٠٥‏/٠٩‏/٢٠٠٦

مسيحي ومسلم... كلاكيت عشروميت مرة!!!

بعد التحية
من منا لا يحب الردح؟ نحن شعب يعشق الردح البلدي ونجيده! وربما كان هذا أحد خصائص شخصية مصر التي لم يذكرها عبقري التاريخ والجغرافيا جمال حمدان (مات شهيدا في انفجار أنبوبة بوتاجاز وليس منتحرا كما أوضح لي أحد الأصدقاء)... نحن شعب الردح في دمه ولا يستطيع أن يحيا بدونه! يبدو أن موضوع معشش في الجينات
في تدوينة هادئة رقيقة كتبتها سوسة المفروسة (حد يقول لي يا شباب إزاي أعمل هايبر لنكات تاخد الناس على الأماكن دي من غير ما يغلبوا تدوير) كانت فيها في قمة الصدق مع النفس تتساءل لماذا نفرح ونهلل لما واحدة مسيحية تعلن إسلامها، أو واحد خواجة يشهر إسلامه وكأنه الفتح المبين والنصر العظيم للإسلام وتمضي في حديثها في نوع من النقد الموضوعي الذاتي لنفسها وللعقلية التي تنتمي إليها... حتى أنها تتذكر محاولتها لأسلمة زميلها الصغير ماجد وهي في ابتدائي إذ حاولت أن تجعله ينطق الشهادتين في مقابل أن تعطيه علبة الألوان (أعرف أن الملايين الآن يريدون أن يعرفوا نهاية القصة وهل أسلم ماجد بالفعل؟ ولكن لن أُنَوِّلها لكم وأحرق عليكم التدوينة الجميلة دي... روحوا اقروها في مدونة سوسة المفروسة الحديث بتاعها شيق وممتع وراقي جدا!
المهم علقت أنا ضمن من علقوا على تدوينتها... وكان محور تعليقي هو العقلية التي تربينا عليها في بلادنا - سواء مسيحيين أو مسلمين - وهي عقلية شديدة الجمود تكره الآخر وترفض وتحقر من شأن الآخر وتسخر منه سواء كان الآخر هو المسيحي (بالنسبة للمسلم)والمسلم (بالنسبة للمسيحي)... وبرضه مش هاحرق عليكم التعليق روحوا اقروه هناك... وعتها يا سيدي خرج عليا أحد المجاهدين... ويدعى عبدُ اللهِ بن أبي مفتاح... وقد ظن أنه خارج على الكفار في غزوة منهاتن المباركة، وراح شايط فيا شوطة إنما في الجون... وقد بدأ بالدفاع عن الحكم العثماني التركي الذي لم يكن احتلالا بل كان خلافةً ومن ثم لا يجوز وصفه بالاحتلال - كما وصفته سوسة في أحد التعليقات - ثم إداها تعظيم في نعمة كونه مسلما مع التلطيش في المسيحية وكتابها المقدس، وإلهها!!! يعني الراجل دخل بمنتهى الأدب والحلاوة في ازدراء صريح بالأديان يعاقب عليه القانون.. ودخل في وصلة ردح من نوعية يا بتوع وفاء قسطنطين ويا اللي أحمد ديدات عمل فيكم وسوا... والإنجيل اللي فيه "شتايم بذيئة" وكلام ميصحش .. ومن دا خد عندك!!!
طبعا أنا رديت عليه بس مش رد متدني وسافل من عينة تعليقه "البريء" بل مسحت الأرض بنوعية العقلية والأيديولوجية العقيمة الجامدة التي أنتجت شعبا كاملا كله عبد الله مفتاح... خشوا على المدونة بتاعة سوسة وارجعوا قولوا لي رأيكم إيه!!

هناك ١٧ تعليقًا:

Gid-Do - جدو يقول...

Read the help section in the blog it is a good source for information and step by step too will teach you how to make hyperlink

الأميره أوسه يقول...

