس

مراقب مصري يقول...

العزيز شادي

طول ما انت بتروح للناس وتسيب حاجات عندهم من غير ما تقرا اللي هما كاتبينه عمر ما حد هييجي مدونتك
اكتب جيدا
واقرأ جيدا
اهتم بالناس
احترم عقل وقلب قارئك
عندئذ لن تصبح مدونتك مشهورة
ستصير إنسانا
ودا الأهم
وساعتها مدونتك وكلمتك هتبقى مؤثرة
تحياتي
(وإن كنت لا أعتقد أنك تتابع التعليقات فلن أرى لك ردا)
يلا أهو الواحد بيعمل الخير ويرميه في البلوجسفير

Gid-Do - جدو يقول...

الحاج جرجس

خلى بالك لما الاخوان راح يمسكوا الحكم ـ تف من بقك وفال الله ولا فالك ـ راح يحطوك فى قائمة مشانق اليوم الاول حتى لو دفعت عن حريتهم لان مصر مش فى دمغهم هما فى دماغهم الخرافة اللى اسمها الخلافة ـ وبعدين متنساش ان فهمى هويدى عجز والاهرام عاوز يطلعة معاش بالعافية فلازم يزهقوة علشان يقدم استقالتة بايدة ومحدش يقول رفدوة ـ لازم تفهم ـ وانت فهيم من يومك ـ ان الصحافة فى مصر اكل عيش وبس ـ شوف اسامة سرايا قبل المنصب كان بيكتب ازاى وشوف دلوقت بيكتب ازاى ـ وبعدين الناس مقاطعة الجرايد من غير حملة ـ مين يدفع جنية علشان يهبب ايدية ـ وكل حملة مقاطعة وانت طيب

3rby يقول...

انا كده كده مش بقراها
بس لما افضي ممكن اكتب بوست

3rby يقول...

جدو:
اسامة سرايا زفت من الاول
هو اللي طلع في دماغ سوزي فكرة نوبل للسلام
يقول امراة السلام خرا السلام
فبقت تعمل منتديات حول السلام
عملوا السلام حرب وكفاح
وخدت 120 مليون دولار من دم المصريين وعملت بيها جمعية في الامم المتحدة اسمها تقريبا"جمعية محبي السلام"علشان تاخد نوبل وبرضه ماخدتهاش ومش هاتخدها انشاء الله

غير معرف يقول...

صباح الخير يا واد يا جرجس
حتى يوم الاجازة اليتيم، لازم اصحى على دين ام مدونتك، صحيت فطيط على رجل واحد زى بتوع البالية، وفتحت النت،
المهم انا فعلا بعمل المدونة يا ذو النون انت وحفصوتشا، لكن محتارة ف اسمها ممكن تقترحوا اسامى؟ انا محتارة بين دق الهوى، ومر الكلام، لانى بصراحة لا اعتقد انها هتكون فلافشة، لانى عارفة نفسي انا نكدية جدا، ولو مش مصدقنى يا جرجس اسأل عمر
كمان انا خايفة اللى بعملوا ف الناس على المدونة هنا، يتعمل فيا، وده مربط الحمار،
صباحه قشطة
randa

غير معرف يقول...

الحق يا جرجس يا حفصوتشا، ذو النون يا مصري انا وعمر بنتخانق هناك
وكمان الواد اسلام
الحقوا انا بضرب
randa

غير معرف يقول...

randa ohktaaah
whos beating u?? tell and i will come ada3'da3' 3edamoh??!!!!1

my options for ur new blog r as the following
1- eldarb fi elmodawineen 7aram
2- agda3 kalam
3- randa elsokarah
4- alqademah min elsinbilaween
5- ana wi entom wi ra2asni ya gada3

i will think of others and get back to u but tell me first, how do u c ur blog? or whats the purpose??

6- my responses ( sakheefa, mosh kedah)sebiki minha

salam

غير معرف يقول...

هاى عليكم يا حاج جرجس
لفت نظرى جزء من تعليق ليك هنا...و اعتقد انه بيلخص مبدأك و اتجاهاتك

أنسى حقهم في الدفاع عن حريتهم وحقهم في التعبير عن أنفسهم وفي الترويج لما يؤمنون به بغض النظر عما إذا كانوا هم يؤمنون بالآخر أساسا أو بحريته أم لا

الحرية مبدأ
الحرية قيمة
الحرية لا تتجزأ

و مع احترامى لسعادتكم ...انا فعلا اجد صعوبه شديده فى استيعاب المبدأ ده.
يعنى بصراحة مش قادرة الاقى فى نفسي اى رغبه فى الدفاع عنهم...لأن دول بالذات يوم ما تقوى شوكتهم هما اللى هيخنقوا الحريه و الديمقراطيه و المعالم الحضاريه فى الاراضي المصريه.
و حاسه انى لو دافعت عن حريتهم، و ده أدى ولو بطريقه غير مباشرة خالص ...لاكتسابهم اى
Momentum
حاسه ان ده هيخلينى اشعر بالذنب على المصايب اللى هيرتكبوها فى بلدى.
بص يا حاج...زى ما قلت فمدونة مفقوعه...الديمقراطيه مش مجرد حريه و بس.
الديمقراطيه مسؤوليه كبيره و واجباتها مهمه زى حقوقها.
و الديمقراطيه من غير عداله ماتنفعش!!!
عموما ده رأيي، و انا فعلا اهنيك لانك استطعت تفصل بين شعورك تجاههم....و دفاعك عن الحريه كمبدأ.

