١٠‏/١٠‏/٢٠٠٦

الرائع عمر قناوي قائد المقاومة الباسلة!!


يا شباب يا مدونين ويا مدونات

صديقي العزيز عمر قناوي خرج أخيرا عن صمته البليغ

وتكلم في حوار شامل أجرته معه جريدة الوفد صباح أمس

وقد اهتمت كالعادة جميع وكالات الأنباء بحوار فخامة السيد النديم

وكالعادة كانت تصريحاته تاريخية وحواره موضع إشادة القاصي والداني

وتصريحاته النارية كانت كسهام نارية تصيب كبد الحقيقة وكانت كمبضع الجراح الذي يصل إلى موطن الداء ويشخص له العلاج الناجع

عمر قناوي أعلن بدء المقاومة

ومن هنا نقول لسيد المقاومة عمر قناوي

نحن معك يا سماحة السيد عمر قناوي

في مقاومتك المشروعة ضد القبح والعفن والعطن والجهل والغباء

نحن معك في خندق واحد

فسر على بركة الله

واخترناه وبايعناه واحنا معاه لماشاء الله

إليكم الحوار نقلا عن جريدة الوفد الصادرة صباح الأمس الاثنين التاسع من أكتوبر 2006

(الكوبي رايتس محفوظة طبعا لجريدة الوفد مع اعتبار إنه في بلدنا الكوبي رايت معناه إتس رايت تو كوبي)

تجارة الكتب حببت إليه القراءة ونشطت وعيه السياسي: عمر قناوي: أتبني مشروعا للمقاومة بترويج الفكر الجاد

فارس سعد:

يعرف غالبية المثقفين، خاصة في منطقة وسط البلد في القاهرة عمر قناوي مدير احدي المكتبات يترددون عليه في المكتبة، يطالعون آخر الاصدارات، من الكتب التي تتميز بسمة خاصة من الجدية، يسألونه عن اخبار الانشطة الثقافية، يصادفونه علي المقاهي المنتشرة في وسط البلد ويترددون عليها، يقابلونه في المظاهرات التي تندلع في مناسبات مختلفة، تطوف بشوارع القاهرة، وهو يشارك فيها بكل حماس، عمر قناوي يبلغ من العمر 30 سنة، خريج كلية الآداب قسم تاريخ، جامعة عين شمس، دفعة 1999.

عن بداية علاقته بالكتب يقول:علاقتي بالكتب ورثتها عن والدي، كان عنده هوس بالقراءة، ولديه مكتبة كبيرة، وبدأت البحث عن الكتاب، والانتباه لقيمة المعرفة، وانا عمري 11 سنة، حيث أخذت اتردد علي المكتبات العامة، وأشعر بالتميز بين اقراني الذين لايقرأون.وكنت أنفق جزءا كبيرا من دخلي علي الكتب، ومن الذكريات الطريفة التي أتذكرها واعتز بها أنه منذ عدة سنوات كنت في ميدان المطرية ووجدت عند بائع الكتب كتاب »المدينة الفاضلة عبر التاريخ« وكان ثمنه ثلاثة جنيهات، وكان كل ما معي من نقود ثلاثة جنيهات والربع، فاشتريت الكتاب، ثم عدت الي منزلي سيرا علي الأقدام من ميدان المطرية، حتي حدائق القبة.

ويواصل:في المرحلة الجامعية عملت في مكتبة سندباد، وكنت وقتها في السنة الثانية بكلية الآداب تعرفت علي واحد من الشركاء وشعر اني الشخص المناسب لادارة المكتبة، وهذا المكان وفر لي القراءة مجانا ومع الوقت شعرت انه من المهم ان يسهم الفرد في تأسيس مكتبة جادة، تقدم كتبا تثير الوعي، والفكر الجاد، واعتبرت ان هذا مشروع مقاومة للانهيار الذي نواجهه.مشروع مقاومة ضد نماذج من الكتاب مثل نبيل لوقا بباوي، وسمير رجب وكتب مثل عذاب القبر، والسحر، والجن.

وحينما بدأت أقرأ في الكتب الجادة بالمكتبة شعرت بأن المكتبة الجادة مشروع مقاومة، وكان عندي إحساس ورغبة ان الناس يجب ان تقرأ هذه الكتب.وبدأت معاييري لنوعية الكتب التي أعرضها للناس تختلف وترك لي الشركاء تولي هذه المسئولية بشكل كبير، لثقتهم في، بالرغم من ان هذه النوعية ليست مفيدة تجاريا، ولكن لم يكن عندنا استعدادا لعرض كتب لانيس منصور، حتي لو كنا هنكسب من وراءها.وبدأت أختار دور النشر التي تقدم كتبا جادة، واقمت علاقات مع دور نشر جادة في الخارج، وبالتوازي مع ذلك بدأت الناس التي تبحث عن هذه النوعية من الكتب، وتنتبه لنا، وتأتي الينا، ومن خلال هذا التفاعل بدأ المكان يحدث صدي عند النخب العربية وغيرها، وبدأنا نشعر بأننا في الطريق السليم، وكان نتيجة ذلك حصولنا علي شهادة عام 2000 من المركز الثقافي الالماني، تؤكد دورنا في الترويج للكتب الجادة

.يقول عمر:من هنا جاءت شهرتي في الوسط الثقافي حيث ارتبطت في البداية بالمكتبة، ومن خلال علاقتي بالمثقفين، كما ان علاقاتي بالوسط الثقافي ترجع ايضا الي قيامي بالكتابة في الصحف، واقوم باعداد البرامج التليفزيونية.إلي جانب أنني أمارس النشاط السياسي في الشارع، وقد بدأ هذا النشاط، بعدما لفتت القراءة انتباهي للسياسة، وبعدما قرأت، كان لابد أن أعبر عن موقفي، وقد تعرضت لتجربة الاعتقال بسبب ممارستي للسياسة مثلما يحدث للعديد من أبناء الشعب المصري، في ظل هذه السلطة، وأزهي عصور الديمقراطية

* ماهو اتجاهك السياسي؟ انا يساري، وقد جذبني لليسار القيمة الإنسانية، وفكرة العدالة للجميع، وإلغاء التمييز الطبقي، وتأثرت ببعض الشخصيات مثل صنع الله إبراهيم، وعبدالرحمن خير، ودكتورة امينة رشيد.

وما هي الكتب التي تأثرت بها؟من الكتب التي تأثرت بها، »سيبرأني التاريخ« وهو مرافعة الرئىس* الكوبي »فيدل كاسترو« عن نفسه بعد فشل انقلابه، وعدد من مجلة »المواجهة« عدد خاص عن سليمان خاطر حيث تأكدت من كذب الدولة التي اشاعت فكرة انه انتحر، وكتاب لرسومات ناجي العلي تعلمت منه دور الشىء البسيط في فعل المقاومة، بالاضافة لروايات مثل: رواية »ذات« لصنع الله ابراهيم وهي اشبه بالوثيقة علي فترة السبعينيات والثمانينيات بالاضافة لروايات كتاب آخرين مثل: بهاء طاهر ورضوى عاشور.اما علي مستوي الروايات الاجنبية فقد تأثرت برواية »الحمامة« لباتريك زوسكيند، وهي رواية عن شخص يجد صعوبة في التكيف مع العالم، وقصص قصيرة لماركيز، ودواوين للشعر الفلسطيني محمود درويش، والمتنبي، وغيرها من الكتب والكتاب الآخرين.

