٠٧‏/٠٩‏/٢٠٠٦

الحداثة في الإسلام... الوجه المشرق لإسلام الحضارة وحضارة الإسلام

بعد السلام والتحية
الموضوع دا يا جماعة مهم جدا بجد... الشهر اللي فات فيه أستاذ دكتور جامعة في أمريكا... هو من أصل باكستاني ويحمل الجنسية الأمريكية... المهم الراجل دا وصل مصر... وبطريقة ما تقابلت معه وجدته إنسانا رائعا علما وخلقا وأدبا
الراجل بيكتب كتاب اسمه "الحداثة في الإسلام" والكتاب على قسمين... القسم الول كان بيتكلم فيه على نموذج لدولة إسلامية غير عربية وكان المثال اللي بيتكلم فيه هو باكستان... وعشان كدة السنة اللي فاتت هو سافر باكستان وعمل دراساته وأبحاثه هناك (طبعا لا أحتاج أن أقول لحضراتكم إن الراجل مسلم ويتحدث الإنجليزية والأردو ويقرأ العربية الفصحى فقط)... المهم... السنة دي هو هنا في مصر لمدة تسعة أشهر بيعمل دراسات وأبحاث في الجامعة الأمريكية في القاهرة في الكتابات الإسلامية المعاصرة والراجل عامل شغل جامد أوي لحد دلوقتي....
الهدف من الكتاب دا إيه؟ حاجة مهمة جدا... وهي التنقيب والكشف عن وجه الإسلام الحضاري والمشرق لإظهاره وترسيخه أمام العقلية المريكية التي لا تعرف شيئا عن المسلم والإسلام سوى العمامة والقنبلة والسيف!! أمريكا يا جماعة بعد 11 سبتمبر في أزمة حقيقية بسبب اكتشافهم هناك إنهم ما يعرفوش حاجة بجد عن هذه الديانة التي يدين بها نحو ربع سكان العالم تقريبا، ولا يعلمون شيئا عن الثقافة والعقلية التي تحكم هذه الجموع الغفيرة من أتباع هذه الديانة على وجه الكوكب. فقرروا من ثم أن يدرسوا أكثر ويعرفوا أكثر... وكان المفتاح هو أن فيه توجهات إسلامية حداثية معاصرة تقدم إسلاما حضاريا جدا (وحقيقيا في نفس الوقت) وإن الناس المحدثة دي بتظهر شيء في الإسلام هما عمرهم ما شفوه... ودي كانت بداية المشروع
الدكتور دا كان لسة من كام يوم بيقول لي إن الجامعة بتاعته عملت قسم دراسي بها للدراسات الإسلامية والراجل هيكون واحد من المسئولين عن تأسيس هذا القسم. وراصدين ميزانية ضخمة لأجل تأسيس هذا القسم... جزء ضخم من هذه الميزانية الضخمة موجه إلى تأسيس مكتبة كاملة للمؤلفات الإسلامية (باللغتين العربية والإنجليزية) التي تظهر حقيقة الدين الإسلامي وجوهره وتناول الإسلام المعاصر للقضايا المعاصرة
انبهرت جدا من جمال الموضوع ووجدته فرصة رائعة لأن تنطلق من مصر رؤية حضارية تعكس وجه الإسلام المضيء ينقلها هذا الرجل (الذي يمثل جامعة كبرى في الولايات المتحدة) إلى شعبه وبلاده... الموضوع تحفة وفرصة هائلة لإظهار الحقيقة التي شوهتها وسائل الإعلام المنحازة، وشوهتها جماعات متطرفة بقيادة الإرهابي بن لادن وأمثاله من الذين جعلوا في أذهان الغربيين الإسلام مرادفا لزي معين وعمامة وسيف وقنبلة أو حزام ناسف!!! دا كدة يا شباب الرؤية الحضارية دي ممكن تأثر في أجيال من الغربيين الذين تتاح لهم - ربما لأول مرة - فرصة محايدة لرؤية غير منحازة لدين ظُلِمَ كثيرل في الغرب بسبب انحياز الإعلام وبسبب غباء المسلمين. آن الأوان ليرى العالم الحقيقة
آن الآوان ليرى الغرب إسلام الغزالي، وفهمي هويدي، والقرضاوي، والعوا، وغيرهم من المحدثين الذين عرضوا إسلاما حقيقيا دقيقا ولكنهم في نفس الوقت عرضوه بلغة يفهمها الغرب... الهدف ليس أن يسلم الأمريكان ويدخلوا في دين الله أفواجا (خلونا نبطل خيابة بقى)... القضية هي قضية تواصل صحيح ينشئ فهما صحيحا عن من نحن وما هي ثقافتنا وما هي حضارتنا والأيديولوجية الكامنة خلف هذه الحضارة
واحد فكيك يسأل "طب وانت دخلك إيه يا حاج جرجس في الموضوع دا؟ المسلمين يبانوا كويسين أو يبانوا كخة دا هيفرق مع أمك إيه؟ ما تخليك في حالك يا ابن الناس وتبطل تدخل مناخيرك في أفشخانات ما لكشي دعوة بيها"... وهنا أرد على عم الفكيك (ربنا يحميه لأمه)... القضية يا أستاذ إن الموضوع معدي أزمة دين، وأزمة مسلمين بقى شكلهم زفت في العالم كله (بسبب إعلام غربي معفن نمرة واحد وبسبب إرهابيين جهلة نمرة اتنين وبسبب شعب عاطفي جاهل رقص وهلل يوم ما الآلاف ماتوا في حداشر تسعة) الموضوع بيضرب في الكل ويؤثر في الكل.... تذكر المكسيكي اللي لا بيه ولا عليه تم الاعتداء عليه في أعقاب حداشر تسعة لمجرد إن "ملامحه عربية!"... وكثير من المصريين المسيحيين يواجهون صعوبات زيهم زي المسلمين بالظبط في أخذ تأشيرة لأمريكا سواء زيارة أو هجرة... من مصلحتنا جميعا أن يُرى الإسلام الحقيقي الحضاري والمعاصر والمعتدل أمام العالم أجمع فيتخلوا عن اسطمبات تصنيف العرب (اللي كلنا محسوبين منهم) إلى إرهابيين وجهلة وشوية مقاطيع!! الموضوع بالقطع يهمني ويأثر عليا لأن الإسلام مش مجرد دين يا عم الفكيك لكنه ثقافة داخلة في صلب تكويني أردت أو لم أُرِد... (ودا بالظبط زي ما الحضارة القبطية وقبلها اليونانية والرومانية والفرعونية وغيرها شكلت فيك يا عم الفكيك وداخلة في صلب تكوينك وعشان كدة مفترض إن حالة الكنيسة القبطية اللي بقت في الحضيض يا عم الفكيك تفرق معاك إنت كمان لأنها بتأثر عليك بعمق أدركت ذلك أو لم تدرك وغالبا لن تدرك).... الموضوع جامد جدا
صديقي الأستاذ بتلك الجامعة الأمريكية طلب مني (بعد ما اقترحت عليه ذلك) أن أرتب له لقاءات مع بعض الكتاب والمفكرين الإسلاميين من ذوي التوجه الحداثي (حداثي دي على فكرة مش شتيمة ولا هي كفر عشان نبقى فاهمين ... ما هياش علماني يعني) لكي يتحاور معهم وجها لوجه مش بس يعتمد على الكتب.... اللي عنده اقتراحات كيف أصل لمثل هؤلاء المفكرين والكتاب لأجل ترتيب مثل هذه اللقاءات مع الرجل يقول لي .... نفسي أتقابل مع محمد عبد القدوس، وفهمي هويدي، والعوا، وأتمنى أرتب له قعدة مع واحد مؤثر جدا زي عمرو خالد... الراجل قرا بالفعل كل كتابات القرضاوي بالانجليزي... يا ريت ألاقي طريقة نقابله بيها على المرشد العام... بس أخاف الرجل يفضحنا وسط الكلام ويقول له طظ في مصر وأبو مصر واللي في مصر ويعرنا قدام الأجانب ... وأنا اللي قعدت اقول له شعر في التحول اللي حاصل في خطاب الإخوان (الموزلم براذرس) وازاي انهم بقوا متقبلين الديموقراطية والتعددية ومش عارف إيه.... وبعد كدة المرشد يفضحنا... لا يا عم بلاش مهدي عاكف خينا في الراجل المؤدب الجميل محمد عبد القدوس، بس دلوني أوصل له إزاي؟؟؟؟؟؟