مراقب مصري يقول...

جدو العزيز

واحشني جدا جدا

فعلا عندك حق
الإخوان مش فارق معاهم أم المخروبة مصر خالص... كل همهم مشروع الخلافة

يلا ربنا يسهل لهم يا سيدي
ربنا ما يجعلنا قطاعين ارزاق
وبعدين هما هيلاقوا شعب طيب وعبيط زينا فين عشان يحكموه

بالنسبة لفهمي هويدي
الراجل دا خلاص فقع مرارتي
ما يسيب أمهم بقى
ما يخرج بكرامته
دي حاجة زفت

سيبك انت يا راجل طيب
كل سنة وانت طيب ومنور مدوناتنا ومنور البلوجسفير كله

يا ريت الواحد يتعلم ولو شوية من حكمتك ومن عقلك

مراقب مصري يقول...

عربي يا حبيبي

حتى لو خدتها
ما انت فاهم
التوجهات السياسية لبتوع نوبل هي اللي بتحك
يعني ما هياش افتكاسة ولا هو سر
معظم بتوع نوبل صهاينة

(دا لا يقلل من شأن أناس عظماء نالوا الجايزة عن جدارة ةهما دول اللي ادوا الجايزة قيمتها الحقيقية)

مراقب مصري يقول...

راندا

مين دا اللي يستجري يمد إيده عليكي
دا انا كنت أقطعهاله وامشيه أعور طول عمره يقول آه يا ودني
-----------------


ألف نهار أبيض راندا السكرة بتعمل مدونة

زغرطي يا اللي منتيش غرمانة

رأيي إن الاسم يبقى

تدوينات خالعة راسها

وتديه بقى مغامرات وحكايات
وخلي الشباب ينبسط
وصور
صور م الجامدة بقى بتاعة الشبكة زمان

نياهاااهااااااااا

مراقب مصري يقول...

نفرتيتي بنت النيل

بصي يا ستي
الحرية الكاملة اللي بادعو ليها لا تعني قبول فكرهم وعدم مقاومة منهجيتهم

على سبيل المثال
في مدونتي
البوست اللي بنعلق فيه هنا دا عن منع جريدة زفت قومية لمقال الكاتب الإسلامي المحترم والكبير فهمي هويدي الذي سطره دفاعا عن الإخوان

وانا بتكلم في الموضوع من منظور حرية الرأي والتعبير... وبعدين نبقى نحلل الرأي ده ونشرح التعبير

في البوست اللي قبله مباشرة واللي نشرته في نفس الساعة
تحليل تفصيلي نقدي لاذع وسخرية وتقريع لحوار المرشد مع جريدة الدستور

أزمتي ليست في الفكر
أزمتي في مواجهة الفكر بغير الفكر
الإسلاميين يواجهون الفكر بالتكفير
(راجعي موقفهم مع نصر أبو زيد وسيد القمني)
أو بالقتل
(المرحوم فرج فودة)

والنظام يواجه الفكر بالسجن والاعتقال والتعذيب

(هذا جعلهم أبطالا حقيقيين في نظر الرأي العام وفي نظري أنا أيضا.. هم أبطال يدافعون عن آرائهم ويدفعون الثمن)

هذا هو المناخ القمعي الحالي
الحرية لا تعطى ولا تسلب

حاليا الحرية بتاعتنا بناخدها
present continuous tense
ولو خدناها مش هيقدر حد يقف قصادنا أو ياخدها منا
لأن ما حدش أصلا إداها لنا
لأنها لا تعطى ولا توهب
هي حق ونحن نأخذه

يوم بقى ما يبى فيه حرية بجد
إفرضي الإسلاميين مسكوا
طلعوا دين أم الناس
حلو
الشعب اللي نجحهم يسقطهم وخلصت

المشكلة إن احنا لسة مش أحرار
وحكمهم النهاردة مش هيفرق كتير عن حكم العسكر الحالي
وهنفضل نناضل عشان الحرية
وهناخدها وللآخر

إذن القضية ليست مين يمسك
القضية اللي بجد
إزاي نحرر شعب
إزاي نحرر وطن

الحرية هي الحل
(الحرية ليست حتى هبة إلهية بل هي أحد أبعاد صورة الله في خلقه للإنسان على صورته ومثاله)

الحرية إذن أزلية كما الله أزلي
وهي إشعاع من عمق ذات الله الخالق في عمق طبيعة الإنسان المخلوق

بعد دا كله لسة مش قادرة تقبلي أن الحل هو الحرية؟

غير معرف يقول...