*.......؟ـ الدولة تتعامل مع الكتاب باستخفاف من حيث تأثيره علي الرأي العام، حيث مازال تأثيره محدودا، وذلك بالطبع يرجع الي ارتفاع نسبة الامية، التي هي في مصلحة هذا النظام، والا من اين يأتي ايضا بجحافل الامن المركزي، والسلطة تري ان الحركة طالما في اطار النخبة، فلا خوف علي النظام منها، ولكن لو مكتبة مثل التي اديرها توجد في حي شعبي، كانت السلطة ستتعامل معها بشكل مختلف.وأري ان الموضوع مثل الاواني المستطرقة، سينما جادة، وكتب جادة، وصحافة جادة، وسوف يؤدي كل ذلك الي رأي عام جاد، يؤدي الي تفتيت سلطة وفاعلية المؤسسات الصحفية، وقنوات التليفزيون، التي تعمل علي تشكيل الرأي العام لحساب هذا النظام.

* وعن رأيه في الواقع الذي تعيشه مصر حاليا يقول:

ـ بحكم كوني دارساً للتاريخ أري اننا نعيش في مصر في عصر انحطاط، في كل شىء، والفساد هو قانون الدولة، ولكن هناك بوادر ايجابية كثيرة، منها نزول الناس الي الشارع، وانكسار حالة الخوف من الامن، وضياع هيبته، وسوف ينزل الناس الي الشارع باعداد كبيرة مع تزايد الازمة وعنف الامن مع الناس دليل علي افلاس النظام وضعفه، وهذا العنف لن يحمي الحكام، لان النظام الذي يسلم ادارة الدولة الي الاجهزة الامنية، ويعتمد عليها تماما، هو نظام انتهي نظام فرغ من العقول المفكرة، وكل العقول الجيدة تقف ضده، والوضع سوف ينفلت غصب عن النظام لان حجم الازمة أصبح أكثر منه وأقول للوطنيين في الاجهزة الامنية بكافة مسمياتها إن لكم فيما حدث لنظام صدام حسين، وجنرالات حزب البعث عبرة، ولكني اظنهم لن يعتبروا بسبب غرور القوة، التي لاتعتبر الا بالانكسار، وساعتها تظهر مدى تفاهتها وهوانها ودونيتها.

* ما الذي استفدته من الكتب؟

استفدت من الكتب قيمة الاحترام، المعرفة تعطيك احتراما، وكلما كنت ضد السطحية تبدو انك تخسر، ولكنها تعطيك احترام الناس والاحساس بالرضا.

هناك ٦٢ تعليقًا:

alnadeem يقول...

يا حج جرجس
الف شكر يا معلم علي الدعايه اللي بتعملهالي وأكيد مش هنساك بمنصب محترم ان شاء الله في حكومتي المقبله ممكن يكون وزاره الأوقاف مثلا أو مشيخه الأزهر
علي فكره الحوار نزل في عدد النهارده (الثلاثاء مش عدد امبارح
وما اتحرمش منك يا زعيم

غير معرف يقول...

الله عليك يا جرجس انا بحترمك اوي انت والنديم انا بجد سعيدة جدا ان لسا الدنيا فيها شباب زيكم ..وزاد احترامي ليكم ..واتمنى ان اتعرف عليكم شخصيا لما انزل مصر ويشرفني اني ادخل مكتبة السيد عمر قناوي لان فكرة المكتبة فكرة لا يفعلها احد في عصرنا الان للاسف الا اذا كان شخص على مستوى عالي من الثقافة والادب
وربنا يوفقكم
ويا عمر انا جيه اشتري كتب وعشان تعلمني العزف وانت شاهد يا جرجس
:)

alnadeem يقول...

إلي العزيزه رشا
الف شكر يا ست الكل علي الكلمتين الحلوين دول و والله العظيم مصر مايانه بالشباب اللي زي الورد بس منها لله الحكومه
اللي قتلت أي روح حلوه موجوده عند الناس
بالمناسبه انا اتعرفت علي الحاج جرجس يادوب من 3 أسابيع ولما عرفته أول كلمه قلتها هي ان مصر لسه بخير طالما فيها نماذج بالشكل ده

عموما يا ستي إحنا مستنيين تشريفك لينا في المكتبه اول ما ترجعي من السفر
بالمناسبه إنتي مسافره فين وهترجعي إمتي
خالص تحياتي

غير معرف يقول...

الاذن منك يا جرجس انا والنديم حنحتل المدونة بتاعتك..هههه
والله انا طول عمري بقول احسن شباب شباب مصر واجدع ناس بجد نفسي الناس تتعلم منكم انا يا سيدي دلوقت في قطر بشتغل
وجايه مصر على العيد ان شاء الله وبجد لازم اجي ازورك واهنيك على المكتبة انت بتفكرني بأبن سينا
ويسعدني اتعرف عليكم شخصيا واستفيد منكم
بس لازم تديني العنوان عشان ما توهش
تحياتي ليك ولعمنا جرجس

مراقب مصري يقول...

نهار أبيض
هو اللي بنعمله في الناس هيطلع علينا ولا إيه؟
مدونتي احتلت في حياة عيني
ومن مين
من فخامة الرئيس النديم
ماشي يا عم النديم
مانا برضه احتليت مدونتك قبليك
ولا يهمك يا ريس
برطع في المدونة براحتك
وبعدين ما هو الموضوع عليك
يعني في بيتها
رد يا عم براحتك ع المدونين
وعيش حياتك
نحن وراؤك يا قائد المقاومة
========================



العزيزة رشا
مستنيينك لما ترجعي
بس اعملي حسابك وانتي جاية تجيبي شوية فلوس كتير عشان تجيبي شوية كتب جامدة جدا من عند عمر
دماغك هتختلف تماما من نوعية الكتب اللي عنده
أنا متفق معاكي إن طول ما فيه شباب زينا كدة طول ما هيفضل فيه أمل في إصلاح المخروبة واسترداد صورتها الأصلية الرائعة التي قصدها لها الله الذي قال مبارك شعبي مصر

غير معرف يقول...

جرجس خلاص انا حاجي وتساعدني انت والنديم اختار كتب جامدة خلينا نتعلم كدا منكم
بس مش تنفضولي انا جاية عشان المكتبة..
وعشانكم طبعا
:)
وبعدين خليه يا خد رحتو هنا عندك منتى مديق عليه العيشة هناك

تحياتي للشباب الصح

مراقب مصري يقول...

خلاص يا أستاذة رشا
إحنا مستنيينك في المكتبة
ومسئولية اختيار الكتب سأتركها لأخي الكريم عمر
ولكن مسئولية تفسيحك والخروجات سأتكفل بها أنا
خلي عمر في مكتبته وبلاش نضيع وقته

غير معرف يقول...

يا عم مين ادي الاستاذ عمر حينقيلي الكتب ويعلمني العزف وحببنا جرجس حيفسحني ايه الجنة الي انا فيها دي
:)
متشكرة يا احلى جرجس ويا احلى عمر
خلاص خليكم عند الوعد ودلوني المكان صح
مش تتوهوني وتطلعوا قافلين زي ما عملتو
مع
Epitaph
خلاص يا حببتي حخديك معايا اصلي انا بتوه في مصر يلا انتوه سوا مع بعض احسن

;)

Adel يقول...