هناك ٤٤ تعليقًا:

soosa el-mafroosa يقول...

أولا للأسف ماقدرش أوصلك لحد من دول ..سوري ..ثانيا الموضوع نفسه كويس بس ايه يابني اللون المحمحي اللي انت كاتب بيه ده ده..انت قاصد تعمينا و الا ايه؟؟

هو انت جرجس بجد ؟....انا مش عارفه ..طب و الراجل ده هيقصدك عشان تعرفوا بمهدي عاكف؟؟؟؟

جايز الله أعلم...بس بوست جميل و فعلا الموضوع بيمسنا كلنا بره بيعتبروا العربي مسلم حتى لو عرفوا بعدها انه مسيحي ..مش عارفه ازاي؟

soosa el-mafroosa يقول...

طب مانت ماطلعتش جرجس اهو و طلعت غبريال ..ماشي يا عم بتشتغلنا و الاايه ..على فكرة اعتذارك ع المدونة بتاعتي كانت حركة كويسة منك ..فعلا انا بيدخل عندي بنات كتير و الكلمة كانت صادمة حتى للشباب كمان ..بس خلاص عفا الله عماسلف ..و نفتح صفحه جديده و ابقى انسى شوية انك دكتور نسا ...ماشي ..سلام

3rby يقول...

حراااام عليك..خط ازرق علي خلفية مش عارف لونها ايه وخطه صغير كمان...يا اخي ارحمنا..انا ماعرفتش اقري

مراقب مصري يقول...

الخط الازرق على الخلفية اللي مش عارف إيه دا هو الانتقام الرهيب على الخط الأحمر على الخلفية الكحلي اللي عميتونا بيها إنت والسيد المحترم أبو جل في شعره

مراقب مصري يقول...

يا بت يا سوسة
لابد أن نذكر للرائدة شهروزة
(زي الرائدة مرات عوض أبو شقفة كدة)
إنها كانت من ابتدى بالأباحة والكلام اللي هو يااااي مش مؤدب
وأنا لمتها على كدة لوما عنيفا
وكانت بتعمل كدة بالتعاون مع البت أوسة
على فكرة العيال دي يا بت يا سوسة عيال خطرة
دانا سمعت - كلام في سرك - إنهم بيشربوا سجاير!ّ!!!
بلمونت معفنة والله أعلم

مراقب مصري يقول...

إيه رأيك في لون التدوينة كدا يا عم عربي؟ فين الواد مونجييييي أبو جل في شعره؟

lastknight يقول...

جرجس يا أخويا
راسلنى على بريدى المباشر .. ممكن ارتبلك مقابلات مع كتير قوى .. غالبا هانستعين بصديقى عمر قناوى ..
بريدى هو
lastknight1964@hotmail.com
أنا فاهم اهتمامك تماما و انت مش محتاج تشرح أنك مسيحى الديانه مسلم الجنسيه زى الراحل مكرم عبيد
تحياتى

Mongey يقول...

