٢٢‏/٠٨‏/٢٠٠٧

من كان يعبد مباركا ... فإن مبارك حي لا يموت!! وعلى قلبكم بالعند فيكم


من فترة كنت في بيت العيلة والست الوالدة حبت تغيظني...
فقعدت تستفز فيا وتغيظني ... وكأنها بتعايرني!!

مبارك هيفضل على قلبكوا ومش هيموت...
والبابا شنودة هيفضل عايش على قلبكوا وبرضو مش هيموت

يا أخي قلب الأم دا رهيب... هي عارفة تستفزني إزاي ... وفين يوجعك!!

أنا طبعا قلت يا واد طنش خالص واعمل إنه ولا كأنه فارق معاك!!
بس بصراحة كنت هافرقع من جوايا...

يا نهار اسود!! هو ممكن اللي بتقوله أمي دا حقيقي؟؟


هو ممكن فعلا مبارك ما يموتش؟؟

ممكن التوريث اللي يقصدوه إنه توريث من مبارك الحالي إلى حفيد ابنه جمال والست ديجا؟

وكان السؤال الأكثر "واقعية" وأقرب إلى المنطق... هو أصلا مبارك ممكن يموت؟؟

طبعا مش هيحصل... سيبكم من اتهامات التكفير وأن نزع صفات الألوهية على بشر مثل مبارك هو كفر صريح... ما هو الراجل فعلا كفر الناس كلها دا واقع... وبعدين هو فعلا - بشهادة كثيرين - يمتلك سلطات شبه إلهية!!

وبعدين يوم ما الواد كريم شتم ربنا خد تلات سنين سجن ويوم ما شتم مبارك خد سنة سجن!!! يعني - بحكم المحكمة والقضاء العادل المستقل الشامخ - تقدروا تعرفوا مكانة مبارك وكراماته "الإلهية"... وبالتالي هنيئا لمن كانوا يعبدون مباركا فإن مباركا مش هيموت وهيفضل حي على قلبنا!! وأما الكفار - بثالوث مبارك وابنه وحرمه - من أمثالنا الذين لا يؤمنون سوى بالله إلها واحدا فعليهم أن يشربوا ويتحملوا ويتجرعوا الكأس حتى نهايتها... بيد أن كأس الرئيس لا نهاية لها ولا حصر لقطراتها
وسيظل هو

"القابض" على السلطة ولا سواه،
و"المنتقم" من كل خصومه ما عداه،
و"الخافض" لكل من يرفع صوته أو رأسه في هذا البلد،
و"المذل" لكل من يريد أن يحيا في كرامة،
و"المعز" لمن يحتكرون الحديد في زمن "العز"!!
وهو"الآب" لكل شاب فينا كما قال عمرو دياب
وله "الابن"
المبارك الذي سيرث مصر ومن عليها،

... يا من تعبدون مباركا مبارك سيظل فيه قلب ينبض ونفس يتردد حتى لو توقفت جميع خلايا مخه عن العمل!!!

-----

هذه التدوينة أكتبها بمناسبة مرور عام على تأسيس هذه المدونة...
كل سنة وانتم طيبين... وعام مبارك عليكم أجمعين... وبلاش إشاعات يا كفرة

هناك ٩ تعليقات:

Bella يقول...

حمد الله على السلام يابا الحاج جرجس

عود أحمد

ولا بلاش احمد احسن تلاقيهم اعتقلوه هو كمان

عود بالسلامة

يادي المصيبة احسن بالسلامة يعتقلوها

المهم انك رجعت وخلاص

وحمد الله على صحة الراجل الكبير
هو احنا لنا بركة غيره ولا نقدر نتنفس من غير اذنه

بالاذن بقى اروح اشوف ورايا ايه

يساري مصري يقول...

ياالف حمد لله على السلامه ياعم الحاج
انت اييييه كنت بتعمل عمره و توهت في السكه و لا ايه ؟
هههههه

و بعدين يعني انت لما ترجع ترجع عشان تفكرنا
ماتسبنا متعلقين بأمال ان يكون بني بشر زينا و بيموت و يتحلل عادي يعني يلا ربنا يسامحك
اتمنى الدوام واحشني الدخول و قرائة حرام كفايه
على رأس مدونه ليست كباقي المدونات
;)

مراقب مصري يقول...

بلبلة الجميلة

الراجل الكبير ما يموتش أبدا... الشعب هو اللي هيموت ويتحلل ويتحول لبترول والراجل الكبير يبيعه لإسرائيل بالعند في المرحوم الشعب!!

أحمد اعتقلوه لأنه ينتمي للمحظور وبالسلامة تعرضت للاغتصاب على يد سائق توكتوك

ابقي تعالي

مراقب مصري يقول...

يساري مصري

اسكت يا واد يا يساري دا العمرة اليومين دول بقت صعبة أوي...

أصل عمك الحاج جرجس ما بيطلعش إلا عمرة من السياحي

رفيق بورجوازي متعفن بعيد عنك يا شي جيبارا

;-)

غير معرف يقول...

يلعن دين مبارك لدين ربنا

Unknown يقول...

نورت النت بس ها يغلوة المهم نفسى نركب العربيه مع بعض تانى بس بشرط القيادة هاتكون ليك بس بلاش حكايه أتكلم فى التلفون علشان ده عيب وبجد نفسى أشوفك وياريت تكلمنى علشان عندى شويه مشاكل فى المدونه

غير معرف يقول...

انت مش كنت ريحتنا وخلعت ولا انت عامل زى مبارك لازق فى ام المدونه والكرسى
انا عايز اللى يقول كلمه يبقى قدها مش يعمل فيها سبع رجاله وبعد كده يطلع سوسن

أنت عارفنى وأنا عارفك يقول...

أنا قربت أصدق كلامك وأنه فعلا ممكن يورث لحفيده مش لأبنه وأنه هيدنه ورانا حتى مموتنا احنا

غير معرف يقول...

حرام عليكم انتم سيبوا الراجل فى حاله
اعرفوا ازاى تحترموا الكبير
الاكبر سنا ومكانه
شوفوا الاول نفسكم قبل ماتحكموا على الغير
اللى اقدر اقولوا عيب عيب جدا عليكم السخافه اللى بتعملوها والمواضيع السخيفه اللى بتنشورها

لكي لا ننسى دم أحمد علي مبروك