عزيزي جرجس : لا من غير عزيزي
واضح انك عندك ميول للسلطة شديد وبتحاول تتملق للرئيس القادم وتلمعه لكن صنف الورنيش بتاعك من نوع نص كم مالك انت ومال عمر ينزلوا له موضوع فالوفد ولا الغد ولا صوت الامة انت كده كده عليك اللعنة وهو ناوي لك ولو ولعت صوابعك العشرة شمع وما تفتكرش ان شوية الحركات دول هايخيلوا عليه ده قناوي ومقطع بطاقنه امال هو بقى رئيس دولة من شيء شوية وبعدين من الاخر انا عرفت من مصادر موثوق فيها جدا ومش هاقول هو مين علشان فارس مايزعلش مني ان انت خلاص اهدر دمك واستباح اضطهادك وقابل يا حلو ياللي عمال تتنطط للسيد الرئيس وبالنوسبة لرشا مالكش دعوة بالفسح بتاعتها دي ابو زمل وبتاعه شوتو فوب زي حالتي وانا اللي هافسحها واركن انت على جمب خليك في الماجيستير بتاعك يا بتاع النسوان والولادة وختاما مش هاقولك تحياتي لكن هاقولك ايه اللي جابك هنا عدو ولا حبيب

lastknight يقول...

شوف ياجرجس .. بعد ما اتأخرت عن الندوه اللى فاتت أنا اصدرت فتوى بأباحة دمك و اضتهاضك .. عادى يعنى .. لكن دلوقتى بعد الرئيس الواطى عمر قناوى مابتدى يتشهر أنا مضطر أنافقك .. أنت عارف أنا رأسمالى و عاوز احافظ على مصالحى .. فبالتالى هالغى الفتوى .. و اقول للرئيس القناوى ألف مبروك ياريس .. اخترناه و أحنا معاه لماشاء الله
المهم كل اللى بيكتبوا دول ماينسوش يوم الخميس .. الندوه هاتبقى موسيقيه ..و ربنا يسترها بقى

tota يقول...

الحج جرجس
اولا شكرا على انك رحمتنا من البحث عن الوفد

ومش غريب على الشلة يعنى انها تبقى سعيدة بعمر كده

عمر يا قناوى
ايه الكلام الكبير ده ده انت تاريخ يا عم ومحدش عارف
اه ليك حق تتريق عليه ما هو انت عم الثقافة واحنا لسه على الهامش
انت تستحق اكثر من ذلك صحيح لسه ما اخذتش حقك بس اكيد فى يوم هنقول عمر ده نعرفه من زمااان ده كنا بنقعد سوا قدام المكتبة شوف سبحان الله بقى ايه واحنا زى ما احنا ونديها ارررر بقى

مبروك يا عمر

مراقب مصري يقول...

العزيزة السكلاة إبيتاف
أنا بعمل مترجم في الوقت الحالي لحد ما ارجع للطب والترجمة من أكتر الحاجات اللي باستمتع بيها جدا
أحب أشوفك في ندوة الخميس
وبعدين تيجي في الميعاد مش هنبيع لبن
الزعيم عمر قناوي دا راجل زعيم يعني على ما يصحى العصر ويخش ياخد الحمام بتاعه في الجاكوزي وينزل في البانيو المليان لبن بياخد وقت
وعلى ما يفطر فطار كونتيننتال بيكون الوقت راح
فيدوب كدة تيجي يوم الخميس على تسعة مش قبل كدة
أو ممكن تيجي تمانية عشان تلحقي كرسي من كراسي القهوة اللي جنبنا
ونبقى نقعد ناخد وندي أنا وانتي في موضوع الترجمة دا
=====================




يا رشا
لن أتركك تتوهي يا حبيبتي
إنتي بس تعالي واطلبيني بالتليفون
وهاخدك أفسحك
سيبك من عمو مزاجنجي
(آه المزاجنجي دا عجوز عنده 44 سنة يعني ما ينفعش يفسح حد مش شباب زيي)
وبعد الفسحة يا قمر هاخدك على الإمبراطورية لمقابلة الزعيم ومجلس قيادة الثورة القناوية
=======================




عم الموزاجنجي
أصدرنا قرارا ثوريا بأنه عليك الابتعاد عن منتئة وسط البلد بما لا يقل عن 20 ميل بسبب سلوكك غير الثوري وتصريحاتك الرجعية والتي توسع من الهوة بين عناصر الأمة الواحدة والتوقيع بين الزعيم الركن المهيب عمر القناوي
(الألف واللام دي للتفخيم زي السادات كدة)
وبين نائب الرئيس القادم الحاج جرجس
واللعب على أوتار الفتنة
إلخ إلخ إلخ

بموناسبة رشا
يا عم الحاج البنت مسيحية وزي ما هو واضح مش من سنك
يبقى تبعد باحترامك عشان ما يبقاش فيه دم وشرشحة ع المسا
قدك دي؟؟؟؟
إنت فيك حيل تفسح قرد بنضارة؟
طبعا مش قصدي أي حاجة وضيعة بس حابب أطمن عليك... خدت مضادات التجلط بتاعتك النهاردة وخوافض الضغط وأدوية الذبحة؟
خلاص خدتهم؟
احبس بقى بسيجارة بوكس وما تخبطشي ف الحلل
=====================




العزيز الفارس الأخير
(أنا بحب الترجمة بدقة)
عفونا عنك وسأكلم الزعيم من أجل تعيينك وزيرا للنخاسة
أقصد وزيرا للاستثمار عشان تبيع اللي هيتبقى من أم المخروبة دي بعد نهاية عصري جمال مبارك وابنه هيثم مبارك
معلهشي يا خويا مش باقي حاجة تبيعها إلا شوية فتات بعد ما جمال باع القناة
وهيثم باع الهرم
خش انت بيع فيصل والطالبية ومشعل مشعل مشعل
========================





توتااااا السكرة
يلا يا قمر استعدي للحفلة الموسيقية القادمة يوم الخميس
ادعو إن مطرب الشعب أسامة فؤاد يكون حاضر
الواد دا قنبلة موسيقية
وما شفتش حد بيغني سيد درويش في جماله
===========================



عم الغريب
شوفت الترابط يا عم الحاج اللي بيننا؟
ولا في بيننا عزول زي المزاجنجي ولا براجماتي نفعي زي الفارس القديم
ولا حد بتاع نسوان (وتوليد) زي الحج جرجس والحياة فلة أهوه عايز إيه بقى؟
يلا هات العيلة الكريمة بروح خالتك وحصلنا على مجلس قيادة الثورة القناوية
المكان سهل وبسيط
(وانشالله ربنا يبعد عنا بتوع لاظوغلي وخصوصا وليد الدسوقي وبتوع القراطيس الكرتون)
اوصل ميدان طلعت حرب
هتخش منه في شارع قصر النيل
تاني شارع يمين
تلاقي فندق كوزموبوليتان
الشارع اللي وراه يا حلو
(أيوة هو الشارع الصغير الضلمة دا)
هتخش وتمشي بتاع اتنشر متر
هتلاقي الشلة قاعدة وناقصها وجودك إنت والعيلة الكريمة
ما تبقى تيجي إنتا والجماعة كدة ومعاكو شوية لب ولا سوداني

غير معرف يقول...

ايه يا جماعة هو عشان انا في الغربة تبيعو وتشترو فيا
:(

فينك يا عم عمر تشوف الي بيجرالي...
اولا الفسح حتكون كل يوم مع حد
واللي عايز يفسحني
لازم يكون كريم اصلي يا جرجس عزمت البنت ابيتاف معايا على الغذاوطبعا على حسابك
:)
والبنت خلاص وفقت
وانا كمان اسبوع
حكون جيت فترجم كويس الفترة دي عشان تحوش وتشتريلي الغسالة ولا نسيت
هههههههه


وتعالا هنا عمال تحب فيا وتمشورني وايه حكاية البنت كارمن دي
خاطب وحدا من ورايا

كارمن لازم تقوليلي الحكاية من الاول انا مستنياكي..اصل الرجاله دول
...