موضوعك رائع يا اي حاجه مش مهم الاسم...مش هيفرق كتير و ان كنت بصراحة لا اهتم اوي بصورتنا في الخارج بصورة كلية ولكن اهتم بصورتنا قدام نفسنا ... لان في دول بصراحة ليهااطماع في الشرق و تحسين الصورة ده عمره ما هيغير منده بشكل جزري .... بس خلاص و شبعدينياسوسة عادييطلع جبريال يطلع جرجس مفيش مشاكل هو ممكن يكون اشتغلنا فعلا بس عادي

غير معرف يقول...

تعرف ان سنتك سودا على كحلى مغبر؟؟
انا ياد انت قريت رائدة فى الكلام الابيح؟؟
بتشنع عليا يا جرجس؟؟
والناس كدة تصدق؟؟
صحيح زى القطط تاكل وتنكر...تقعد تقرا وتتمخمخ وتعلق وتلعب فى المدونة براحتك وفى الاخر تقول علينا بتقول كلام ابيح
ومش معلقة على الموضوع بتاعك
هاااة
ولعى راى مهدى عاكف بقا



-----
ولا بلاش

3rby يقول...

ايوة كده اشطه يا جرجس بالعند فيك...بس عاوز اقولك حاجة انت يمكن ماتبقاش حاسسها....في فرق كبير في التأشيرات بين المسلم والمسيحي.....المسلم بقت تأشيرته شبه مستحييلة...لو عاوز انا ساكن في العمارة اللي جمب مهدي عاكف...بس هو نقل الشهر ده...ابنه قعد بداله...انشاء الله اقدر ارتبلك الحكاية ديه بس ابقي حاول تخلي الراجل يبعده عن الاسلام والسياسة احسن يشتم مصر قدامه وتبقي الفضيحة بجلاجل...وبعدين علي فكرة انت فهمتني غلط خالص في المدونة بتاعتي...انت كده بقيت زي نااس.....مش انتي طبعا يا اروي



انت مش واخد بالك من حاجة...البت اروي ديه قربت تبقي رمز للقراية الغلط للاشخاص...يعني ممكن كمان خمسين ستين سنة كده تتدرس في التاريخ والمدرسين في الحياة يقولوا:هذا النوع كان موجود من ستين سنة...وقدظهر في ظل البلظميطة في الحياة السياسية والاجتماعية والاقتصادية والدينية والجيو-فيزيقية(يا عم المعقد)والفسوجلقية...قول يا رب

الأميره أوسه يقول...

وكانت بتعمل كدة بالتعاون مع البت أوسة
على فكرة العيال دي يا بت يا سوسة عيال خطرة
دانا سمعت - كلام في سرك - إنهم بيشربوا سجاير!ّ!!!
بلمونت معفنة والله أعلم

أنت بتتكلم فى موضوع جاد
وقولت كويس أهو بيعمل خير
أيه اللى جاب سيرة شهروزه وأوسه
وبعدين أحنا بنشرب سجاير بلمونت برضه
شهروزه بتشيش وأنا بشرب كوكو ضعيف
يعنى كليوبترا بوكس يا جرجس يا كوخه
وبطل تعمل تنفس صناعى للمرضى
حرام عليك موتهم
مفيش حد يعيش أبدآ
لو الراجل الباكستانى ده محتاج يقابل حد بيفهم ممكن يقابلنى
طبعا عارف مكانى
قهوة بعره

غير معرف يقول...

قولى له والنبى يا اوسا يا اؤختشى
ايش اخشش اوسا وشهروزة فى الفيلم ؟ ماعرفش
انت ياد انت تعمل وحدة وطنية فى جنب وتيجى تعمل فتنة وانقلاب علينافى الجنب التانى؟؟ ولا اية النظام بالزبت يعنى؟؟
قال يلم البلد من ناحية ويفحكشها من الناحية الحلوة..اللى هى احنا يعنى
وبرضة مش حاعلق على الموضوع



هاااااااااة


على راى مهدى عاكف الابيح

ولا بلاش برضوو

غير معرف يقول...

لا أستطيع ان اضع من يخالفنى قناعاتى الدينية فى خانة الكفر
بص يا عم ريفورمر ممكن واحد مسلم يعمل اللى انت بتعمله بس بالعكس ؟؟
يعنى يقعد يشرح لواحد أمريكانى تاريخ الكنيسة القبطية لمساعدته
على اصدار كتاب عنها موجه للدول الاسلامية ؟؟ أم أن الموضوع حايبقى
صعب عليه نفسيا أو دينيا ؟؟
أما عن عبد القدوس فممكن تسأل عنه فى جريدة وطنى لأنه صديق يوسف
سيدهم
على فكرة : اللون المحمحى ده حلو قوى ... أنا بادور من زمان على قميص باللون ده

مراقب مصري يقول...

عزيزتي شهروزة وأميرتي أوووسة
هاتيا رأسيكما أبوسهما
يا صدقتيا العزيزتين
لا أقدر على زعلكما أبدا
أبدا
أبدا
مهما يكون
شهروزة لا تقبل الأباحة أبدن يا شباب
وهي سيدة فاضلة لا تقل ورعا ولا تقوى عن الفاضلة أروى الطويل
أما عن الأميرة أووووسة فحدث عن فضائلها ولا حرج
أما حكايات كوكو الضعيف
والشيشة تفاح
التي تحكيها أوووسة
فدا كذب وتلفيق
وتلاقي الواد بعرة بتناع القهوة
عمل هاكنج على مدونة الأميرة أوووسة
(اللي هي خالتي وتاج راسي)
وتلاقي هو الواد بعرة اللي كتب التعليق بتاع أنهم بيضربوا شيشة وسجاير
(بالمناسبة التدخين ليس عيبا إذا مارسته الستات... التدخين ضار ومدمر للصحة سواء للرجال أو النساء... لكن حكاية أنه عيب للستات ومش عيب للرجالة دا كلام وضيع ورجعي)

معكيش سجارة يا أوختشي؟

مراقب مصري يقول...