الحج جرجس

عايزة اطلب طلب صغير من المدونين
عندما نقرأ موضوع ونعلق عليه برجاء عدم الخروج عن صلب الموضوع والغرض الاساسى الذى من اجله التدوينة والتفرع الى جانبيات ومنها الى اخرى حتى نجد انفسنا فى نهاية الامر نعلق على موضوع مختلف

انا قريت مقال فهمى هويدى
ولم اشترى الاهرام منذ شهور اذا انا لا استطيع متابعة فهمى هويدى حتى لو كنت معجبة باسلوبه لانه يكتب فى جريدة ليس لها مصداقية
ماذا ينتظر فعلا فهمى قبل ان يفقد كل قراءه
ما السر فى تمسكه بالاهرام وهل الاهرام هى من صنعت فهمى هويدى حتى يتم تهديده بأنه عندما يهجرها لا يصبح له كيان واين هو من اثبات العكس

سلبية فهمى هويدى غريبة وتحتاج تفسير منه

مناقشة مقال فهمى هويدى موضوع اخر اذا احببت رأيى فيه فلك هذا
تحياتى

مراقب مصري يقول...

رفيقة الفكر العزيزة توتا

غريب حال هويدي بالفعل
وخصوصا بعد نبرة الاستعلاء التي يستخدمونها معه مؤخرا والتي خلاصتها
ابقى شوف مين يقرالك

دا عيب
دا سفالة
دا انحطاط
دا غير مبرر على الإطلاق
الناس دي مش قادرة تستوعب إن الأشياء القديمة بتتغير
والأهرام النهاردة فاقدة مصداقيتها عند الأغلبية
الأزمة إنه بعض الناس من الجيل اللي قبلنا لسة عندهم عادة قراءة الأهرام صباحا ومش قادرين يقطعوها مع إن حتى صفحة الوفيات مبقتش بالأهمية بتاعت زمان بعد الموبايل والتكنولوجيا ما لغت أي أهمية لهذا الهطل
وحظك اليوم بقى ليه قنوات متخصصة
والحوادث جرايد كاملة وهكذا

بس تقولي إيه في العادة اللي ما قادرينشي يقطعوها

يا خوفي إن هويدي وأمثاله ما زالوا بيكتبوا في الأهرام بحكم إن قطع العادة فال مش كويس

يا خبر اسود... مصيبة لا تكون دي الحقيقة

مراقب مصري يقول...

وردا على ما قالته توتا كذلك بشأن التعليقات عموما
أهديكم هذا اللنك الرائع عن أساسيات التعليق في عالم التدوين

http://www.tadwen.com/?p=38

(ملحوظة مع كل احترامي للمكتوب في الدليل ده بس ما هواش قرآن)

نهاركو عسل

غير معرف يقول...

طبعآ غلطوا... أنا ماليش فى الاخوان اوى... يس حسب مشاهداتى فى الكلية حساهم دماغهم ضاربة حبتين و بعدين لما يبقوا يغيروا القائد بتاعهم يبقوا ينتقدوا بقاء الرئيس... و كمان رغم التنظيم الجامد الى باينين انهم فييه حسيت ان اتصال القادة بالشباب مش منظم دا غير انى ضد الفكر الواحد أو يعنى تجنيد نفسى و لغى مخى و الإنسياق وراء فكر واحد ... بس ما يمنعش انوا قمعهم هو اللى ادى للعنف و ان قتل الأطفال مشكلة اجتماعية تستحق وقفة أكبر من كدة... و أن قضية الإخوان متستحقش الزخم الإعلامى الرهيب اللى فى القناة الأولى ده....
أصلك ماشوفتش عمرو الشنيع فى برنامجه المريع ... حللة حوار... لو الإخوان قتلوا أبويا كنت هتعاطف معاهم بعد البرنامج ده (بعد الشر ... ربنا يخليه لول)

غير معرف يقول...

الراجل فهمى الهويدى ده عظيم انا مش فاهمة هو لسة بيكتب فى المخروبة دى ليه دى مش عادة دول ولا مايكون ماسكين عليه ذلة s;
يا رب يعرف قيمته و يسيبها

ذو النون المصري يقول...

كفر الشيخ يا سيد جرجس بفتح الكاف
و عموما فتحها او قفلها مش هيفرق كتير
و اضف لمعلوماتك هذه المعلومه الجديده
محافظ كفر الشيخ منذ ان اتي للمحافظه و هو معترض علي اسمها
(هو رئيس مباحث امن الدوله سابقا اللواء صلاح سلامه)
و رايه ان كلمة كفر تقال علي تجمع سكني لاصغر من قريهلكن لا تسمي به محافظه كامله
و اقترح سيادته اسم جديد تعرف هو ايه
محافظة المستقبل
اه و الله العظيم كما اقول /المستقبل
لكن الشعب هنا سخر من الاسم و لم يؤيده احد
سكت سكت و هووووب
طلع باسم جديد هو ايه المره دي؟
قال مينفعش نسمي محافظه باسم الشيخ كده الاسم وحش
نعمل ايه يا سيادة المحافظ اخذ يفكر و يفكر
و قرر
نسميها
الدسوقيه
نسبه لابراهيم الدسوقي
الناس في الكفر (كفر الشيخ )كلاته قالوا له ما ازفت من غمر الا ميت غمر
و يجعله عامر

ذو النون المصري يقول...