بص يا فقرى
وأنت بتكتب بوست
مثلآ عاوز تعمل لينك لخالتك سوسه
تكتب خالتى وستى وتاج راسى سوسه
وتظللها ماشى
حتلاقى فى البار بتاع لون الخط وحجمه والأفشخانات دى
حاجه أسمها هيبرلينك على شكل دايره عبيطه كده تضغط عليها تلاقى مستطيل
ومكتوب
http://
من بعد الكلمه دى تلزق عنوان سوسه
soosamafroosa.blogspot.com/
ثم أنتر كده عملت لينك وبقيت شاطر

بقولك أيه أنت عامل بوست على المناظره دي
أنا عاوزه أقولك أن الأديان تسامح ومحبه
وبطريقتك دى هاتوسع أى خلاف
الأفضل تكون مثال كويس فى حياتك العمليه وده أفضل من الكلام
كلنا مصريين وعايشين فى الحلوه والمره مع بعض وده مش مجرد كلام
أنا عمرى ماحاولت أكفر حد
على رأى الغريب فى أحدى تعليقاته
الدنيا تتسع الجميع

Mongey يقول...

ايه يا عم انا حاسس انك ناقل الموضوع بتاعها وكاتبه هنا . وان كنت مبيهمنيش ان الناس تبقي كلها مسلمين لان ده انا شايف انه مستحيل ... المهم في حتة الفكر بتاعنا اعتقد انه شي طبيعي ما دام الاحساس ده متبادل يبقي شي طبيعي جدا.

غير معرف يقول...

عم الحاج جرجس
اية يا عم الدعاية المفتخرة دى لسوسة ؟؟
ههههههههه ..هو فعلا الموضوع حلو اوى وساخن جدا جدا
واد يا جرجس
اعملى دعاية حلوة زى دى احسن ورحمة خالى حسن اللى مات من الجوع اهيبرك بجد
هههههههههه
فكك من الحوار دة
انزل ببوست فرايحى كدة بعد الفاصل
من نوعية الكوميديا السودا بتاعتك يا فقرى على راى اؤختشى اوساا
سامو عليكو

Mongey يقول...

اه صحيح لمعلوماتك الاخ عبد الله مفتاح وهابي و بيقول ان الي بيغلط في الوهابية يغلط في الاسلام و كان الاسلام هو الوهابية فقط ..

Mongey يقول...

انا لسه بالصدفه في كتاب اسمه كيف احتل الانجليز مصر بيدل علي ضيق وسطحية شديدة كاتبه واحد سعودي علي ما اعتقد
طلع كل العالم ولاد كلب لمجرد انهم طالبوا بانفصال مصر عن الدولة العثمانية و غلط في عرابي و محمد عبده و جمال الدين الافغاني عشان كاوا بيثوروا ضد الحاكم الهو توفيق و طلعهم غلطانين عشان هما وقفوا ضد اولي الامر ....
قمة السخافة و كان واضح ان وهابي من طريقة كلامه عن محمد علي

Shower-Mirror يقول...

عزيزى غبريال

ارجو انك تكون عرفت بعد مازرتنى انا ليه مسمى نفسى مراية الحمام ... و انا احترم هوايتك الجميله فى التخبيط فى الحلل ..و كل واحد وكيفه ولو انى قلت فيك بقين حلوين انما انت مصمم تخبط فيا ...عموما براحتك بس خد بالك ان مش كل الحلل يتخبط فيها عشان فى حلل بتلسع ....

بخصوص الموضوع بعاليع .. واضح ان الناس نسيت التسلسل الطبيعى لهذا المكان ...! المكان ده اصلا معمول عشان كل واحد يقول رأيه ... مع امكانية ان الناس تعلق على كلامه و تقول رأيها او تختلف معاه أو تعدل عليه ..يعنى الموضوع ف الاصل شئ ايجابى ...انما ازاى و دى تيجى ؟...مايصحش ، لازم شعب واطى زى حالاتنا يحول كل شئ الى ردح - على رأيك - و تشويه ..و احنا احسن منكم ..وانتو كفره .. والكلام البايظ ده ... فأنا معاك ان دى حاجه غريبه جدا ولكن ما غريب الا الشعب المصرى .... و بعدين العادى فى الشعب العبيط ده انه لما حد يحب يختلف مع التانى .، يقوم يدور على الحاجه الحساسه و يتكلم فيها ...زى الدين هنا مثلا ..... قال يعنى خلاص احنا عاملين كل حاجه صح ..و كل واحد قاعد يرمى عل الاديان الثانيه كل العلل ....