غير معرف يقول...

عم الحاج جرجس
جميل منك احتفالك بصديقك هنا
وعلى صفحات مدونتك

لاء وكمان اييييييية؟؟
عمر ساق فيها واحتل التعليقات

الف مبروك يا عمر
الاول تزلت فى اخبار الادب وفارس كان بيهنيك عليها عنده فى مدونته
ودلوقتى فى الوفد وجرجس سبق واخدها هنا
عقبال السى ان ان
بس بجد
انت واجهة مشرفة لشباب البد دى
اللى الكل فاهم عنهم
انهم مش فاضيين الا
للهشك بشك ودمتم
ولا لسمسون الحشيش وخلافه
ولا لمامى ودادى وبنفطر مربى يوماتى


على الاقل يبقا عندنا امل لسه

عقبالك يا جرجس
اجى هنا اهنيك
بظهورك فى نشرة اخبار الجزيرة

ام العيال يقول...

مساء الخييييييييييير
انتو قلبتوها شات و لا ايه
و انت يا جرجس سايب كارمن مدامتك و عيالك في الشارع و قاعد نفسح في رشا

انا بهدي النفوس بس
سلام

alnadeem يقول...

يا شباب
ويا حاج جرجس
أنا النت عندي فاصلمن امبارح وعشان كده ما بردش
متشكر جدا ليكوا جميعا
انتم مش عارفين انا مبسوط قد أيه باهتمامكم ده
ده كتير عليه جدا والله

انا اسف يا ابيتاف وحزين انك جيتي وما لقيتيناش فاتحين
بس احنا في رمضان بنشتغل لحد الساعه 3 العصر نهارا
وبنشتغل مساء من 8 ألي 12

lastknight يقول...

كده يا جرجس يا بتاع البنات ..؟ تشحطط كارمن مراتك حبيبتك أم العيال و تجرى تفرقع فلوسها تفسح بيها البنات .. ليلتك سوده يا مزواج ..
ياجماعه أنا هافضحه بقى .. جرجس ده مش جرجس خالص .. ولا أبوه قسيس ولاحاجه .. أسمه الحقيقى محمد عبد الرحمن بن لادن .. و مزواج .. و ضحك على كارمن و اتجوزها مع أنه متجوز تلاته قبلها .. أتنين فى أفغانستان و التالته فى الوراق ..
يعنى مسلم أصولى سلفى رجعى متشدد و كمان مزواج ..
هاهاهاه .. حلوه حكاية جرجس بن لادن دى .. أنا هاخرب بيتك لحد سيادة الرءيس القناوى مايرفدك و يعينى بدالك ..
و بعدين هرم أيه يابنى اللى باعوه ؟ هو أنا هابص للحاجات البسيطه دى .. أنا ياحبيبى هافك السد العالى و ابيعه ردم .. و بعيدن أعبى النيل قزايز مية بركه و ابيعه .. و الغاز الطبيعى هاعمله مصنع ولاعات صينى و ابيعها برضه .. و لسه .. أنا هاوريكم ياغجر .. بس الريس يرضى عليا

lastknight يقول...

و طبعا لأن تفكيرك مش رأسمالى متفتح زيى مش عارف تشوف غير الثروات البسيطه فى البلد دى .. أنت نسيت يافالح أن على الرئيس القناوى أطال الله بقاؤه مايوصل للحكم هايكون تعداد الشعب المصرى فوق التسعين مليون ؟
طبعا مانتاش فاهم
على مايوصل عمر ..هايكون العلم اتقدم ..و عمليات زرع الأعضاء بقت على ودنه ..
محسوبك بقى بعون الله هايفك الشعب و يبيعه قطاعى .. كلاوى .. حدقيات .. كرشه فشه .. و ممكن طبعا أعضاء أخرى مهمه .. و دى هاتبقى بأسعار خاصه ..
فهمت بقى يا متخلف أن ثروة البلد دى مش فى البترول ولا القناه ولا الهرم ؟؟
يا بلوريتاريا زى ريسك

lastknight يقول...

هافك الشعب و ابيعه
هافك الشعب و ابيعه

3rby يقول...

ايه يا جرجس هو انا علشان ماعلقتش يبقا تعلقوا البت مني....صحيح شهروزة بتموت فيا وبتكتب عني بوستات فيها حاجات سر:)
بس انا مش باحبها...وانا قلت ميت مره عن رشا:البت ديه اللي هايكلمها هاعورها...يا جدعان انا مابعرفش انام...باحلم بنظرة الي الداخل لحد ماتحولت....ومابزاكرش غير لما ابص علي صورتها...تقوموا تستندلوا معايا كده

يا رشا لو عاوزة تتفسحي خليكي مع الشباب هاوديكي اجمد غرز واماكن ماعرفهاش الدبان الاحمر...مش واحد عنده تجلط والتاني اسمه جرجس وطلع متجوز وبيحب الخدامة...طب بزمتك مش هاتبقي مكسوفة منه كده واسمه جرجس...جرجوستي...ده حتي اسمه معجن كده
يا جدعاان انا هايمان ومش هايهمني اي فاندام...انا جركن مان



اللي هايتكلم في الموضوع ده تاني هاعوره

Adel يقول...

كارمن الجميلة ام العيال الغلابة ربنا استجاب لدعاكي يوم الخميس اللي فات يعني امبارح جرجوستك ما جاش الندوة لانه بعيد عن السامعين لاقوه واقع في الارض فوق هضبة المقطم وبعد الكشف والذي منه وجدوا انه مشطب بنزين فرجاءًخدي معاكي جركن عبوة 4 لتر بنزين 80 من المعفن وروحي مستشفي المقطم وعبية ودورية وياريت تاخدي معاكي بطارية احتياطي اكيد البطارية نامت من الركنة او لو مش عاوزة ده كله ممكن تسحبية او تسحليه على الارض ما هو خلاص بقى مضطهد وتحياتي ليكي وللعيال ولو بجد والله عندي حشيش او اي حاجة غير بتاعتي انا والعيال ما كنتش هاعزها عليكي وعلى فكرة انا لسه باشطب في شقتي في بورسعيد من خاتم المرسلين علشان ابقى جنبك ويارب تفهميني بقى

Adel يقول...

روشا الجميلة شفتي جرجس وكلامه والله انا كان كل هدفي ان انا افسحك وبس واكيد انت فاهمة لكن هو ضميره سو ووحش بلاش تخرجي معاه لا انت ولا ابيتاف وخليكوا معايا واللي بيشحت على 5 عيال وامهم مش هايعرف يشحت على اتنين كمان معاهم تعالوا ولا يهمكوا

Adel يقول...

3rby
عرابولا انت عارف انا باكرهك اد ايه تخبط في جرجس يا كش تولع فيه انما يا خفيف ابعد عن سكة رشا وقد اعذر من انذر وانا عارف بيتك يا حمادة وبلاش نسيح واروح لاخويا القمحاوي والاغيه عليك اشطة ؟

Adel يقول...