الفارس الأخير
شكرا ليك
سأراسلك على إيميلك
وعلى الله بس ما تطلعش أمن دولة
(بهزر يا عم)

مراقب مصري يقول...

يا واد يا عربي
أنا متفق معاك في الصعوبة النسبية للحصول على تأشيرة أمريكا بالنسبة للمسلم حتى تكاد تصل إلى الاستحالة مقارنة بالمسيحي
بس بجد حتى بالنسبة للمسيحيين
بقت صعبة جدا جدا مقارنة بزمان
أما بالنسبة لأروى
بلاش نشتغلها أكتر من كدة
البنت ييجي منها
زما هي إلا نتاج بيئة معفنة اتربينا فيها كلنا
(كوووم زبالة كبير على حد تعبيرها)
لهذا فمن منبري هذا أدعو بوقف لحملات التشويه المغرضة التي انطلقت ضد الرائدة أروى الطويل
ومنحها فرصة تانية
(أثبت لك فيها حبي
علشان تعرف مشاعرك
وصورتك جوة قلبي)
إديها
إديها
==================

الصديق العزيز أبو جل في شعره
أتفق معك على أهمية تغيير صوتنا الذاتية (الزفت) أمام أنفسنا
وأن هذا أهم من تغييرها أمام الآخرين
أتذكر هنا مثال من التاريخ

في يوم من الأيام
بنو إسرائيل لما خرجوا من أرض مصر بيد موسى
أرسلوا اتناشر جاسوس إلى أرض أريحا
ليتجسسوا البلد
طبعا أريحا وقتها كانت قوية جدا
ومحصنة جدا
المهم يا سيدي كان الله قد وعهم
(في ذلك الزمن)
أن يدفع لهم الأرض
ولكن لما الجواسيس الاتناشر راحوا
اتنين منهم بس اللي كان عندهم إيمان
في الوعد اللي قالهولم ربنا
وقالا
نصعد ونمتلكها لأننا قادرون عليها
بينما قال الأغلبية
(العشرة الباقون)
إنها مدينة محصنة وأسوارها عظيمة جدا
وشعبها عمالقة
والمهم بقى يا حلو الجملة اللي جاية دي
قالوا:
صرنا في أعيننا كالجراد
واخد بالك؟
مش صاروا في أعين عدوهم كالجراد
(يعني صغيرين أوي)
لكن صغيرين أوي في أعين أنفسهم
ودا اللي خلاهم ما يدخلوش الأرض
بالرغم من أن الله وعدهم بيها
ودا في حد ذاته كان ممكن يبقى أكبر قوة ليهم
لكن دفعوا تمن صغر النفس والدونية دي
أربعين سنة من التيه في البرية
لحد ما دخلوا بإيد يشوع بن نون
(اللي كان واحد من الاتنين اللي قالوا نصعد ونمتلكها لأننا قادرون عليها)
القضية هنا
طبعا بعد تنحية كراهيتنا لليهود جانبا
هي قضية التأثير المدمر لنفسية العبيد
وعقلية الدونية وصغر النفس عندما تسود وتتفشى في أمة ما من أمم الأرض
ساعتها بتفقد حتى ما قد يأمر به الله لك من بركة ومن وعود

وبالتالي مهم جدا لنا كأمة أن ندرك الأبعاد العظيمة لحضارتنا
سواء البعد الإسلامي
أو القبطي
او الفرعوني
أو الروماني

بس بلاش البعد العثمانلي بتاع فلاح خرسيس
والبعد الوهابي بتاع ثكلتك أمك يا بن الكافرة
بقول لك حضارة!!!

مراقب مصري يقول...

العزيز أنونيمس
كلامك كويس بس أتمنى إنك تخش بأي اسم
عشان نعرف نتواصل

غير معرف يقول...

شكرا يا ريفورمر اية رأيك فى الاسم ده ؟؟؟
و ايه رأيك كمان فى رفعت السعيد بدل من سليم العوا اللى عاب كتير فى المسيحيين
( و طالب مرة فى الأهرام - ديسمبر 2004 - بألوان مختلفة لجواز سفر المسلم عن الغير مسلم ) طيب ايه رأيك فى محمد السيد السعيد أو جمال البنا بدل من فهمى هويدى ؟؟؟ مش عارف ليه
انت اخترت أسماء أشد من مهدى عاكف . أنا شخصيا أرى أن أراءهم أكثر حيادية و مصداقية بغض النظر عن انتماءاتهم

high_staff يقول...

البوست تمام و..؟؟؟؟؟؟؟انا من كتر الكومنتس اللى قريتها نسيت البوست من الدوشة اللى انتو عاملينها عاوزين الفصل يهدى شوية

أم أحمد يقول...

الموضوع هايل وانا فعلاً اعرف مسيحيين بيقروا عن الدين الإسلامي اكتر مننا احنا يامسلمين وفيه فعلاً صديق لزوجي كبير شوية في السن محامي حافظ آيات قرآنية كتير وبيستشهد بيها في كلامه كمان تخيل دي ؟ وطلب من جوزي يشتريله كتب تفسير ييجي بالف جنيه
واللي حصل في امريكا ده في 11 سبتمبر لا يمت للدين بصلة قلبوا علينا العالم الله يسامحهم

3rby يقول...

الله يسامحهم؟!الله يحرقهم مطرح ماهم موجودين

مراقب مصري يقول...