المحافظ شايف ان الاسم مش علي قده

غير معرف يقول...

ذو النون هو دا الاسم الجديد لكوفر الشيخ ؟
"المحافظ قال ان الاسم مش قد كدة"
ولا اقولك طب ما تسموها كفر المحافظ بدل الشيخ و لو ان الاتنين بيلبسوا نفس العمة(بكسر العين والراس)
و بلاش احسن سموها عزبة السيد المحافظ، و لا لاء الاحسن تسموها كفر ...اللى انت عارفوا بما ان كل حاجة فالبلد ممكن تتسمى على اسمه
حتى انا خايفة اصحى من النوم مرة الاقى الناس بتقولى يا مبروكة، ولا اى حاجة من مشتقات الاسم.
صباحه ولا مساه عسل يا ذو النون،
ازيك يا جرجوسي، فينك يا عم انت مبتعديش ليه؟
randa

ذو النون المصري يقول...

صح يا راندا
فعلا انا خايف يسموا البلد كلها باسم المعفن اياه
و فعلا ليه منسميش المحافظه
كفر المحافظ
هاهاهاهاهاها صحيح ليه لا؟
كله عند العرب صابون
حلوه صابون بالعربي الفصيح دي
اقريها تاني
صااااااااااااااابووووووووووووووون

غير معرف يقول...

صابووووووون ولا مصابون؟ بما اننا مؤمنين ع الاخر وبالتالي كانت النتيجة الحتمية اننا مصابون، بكل البلاوى اللى ف الدنيا والاخرة، و من ضمنها المعفن الكبير، والست المودام، وكمان الانجال وقريبا الاحفاد، وشلة الانس، وكل البرتيتة، واسلام نبيه، ورضا فتحى.
او ممكن تقول م +صابون، اى بما ان كل حاجة عند العرب صابون، فأكيد العرب....وكفاية النهاردة احسن اضرب.
ايوووه يا سي جرجس، كدة اهون عليك تسيب الواد عمر، والنونو اسلام، يضربونى، وفين يوجعك ، مكنش العشم يا سي جرجس، ماشي يا حفصوتشا، طيب يا ذو النون لو جدع اشطر ع الوزير،..طيب يا جرجس لو شفتنى يا ريت تستخبي احسن لك، صحيح ما هو اللى جرجس يقولها يا عورة عمر واسلام يلعبوا بيها بلاى ستاشن، بما انى اعتزلت لعب الكرة.وتصبحوا على خير.
randa

ذو النون المصري يقول...

يخرب عقلك يا راندا صابون و مصابون
لتنين عند العرب زي بعض فعلا
هو فين جرجس مبيجيش هنا ليه
دا قال لي مره قبل كده انه بيعرف دبة النمله في مدونته

ذو النون المصري يقول...

ادي احنا بنطبل و هو ولا هنا

مراقب مصري يقول...

بعد إذن حضراتكم

هنقل لكم جانب من حوار حص على مدونة منال وعلاء مرتبط جدا بموضوع البوست بتاعنا هنا
=================
تعليق ـ1ـ

طبعا مافيش بني
Submitted by منصور الصعيدي (not verified) on Tue, 19/12/2006 - 15:29.
طبعا مافيش بني آدم عاقل ممكن يؤيد اعتقال أبرياء لمجرد أنهم تجرأوا وعبروا عن آرائهم. والكلام ده ينطبق على عبد الكريم سليمان وعصام العريان وطلبة الإخوان وحتى الجهاديين كمان (اللي معتقلين بدون أدلة تدينهم مش المدانين بجرائم إرهاب). سجن أي بريء شيء مؤلم جدا لأي إنسان عنده ضمير، ولكن فيه حاجة ثانية فاقعة لي بيضاني وهي إن احنا ماشيين في سكة شكلها ما يطمنش. الإخوانجية عايزين حرية وديمقراطية على الطريقة الإسلامية وقد لخصها الأخ برهان الإسلام بقوله "اللي يتجنى على الإسلام يتحاكم بشرع الله" . اخواننا الأقباط مرعوبين (ولهم الحق) لأن من المؤكد إن أوضاعهم حتتنيل أكثر لو وصل الإخوان للحكم. وفي نفس الوقت البدائل الأخرى مش مشجعة أوي. علاء مثلا، بيقول إنه لا يثق في الناصريين أو الليبراليين أو الاشتراكيين وراح مكملها بحتة تريقة وقال إنه لا يثق حتى في نفسه ولا في أبيه. طب وبعدين؟