من الاخر - و اسف على التطويل - ربنا ابتلى الشعب ده بنفسه ،، يعنى اكبر اعداء الشعب المصرى هو الشعب المصرى نفسه ....

ياريت الناس تبطل هبل و تفكر فى حاجه و احده ... ( ربنا مش بتاع حد و حد لأ .. ربنا رب الناس كلها .. )

غير معرف يقول...
أزال أحد مشرفي المدونة هذا التعليق.
ام العيال يقول...

لا فرق بين عربي و لا اعجمي الا بالتقوى و العمل الصالح
ده يلخص الي انا حقوله لانني لا اجد مثل تلك العنصريه الا هنا في حبي مصر كنت في مدارس راهبات في الكويت عمري ما حسيت انو في فرق ابدا المدرسه راهبه اسمها ماري روز ماثره فيا الى هذا اليوم قمة الاخلاق و على فكرة حاولت اخلي انا كمان ايفا مسلمه و اخذتها للجامع و كان يوم اسود المهم لك ايأس حاولت تاني مع الشغاله السيريلانكيه و حفظتها الشهاده فضلت تقولها و هي مش عارفه بتقول ايه و كمان مفيش فرق بين السنه و الشيعه و لا الابيض و لا الاسود ولا الطويل و لا القصير بس في فرق بين الي معاه جنسيه و الفلسطيني الي معاه وثيقه سفر لاجئين و كفايه كده لعيط

3rby يقول...

بس يا جرجس...انا متفق معاك في كل اللي قولته هناك الا في شيء واحد...بص انا مره اتشتمت في مدونة بنت(مش فاكر مدونة مين)بشتايم كده فقلتله انا مش هارد عليك علشان احنا في مدونة بنت.....يعني انت ممكن تكتب اللي انت عاوزه في مدونتك...بس الحتة بتاعة انجس من مش عارف ايه ديه انت غلطت وده اللي قوم عليك الناس...يعني مثلا كان ممكن تقول انجس من بق كلب...حاجة تانية يعني غير المثال بتاعك...لان لو سوسه قرت التعليق ده جوه مدونتها اكيد هاتدايق منك...ولو شالته انت هاتدايق نها...انا لو منك اعتزر عن الكلمة ديه بس....ماتبقاش زي الوهابيين....كمان انا عاوزك تدخل بلوج اسمه طعمه هاتلاقي لنكه عند بنت مصريه..اقري موضوع تبرئة زمة وتعليقاتها علي اللي بينقشوها...هي رافضة فكرة انها تقتنع غير من وهابي تقريبا كده

مراقب مصري يقول...

جدو:
شكرا على المساعدة

أووووسة الغالية:
ميرسي يا قمر على المعلومات القيمة بتاعة الهيبرلنك... أنا متفق معاكي تماما في أن الأديان أساسا تسامح... قضيتي ليست توسيع الخلاف على الإطلاق... قضيتي فقط محاولة إظهار كم نحن ضيقو الأفق فيما يختص بالفكر والدين والأيديولوجية ... هدفي صدقيني إيجابي جدا... إننا - على الأقل الشوية اللي باقية فينا نفسها تشوف تغيير حقيقي - إننا نشخص موضع الداء في شخصيتنا المصرية.. ومن ثم نستطيع بحق أن نتغير... لا أحتاج أن أدافع عن نفسي فأنا لم أكفر أحدا ولم أقل أن المسيحيين هم اللي منفتحين ومش متعصبين ... مش محتاج أدافع أو أعتذر لأني أعتقد أنني كنت موضوعيا إلى حد بعيد.. لاحظي أني لم أرد على الردح الوهابي الذي قاله عبدالله (بالمناسبة... أنا لم أفتح التعليقات هناك لسة وما عرفتش لسة إيه تطزرات الخناقة... ما دخلتش النت من أكتر من يومين)

