هوا فيه إيه ؟؟

هوا فيه إيه ؟؟

البنزين غلي... طب ودي فيها إيه؟ فيها كتير... دا معناه أن هناك الآلاف من بني شعبي لن يستطيعوا من هنا ورايح أن يولعوا في أنفسهم بالبنزين وهو كما تعلمون سريع الاشتعال ومفعوله أكيد يعني هينجز معاك في السريع ونتايجه مضمونة يعني من البنزينة على القرافة على طول ولا توجد احتمالات معه أن سيادتك ترقد متشوه في عنبر 9 في قسم الحروق بقصر العيني لا تجد من يجيب لك كوباية مية تطفي بيها النار اللي بتكوي جسمك يا حلو... كل دا مش هيحصل في حالة إنك تولع في نفسك بالبنزين... ويبدو أن هذا هو السبب أن الحكومة الرشيدة (هل في هذا دلالة أن رشيد محمد رشيد هو رئيس الوزراء القادم؟) رفعت أسعار البنزين... لأ يا راجل يا طيب مش عشان تمنع الانتحار بين بني شعبي... صحيح هي حكومة قلبها طيب بس ما تنساش أنها ديمقراطية يعني ما ينفعش تمنع المواطن من حرية التعبير عن رأيه بالإشعال في نفسه... ومن ثم فقد غلت البنزين!! لكي يتجه بنو شعبي إلى البديل الأرخص وهو الجاز (ويا حبذا لو كان جاز وسخ) ولها في ذلك حكمة طبعا... فالجاز يا حبيب قلبي مش سريع الاشتعال (ويا حبذا زي ما قلنا لو كان جاز وسخ)... ودا معناه إن النار يا حلو هتمسك فيك لكن مش ها تخلَّص عليك بسرعة ... إنسى الهبوط الحاد في الدورة الدموية خالص!! مش هتفلسع يا حلو بالسهولة دي!! واحد يقول لي إذن الحكومة دي ساديَّة وبتتلذذ بتعذيب بني شعبي بأن تتفرج عليهم وهم بيتشووا لأطول فترة ممكنة قبل أن يفلسعوا ويقابلوا رب كريم!! أقول له إخرس يا له جك قطع لسانك... عيب !! ما هو اللي ما يعرفش يقول عدس (سمعت إشاعة إن بني شعبي كلهم ماشيين في مظاهرات بيهنفوا "عدس"!! بعد ما الحكومة نجحت في أن تخلي بني شعبي كلهم "ما بيعرفش") إقطع لسنك ياله انت وهو ... عمر ما الحكومة كانت ساديَّة.... (وإن كنا إحنا اللي بالقطع مازوخيين) الحكومة دي أمنا (وعيني ع الأم وحنان الأم) والأم دي كلها حنية وحب وما يهونش عليها تشوف ولادها (اللي هما بني شعبي) يفلسعوا كدة بسرعة بالبنزين القاتل.... ففضلت أن توفر لهم الجاز الوسخ (والبنزين 80 اللي لسة ما غليش) عشان بكدة تبقى ضربت عصفورين بحجر واحد (يقال أن الحكومة عمرها ما بتغير الحجر لكن دايما بتغير الولعة): العصفور الأولاني هو أن بني شعبي يبقى لهم فرصة تانية في الحياة (بعد ما هيتعلموا الأدب وجسمهم المشوي ها تبقى باينة فيه علامات الحروق بنسبة 80 % وطبعا ساعتها هيكونوا عرفوا أن الله حق وفي هذا عبرة لكل كلب ناقم وناقد وحاقد على المجتمع)... والعصفور التاني إنها تبقى فرصة أن السيدة الفاضلة حرم الرئيس تفتح قسم جديد لعلاج الحروق الناتجة عن الحرق بجاز وسخ وذلك بعنبر9 برضه جراحات الحروق بقصر العيني برضه وبتمويل ياباني هندي مشترك واهو كله سبوبة والأشيا بعون الله ها تبقى معدن وكفاية قر على اسيادكوا يا ولاد الكلب!! مش كفاية الريس موفر لكوا البنزين 80 بنفس السعر المدعوم والجاز الوسخ على قفا من يشيل!! معلهش يا ريس يا حبيب الكل دي أشكال وسخة ما يملاش عينها غير التراب... وبعدين يقولوا حسن نصر الله هو سيد الأمة!! أما ولاد كلب صحيح يا ريس... إنت برضه الكبير يا معلم وما تعملش عقلك بعقل "البتاع دا" .... بالمناسبة يا ريس زكريا بيه واقف برة وبيقول لك جايب جركنين بنزين 95 من اللي قلبك يحبه... تاخد كبريت ولا معاك ولاعة؟؟