بصراحة كده هي شكلها ما فيش غير حل من اتنين يا إما جمال مبارك والفكر الجديد يا إما الإخوان والفكر القديم. ولو مافيش معارضة حقيقية في مصر غير الإخوان يبقى لازم يفهموا كويس إن الديمقراطية مش معناها حرية الوصول للحكم عشان بعد كده يعملوا فينا اللي هما عايزينه... واللا احنا يا ربي مكتوب علينا نخرج من حفرة نقع في دحديرة ومن فخ لفخ؟؟؟
==========================

تعليق ـ2ـ

أو فيه حل تالت.... الحريـــــــــــــــــــــــــــــــــــــــة
Submitted by الحاج جرجس (not verified) on Tue, 19/12/2006 - 17:27.
الحرية بديل تالت يا منصور تحرير الوطن من القديم والجديد ممكن وعشان كدة أيمن مرمي في السجن (أيمن نور مش بس كشخص لكن كمنهجية ليبرالية كان حل ولا يزال)

الخوف من الإخوان مش خوف نابع عن تصنيفي قبطيا (وهو تصنيف أرفضه تماما) ولكن لكوني مصريا أؤمن بالوطن

من منطلق الحرية هي الحل ننادي

الحرية لشباب الإخوان الحرية لمعتقلي الإخوان الحرية والعدالة لكل سجين رأي
==============================


تعليق ـ3ـ

حلو ولكن
Submitted by منصور الصعيدي (not verified) on Tue, 19/12/2006 - 18:37.
كلامك حلو يا حاج جرجس ولكن تخيل لو عملنا انتخابات حرة الشهر اللي جاي واترشح لرئاسة الجمهورية: جمال مبارك ومهدي عاكف وأيمن نور... مين اللي حيكسب؟ أكيد الحاج عاكف مش كده؟

الحاجة الثانية اللي عايز أقول لها لك إنه مش عيب إنك تقول إنك خايف من الإخوان عشان إنت قبطي. طبعا إنت مصري ومؤمن بالوطن ولكن إنت قبطي ومش عيب إنك تتخوف من اللي ممكن يجرى للأقباط لو الإخوان حكموا. أنا ياقول الكلام ده لأن احنا ما بقاش عندنا غير تصنيفين "مقبولين" يا إما مسلم يا إما مصري... الحرية في رأيي هي إن المناخ العام في مصر يبقى متعدد ويسوده التسامح يعني زي ما الإسلامي مقبول لازم القبطي والبهائي والشيعي والعلماني يبقوا تصنيفات مقبولة برضه
=========================

استنوا ما تزهقوش التقيل ورا

:D

مراقب مصري يقول...

تعليق ـ4ـ

تقريبا احنا متفقين ولكن
Submitted by الحاج جرجس (not verified) on Wed, 20/12/2006 - 07:29.
لما بقول أيمن نور بديل محتمل دا مش معناه إن البهايم اللي في مصر هيختاروه

دا معناه فقط إنه بديل محتمل وافضل البدائل

الشعب بتاعنا أهطل وبينضحك عليه بالدقن وقال الله قال الرسول من أيام نابليون لحد الحاج عبدالله مينو لحد الرئيس بوش لما بيضحك ع المسلمين بكلمتين حلوين في العيد ولحد ما نهلل لإسلام مايكل جاكسون وإلخ إلخ

هذا الشعب في هطله هيتنيل يختار إيه؟ سؤال مهم طبعا

بس الأهم منه... النخبة الوطنية المثقفة اللي المفروض إنها إحنا (طبعا بإقشاء الإخوان منها لأن أجندتهم غير وطنية) النخبة دي بتعمل إيه؟؟؟

بناكل ف بعضينا وبنحاول نطلع سبوبة من ورا الليلة أي ليلة

لو بجد النخبة الوطنية دعمت أي بديل محترم الإخوان هتلاقيهم بخ خلاص

الناس انتخبت الإخوان بوضوح نكاية في النظام ولأن الأحزاب فقدت كل مصداقية في الشارع بالإضافة إلى أن الإخوان بيرشوا المواطنين بالخدمات في حين أنهم لا يخاطبوا وعي الناس ولا وطنيتهم الكامنة... ومش من مصلحة الإخوان توعية المواطن بالوطن

طب ما نوعيهم احنا... لأ إحنا بنبزنس زبنطلع سبوبة من النضال ومنالحنجوري

على فكرة الإخوان لما اتفضحوا بعرضهم العسكري قدام الرأي العام فقدوا كتير من التعاطف من الناس الناس بجد اتصدمت والإخوان بيسخروا من الناس باستعلاء فظيع لما بيسخروا من إن الناس "اتخضت" من الفكرة بتاعة المواجهة العسكرية... الفكرة على فكرة موجودة وقائمة وراجع حوار المرشد في دستور النهاردة... هو لم ينف بل أكد فكرة وجود كوادر مقاتلين في صفوف الجماعة ويصل عددها للألاف... ولم ينف أنه يؤمن بفكرة العروض العسكرية "بس في الوقت والمكان المناسب"... هو فقط هون من موضوع عرض جامعة الأزهر... إذن المنهجية والإيديولوجية موجودة