الأخ ريدر
للأسف زي مانت شايف ما انتاش عارف تجمع اسمين تلاتة على بعض كتاباتهم متزنة في موضوع المسيحيين تحديدا ووضعهم في التصور بتاعهم عن الدولة الإسلامية... ما هو أنا لو وقفت عند أرائهم في الموضوع دا تحديدا فما أسخم من ستي إلا سيدي... ومن ثم عدي الحتة دي وتعال نناقش الأبعاد الأخرى في إسلام الحداثة... ليه الإخوان تحديدا أنا مهتم بالحديث معاهم... لأن خطابهم تغير كثيرا على الأقل في ظاهره عن سنوات سابقة... النهاردة الإخوان بيقولوا لك هما مؤمنين بالديموقراطية والتعددية وتداول السلطة من خلال انتخابات... والنهاردة هما بالفعل ليهم حوالي خمس مجلس الشعب... ولأن النموذج بتاعهم النهاردة جدير بالاعتبار والدراسة


العزيزة سحر
من تاني القضية ليست مسيحي ومسلم
القضية هي أزمة رؤية الغرب لنا كعرب
وبياخدونا كلنا في سلة واحدة
الرجعي مع التقدمي
السلفي مع المحدث
بل والمسيحي مع المسلم
فمادمت عربيا فأنت مشبوه
وأنت إرهابي محتمل إلى أن يثبت العكس
ودي العقلية اللي شفناها في أزمة الكاريكاتير الدنماركي
هما الناس عبروا "ببساطة" عن القرف اللي في دماغهم عن الإسلام وعن المسلمين ونبيهم
هما ما يعرفوش غير دا
ودورنا أننا نعضد كل المحاولات والمساعي المبذولة لتغيير الصورة دي
قدام الأجانب وقبلها قدام أنفسنا

3rby يقول...

علي فكرة انا رديت عليك عندي وعند سوسه

غير معرف يقول...

شكرا يا ريفورمر و ده يوصلنا لنقطة فى الصميم من واقع ردك : المسلمين كما أرى عاوزين يغيروا الصورة و انت نفسك ذكرت الخطاب الظاهرى للاخوان : بمعنى ان الراجل الباكستانى عاوز يقول حاجة فى حين أن الواقع مختلف و متفق عليه ( تمام زى لما مسئول كبير يزور مستشفى حكومى) . هل يقدر المسلمون اليوم يدينوا المتهمين فى الكشح ؟؟ هل يقدروا يطبقوا معايير صادقة للحياد الدينى فى مصر ( بلاش العلمانية) ؟؟
مين يقدر يتكلم زى رفعت السعيد ؟ حايبقى موالى للكفار ( اللى هو احنا ) ومرتد و مش عارف ايه .... و يضيع أى حوار وسط الصوت العالى .
سمعت مرة من واحد بيقول الديمقراطية هى حكم الأغلبية : فى رأى الأخوان حكم المسلمين للكفار يعنى يتصرفوا مع الكفار من منظور اسلامى و ليس انسانى... مش ممكن هو ده اللى انت عاوزه ؟؟؟
أنا شايف ان الأغلبية تعنى الأغلبية السياسة و الا جزمنا بأن المسيحيين الديمقراطيين سوف يصفوا المسلمين فى ألمانيا باعتبار ان ده حقهم .... أغلبية بقى !!!!
علشان كدة أنا ذكرت أسماء ( زود عليهم عبد المنعم سعيد) بيقولوا ما سوف يفعلون و مش بيقولوا ظاهريا و ما شفناش منهم غير الايذاء و الفرز

3rby يقول...

علي فكرة يا ريدر لو المسيحيين اتعاملوا في مصر معاملة اسلامية هايبقي احسن بكتير من دلوقتي...بس الاسلام كامل...ومش معامله الناس المسلمين اللي جم بعد الرسول كمان...معاملة القران والسنة كاملة....دلوقتي الدستور حيادي(من غير البطاقة)بس اللي بيحكموا دلوقتي مايتحسبوش علي مسلمين ولا مسيحيين ولا يهود حتي...دول كفرة بجد(مع اني مابحبش اكفر حد...بس هنا كلمة كافر مش قصدي بيها من منظور ديني...من منظور انساني لانهم بيخالفوا كل الاديان...سماوية وغير سماوية)


كل اللي انا قلته ده مش معناه اني مع الاخوان...لاني مش عارف ليه
(مع انهم محترمين في حاجات كتير)بس مش باستريحلهم....وادايقت منهم اوي لما قالوا هايقتلوا البهائيين...مع ان الوهابيين دول ناس هبلة...بس مانبصش لكام الف في مصر...ونسيب الهبل اللي بيحصل في سينا....المصريين متبهدلين ومبقاش ينفع تدخل بري......نقوم نسيب الكفرة اللي بيأذوا الناس وبيحبسوهم جوه بلدهم...ونمسك في الهبل....انا ماعرفتش انتا مارضتش عليا ليه يا عم جرجس في موضوع يهدي من يشاء عند سوسة...انت كل شوية تغلطني في موضوع اتقفل علشان مارضش عليك:)

3rby يقول...

فيه خبر لسه عارف دلوقتي...الاخوان طرح اصلاحات للدستور اقترحها حزب الوسط تجيز تولي مسيحي لرئاسة الجمهورية...عايزينك تجهز نفسك كده يا جرجس

مراقب مصري يقول...