ام العيال الرقيقة تهدي نفوس مين والله الراجل ده عاوز قطع رقبته يبقى عنده زوجة زي كارمن الجميلة دي ويدور يتصرمح ولا لو شوفتي مراته بتاعة تورا بورا حاجة ايه ما اقولكيش واد مزواج منه لله المهم يا ست الكل انت منورة هنا وفكل مكان

Adel يقول...

lastknight
منور يا نجم واعضاء ايه اللي عاوز تفكها وتبعها طيب وحياة ابوك قولي انا في ايه ممكن يتباع وانا موافق يللا هات الميكانيكي بتاعك وتعالى فك وقبضني

Adel يقول...

tota
اجمل وردة في بستان وزارة الزراعه اللي في الدقي وانت نازل من كوبري اكتوبر من جنب يافطة نوكا اللي ورا شارع الثورة منورة وشكرا على الاطراء الرقيق اللي خارج من ارق قلب وربنا ما يحرمني انا شخصياًمنك وانت عارفة السبب والله العيال وامهم بيدعوا لك ومستنين الكمالة وطبعا يا ست الكل عمر يستاهل كده واكتر وربنا يارب يروق بالك وشكراً على الزيارة

Adel يقول...

Epitaph
يا ستي خيرها في غيرها ومنتظرينك ان شاء الله يوم الاتنين وتنورينا

Adel يقول...

شهاريزو شكرا ليكي على الزيارة واكيد انا عارف انك فرحانه لعمر جدا وعارف انك كمان حاقدة علينا علشان كنا مع بعض يوم الخميس وانت لا لكن منتظرينك بعد رمضان بقى وكل سنة وانت طيبة

3rby يقول...

انت وهو

Adel يقول...

3rby
نعم مني ونعمين منه ؟

3rby يقول...

يا عم مزاجنجي علي نفسك
وانت جرجس الكافر علي نفسك برضه
لو انت جرجس انا ابو جهل بشخصه:)
انا من عباس العقاد يا بشر
والبت بتاعتي ماتتعلقش
انا متكلم من زمان
وهي مالهاش راي
المهم امها موافقة
مدونين اخر زمن

Adel يقول...

3rby
قمحاوي انت داخل شمال ليه في ايه مالك مين جاب سيرة المزة يا عم البلطجي انت وعموما انا اعلنت الحرب عليك واللي هاشوفك فالمعركة هايقتلك ....... خد بالك

3rby يقول...

ماشي يا عم القائد
عمالين تعاكسوا في رشا ليه
والله لاعمل حرب عالمدونة بتاعتك
ونأخذ من كل رجل قبييلة
حتي نفرق دمك بين البلوجات:)

الأميره أوسه يقول...

أنتوا طفشتوا جرجس
تعالا يا جرجس
الطريق أمان
خلاص مشيوا

3rby يقول...

انتي بلطجية يعني ولا هاتعملي فيها خاطبة؟
طبعا مانتي عاوزة تخلصي من جرجس فاتقومي مجوزاه لرشا....طيب انتي ومزاجنجي وجرجس
ونأخذ من كل رجل قبيلة حتي يتوزع دمك بين القبائل...هاعمل من دمك شلالات زي المرسومة في اللوجو بتاعك:)
سلام حتي الحرب:)

مراقب مصري يقول...

ما شاء الله
المدونة بتاعتي بقت مرتع للي رايح واللي جاي
وببتخانقوا ف بيتي كمان
ما طبعن ما هو إن غاب القط إلعب يا فار

وانت يا عم المزاجنجي ياللي بتعلن الحرب على البشر كلهم
واخد المدونة لحسابك وبترد ع الزباين بتوعي
هو اللي بنعمله في الناس هيطلع علينا ولا إيه
وبعدين الموضوع بتاع التدوينة دي كان الزعيم الاباسل قائد المقاومة عمر القناوي
قوم انتوا قلبتوها معارك ع الحريم لمؤاخذة
إخص عليكم
يا ام العيال متقلوليهم حاجة
المهم أنا عندي مجموعة ردود كنت كتبتها لكل واحد فيكم من يوم الخميس ومالحقتش أطلعها
خدوا عنكوا اللي جاي بقى

مراقب مصري يقول...

أولا أكتب إلى كارمن

يا بت يا كارمن

ما ترسي على بر
الحاج جرجس أبوكي ولا خطيبك ولا ابن بطنك ولا إيه بالظبط؟
عند فخامة الرئيس عمر في المقر الصيفي لإمبراطورية النديم قولتي إن أنا أبوكي وأنا اعترفت بيكي واعترفت بغلطتي مع أمك من سنين عددها يساوي عدد سنين عمرك زائد تسع شهور
وقلت ماشي أهو ينوبني فيكي ثواب واعوضك هم اليتم اللي اتيتمتيه طول عمرك
لكن تيجي هنا وتدعي إن أنا خطيبك وأبو عيالك!!! يا نهار اسود
خطيبك وأبو عيالك كدة خبط لزق!!
الله يسامحك... يا مفترية
بقى عشان لقيتيني خلاص أنا ورشا بقينا خلاص داخلين على الجد تقومي تطلعي تعملي الإسفين المتين دا؟
لأ بجد إخص
طب مش هصلح غلطتي مع أمك
وخليكي طول عمرك لقيطة كدة
وكمان مدمن بنزين يا مصاصة الدماء يا آكلة المورتاديلا وعصير الخنزير
وفي الآخر كمان يطلع إن الحاج جرجس ابن بطنك... جك وجع بطنك قليلة الرباية
اللي اختشوا ماتوا صحيح
لأ داحنا صعايدة وعيال جامدة أوي

إلا انتي صحيح يا بت م العمرانية؟
طب ما تخدي أول توك توك وتيجي لي يا وزة ونبقى نتفاهم
;)

اطلعي م الموضوع بتاعي أنا ورشا خالص
بلاش توقيع يا بت
أنا عايز استقر بقى
ورشا شكلها نايمة على خميرة جامدة من شغلها في بلاد الجاز
اصبري يا بت وهينوبك م الحب جانب
================================

مراقب مصري يقول...

ثم إلى الرائعة الجميلة الساحرة رشا

العزيزة رشا
إوعي تصدقي كلام كارمن
دي بنت مشيها بطال من زمان
وكانت بتخدم في البيوت مع بوسي سمير
ويقال إنها مصاصة دماء
وبعدين في تصريح صحفي على لسانها أعلنت
(ولم تنكر هذه التصريحات إلى الآن)
أعلنت إنها أصلا مش بنت
(لأ مش قصدي زي ما فهمتي)
قصدي إنها مش أنثى بالمعنى الأكاديمي لكلمة أنثى
هي قالت أن نصفها الفوقاني أنثى صارخة الجمال
(مزة جامدة بالبلدي مع الاعتذار للصائمين)
ونصفها التحتاني
(أعوذ بالله من غضب الله)
راجل وبرضه جامد أوي
طب دي تتخطب وتتهبب تخلف إزاي؟
(هذه الأسئلة استنكارية وليست للإجابة لمن قد تسول له نفسه الإجابة)
يعني لابد أن تطمئني تماما
اللي بيني وبين كارمن لا يزيد على الإطلاق عما بيني وبين صديقي العزيز فارس قديم
يعني ما بيننا إلا كل خير وخلاف أيديولوجي وصراع على السلطة والتقرب إلى الزعيم عمر القناوي

بالنسبة للعزومة على حسابي
والغسالة اللي عايزاني اشتريهالك
ما عنديش مشكلة في العزومة
عندنا في مصر مطعم خمس نجوم في أفخر شوارع الجيزة
(الجيزة اللي فيها الأهرامات وابو الهول وترعة الزمر)
اسمه
Raslan Sons' Restaurant
ودا مطعم شهير لازم تحجزي فيه قبلها يتلات شهور على الأقل
وفي هذا المطعم سأعزمك على أفكر أنواع الكبدة الاسكندراني والسجق الاسكندراني والكفتة الاسكندراني برضه
(إخرس ياد يا فارس سندوتش إيه اللي بربع جنيه يا براجماتي إنت... دا الرغيف هناك وصل جنيه بحاله)
أما حكاية الغسالة يا حبيبتي
فأنا برضه ما عنديش مانهع من حيس المبدأ
بس عندي اقتراح أفضل يا رشروشتي
مش لو جبتيها معاكي من قطر هتبقى أرخص يا أمي؟
(إوعي تكوني داخلة على طمع يا بت؟ نقبك هيطلع على شونة)
إنتي بس تعالي وكل هذه الصراعات الداخلية سيتم إخمادها في مهدها
================================

مراقب مصري يقول...