عزيزي عربي
أتفق معك تماما في وجوب الاعتذار عن الكلمة دي تحديدا... لم تكن لائقة ولا موفقة على الإطلاق... زي ما قلت أنا لسة ما شفتش توابع التعليق هناك... لكن بعد ما هاخلص الرد هنا هاخش واشوف... الكلمة دي تحديدا يبدو إن الجلالة خدتني وانا بكتب... عذرا أنا طبيب ومسجل ماجستير نسا وولادة وفيه حاجات بالنسبة لي ممكن تكون عادية خالص بينما هي عيب خالص للآخرين (وإن كان هذا ليس بمبرر لعدم اللياقة في الحديث في بيت سوسة) آسف للجميع هنا وسأتأسف هناك أيضا (عن كلمة أنجس من مش عارف إيه دي بس مش عن الكومنت كله!)

شهروزة الحبيبة
آه طبعا دي دعاية لخالتي وتاج راسي وستنا سوسة (مع تحياتي لأووووسة الأميرة)... وبيني وبينك البنت تستاهل! التدوينة دي كانت هايلة بجد وأسلوبها في الكتابة رائع أما عن الدعاية ليكي.. أوعدك هاعمل كدة لما ألاقي حاجة قوية جدا وتستاهل أعمل كدة وإلا تبقى مجاملة مش في محلها... خليها تيجي بشكل تلقائي (عشان الزبون ما يفقسشي إنها دعاية مباشرة) أو ممكن أكتب عليها موضوع تسجيلي... هاهاهاهاها

عزيزي شاور ميرور
أتفق معك أن المشكلة الرئيسية في هذا البلد هي شعبه... حتى المدونات يا عم قلبناها ردح وشرشحة... عايز بس أتحفظ - بعد إذنك - على فكرة إن الحاجات الحساسة نتحاشى الحديث فيها وخصوصا الدين... أنا مش معاك أوي في الحتة دي لأنه ينفع في إطار من التحضر والرقي... نتحاور بأدب وبإحساس عالي (زي الرائعة سوسة ما طرحت الموضوع بمنتهى الرقة والجمال والحلاوة)... الأزمة الحقيقية لما وهابي يخش على الخط ويبدأ يردح، والمصيبة تصبح أكبر لما إصلاحي زي حالاتي يشرح اللي هوه قاله حتى ولو بموضوعية... شعبنا للأسف لسة ما اتعلمش الموضوعية ولا ثقافة الاختلاف والجدل البناء... لو موضوع التخبيط في الحلل مضايقط مني كدة خلاص يا عم مش هاخبط في الحلل تاني... نمشي جنب الحيط احسن ونتكلم في الأمور اللي مش حساسة... بس والنبي اختار لي موضوع في البلد دي مش حساس؟ البلد بقت مولعة وكل حاجة فيها حساسة يا عم الحاج وكل الحلل بتلسوع!!! بالمناسبة يا واد عرفت إزاي إن اسمي الحقيقي غبريال؟ هاهاهاهاها

العزيزة أم العيال
كلامك على قد بساطته على قد ما هو حقيقي جدا ويلمس القلب ويقطعه ستين حتة كمان... حسرة عليكي يا مصر!!!

العزيز جدا مونجييي
آراؤك واقعية جدا وأسلوبك في الكتابة رائع... وإن كان لي تحفظ على فكرة - أنا عارف إنك مقصدتش ما يُفهم منه - فكرة إن الكراهية طبيعية مادامت متبادلة... هوا طبيعي آه ومنطقي جدا آه لكن لازم نأكد أنه مش مقبول ولازم ننفر الناس من الكره والاحتقار للآخر ودورنا كتنويريين إننا نبين قد إيه الكره قذر جدا ومكرهة أمام الله أن يرى قلوب الناس وقد امتلأت بالحقد والكراهية بدلا من المحبة والرحمة

3rby يقول...