على فكرة متفق معاك في أنه مش عيب أن الأقباط يتخوفوا من حكم الزفت الإخوان.. البيه في حواره ردا على أن عدد من الأقباط قالوا أنهم سيرحلوا إذا حكم الإخوان قال بسفالة "بالسلامة"... ما هي أصل عزبة أبوه... وقال عن الكنيسة المصرية (التي تؤثر - وللأسف توجه - ما لا يقل عن عشرة مليون بني آدم مصري) "لا أعطيها أي أهمية"!!!! ـ

الفكرة إني لما قلت أنا شخصيا مش متخوف باعتباري قبطي كنت دقيق في كلامي... أنا متخوف كمصري... دا تخوفي الشخصي ما اعرفش بقيت العشرة مليون تخوفهم ديني ولا وطني بس أنا شخصيا تخوفي وطني
=========================

تعليق ـ5ـ


وبعدها معاك يا مقدس جرجس

Submitted by m4m on Fri, 22/12/2006 - 05:18.

أنا الحقيقة كنت مانع نفسى من التعليق هنا لكن انت يا قسيس جرجس مستفز بشكل عنيف...بعد ماتمسح بيك الأرض عند سوسة المفروسة جاى تنفخ سمك هنا مين هما البهايم ياحيوان؟ واخوان مسلمين مين اللى عندهم ميليشيات عسكرية؟ كفاية توقيع بقى وتسخين للأمور....ومين هو اللى وصفته بالسفالة يا سافل؟ ده احنا كمسلمين نحترم أنفسنا ولا نشتم شنودة بتاعكم....عنده حق طبعا...اللى عايز يغور من البلد يغور فى داهية...والمسلمين برضه لو هددوا بالرحيل لو المسيحيين حكموا يبقوا هما كمان فى داهية.....وتقدر تقول لى ايه أهمية الكنيسة؟

ولا الكنيسة ليها أهمية ولا الأزهر ليه أهمية....يبقى ليه بتنفخ فى النار يا مقدس؟

m4m http://malayalzam.blogspot.com
================================

الشتيمة جاية في السكة
نياهاهاهااااا

مراقب مصري يقول...

تعليق ـ6ـ

العزيز ما لا يلزم
Submitted by الحاج جرجس (not verified) on Fri, 22/12/2006 - 13:41.
بص يا سيدي

أولا حضرتك لديك اعتقاد ورأي بأن الإخوان ناس كويسين دا حقك وما حدش يقدر يجادلك في قناعتك بالرأي ده وبالطبع ثمة عشرات الألوف غيرك لديهم نفس القناعة كويس... برضه حقهم والواقع أن الإخوان المسلمين كفصيل سياسي لها ما لها وعليها ما عليها وكلكم يخطئ ويصيب إلا صاحب هذا القبر

رأيك خطأ يحتمل الصواب ورأيي صواب يحتمل الخطأ (الإمام مالك)

أنا في اعتقادي أن الإخوان كفصيل سياسي زفت دا حقي في الاعتقاد ويمكن أنا غلطان ولو الناس في بلدنا اختارتهم يبقوا بهايم دا برضه رأيي... ورأيك مختلف وللأسف ما بنسمعش رأي الناس اللي هي الناس بجد اللي بنتكلم عنهم أنا وانت على انهم قطيع من الغنم أو النوق إلى أن يثبت غير ذلك

لما سي مهدي عاكف اللي هيمسك حكم العزبة بحسب إدعاءاته يقول أيوة عندنا عشرة آلاف مقاتل ومدربين وفي الوقت المناسب لا مانع يمنعنا من عروض عسكرية حقيقية

(راجع حوار الأخ مهدي في الدستور)

لما البيه يقول الكلام دا يبقى حاجة من اتنين

حضرتك وغيرك من المتعاطفين أو المنتمين للجماعة تحجروا عليه بتهمة التخريف أو فنجرة البق أو الأخطر وهو إفشاء أسرار الجماعة العسكرية (حسب هو فعلا فيه اللي بيقول عليه والا بس بيفنجر بق)ـ

أو الحاجة التانية يبقى لازم ناخد من بق الراجل ونصدقه طالما لم تكذبوا كلامه ولم تحجروا عليه وفي هذه الحالة نعم الجماعة لديها ميليشيات مدربة على أعلى مستوى قتالي ... والجماعة قادرة على أداء عروض عسكرية... والجماعة كمان قادرة على تشكيل حكومة... دا نص كلمات عم الحاج عاكف في جريدة الدستور... روح اقرا وتعال تاني

بالنسبة لما وصفته بالسفالة... ليس المرشد كشخص لأني لا أعرف الرجل... لكني أصف رده بالسفالة ... فعندما يقول لعشرة أو اتناشر مليون قبطي في البلد "بالسلامة" فهذه سفالة وانحطاط

وعلى فكرة بالنسبة لشنودة بتاعنا... أنا رأيي أنه دكتاتور وفاسد وأفسد المؤسسة الكنسية التي تؤثر في أغلبية أقباط مصر

يعني عادي ما فيش حد ما ينفعش يُنتقد وخصوصا إذا كان شخصية عامة ================

ملحوظة صغيرة ماذا تعني بالاختصار الذي تسمي نفسك به m4m ????