شوف يا أخ عربي ويا أخ ريدر

أنا مع الأخ عربي في إن ما يتكلم به الإخوان عن وضع المسلمين في دولتهم الافتراضية
(زي السيبر سبيس كدة)
هيكون أفضل من الزفت اللي عايش فيه المصريون النهاردة
سواء مسيحيون أو مسلمون
الأزمة يا أخ عربي إن منظور المواطنة الكاملة بيضيع طول ما انت مصر تصنف الناس أمام الدولة بحسب الدين
(ودا واقع النهاردة)
(ولما الإسلاميين يحكموا هتبقى زفت من ناحية المواطنة)
بس موضوع المواطنة دة أصبح من الرفاهيات والكماليات
لشعب نصفه بيبات من غير عشا!!!
المسيحيون في ظل حكم الإخوان هيتبغددوا
وها يبقى من حقهم حاجات كتير مش بيحصلوا عليها النهاردة
(ما تسألنيش زي إيه... لأني من كتر السوء اللي احنا فيه ما بقيتش متصور أسوأ منه ومن شدة العوز والضنك أرى أي انفراجة وكأنها الفرج اللي ما بعده فرج!)

بالنسبة لموضوع ولاية غير المسلم في الدولة الإسلامية
الإخوان "قالوا" رسميا إن الذمي
(اللي هما المواطنين درجة تانية يعني)
ممكن - نظريا على الأقل - يمسك
لحد رئيس وزرا
(لم يجرؤ واحد من أنصار الدولة المدنية اللي حكمونا خمسين سنة وزيادة أنه يعين واحد ذمي رئيس وزرا)
أما حكاية حزب الوسط
(أنا لسة ما قريتشي الكلام ده)
بس في كل الأحوال حزب الوسط
(وهو حزب سيبري أي افتراضي أيضا)
لا يمثل الإخوان
فهم منشقون على الجماعة
ومن ثم ما ينفعش آخد كلامهم على إن ده رأي الجماعة

مش ملاحظ إن المناقشة دي بايخة؟
رئيس وزرا ولا رئيس مسيحي
إيه الدلع اللي احنا بنتكلم فيه دا؟
دي أحلام اليقظة
يا عم أهو في كل الأحوال أي حاجة أحسن م القرف اللي عايشين فيه
واهو يمكن لو مسكوا وطبقوا الحدود
(بس بشرط على الكل مش ع الغلابة بس)
فيه أيادي وسخة كتير في البلد دي
ساعتها ها تتقطع يا حلو
ويا ريت تيجي ع الإيدين بس
دا فيه لغاليغ كمان هتطير
وكل واحد يخلي باله من لغاليغو



إعلان:
العبور إلى المستقبل
(تحسه إعلان لكتاب خيال علمي من بتوع نبيل فاروق زمان)
انتخبوا الحاج جرجس لرئاسة الجمهورية
خير من يمثلكم على قمة الخازوق الذي نلبسه جميعنا
البسوني لن تشعروا بي
فأنا كالماء والهواء
لا لون ولا طعم ولا رائحة
لكن لن تستطيعوا أن تستغنوا عني يا كلاب

3rby يقول...

الكلام ده موجود في العربية نت

مراقب مصري يقول...

أنا رديت عليك عند سوسة في يهدي من يشاء
ورديت على سوسة كمان
وأعدت قراءة البوست هناك لتعليقاته من تاني
مرات لما بتعيد قراءة الأشياء بتشوف حاجات ما شفتهاش قبل كدة

بالنسبة للخبر
حتى لو صحيح فهو لا يمثل رأي الإخوان
الإخوان بيقولوا إن انا ما ينفعش غير رئيس وزرا
وانا مصر على رئيس يعني رئيس

Mongey يقول...

يا عم جرجس المسيحيين عندهم وزير البيئة تيمة ثابتة في كل الوزارات هاااهااا ووزير الاقتصاد برضه متنساش وديه وزارة مهمة اوي خد بالك و ده المفروض لو عندنا اقتصاد اصلا

غير معرف يقول...

يا أخ حربى أنا سمعت الكلام ده قبل كدة بس استحالة أصدقه .
فيه حكام كتير اضطهدوا المسيحيين ...
ليه عملوا كدة حايقول لك باطبق الاسلام و المسيحيين كفرة و لازم أذلهم و أخدم الاسلام,.
و لو سألت القاضى بتاع الكشح حايقول نفس الكلام و انه بيطبق الاسلام الصحيح
انا لا أقصد ادانة أحد حتى هذا الحاكم أو القاضى أ و اخرين غيره ربنا هو اللى يحاسبهم .
ما ينفعش تطبق الشريعة لأن ما ينفعش تكون الحكم و الخصم فى ان واحد.
تعالى يبقى فيه منطقة محايدة بيننا .... ايه اللى ممكن يؤذيك لو طبقنا قانون للحياة بيساوى بين للكل ... تدينك انت مش حاينقص .
مثلا : مش فيه مسلمين بيسافروا أو حتى يهاجروا اوروبا ؟؟؟ مش دول بيصلوا و يصوموا و هم فى بلاد غير اسلامية ؟؟ هل تأثر تدينهم نتيجة لهجرتهم ؟؟ أنا باقو ل ان خطر جدا فرض الاسلام سياسيا على المسيحيين ( الكفرة لو تحب ) لان الله ( حسب ما قرأت فى كتلب فرنسى ) يعرض نفسه و لا يفرض نفسه :
Dieu se propose mais ne s"impose pas
أما عن موضوع ترشيح مسيحى للرئاسة فلازم قبل أى شىء نبقى زى الهند ذات الأغلبية الهندوسية و الرئيس المسلم وأنا لا أعتقد ان المسلمين حا يقبلوا هذا بل سيكون رد الفعل أنه مفروض من أمريكا . ثانيا استحالة أرشح رئيس مسيحى علشان مسيحى ... ده هبل لأنه مش حايعرف يعمل حاجة من الضغوط ....المهم يبقى محايد و متفهم .
.

3rby يقول...

يا عم انت مين اللي قالك اني باكفر حد بس...يمكن انت اللي ماتعرقنيش...اسأل جرجس وانت تعرف مين اللي بيعتبر كافر في بلدنا ديه...انا طبعا

مفلس افندى الرايق يقول...