وبعدين رد على شهروزة الشهاريز الجميلة

عزيزتي شهروزة
إيه يا أمي العقل والرزانة اللي نزلت عليكي دي يا سيدتي
(إنتي بتتفرجي ع البت المزة رزان كتير في البيت اللي مش بيتك؟)
لأ وكلام كبير وجامد
ماشي يا ستي
صلحي مع الرئيس عمر القناوي على قفايا يا أوختشي
عموما ما احنا كلنا بننافقه يعني جت عليكي انتي
وبعدين الرئيس عمر القناوي دايما يقول لنا أنا مش بتاع شعارات
وعارف إن كل دا نفاق رخيص ومش باكل منه بس من فضلكم اللي ينافقني
(والكلام للسيد الرئيس)
ينافقني من قلبه
شفتي عمرك رئيس بالجمال والحلاوة دي؟
عشت لنا رئيسا وزعيما ونافخا ومنفوخا يا زعيمنا الهمام المفدى يا عمر يا بن ...
(هو انت اسم امك إيه؟)
يلا يا عمر يا بن قناوي

بالمناسبة يا شهروزة
يرضيكي اللي عاملاه فيا كارمن دا؟
هتبوظ لي المواضيع مع رشا
================================

مراقب مصري يقول...

ثم ست العاقلين وستكوا كلكوا أم العيال

أم العيال
مش عارف يا أختي العيال دي اللي بتعملوا هنا
قلبوها تشات
واحنا اللي جايين نقول كلمتين حلوين في حق الرئيس عمر قناوي
إخص عليهم عيال معندهمش اخوات بلاستك
طب والنبي يا شيخة لا تقوليلنا كلمتين جد كدة في موضوع ثكافي كدة جامد أو تشكري شوية في الزعيم عمر بن أنكل قناوي
ويمكن يمسكك وزارة البيئة
(سوري لأ دي بتاعة المسيحيين)
يمسكك الكوى العاملة
أو الشئون الاجتناعية
(سموها دلوقتي الدمان الموجتماعي)
بس زي ما قلنا لما تنافقي الرئيس
نافقي من قلبك
================================

مراقب مصري يقول...

وطبعا لابد من الرد على بتاع الأعضاء
سي الفارس القديم

عم الفارس الأخير
لقد أثبتَّ لي سيدي البارون أن لك عقلية فذة (ومستفزة) في التجارة
(التي هي بالطبع شطارة)
وراجل صاحب نظرية مش بس بياع
وأرى أن مكانك الحقيقي يا صاحب السعادة والهنا
في قلب لجنة السياسات جمب الأستاذ جمال
(عف اللسان الدمث الأخلاق)
وإن كنت أخشى عليك من إنك تتعدي منه
وما يبقاش عندك رغبة ولا نية
(يا نهار اسود)
(طب هتتجوز ازاي!!!!!!؟؟؟؟؟)
لا يا عم دة حتة الأعمالو بالنيات
وانت نيتك زي قلب الخساية
لأ بلاش لجنة السياسات
شوف لك أي لجنة تانية أو استنى بقى جمبينا لحد ما جيمي يخلص رئاسته
وبعديه هيثم ابنه
وبعدها يقوم عمر بانقلابه
ويكون أيمن خرج م السجن
وساعتها تستنى عليهم كمان اتناشر سنة يكونوا فسدوا فيها ويبدءوا يدوك توكيل فك الشعب واللعب في أعضاؤه أصدي خصخصة أعضاؤه
يا نهار اسود يا شعب يا اللي أعضاءك ها تتخصخص... ما علهش كله يهون لجل سواد العيون
شعللها شعللها
خصخصها خصخصها
شعلل
خصخص

هل تعتقد أن الخصخصة في مصر من أيام الفراعنة بدليل مجود كثير من الخصيان في البلاط؟
===============================

مراقب مصري يقول...

ثم نرجع إلى موضوعنا الأصلي وهو يا غجر الاحتفال بفخامة الأخ العقيد عمر القناوي زعيم المقاومة الباسلة

وأخيرا يا رئيس كل القناويين
عزيزي فخامة الرئيس المُفَدَّى الزعيم الحكيم والقائد الرائد
دعني أخاطبك بلا ألقاب يا زعيم الأمة
ومنهض الهمة
ومزيل الغمة
دعني أخاطبك حاف يا سيادة وفخامة الرئيس عمر القناوي

ناضلنا معك على مدى ستة وأربعين سنة
(منذ عام 2006)
وقد مرت السنون يا زعيم
وانقضى عهد جيمي وهيثم وآل مبارك جميعا وأخيرا صرت لنا زعيما
وأطلقت سراح أيمن نور وجعلته زعيما شرفيا للجمهورية القناوية
(دا طبعا قبل ما تعدمه في ثورة تصحيحك الأخيرة)
يا هادم الزنازين القديمة ومحرر مساجينها
(لتدخلهم الزنازين الجديدة)
هنيئا للمخروبة بك وهنيئا لك بالمخروبة
نحتفل معك اليوم بذكرى حوارك التاريخي في جريدة كانت تسمى الوفد بتاعة الإمبرياليين والإقطاعيين والذين تمت إبادة آخر معاقلهم منذ نيف وثلاثين سنة
حوارك التاريخي في تلك الجريدة عندما بدأت المقاومة يا سيد الأمة
وكان إعلانك الخالد يوم الثلاثاء (مش الاتنين) 11 أكتوبر 2006
عن بدء مشروعك للمقاومة
وقد دارت الأيام ومرت الأيام
وها أنت يا زعيم كل القناويين جالسا على العرش وحدك
وقد سكت صوت المعارضة الوضيعة
(من ذا الذي يعارض حكمة حكمك وبعدين يعراضوا ليه.. هما لاقيين حد يحكمهم الجرابيع دول)
في هذه الذكرى المهيبة واللحظات المفعمة بالرهبة
دعني أتجاسر وأتجرأ
وأن أشير عليك كما أشار المغيرة بن شعبة على الخليفة أمير المؤمنين معاوية يأن يعطي البيعة من بعده لولده يزيد
فها أنا أيضا أتجاسر وأتجرأ أن أشور عليك وأنت الذي لا تعوزه المشورة
وأقترح وأنت الذي لا تحتاج إلى اقتراح
بأن تعين ابن فخامتكم
الشاب الرائع دمث الأخلاق عف اللسان
بيتر عمر قناوي
ابن سيادتكم من السيدة الأولى تشيلسي كلينتون
التي تزوجتها إبان اضطهادك في عصر هيثم مبارك حينما نفاك إلى الشقيقة الكبرى أمريكا
وتلقفتك هناك السيدة الفاضلة تشيلسي ابنة الرئيس الأمريكي الأسبق الرجل الفاضل الطاهر جد ابن فخامتكم الرئيس بيل كلنتون
تاللهِ أعظم سلف لأعظم خلف
أشور على فخامتكم أن تعينه في منصب رئيس حزب جديد نعمله مخصوص لسيادته
(عشان فخامتك الليلة تبقى محبوكة)
وفخامة الباشا الصغير يبقى معارض شرس
وينجح في انتخابات جامدة وسيادتكم تخسر قدامه
فخامتك دي أنسب طريقة في عصرنا دا لتتميم مشروعنا التوريثي العظيم من أجل نهضة المخروبة
(سيادتكم لا يخفى عليكم إن كل سيناريوهات التوريث انفضحت وانكشفت أمام الشعب المعفن بتاع المخروبة)
(من أول لجان السياسات وكمال أبو المجد وعمر سليمان وكمان توريث جيمي لابنه هيثم اللي كان مفقوس أوي وسيادتكم كما هو العهد بكم كنتم أول المعارضين)
أقول هذا وأستغفر الله لي ولكم ياشعب الجمهوملكية القناوية
مصر سابقا
من قصر المخروبة
العروبة سابقا

عشتار يقول...