توضيح صغير من اخوط الصغير يا باشمهندس الاختصار دا مش حلو وبيدي انطباع وحش عن حامله في أي حتة في العالم m4m = male for male

يعني إشارة للواطيين أي الشواذ جنسيا فنصيحة من أخيك، غيره أفضل

لو مش مصدقني وحاسس إني باتجنى عليك اكتب m4m في أي محرك بحث على النت وستجد ما لا يسرك

=========================


تعليق ـ7 و 8 بالمرةـ

يالهووى
Submitted by m4m on Sat, 23/12/2006 - 00:42.
يادى المصيبة...طلع كلامك صح...أنا عمر الاختصار ده ماخطر على بالى...نخليه m5m m5m http://malayalzam.blogspot.com


ياعلاء
Submitted by m4m on Sat, 23/12/2006 - 00:55.
ياعلاء باشا..ياريت تدلنى على طريقة تغيير اليوزر نيم عندك

m5m http://malayalzam.blogspot.com

===================

نياهاهاهااااا

ثم يغير علاء له الاسم من
m4m
إلى
m5m

استنوا لسة التقيل ورا

مراقب مصري يقول...

صاحبنا بعد كلام العقل وبعد ما غالبا راجع كلام المرشد وبعد طبعا ما نبهته لفضيحة إم فور إم رجع يعلق ويقول
(لاحظوا بقى تغيير اللهجة)

تعليق ـ9ـ
شكرا لعلاء على
Submitted by m5m on Sat, 23/12/2006 - 13:35.
شكرا لعلاء على تغيير اليوزر نيم

نرجع لموضوعك يا عم جرجس وبعد مانشكرك على ملحوظتك اللى كانت فى محلها...أرجع وأقول لك ان من حقك كمصرى تقول رأيك فى أى حاجة بس لما تتكلم عن رموز اسلامية_سواء اتفقنا معاها أو اختلفنا_ يبقى تنقى ألفاظك

انت شايف شنودة فاسد بس احنا ماشتمناهوش....واحنا عارفين ان عاكف بيهرتل بس انت شتمته...واخد بالك؟

موضوع الكتائب المسلحة مايثبتوش مجرد كلام من عاكف أو حركات عبيطة من شوية عيال الا اذا كان فيه سوء نية وترصد زى الحكومة ماعملت....أظن علاء عامل تدوينة وعامل رابط لشهادة مصور المصرى اليوم بتبين ان الموضوع متلفق

وبعدين طول عمرنا بنسمع عن ميليشيات الأقباط فى أديرة الكنايس...حد كان صدق؟

ياراجل أهو كله كلام وماتاخدش على أعصابك

m5m http://malayalzam.blogspot.com

============================


تعليق ـ10ـ

يا عمّ!
Submitted by ألِف (not verified) on Sat, 23/12/2006 - 16:42.
موضع الإخوان و الأزهر في الإسلام مش زي موضع آبا شنودة و الكنيسة في المسيحية. بغض النظر عن دا كويس أو وحش لأنه مش موضوعنا.

و المرشد مش زي الأنبا و دي من مميزات الإسلام لو الناس بتفهم. لأنها بتخليهم يقدروا ينتقدوا قيادتهم من غير مشاكل مع دينهم زي الحساسيات ال ممكن تحصل لو مسيحي انتقد قيادات الكنيسة.

مش علشان واحد مسيحي بيقول أن الإخوان كجماعة سياسية مش عاجبينه تروح شاتم في مقدساته! هو بيتكلم في السياسة و أنت بتسب له الدين! و مع كدا هو مسك نفسه و ما عملش زيك، فخليك فاكر علشان لما حد ييجي واحد مسلم نفساوي يعيش في دور الضحية بعد كدا و يمثل أن المسيجيين بيشتموه تبقى تقول له.

و لما نقول نفصل بين الدين و السياسة علشان دا ما يحصلش الناس تزعل و تقول لك عاوزين يكفّرونا.

حاجة غريبة فعلا!

========================

أستاذ غربية
Submitted by m5m on Sat, 23/12/2006 - 18:09.
ياريت ياسيدى الفاضل تطلع لى سب الدين من كلامى...أو تشاور لى على شتيمة المقدسات فى اللى أنا قلته...أنا عارف انك جاى تهدى النفوس طبعا مش قصدك حاجة وحشة

m5m http://malayalzam.blogspot.com
===========================


اللي جاية بقى تثبيت أكتاف ومن علاء شخصيا ... ما تزهقوش

مراقب مصري يقول...