ممكن اعرف بس انتوا عاملين قلق ليه
اللى يعرف طريق محمد عبدالقدوس يقول علشان ناخد ثواب مش جايز الراجل ربنا يهدى قلبه للاسلام

ازيكم جميعا وازيك يا اوسه يا مفروسه وازيك يا شهروزه يا رافعين راس مدونتى لعنان السماء ما يحرمنيش منكم

wanna b a bride يقول...

برافو عليك والله

wanna b a bride يقول...

لو بجد يعني

مراقب مصري يقول...

مستر مفلس الرايق
مش مضيعنا وجايبنا مارشدير في بلادنا سوى فكرة إن كل حوار بين مسلم ومسيحي هو لهداية الآخر وإنقاذه من الضلال
يعني ينفع أقبلك زي ما انت
وتقبلني زي ما انا
ونتفق على قيم ثابتة
هي الحب
والخير
والجمال
لكن احنا أساسا في بلد غابت فيه القيم
محمد عبد القدوس طبعا راجل جميل
وأنا بحبه جدا
إنسان جميل
ولسانه عف وأخلاقه عالية جدا
وعلى فكرة دي شهادة في حق الإخوان
ناس أمناء جدا في حدود معلوماتي
وأصحاب قضية
وعندهم قيم
مهما كنت مختلف معاهم

===============
عزيزتي وانا بي برايد
الموضوع جد جدا
والفارس القديم بالفعل عرفني على أحد الأصدقاء وبنرتب لبعض اللقاءات
على فكرة الفارس القديم دا طلع حكاية
وعلى فكرة هو حاليا أعزب
خشي عليه في مدونته ولاغيه
"من الملاغية"
ومين عارف يمكن رنا يوفق
وتبقي برايد

Gid-Do - جدو يقول...

الحاج جرجس
انا جاى اقولك كل سنة وانت طيب علشان قرب شهر رمضان ـ انا عارف انك مبتحتفلش بشهر رمضان وانا كمان مبحتفلش بالكريسماس لكن بشارك زملائى بفرحتهم وبكون سعيد معاهم وهما بيعزمونى لاننا شركاء فى الوطن وانا من هذا المنطلق بقولك ياشريكى فى الوطن كل سنة وانت طيب

غير معرف يقول...

الكابتن جرجس
اولا دى اول مرة ادخل مدونتك بعد ما شوفت تعليقاتك عند سوسة واختلفت مع تعليقاتك كتير واتفقت معاها بردة كتير وقررت ادخل اشوف مدونتك وها انا ذا (مش تقول اتفضل ) عموما انا دخلت خلاص وبصراحة الموضوع الاول شدنى جدا وبجد برافو عليك وشد حيلك ويارب الى يقدر يساعدك مايتأخرش لتقريب وجهات النظر وفرض اسلوب محترم للحوار وليس لاقناع طرف بترك دينة والاتجاة لدين الاخر المهم ان نفهم بعض ونسعى سويا مسلمين ومسيحين الى تحسين صورتنا الخارجية لان هو دة المهم زى مانا قلت عند سوسة قبل كدة و مانسمحش لاعلام الفضائح انه يسخن الاحداث ويبوظ سمعتنا الى هى بايظة اصلاً وعجبنى اختيارك للشخصيات التى طلبتها للحوار لانها جميعا معتدلين واسلوبهم فى الحوار اسلوب راقى
دعوة لنبذ التطرف سواء من المسلمين او من المسيحين ودعونا نسعى لهدف واحد وهو تحسين صورتنا كعرب امام العالم وليكن شعارنا الدين لله والوطن للجميع

3rby يقول...

انا مختلف معاك يا مغترب...انا شايف ان الاهم هو صورتنا في الداخل...وثقتنا ببعض...اللي بيولع الفتنة كل شوية وبالذات في الاسكندريةتدخل الشرطة...ايوة والله...الشرطةاللي بقت بتعمل فعل قريب من اسمها...المفروض تحمي المواطن بتعرضه للخطر...بتعرض الوطن لفتنة في كل لحظة...بانها بتقدم واحد غلبان وتقول مختل...اما بقصد تريح الدماغ والتفرغ لضربنا في المظاهرات...واما بقصد توليعها وشعللتها بس مش قدام العالم ...علشان ماتبقاش حرب شوارع...يهدوا الحكاية...ويستنوا حوار تاني وشرارة تانية...وكل ده علشان يشغلونا عن النضال مع بعض...يعني مثلا حركات خطف البنات واسلمتها....وحركات توزيع كتب التنصير(حصلت في مدرستي حكاية توزيع الكتب...وجابوا ظباط امن دولة....وقعدوهم جوه المدرسه....والتانيين بيوزعوا بره.....اكن يعني عيب يخرجوا من غير اذن المديرة)علشان كده لازم يبقي فيه حوار وطني...بس مش بين شيخ الاذهر والبابا شنودة(اللي باحترمه جدا لمواقف ممكن ابقي اعمل مقارنة بينه وبين شيخ الاذهر ونشوف مين المحترم)المفروض الحوار مايبقاش باسم الدين...المفروض يبقي حوار شعبي..

شكرايا جرجس علي موضوع التدوينة

مراقب مصري يقول...