الحاج جرجس
انت يا ابني الواحد يخاف يعلق عندك
اية االسيناريوهات المسرحية دي
بعدين ما عدتش بتحج على مدونتي لية طب ما عشتار نشرت موضوع عن عمر شمعنا الوفد؟؟

مراقب مصري يقول...

عشتار الجميلة
حضرتك تيجي وتعلقس زي ما انتس عايزة وقت ما انتس عايزة
وما تخافيش من أي حد
السيناريوهات المسرحية دي ما بتتكتبش إلا على الدكتاتورات الطغاة أمثال رئيسنا بعد بعد القادم عمر القناوي
أما البنوتات الرقيقات أمثالك فسيجدن منا كل سيناريوهات الشعر الرقيق والكلام اللي طالع من القلب ليذهب إلى القلب
أما حكاية إني مبروحش مدونتك فدا مش صحيح
مرات باعدي بس مش بعلق
لكن لازم من هنا ورايح آجي وأعلق عشان خاطر ربة الشام الجميلة ما تزعلش مني

مراقب مصري يقول...

يخرب بيت سنينك يا بت يا كارمن
دا انتي طلعتي مثقفة وعارفة إن فيه حاجة اسمها النثر
معظم الجهلة من مصاصين الدماء زمايلك يعرفوا الشعر بس لكن صدقيني برافو عليكي إنك عرفتي إن فيه حاجة اسمها نثر
بقول لك إيه يا بنت العمرانية
(شرقية ولا غربية؟)
خدي إيميلي الشخصي أهو وابعتيلي عشان أديكي نمرة تليفوني ونخلص بقى م الحكاية اللي مسخت دي
عايزة فلوس قولي
عايزة حاجة تاني برضه قولي
المهم تسيبيني ف حالي
وكفاية ابتزاز

إيميلي هو
dr_mnzekry@hotmail.com

lastknight يقول...

بتزايد على وطنيتى يا خسيس .. ؟ طيب شوف دى بقى
سيدى الرئيس المفدى و القائد المغوار و الصامد منذ الأقدم و ألى الأبد عمر قناوى
أن هذا الواد جرجس الشهير بجرجس بن لادن أنه أفاق و عواطلى و بيقول على نفسه دكتور مع أنه سقط فى امتحان حلاقين الصحه .. هذا الواد مفلس و خروبى و قدمه نحس و رجليه الأتنين شمال .. يعنى حتى لما جه يحب واحده طلعت مصاصة دماء .. أقد يا زعيم أنك لو سمعت كلامه هايقطع الخميره من المخروبه كلها .. و هى أصلا مش ناقصه
سيدى الرئيس .. بصفتى زعيم الأقتصاديين فى المخروبه العظيمه حيث أن سيادتك تفضلت سابقا و شنقت كل الأقتصاديين التانيين و مش فاضل غيرى .. أتشر بأن أتقدم لسيادتكم بأهم مشاريع القرن الواحد و العشرين .. لخدمة نهضة المخروبه .. و هو أحياء لمشوعى القديم الذى أحطت سيادتكم به علما منذ نيف و أريعسن عاما .. و تعذر تنفيذ المشروع وقتها حيث كنتم سيادتكم مشرف فى الأوبرج ( سجن طره )أبان عهد النضال
مشروعى يا سيادة الرئيس هو الأستغلال الأمثل للثروه القوميه الحقيقيه فى المخروبه .. فتعداد السكان الآن أصبح يزيد عن المائة مليون جحش / مواطن .. أغلبهم مالهومش لازمه .. و مش لاقيين شغل .. و بيعملوا مشاكل .. و بياكلوا زباله و طبعا ده بيعملهم غازات و ريحة البلد بقت نيله .. وفى ذات الوقت تقدم العلم و التكنولوجيا فى مجال الطب .. و أصبحت زراعة الأعضاء البشرسه عمليه بسيطه و سهله .. و مربحه .. و بالتالىأتقدم لسيادتكم بالمشوع القومى لتفكيك الشعب و بيع أعضاؤه بالتجزئه بأسعار الجمله لنضمن التفوق على المنافس الصينى .. و أقترح أن يبدأ المشورع بتفكيك الأصناف المزعجه لراحة سيادتكم من المعارضن السخقاء أمثال الواد جرجس .. على أن يكون تسويث الموضوع بطابع تجارى حديث مع منح حوافز للمستثمرين الأجانب .. بمعنى أن اللى يشترى حدقية عين مثلا .. ياخد عليها جوز ودان مجانا .. أو اللى يشترى كليه ياخد معاها طحال مجانا .. أو اللى يشترى كبد ياخد عليه شوية فشه و كرشه فى سندوتش .. وممكن تأسيس شركة نقل خاصه لتوصيل الطلبات مجانا ألى الزبون بنظام الهوم دليفرى .. على أن تكون شركه متعددة الجنسيات ( حيث أن الأقتصاد مالوش مله من اساسه ) و يتولى أدارتها صديقك الصدوق السيد حاييم أيريل شارون .. لما له من خبره متوارثه فى مجال الجزاره و تفكيك لحوم العرب بوجه عام ..
و بنظره مستقبليه مشرقه .. نجد أن المواطن الواحد يمكن بيع أهم أعضاؤه بمبلغ فى حدود من ألفين ألى خمسة ألاف دولار ..( حسي حالة المواطن ) و بحسبه بسيطه .. نجد أن مجرد بيع نصف الشعب سيدر عائد لخزانتكم العامره أنشاء الله فى حدود من مائة ألى خمسمائة مليار دولار .. مع التخلص بصوره نهائيه من حوالى خمسين مليون جحش مزعج بياكل فول و كرنب و يعمل غازات .. و بالتالى فأن تأثر هذا المشروع سيكون جيد جدا على تنمية البيئه و تنقية الأجواء المصريه من الغازات .. و أيضا تخفيف الضغط على شبكة المجارى التى تهالكت بعد أن كان آخر تطوير لها هو فى العصر المباركى الأول
سيدى الرئيس .. أسمحلى أن ابدا على بركة الله فى المشورع القومى ... هافك الشعب و ابيعه

الأميره أوسه يقول...

جرجس أفندى
أنا شايفه ترجع لبيتك وعيالك
و حبيبتك كارمن
حرام تخرب بيتك بأيدك
أنت أيه معندكش قلب
كنت واخده عنك فكره أحسن من كده

مراقب مصري يقول...