علاء بقى خلاص جاب جاز من الأخ إم فور إم وقرر يبطحه
اقروا تعليق علاء

تعليق ـ علاء ـ
يعني ايه كلام
Submitted by alaa on Sat, 23/12/2006 - 16:14.
يعني ايه كلام عاكف لا يثبت؟ هو مش بدين أمه المرشد العام؟

لو البابا قيادة كنسية مهمة اتكلمت عن ألاف الشباب المسيحي المعد و المدرب المنطقي هو أننا نصدقه.

أنا شخصيا رأيي أن عاكف بيخرف و ده رأيي فيه من زمان لأن كلامه متضارب و كل ما أقابل صديق من الأخوان أقولهم عيب عليكم يا تسكتوه يا تغيروه، و تفسيري أنه بيخرف فعلا و أنها مسألة سن أساسا.

لكن في النهاية لما حد في منصبه ده يتكلم عن عشرات الألوف من الشباب اللي جاهز للجهاد و عن امكانية الاخوان أنهم يعملوا عروض عسكرية لو عايزين و غيره من التصريحات مقدرش ألوم حد لما يصدقه (و مقدرش أقول لحد لأ يا فلان أنت متحامل عليهم و بتصدق تخريف المرشد العام بالقصد).

يعني ممكن فعلا يكون متحامل عليهم و فاهم أن المرشد بيخرف بس بيتلكك لكن في النهاية مقدرش ألومه، مش وضع طبيعي أن أهم مركز قيادي و اعلامي يكون بيخرف و يبقى مطلوب مننا أحنا أننا نتغاضى و نفوتله عشان سنه و مقامه يعني.

يحاسب الأخوان على ما يقوله قياداتهم و أعضائهم و على أدبياتهم و سلوك قياداتهم و أعضائهم زيهم زي أي فصيل سياسي آخر.

============================

(طبعا بعد تعليق علاء كانت خلاص جابه بالقاضية)

تعليق ـ أخير ـ
ازيك ياعلاء
Submitted by m5m on Sat, 23/12/2006 - 18:12.
ازيك ياعلاء باشا وحشتنا....من غير بس سيرة دين أمه أنا قلت انه بيهرتل...والكل عارف ان القيادة الفعلية لحبيب والشاطر....هو لو كان له لازمة كانت الحكومة سابته؟

تعرف انى ساعات بيتهيألى ان الحكومة هى اللى معيناه عشان تكره الناس فى الاخوان؟

m5m http://malayalzam.blogspot.com
=========================


ههههههههههههههههههههههههههههههه
نياهاهاهاهاااااا

حلوة دي يا إم
عاجباني فكرة إن الحكومة هيا اللي معينة عاكف عشان تشوه بيه صورة الإخوان

في الجوووووووووون

بس للأسف هما مش بالذكاء ده
الإخوان هما اللي بالغباء ده

ولا يهمك يا إم

كله بيروح ف الغسيل

غير معرف يقول...

عندما تطالب فهمي هويدي بترك الاهرام (و هي الجريدة التي بدا مشواره الصحفي فيها منذ اكثر من 40 سنة مع اساتذة الصحافة انذاذ) اين ينشر مقالته؟ هل انت مصدق ان المصري اليوم جريدة مستقلة فعلا و انها افضل من الاهرام سياسيا؟ صحيح ان المصري اليوم تحتوي علي جهد صحفي لكن في العام الماضي اتضحت ميول الجريدة السياسية. فهي اولا ضد حركات المقاومة و اصبحت منبر للهجوم علي حماس و حزب الله. كذلك لوحظ ترويجها لسياسية مصر الخارجة الي هي اصلا زي الزفت. و لكن الاسواء من كل هذا ترويجها للتعديلات الدستورية القميئة و تبريرها في سياق كتابة الخبرعلي الصفحة الاولي لموضوع الاشراف القضائي الصوري الذي سيتم عند تعديل المادة 88 الخاصة بالاشراف القضائي. و اخيرا و ليس اخرا المصري اليوم متعاطفة مع مشروع جمال مبارك و روجت و حرضت علي طلبة الاخوان المسلمين حتي ان البعض راي انها شجعت الامن علي اعتقالهم و ترهيبهم.
هل المصري اليوم بهذا الشكل افضل كثيرا من الاهرام؟ و هل توجد جريدة واحدة محترمة في مصر اصلا؟ اشك

مراقب مصري يقول...

عزيزي كريم

أتفق معك في مجمل ما قلته
وإن كنت مازلت مؤمنا أن الحرة تجوع ولا تأكل - لا مؤاخذة - بثدييها

غير معرف يقول...

الخراب يخيم على منطقة الزواية الزراعية بكفر الشيخ بعد تعليمات السيد المحافظ الشفوية بالغاء انتفاع شباب الخريجين المنتفعين بطقعة ارض من مشروع مبارك للخريجين بالغاء انتفاعهم فورا وتسكين بدلا منهم الرجاء من السادة المسؤلين ان ينظروا لنا بعين الرحمةحيث اننا ننتفع بهذة الارض من سنة 1989 وهى مصدر رزقنا ورزق اولادناوالامر مفوض لسيادتكم

لكي لا ننسى دم أحمد علي مبروك