عزيزي مصري مغترب
قبل أي حاجة رمضان كريم وكل سنة وانت طيب... جبت فانوس ولا لسة؟
كنت دايما بحب الفوانيس وانا صغير
وكنت بحب الفانوس أبو شمعة
مش المعفن الميد إن تشاينا أبو لمبة وحجرين
الأزمة يا غم المصري المغترب في الحقيقة هي أننا كلنا كمصريين سواء مسيحيين أو مسلمين صرنا جميعا مثلك
"مصري مغترب"!!
المصري غريب في بيته
المصري طالع دين أمه في كل شيء في هذا البلد
واللعب على وتر الفتنة هو عملية أمنية قذرة أصلها السياسة اليهودية الشهيرة:
فرق تسد

أتفق مع عربي في رده عليك أن القضية هي أننا نتغير من جوانا بالأساس وأمام أنفسنا ثم أمام بعضنا البعض وبعدين نبقى شوف حكاية صورتنا المتنيلة بنيلة في العالم
لا أقصد الترتيب هنا زمنيا
بل ترتيب الأهمية
في حين إنه من الممكن أن نعمل الخطوات كلها في توقيت واحد
فنبدأ نتوب ونتغير من جوانا ونبقى ناس بجد
إحنا في مصر أشباه بشر
مش بشر زي ما خلقنا ربنا بجد
التوبة هي إنك ترجع تاني على النموذج الأصلي اللي خلقنا عليه ربنا
وفي نفس الوقت
نتعالج من أمراض النقص اللي عندنا واللي بتخلينا نطلع دين أم بعض على الرغم من إننا شركاء في بواقي وطن واحد
وفي الوقت نفسه ننقل للآخرين برة وجوة صورة مختلفة عنا
عندئذ هتكون صورة حقيقية

كل سنة وانتوا طيبين
والسنة الجاية يا رب ما يكونش فيها بنديكت وطولة لسانه

مراقب مصري يقول...

بابا جدو الحبيب

طبعا كل سنة وانت طيب يا حبيب قلبي
رمضان كريم
مين قال إني مبحتفلشي برمضان؟
لا شك أن ثمة جانب اجتماعي في كل احتفال ديني
ورمضان ينطبق عليه هذا القول
منذ الصغر وقد اعتدنا على شراء ياميش رمضان
واللعب بالفوانيس
والاستمتاع بالمسحراتي
في شبرا كان المسحراتي ينادي على كل السكان اسما اسما
وكان جميلا جدا وكوميديا في نفس الوقت أن تجده ينادي على جرجس وبطرس ووديع ورسمي وجورج وإدوار
بندائه الشهير
إصحى يا نايم وحد الدايم
رمضاااااان كريييييييم
كانت بالنسبة لي مشاهدة سيد مكاوي من السنة إلى السنة وهو ينشد أسطورة فؤاد حداد المسحراتي
(طبعا زمان ما كنتش اعرف يعني إيه فؤاد حداد)
ولما كبرت واشتريت ديوان المسحراتي كان بالأساس لكي ما أتذكر تلك الأيام الجميلة واستعادة ذكراها
لا يفوتني أن أذكرك بمتعة الفرجة على بوجي وطمطم في رمضان
الله يرحمك يا رحمي
وعمو فؤاد رايح يصطاد
الله يرحمك برضه يا عمو فؤاد
وطبعا فوازير نيلي ثم فطوطة
ومسلسلات رمضان اللي كان التلفزيون بيعيد اجترارها على مدار بقية السنة بسبب فراغه الفني وكأنه واخد أجازة بقية شهور السنة

أما الآن فالبركة في الخيم الرمضانية وسهرات الأصحاب في جو رمضان
والذهاب إلى الغدا في أي مطعم في وقت الإفطار ومتعة الانتظار مع الصائمين لضربة المدفع عشان نبتدي ناكل

كانت أكتر حاجة باكرهها بقى في رمضان هي طريقة تعامل الولاد المسلمين معانا في المدرسة في هذا الشهر
دايما كانوا بيتعاملوا معانا زي الزفت
عشان احنا فاطرين وهم صايمين
أنا من النوع اللي مكنتش أحب أفطر الصبح
ودا كان بيبقى معناه إني بفضل طول اليوم من غير أكل لحد ما أرجع البيت
لكن هما كانوا دايما بيفترضوا أن الواحد واكل ديك رومي الصبح
يوووووووه فكرتني
المدرسين في رمضان!!!!
كانوا أجارك الله
مفيش واحد فيهم طايق روحه
وبعد ما الواحد فيهم يتظربن ويتنرفز
يقول لك اللهم إني صائم
أو ما تخلينيش أفطر عليك
(طول عمري مفهمتش إيه المقصود بإنه يفطر عليا!)
(يعني هياكلني ولا هيضربني ولا هيعمل حاجة عيب ولا إيه بالظبط؟)

سيبك بقى من كل دا يا راجل طيب
السنة دي بفكر احتفل برمضان بطريقة جديدة عمري ما جربتها قبل كدة!!!
بفكر أقضيها مائدة رحمن مختلفة كل يوم طول التلاتين يوم!!!
دا طبعا تماشيا مع سياسة الفقر التي صرنا نحيا فيها ونتنفسها بشك ثابت في هذا البلد
إيه رأيك؟
ما لو انت في مصر في الوقت دا كلمني ونقضيها موائد رحمن طول الشهر الكريم
وبعدين بيقول لك
بيبقى فيها لحمة هبر!!!

كل سنة وانت طيf

3rby يقول...

افطر عليك مش معناها اكلك...:)يخرب بيت شيطانك....معناها انه يشتمك او يضربك...لان ده بينقض الصيام...هيه مش حكاية جوع وبس يعني...ده علي اساس يعني انه لما اتنرفز عليك يبقي لسه صايم...فبيقولك كده...منظره يعني

مراقب مصري يقول...

يا واد يا عربي
ما تشوف إذا كان أبوك يعرف يساعدنا في موضوع الدكتور الأمريكاني دا ياض
أكيد عنده شوية علاقات ويعرف يوصلنا بناس جامدة
واهو كله بثوابه

3rby يقول...

معلش لسه شايف التعليق دلوكيت....من عيني...هاقوله

لكي لا ننسى دم أحمد علي مبروك