انت هاتنام يا جرجس ولا ايه...ماقلتلك اسمه امال دنقل...ولا انت كنت بتعمل الشاب الشاعر علي شهروزة يعني علشان بنت ومبتورة الجناح...وراكي شعراء يا شهروزة

مراقب مصري يقول...

يا أخ عربي
أنا مرضيتش أرد عليك
لأنك جاهل وأمي
(ملكش دعوة بأمي يا كافر)
اسمه أمل مش آمال!!!
آمال دي تبقى المزة اللي واقفة على العمود في شارع جامعة الدول
إجري الحقها يا وله

Adel يقول...

جرجس الله يحرقك شكلك مشاغب ياض انت وعاوز تعمل دربكة وزوابع اسمع اقولك كلمتين ويارب تفهمهم ولو اني عارف انك هاتغهمهم بس انا باقول لاي حد يقرا التعليق ده انا مش عارف ايه الحوار والقصة اللي اتعملت على كلمة فوطة الويز ايه العيب اللي فيها احا مع الاعتدار لادم المصري لاني اخدت رسالة الدكتوراه بتاعته ما احنا بنقول اكتر من كده وهو ده التدوين انك تتكلم براحتك واللي مش عاجبه على ميتين ابوه هو احنا ها نتحبس بره وجوه ولا هي منظره وفنجرة وكلنا عاوزين نعمل ولاد ناس ومتربين ونصنا ولا تلت ترباعنا ولاد ستين بلغة ما تلموا الدور بقى بدل ما اقوم اطوق فيكم كلكم احه هي ناقصة جاتكم ستين نيلة وانت يا سي جرجس اسمك جرجس ولا غبريال؟؟؟ حدد ما تتوهناش مش ناقصاك انت كمان.... تقولشي هاجوزك من العيلة ما ان شالله يكون اسمك بعرور حتى... واحنا مالنا دا اسمك وده دينك ودين اهلك احنا مالنا؟؟ اما عالم فاضي وبعدين قصةانك بتتكلم في مدونة بنت برضة عنصرية ومالهاش داعي مش عمنا صلاح ابو جاهين رحمة الله عليه قال البنت زي الولد ما هيش كمالة عدد يعني ما اوسا بتقول بانجو وكودافين وما شابة تبقى بنت قليلة ادب ؟؟؟؟ ابدا بس هنا مساحه للفضفضة واللي مش عاجبه يشيل حواجبه اقعدوا بالعافية بقى واديا جراجيسو ابقى عدي عندي

غير معرف يقول...

انت يا عم عايز تولعها يعنى الراجل قال رأيه وانتا قولت رأيك بلاش تريقئة بقى وشغل ضرب تحت الحزام ده

3rby يقول...

يا عم هي فرقت معاك عالالف يعني...وبعدين اصله شاعر كبير فقلت اعمله جمع

مراقب مصري يقول...

صدقني يا عم مزجنجي إنت راجل جامد أوي
لأ بتكلم جد
أنا متفق معاك في اللي بتقوله
بس لما ناس تسيب كل اللي اتقال في تعليقي (اللي بلغ من الطول أربع صفح إيه فور)
وتمسك في موضوع الألويز دا
وحكاية إني بتكلم في مدونة بنت
يبقى كان لازم اعتذر
واهو كلنا بنتعلم
بعد كدة هبقى أأبح بس في مدونتي
(ومدونتك إنت كمان لو سعادتك معندكش مانع)
أنا عديت عندك من كام يوم على فكرة وعجبتني جدا القصة بتاعة الملك والغلام وموهبة الفراسة
أخبار التينورمين معاك إيه؟

لكي لا ننسى دم أحمد علي مبروك