عزيزتي أووسة

وحشاني يا سكرة

أنا كارمن دي لا يمكن أردها تحت أي ظرف من الظروف

البنت قلت أدبها عليا
وكل يومين تقولي انزل هات لي كيسين دم وتمن بلازما وكتر الصفايح

بذمتك دا اسمه كلام؟؟؟؟؟؟

دم وبلازما وصفايح!!!! يا نهار اسود دا مبقاش بيت!! دي بقت عربخانة



دم وبلازما وصفايح وانا اتحرق بجاز

ماهي مخلصة الفلوس ع القرف دا وانا مش لاقي ولا كيس كرات دم حمرا!!! ياخي أحمد

مراقب مصري يقول...

خبر عاجل








انضم الانتهازي البورجوازي المدعو فارس أثيم
(القديم سابقا)
إلى مجموعة هيرميس لتجارة الأعضاء والأوراق المالية
ولقد شارك معهم في المشروع "بالمجهود" ومن المعروف طبعا أن الأخ فارس شريك أساسي في كل استثمارات الشركة التي يرأسها الوريث ويملك معظم أسهمها
وبهذا فإننا نعلم تبرؤنا كمدونين من الأخ فارس الذي ثبت كذبه ونفاقه ولقد بان لنا بالدليل القاطع أن هذا المرتزق ما إلا فسل مارق خارج عن إجماع الأمة وشاقق عصا الطعا (من النص) وبيلعب على جميع الحبال وعامل إنه معارض (بالضاد يعني فيه نقطة) وهو مش معارض بل مؤيد ومنتفع وبتاع نسوان وخمرة ومزة بفتح الميم وضمها أيضا
وبالنسبة لمشروعه الخيري بتاع فك الشعب وبيعه
ثبت لنا أيضا أنه لن يقوم بهذا المشروع الخيري الاستراتيجي لوجه الله ولا لصالح الوطن كما ادعى دائما بل أن مصلحته المباشرة وزيادة مرياراته المتلتلة في بنوك السنبلاوين وكفر أم محمود هي الدافع الأوحد وراء هذا المشروع العظيم الخيري والذي سيفسده هذا "الفارس" بطمعه وجشعه

ومن هنا أعلن تنحية الأخ فارس من كل منصب رسمي ليعود بين صفوف الجماهير كلبا جربوعا زي بقيت الجماهير

وقد قررت تعيين السيدة الفاضلة عشتار جرجس (حرمنا المصون) مديرة عامة لمشروع فك الشعب وبيعه بالقطاعي ولكن بسعر الجملة وذلك لما عهدناه في هذه السيدة الفاضلة من أمانة وطهارة يد وعفت لسان وهمت يا بنتي
وأنها ستكون أكثر من أستأمنه على هذه الثروة البشرية الضخمة والتي سنستثمر فيها بكل طاقتنا بعد أن ثبتت جدوى هذا المشروع الرائع والضخم والذي حاول هذا المتنطع فارس قديم أن يستولي عليه وكأنه من بنات أفكاره
مع أنه من أولاد بنت اخت أفكاري أنا والسيدة الفاضلة عشتار ربة الشام
اللهم فاشهد إني قد بلغت





ينشر هذا القرار بالمدونة الرسمية بتاريخ اليوم 17 عشرة 2052 ميلادية
46 قناوية


(ملحوظة منذ يوم 11 عشرة 2006 بدأ العمل بالتقويم القناوي في بلاد المخروبة وهو تاريخ إعلان الزعيم الراحل عمر القناوي بدء مشروعه للمقاومة)

alnadeem يقول...

يا جرجس يا حبيبي
واحشني جدا يا ريت تكلمني لأن نمرتك كالعاده ضاعت مني
أما بالنسبه للفارس
فعلي نفسها جنت براقش

lastknight يقول...

الحاج جرجس بن لادن .. و المناضل سابقا عمر قناوى
ليلة أبوكم سوده .. أنا قلت انفذ المشروع معاكم أهو تستفيدوا قرشين يا غجر .. و ربنا يتوب عليكم من راس العبد و تبتدوا تشربوا حاجه عدله.. لكن أنتم بلوريتاريا .. و مش هاتنصلحوا أبدا ..
أنا برضه هانفذ المشروع غصب عنكم .. و بالآشتراك مع الوريث الوارث هيثم جمال مبارك أنشاء الله .. و طبعا هيثم كايكون رئيس برياله زى اللى خلفه و اللى خلفه .. و بالتالى هايبقى سهل جدا أنى أقنعه يعلقكم من ودانكم على باب زوريله يا غجر
هافك الشعب و ابيعه
هافك الشعب و ابيعه

lastknight يقول...

و هاشيل أم الرصيف اللى قدام سندباد اللى عاملينهولى هايد بارك ده .. أنا هاقعدكم قدام جامع الأوقاف تشحتوا بكوز يا غجر
هاعمل أيه بالرصيف ؟؟ هاضمه لميناء العين السخنه و اعمله رصيف تفريغ حاويات
أن كان عاجبكم
هافك الشعب و ابيعه
هافك الشعب و ابيعه

عشتار يقول...

انت يا جرجس نايم على روحك ومش داري بنفسك مش حركم المصون عشتار الفاضلة فقدت العفة والحياء
يا للعار يا للعار
بعدين مش كنت مخطوبة للرأسمالي القيناوي؟ السيناريو تغير امتى؟

غير معرف يقول...

eih ya gam3a el 7ewerat el 2lasha deh
7'ademet eih we 3eyal eih we bee3 a3da2 eih
mosh 3eeb 3la senko
ps el 7aga om george is no one except gerges himself

3rby يقول...

ماقولتليش يا جرجس عملت ايه بالنمر اللي ادتهالك...نظمت القائات ولا ايه النظام؟

مراقب مصري يقول...

يا عم عربي
بالنسبة للنمر بحاول وصل للناس بس انت عارف رمضان بقى
المفكرين الإسلاميين هما كمان ما بيحبوش يستغلوا في رمضان
كله بيأجل لبعد العيد

رمضان كريم
وعيد مبارك
(أحد المدونين لا أذكر اسمه قال في مكان ما مش فاكر فين أنه تم تغيير تحية العيد من عيد مبارك إلى يا جمال العيد)

يا مصر اكتب إليكي رسائلي يقول...

يشرفني ان اتقدم بخالص التهاني وأطيب التمنيات القلبية بمناسبة عيد الفطر المبارك اعادة الله علينا وعليكم وعلى مصرنا الحبيبة بكل خير .. مع خالص تحياتي وكل عام وانتم والأسرة الكريمة في أسعد حال

3rby يقول...

لا حلوة...هو الراجل الباكستاني ده لسه هنا في مصر؟

3rby يقول...

انت لسه ماجتش من العيد ولا ايه يا جرجس؟

مراقب مصري يقول...

يا واد يا عربي

خطيبتي رشا وصلت من قطر امبارح
هنتقابل الليلة كلنا عند عمر في الإمبراطورية اللي هي مكتبة سندباد اللي في وسط البلد ورا فندق كوزمو بوليتان في تاني شارع يمين من شارع قصر النيل
تعال لنا على هناك
أو تعال بكرة
أو روح انتحر بقى لأنه الجميلة رشا مش هتقعد على طول
بس يكون في معلومك هتيجي يبقى تقعد بأدبك
فاهم يا قمحاوي؟

3rby يقول...
أزال أحد مشرفي المدونة هذا التعليق.
3rby يقول...

بلاش التليفون
doda_902005@yahoo.com

لكي لا ننسى دم أحمد علي مبروك